| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൨൨. ബാവീസതിമവഗ്ഗോ
22. Bāvīsatimavaggo
(൨൧൬) ൯. ആസേവനപച്ചയകഥാ
(216) 9. Āsevanapaccayakathā
൯൦൩. നത്ഥി കാചി ആസേവനപച്ചയതാതി? ആമന്താ. നനു വുത്തം ഭഗവതാ – ‘‘പാണാതിപാതോ, ഭിക്ഖവേ, ആസേവിതോ ഭാവിതോ ബഹുലീകതോ നിരയസംവത്തനികോ തിരച്ഛാനയോനിസംവത്തനികോ പേത്തിവിസയസംവത്തനികോ, യോ സബ്ബലഹുസോ പാണാതിപാതസ്സ വിപാകോ മനുസ്സഭൂതസ്സ അപ്പായുകസംവത്തനികോ ഹോതീ’’തി 1. അത്ഥേവ സുത്തന്തോതി? ആമന്താ. തേന ഹി അത്ഥി കാചി ആസേവനപച്ചയതാതി.
903. Natthi kāci āsevanapaccayatāti? Āmantā. Nanu vuttaṃ bhagavatā – ‘‘pāṇātipāto, bhikkhave, āsevito bhāvito bahulīkato nirayasaṃvattaniko tiracchānayonisaṃvattaniko pettivisayasaṃvattaniko, yo sabbalahuso pāṇātipātassa vipāko manussabhūtassa appāyukasaṃvattaniko hotī’’ti 2. Attheva suttantoti? Āmantā. Tena hi atthi kāci āsevanapaccayatāti.
നത്ഥി കാചി ആസേവനപച്ചയതാതി? ആമന്താ. നനു വുത്തം ഭഗവതാ – ‘‘അദിന്നാദാനം, ഭിക്ഖവേ, ആസേവിതം ഭാവിതം ബഹുലീകതം നിരയസംവത്തനികം തിരച്ഛാനയോനിസംവത്തനികം പേത്തിവിസയസംവത്തനികം, യോ സബ്ബലഹുസോ അദിന്നാദാനസ്സ വിപാകോ മനുസ്സഭൂതസ്സ ഭോഗബ്യസനസംവത്തനികോ ഹോതി…പേ॰… യോ സബ്ബലഹുസോ കാമേസുമിച്ഛാചാരസ്സ വിപാകോ മനുസ്സഭൂതസ്സ സപത്തവേരസംവത്തനികോ ഹോതി…പേ॰… യോ സബ്ബലഹുസോ മുസാവാദസ്സ വിപാകോ മനുസ്സഭൂതസ്സ അബ്ഭൂതബ്ഭക്ഖാനസംവത്തനികോ ഹോതി…പേ॰… യോ സബ്ബലഹുസോ പിസുണായ വാചായ വിപാകോ മനുസ്സഭൂതസ്സ മിത്തേഹി ഭേദനസംവത്തനികോ ഹോതി…പേ॰… യോ സബ്ബലഹുസോ ഫരുസായ വാചായ വിപാകോ മനുസ്സഭൂതസ്സ അമനാപസദ്ദസംവത്തനികോ ഹോതി…പേ॰… യോ സബ്ബലഹുസോ സമ്ഫപ്പലാപസ്സ വിപാകോ മനുസ്സഭൂതസ്സ അനാദേയ്യവാചാസംവത്തനികോ ഹോതി, സുരാമേരയപാനം, ഭിക്ഖവേ, ആസേവിതം…പേ॰… യോ സബ്ബലഹുസോ സുരാമേരയപാനസ്സ വിപാകോ മനുസ്സഭൂതസ്സ ഉമ്മത്തകസംവത്തനികോ ഹോതീ’’തി 3! അത്ഥേവ സുത്തന്തോതി? ആമന്താ. തേന ഹി അത്ഥി കാചി ആസേവനപച്ചയതാതി.
Natthi kāci āsevanapaccayatāti? Āmantā. Nanu vuttaṃ bhagavatā – ‘‘adinnādānaṃ, bhikkhave, āsevitaṃ bhāvitaṃ bahulīkataṃ nirayasaṃvattanikaṃ tiracchānayonisaṃvattanikaṃ pettivisayasaṃvattanikaṃ, yo sabbalahuso adinnādānassa vipāko manussabhūtassa bhogabyasanasaṃvattaniko hoti…pe… yo sabbalahuso kāmesumicchācārassa vipāko manussabhūtassa sapattaverasaṃvattaniko hoti…pe… yo sabbalahuso musāvādassa vipāko manussabhūtassa abbhūtabbhakkhānasaṃvattaniko hoti…pe… yo sabbalahuso pisuṇāya vācāya vipāko manussabhūtassa mittehi bhedanasaṃvattaniko hoti…pe… yo sabbalahuso pharusāya vācāya vipāko manussabhūtassa amanāpasaddasaṃvattaniko hoti…pe… yo sabbalahuso samphappalāpassa vipāko manussabhūtassa anādeyyavācāsaṃvattaniko hoti, surāmerayapānaṃ, bhikkhave, āsevitaṃ…pe… yo sabbalahuso surāmerayapānassa vipāko manussabhūtassa ummattakasaṃvattaniko hotī’’ti 4! Attheva suttantoti? Āmantā. Tena hi atthi kāci āsevanapaccayatāti.
൯൦൪. നത്ഥി കാചി ആസേവനപച്ചയതാതി? ആമന്താ. നനു വുത്തം ഭഗവതാ – ‘‘മിച്ഛാദിട്ഠി, ഭിക്ഖവേ, ആസേവിതാ ഭാവിതാ ബഹുലീകതാ നിരയസംവത്തനികാ തിരച്ഛാനയോനിസംവത്തനികാ പേത്തിവിസയസംവത്തനികാ’’തി. അത്ഥേവ സുത്തന്തോതി? ആമന്താ. തേന ഹി അത്ഥി കാചി ആസേവനപച്ചയതാതി.
904. Natthi kāci āsevanapaccayatāti? Āmantā. Nanu vuttaṃ bhagavatā – ‘‘micchādiṭṭhi, bhikkhave, āsevitā bhāvitā bahulīkatā nirayasaṃvattanikā tiracchānayonisaṃvattanikā pettivisayasaṃvattanikā’’ti. Attheva suttantoti? Āmantā. Tena hi atthi kāci āsevanapaccayatāti.
നത്ഥി കാചി ആസേവനപച്ചയതാതി? ആമന്താ. നനു വുത്തം ഭഗവതാ – ‘‘മിച്ഛാസങ്കപ്പോ…പേ॰… മിച്ഛാസമാധി, ഭിക്ഖവേ, ആസേവിതോ ഭാവിതോ…പേ॰… പേത്തിവിസയസംവത്തനികോ’’തി! അത്ഥേവ സുത്തന്തോതി ? ആമന്താ. തേന ഹി അത്ഥി കാചി ആസേവനപച്ചയതാതി.
Natthi kāci āsevanapaccayatāti? Āmantā. Nanu vuttaṃ bhagavatā – ‘‘micchāsaṅkappo…pe… micchāsamādhi, bhikkhave, āsevito bhāvito…pe… pettivisayasaṃvattaniko’’ti! Attheva suttantoti ? Āmantā. Tena hi atthi kāci āsevanapaccayatāti.
൯൦൫. നത്ഥി കാചി ആസേവനപച്ചയതാതി? ആമന്താ. നനു വുത്തം ഭഗവതാ – ‘‘സമ്മാദിട്ഠി, ഭിക്ഖവേ, ആസേവിതാ ഭാവിതാ ബഹുലീകതാ അമതോഗധാ ഹോതി അമതപരായനാ അമതപരിയോസാനാ’’തി! അത്ഥേവ സുത്തന്തോതി? ആമന്താ. തേന ഹി അത്ഥി കാചി ആസേവനപച്ചയതാതി.
905. Natthi kāci āsevanapaccayatāti? Āmantā. Nanu vuttaṃ bhagavatā – ‘‘sammādiṭṭhi, bhikkhave, āsevitā bhāvitā bahulīkatā amatogadhā hoti amataparāyanā amatapariyosānā’’ti! Attheva suttantoti? Āmantā. Tena hi atthi kāci āsevanapaccayatāti.
നത്ഥി കാചി ആസേവനപച്ചയതാതി? ആമന്താ. നനു വുത്തം ഭഗവതാ – ‘‘സമ്മാസങ്കപ്പോ, ഭിക്ഖവേ, ആസേവിതോ ഭാവിതോ ബഹുലീകതോ…പേ॰… സമ്മാസമാധി, ഭിക്ഖവേ, ആസേവിതോ ഭാവിതോ ബഹുലീകതോ അമതോഗധോ ഹോതി അമതപരായനോ അമതപരിയോസാനോ’’തി അത്ഥേവ സുത്തന്തോതി, ആമന്താ. തേന ഹി അത്ഥി കാചി ആസേവനപച്ചയതാതി.
Natthi kāci āsevanapaccayatāti? Āmantā. Nanu vuttaṃ bhagavatā – ‘‘sammāsaṅkappo, bhikkhave, āsevito bhāvito bahulīkato…pe… sammāsamādhi, bhikkhave, āsevito bhāvito bahulīkato amatogadho hoti amataparāyano amatapariyosāno’’ti attheva suttantoti, āmantā. Tena hi atthi kāci āsevanapaccayatāti.
ആസേവനപച്ചയകഥാ നിട്ഠിതാ.
Āsevanapaccayakathā niṭṭhitā.
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൯. ആസേവനപച്ചയകഥാവണ്ണനാ • 9. Āsevanapaccayakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൯. ആസേവനപച്ചയകഥാവണ്ണനാ • 9. Āsevanapaccayakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-അനുടീകാ • Pañcapakaraṇa-anuṭīkā / ൯. ആസേവനപച്ചയകഥാവണ്ണനാ • 9. Āsevanapaccayakathāvaṇṇanā
