| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၂၂. ဗာဝီသတိမဝဂ္ဂော
22. Bāvīsatimavaggo
(၂၁၆) ၉. အာသေဝနပစ္စယကထာ
(216) 9. Āsevanapaccayakathā
၉၀၃. နတ္ထိ ကာစိ အာသေဝနပစ္စယတာတိ? အာမန္တာ။ နနု ဝုတ္တံ ဘဂဝတာ – ‘‘ပာဏာတိပာတော, ဘိက္ခဝေ, အာသေဝိတော ဘာဝိတော ဗဟုလီကတော နိရယသံဝတ္တနိကော တိရစ္ဆာနယောနိသံဝတ္တနိကော ပေတ္တိဝိသယသံဝတ္တနိကော, ယော သဗ္ဗလဟုသော ပာဏာတိပာတသ္သ ဝိပာကော မနုသ္သဘူတသ္သ အပ္ပာယုကသံဝတ္တနိကော ဟောတီ’’တိ 1။ အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ ကာစိ အာသေဝနပစ္စယတာတိ။
903. Natthi kāci āsevanapaccayatāti? Āmantā. Nanu vuttaṃ bhagavatā – ‘‘pāṇātipāto, bhikkhave, āsevito bhāvito bahulīkato nirayasaṃvattaniko tiracchānayonisaṃvattaniko pettivisayasaṃvattaniko, yo sabbalahuso pāṇātipātassa vipāko manussabhūtassa appāyukasaṃvattaniko hotī’’ti 2. Attheva suttantoti? Āmantā. Tena hi atthi kāci āsevanapaccayatāti.
နတ္ထိ ကာစိ အာသေဝနပစ္စယတာတိ? အာမန္တာ။ နနု ဝုတ္တံ ဘဂဝတာ – ‘‘အဒိန္နာဒာနံ, ဘိက္ခဝေ, အာသေဝိတံ ဘာဝိတံ ဗဟုလီကတံ နိရယသံဝတ္တနိကံ တိရစ္ဆာနယောနိသံဝတ္တနိကံ ပေတ္တိဝိသယသံဝတ္တနိကံ, ယော သဗ္ဗလဟုသော အဒိန္နာဒာနသ္သ ဝိပာကော မနုသ္သဘူတသ္သ ဘောဂဗ္ယသနသံဝတ္တနိကော ဟောတိ။ပေ.။ ယော သဗ္ဗလဟုသော ကာမေသုမိစ္ဆာစာရသ္သ ဝိပာကော မနုသ္သဘူတသ္သ သပတ္တဝေရသံဝတ္တနိကော ဟောတိ။ပေ.။ ယော သဗ္ဗလဟုသော မုသာဝာဒသ္သ ဝိပာကော မနုသ္သဘူတသ္သ အဗ္ဘူတဗ္ဘက္ခာနသံဝတ္တနိကော ဟောတိ။ပေ.။ ယော သဗ္ဗလဟုသော ပိသုဏာယ ဝာစာယ ဝိပာကော မနုသ္သဘူတသ္သ မိတ္တေဟိ ဘေဒနသံဝတ္တနိကော ဟောတိ။ပေ.။ ယော သဗ္ဗလဟုသော ဖရုသာယ ဝာစာယ ဝိပာကော မနုသ္သဘူတသ္သ အမနာပသဒ္ဒသံဝတ္တနိကော ဟောတိ။ပေ.။ ယော သဗ္ဗလဟုသော သမ္ဖပ္ပလာပသ္သ ဝိပာကော မနုသ္သဘူတသ္သ အနာဒေယ္ယဝာစာသံဝတ္တနိကော ဟောတိ, သုရာမေရယပာနံ, ဘိက္ခဝေ, အာသေဝိတံ။ပေ.။ ယော သဗ္ဗလဟုသော သုရာမေရယပာနသ္သ ဝိပာကော မနုသ္သဘူတသ္သ ဥမ္မတ္တကသံဝတ္တနိကော ဟောတီ’’တိ 3! အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ ကာစိ အာသေဝနပစ္စယတာတိ။
Natthi kāci āsevanapaccayatāti? Āmantā. Nanu vuttaṃ bhagavatā – ‘‘adinnādānaṃ, bhikkhave, āsevitaṃ bhāvitaṃ bahulīkataṃ nirayasaṃvattanikaṃ tiracchānayonisaṃvattanikaṃ pettivisayasaṃvattanikaṃ, yo sabbalahuso adinnādānassa vipāko manussabhūtassa bhogabyasanasaṃvattaniko hoti…pe… yo sabbalahuso kāmesumicchācārassa vipāko manussabhūtassa sapattaverasaṃvattaniko hoti…pe… yo sabbalahuso musāvādassa vipāko manussabhūtassa abbhūtabbhakkhānasaṃvattaniko hoti…pe… yo sabbalahuso pisuṇāya vācāya vipāko manussabhūtassa mittehi bhedanasaṃvattaniko hoti…pe… yo sabbalahuso pharusāya vācāya vipāko manussabhūtassa amanāpasaddasaṃvattaniko hoti…pe… yo sabbalahuso samphappalāpassa vipāko manussabhūtassa anādeyyavācāsaṃvattaniko hoti, surāmerayapānaṃ, bhikkhave, āsevitaṃ…pe… yo sabbalahuso surāmerayapānassa vipāko manussabhūtassa ummattakasaṃvattaniko hotī’’ti 4! Attheva suttantoti? Āmantā. Tena hi atthi kāci āsevanapaccayatāti.
၉၀၄. နတ္ထိ ကာစိ အာသေဝနပစ္စယတာတိ? အာမန္တာ။ နနု ဝုတ္တံ ဘဂဝတာ – ‘‘မိစ္ဆာဒိဋ္ဌိ, ဘိက္ခဝေ, အာသေဝိတာ ဘာဝိတာ ဗဟုလီကတာ နိရယသံဝတ္တနိကာ တိရစ္ဆာနယောနိသံဝတ္တနိကာ ပေတ္တိဝိသယသံဝတ္တနိကာ’’တိ။ အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ ကာစိ အာသေဝနပစ္စယတာတိ။
904. Natthi kāci āsevanapaccayatāti? Āmantā. Nanu vuttaṃ bhagavatā – ‘‘micchādiṭṭhi, bhikkhave, āsevitā bhāvitā bahulīkatā nirayasaṃvattanikā tiracchānayonisaṃvattanikā pettivisayasaṃvattanikā’’ti. Attheva suttantoti? Āmantā. Tena hi atthi kāci āsevanapaccayatāti.
နတ္ထိ ကာစိ အာသေဝနပစ္စယတာတိ? အာမန္တာ။ နနု ဝုတ္တံ ဘဂဝတာ – ‘‘မိစ္ဆာသင္ကပ္ပော။ပေ.။ မိစ္ဆာသမာဓိ, ဘိက္ခဝေ, အာသေဝိတော ဘာဝိတော။ပေ.။ ပေတ္တိဝိသယသံဝတ္တနိကော’’တိ! အတ္ထေဝ သုတ္တန္တောတိ ? အာမန္တာ။ တေန ဟိ အတ္ထိ ကာစိ အာသေဝနပစ္စယတာတိ။
Natthi kāci āsevanapaccayatāti? Āmantā. Nanu vuttaṃ bhagavatā – ‘‘micchāsaṅkappo…pe… micchāsamādhi, bhikkhave, āsevito bhāvito…pe… pettivisayasaṃvattaniko’’ti! Attheva suttantoti ? Āmantā. Tena hi atthi kāci āsevanapaccayatāti.
၉၀၅. နတ္ထိ ကာစိ အာသေဝနပစ္စယတာတိ? အာမန္တာ။ နနု ဝုတ္တံ ဘဂဝတာ – ‘‘သမ္မာဒိဋ္ဌိ, ဘိက္ခဝေ, အာသေဝိတာ ဘာဝိတာ ဗဟုလီကတာ အမတောဂဓာ ဟောတိ အမတပရာယနာ အမတပရိယောသာနာ’’တိ! အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ ကာစိ အာသေဝနပစ္စယတာတိ။
905. Natthi kāci āsevanapaccayatāti? Āmantā. Nanu vuttaṃ bhagavatā – ‘‘sammādiṭṭhi, bhikkhave, āsevitā bhāvitā bahulīkatā amatogadhā hoti amataparāyanā amatapariyosānā’’ti! Attheva suttantoti? Āmantā. Tena hi atthi kāci āsevanapaccayatāti.
နတ္ထိ ကာစိ အာသေဝနပစ္စယတာတိ? အာမန္တာ။ နနု ဝုတ္တံ ဘဂဝတာ – ‘‘သမ္မာသင္ကပ္ပော, ဘိက္ခဝေ, အာသေဝိတော ဘာဝိတော ဗဟုလီကတော။ပေ.။ သမ္မာသမာဓိ, ဘိက္ခဝေ, အာသေဝိတော ဘာဝိတော ဗဟုလီကတော အမတောဂဓော ဟောတိ အမတပရာယနော အမတပရိယောသာနော’’တိ အတ္ထေဝ သုတ္တန္တောတိ, အာမန္တာ။ တေန ဟိ အတ္ထိ ကာစိ အာသေဝနပစ္စယတာတိ။
Natthi kāci āsevanapaccayatāti? Āmantā. Nanu vuttaṃ bhagavatā – ‘‘sammāsaṅkappo, bhikkhave, āsevito bhāvito bahulīkato…pe… sammāsamādhi, bhikkhave, āsevito bhāvito bahulīkato amatogadho hoti amataparāyano amatapariyosāno’’ti attheva suttantoti, āmantā. Tena hi atthi kāci āsevanapaccayatāti.
အာသေဝနပစ္စယကထာ နိဋ္ဌိတာ။
Āsevanapaccayakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၉. အာသေဝနပစ္စယကထာဝဏ္ဏနာ • 9. Āsevanapaccayakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၉. အာသေဝနပစ္စယကထာဝဏ္ဏနာ • 9. Āsevanapaccayakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၉. အာသေဝနပစ္စယကထာဝဏ္ဏနာ • 9. Āsevanapaccayakathāvaṇṇanā
