| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༢༢. བཱཝཱིསཏིམཝགྒོ
22. Bāvīsatimavaggo
(༢༡༦) ༩. ཨཱསེཝནཔཙྩཡཀཐཱ
(216) 9. Āsevanapaccayakathā
༩༠༣. ནཏྠི ཀཱཙི ཨཱསེཝནཔཙྩཡཏཱཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘པཱཎཱཏིཔཱཏོ, བྷིཀྑཝེ, ཨཱསེཝིཏོ བྷཱཝིཏོ བཧུལཱིཀཏོ ནིརཡསཾཝཏྟནིཀོ ཏིརཙྪཱནཡོནིསཾཝཏྟནིཀོ པེཏྟིཝིསཡསཾཝཏྟནིཀོ, ཡོ སབྦལཧུསོ པཱཎཱཏིཔཱཏསྶ ཝིཔཱཀོ མནུསྶབྷཱུཏསྶ ཨཔྤཱཡུཀསཾཝཏྟནིཀོ ཧོཏཱི’’ཏི 1། ཨཏྠེཝ སུཏྟནྟོཏི? ཨཱམནྟཱ། ཏེན ཧི ཨཏྠི ཀཱཙི ཨཱསེཝནཔཙྩཡཏཱཏི།
903. Natthi kāci āsevanapaccayatāti? Āmantā. Nanu vuttaṃ bhagavatā – ‘‘pāṇātipāto, bhikkhave, āsevito bhāvito bahulīkato nirayasaṃvattaniko tiracchānayonisaṃvattaniko pettivisayasaṃvattaniko, yo sabbalahuso pāṇātipātassa vipāko manussabhūtassa appāyukasaṃvattaniko hotī’’ti 2. Attheva suttantoti? Āmantā. Tena hi atthi kāci āsevanapaccayatāti.
ནཏྠི ཀཱཙི ཨཱསེཝནཔཙྩཡཏཱཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘ཨདིནྣཱདཱནཾ, བྷིཀྑཝེ, ཨཱསེཝིཏཾ བྷཱཝིཏཾ བཧུལཱིཀཏཾ ནིརཡསཾཝཏྟནིཀཾ ཏིརཙྪཱནཡོནིསཾཝཏྟནིཀཾ པེཏྟིཝིསཡསཾཝཏྟནིཀཾ, ཡོ སབྦལཧུསོ ཨདིནྣཱདཱནསྶ ཝིཔཱཀོ མནུསྶབྷཱུཏསྶ བྷོགབྱསནསཾཝཏྟནིཀོ ཧོཏི…པེ॰… ཡོ སབྦལཧུསོ ཀཱམེསུམིཙྪཱཙཱརསྶ ཝིཔཱཀོ མནུསྶབྷཱུཏསྶ སཔཏྟཝེརསཾཝཏྟནིཀོ ཧོཏི…པེ॰… ཡོ སབྦལཧུསོ མུསཱཝཱདསྶ ཝིཔཱཀོ མནུསྶབྷཱུཏསྶ ཨབྦྷཱུཏབྦྷཀྑཱནསཾཝཏྟནིཀོ ཧོཏི…པེ॰… ཡོ སབྦལཧུསོ པིསུཎཱཡ ཝཱཙཱཡ ཝིཔཱཀོ མནུསྶབྷཱུཏསྶ མིཏྟེཧི བྷེདནསཾཝཏྟནིཀོ ཧོཏི…པེ॰… ཡོ སབྦལཧུསོ ཕརུསཱཡ ཝཱཙཱཡ ཝིཔཱཀོ མནུསྶབྷཱུཏསྶ ཨམནཱཔསདྡསཾཝཏྟནིཀོ ཧོཏི…པེ॰… ཡོ སབྦལཧུསོ སམྥཔྤལཱཔསྶ ཝིཔཱཀོ མནུསྶབྷཱུཏསྶ ཨནཱདེཡྻཝཱཙཱསཾཝཏྟནིཀོ ཧོཏི, སུརཱམེརཡཔཱནཾ, བྷིཀྑཝེ, ཨཱསེཝིཏཾ…པེ॰… ཡོ སབྦལཧུསོ སུརཱམེརཡཔཱནསྶ ཝིཔཱཀོ མནུསྶབྷཱུཏསྶ ཨུམྨཏྟཀསཾཝཏྟནིཀོ ཧོཏཱི’’ཏི 3! ཨཏྠེཝ སུཏྟནྟོཏི? ཨཱམནྟཱ། ཏེན ཧི ཨཏྠི ཀཱཙི ཨཱསེཝནཔཙྩཡཏཱཏི།
Natthi kāci āsevanapaccayatāti? Āmantā. Nanu vuttaṃ bhagavatā – ‘‘adinnādānaṃ, bhikkhave, āsevitaṃ bhāvitaṃ bahulīkataṃ nirayasaṃvattanikaṃ tiracchānayonisaṃvattanikaṃ pettivisayasaṃvattanikaṃ, yo sabbalahuso adinnādānassa vipāko manussabhūtassa bhogabyasanasaṃvattaniko hoti…pe… yo sabbalahuso kāmesumicchācārassa vipāko manussabhūtassa sapattaverasaṃvattaniko hoti…pe… yo sabbalahuso musāvādassa vipāko manussabhūtassa abbhūtabbhakkhānasaṃvattaniko hoti…pe… yo sabbalahuso pisuṇāya vācāya vipāko manussabhūtassa mittehi bhedanasaṃvattaniko hoti…pe… yo sabbalahuso pharusāya vācāya vipāko manussabhūtassa amanāpasaddasaṃvattaniko hoti…pe… yo sabbalahuso samphappalāpassa vipāko manussabhūtassa anādeyyavācāsaṃvattaniko hoti, surāmerayapānaṃ, bhikkhave, āsevitaṃ…pe… yo sabbalahuso surāmerayapānassa vipāko manussabhūtassa ummattakasaṃvattaniko hotī’’ti 4! Attheva suttantoti? Āmantā. Tena hi atthi kāci āsevanapaccayatāti.
༩༠༤. ནཏྠི ཀཱཙི ཨཱསེཝནཔཙྩཡཏཱཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘མིཙྪཱདིཊྛི, བྷིཀྑཝེ, ཨཱསེཝིཏཱ བྷཱཝིཏཱ བཧུལཱིཀཏཱ ནིརཡསཾཝཏྟནིཀཱ ཏིརཙྪཱནཡོནིསཾཝཏྟནིཀཱ པེཏྟིཝིསཡསཾཝཏྟནིཀཱ’’ཏི། ཨཏྠེཝ སུཏྟནྟོཏི? ཨཱམནྟཱ། ཏེན ཧི ཨཏྠི ཀཱཙི ཨཱསེཝནཔཙྩཡཏཱཏི།
904. Natthi kāci āsevanapaccayatāti? Āmantā. Nanu vuttaṃ bhagavatā – ‘‘micchādiṭṭhi, bhikkhave, āsevitā bhāvitā bahulīkatā nirayasaṃvattanikā tiracchānayonisaṃvattanikā pettivisayasaṃvattanikā’’ti. Attheva suttantoti? Āmantā. Tena hi atthi kāci āsevanapaccayatāti.
ནཏྠི ཀཱཙི ཨཱསེཝནཔཙྩཡཏཱཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘མིཙྪཱསངྐཔྤོ…པེ॰… མིཙྪཱསམཱདྷི, བྷིཀྑཝེ, ཨཱསེཝིཏོ བྷཱཝིཏོ…པེ॰… པེཏྟིཝིསཡསཾཝཏྟནིཀོ’’ཏི! ཨཏྠེཝ སུཏྟནྟོཏི ? ཨཱམནྟཱ། ཏེན ཧི ཨཏྠི ཀཱཙི ཨཱསེཝནཔཙྩཡཏཱཏི།
Natthi kāci āsevanapaccayatāti? Āmantā. Nanu vuttaṃ bhagavatā – ‘‘micchāsaṅkappo…pe… micchāsamādhi, bhikkhave, āsevito bhāvito…pe… pettivisayasaṃvattaniko’’ti! Attheva suttantoti ? Āmantā. Tena hi atthi kāci āsevanapaccayatāti.
༩༠༥. ནཏྠི ཀཱཙི ཨཱསེཝནཔཙྩཡཏཱཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘སམྨཱདིཊྛི, བྷིཀྑཝེ, ཨཱསེཝིཏཱ བྷཱཝིཏཱ བཧུལཱིཀཏཱ ཨམཏོགདྷཱ ཧོཏི ཨམཏཔརཱཡནཱ ཨམཏཔརིཡོསཱནཱ’’ཏི! ཨཏྠེཝ སུཏྟནྟོཏི? ཨཱམནྟཱ། ཏེན ཧི ཨཏྠི ཀཱཙི ཨཱསེཝནཔཙྩཡཏཱཏི།
905. Natthi kāci āsevanapaccayatāti? Āmantā. Nanu vuttaṃ bhagavatā – ‘‘sammādiṭṭhi, bhikkhave, āsevitā bhāvitā bahulīkatā amatogadhā hoti amataparāyanā amatapariyosānā’’ti! Attheva suttantoti? Āmantā. Tena hi atthi kāci āsevanapaccayatāti.
ནཏྠི ཀཱཙི ཨཱསེཝནཔཙྩཡཏཱཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘སམྨཱསངྐཔྤོ, བྷིཀྑཝེ, ཨཱསེཝིཏོ བྷཱཝིཏོ བཧུལཱིཀཏོ…པེ॰… སམྨཱསམཱདྷི, བྷིཀྑཝེ, ཨཱསེཝིཏོ བྷཱཝིཏོ བཧུལཱིཀཏོ ཨམཏོགདྷོ ཧོཏི ཨམཏཔརཱཡནོ ཨམཏཔརིཡོསཱནོ’’ཏི ཨཏྠེཝ སུཏྟནྟོཏི, ཨཱམནྟཱ། ཏེན ཧི ཨཏྠི ཀཱཙི ཨཱསེཝནཔཙྩཡཏཱཏི།
Natthi kāci āsevanapaccayatāti? Āmantā. Nanu vuttaṃ bhagavatā – ‘‘sammāsaṅkappo, bhikkhave, āsevito bhāvito bahulīkato…pe… sammāsamādhi, bhikkhave, āsevito bhāvito bahulīkato amatogadho hoti amataparāyano amatapariyosāno’’ti attheva suttantoti, āmantā. Tena hi atthi kāci āsevanapaccayatāti.
ཨཱསེཝནཔཙྩཡཀཐཱ ནིཊྛིཏཱ།
Āsevanapaccayakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༩. ཨཱསེཝནཔཙྩཡཀཐཱཝཎྞནཱ • 9. Āsevanapaccayakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༩. ཨཱསེཝནཔཙྩཡཀཐཱཝཎྞནཱ • 9. Āsevanapaccayakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༩. ཨཱསེཝནཔཙྩཡཀཐཱཝཎྞནཱ • 9. Āsevanapaccayakathāvaṇṇanā
