| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
12. ஆஸேவனபச்சயனித்³தே³ஸவண்ணனா
12. Āsevanapaccayaniddesavaṇṇanā
12. ஆஸேவனபச்சயனித்³தே³ஸே புரிமா புரிமாதி ஸப்³ப³னயேஸு ஸமனந்தராதீதாவ த³ட்ட²ப்³பா³. கஸ்மா பனெத்த² அனந்தரபச்சயே விய ‘‘புரிமா புரிமா குஸலா த⁴ம்மா பச்சி²மானங் பச்சி²மானங் அப்³யாகதானங் த⁴ம்மான’’ந்திஆதி³னா நயேன பி⁴ன்னஜாதிகேஹி ஸத்³தி⁴ங் நித்³தே³ஸோ ந கதோதி? அத்தனோ க³திங் கா³ஹாபேதுங் அஸமத்த²தாய. பி⁴ன்னஜாதிகா ஹி பி⁴ன்னஜாதிகானங் அரூபத⁴ம்மானங் ஆஸேவனகு³ணேன பகு³ணப³லவபா⁴வங் ஸாத⁴யமானா அத்தனோ குஸலாதி³பா⁴வஸங்கா²தங் க³திங் கா³ஹாபேதுங் ந ஸக்கொந்தி. தஸ்மா தேஹி ஸத்³தி⁴ங் நித்³தே³ஸங் அகத்வா யே யேஸங் வாஸனாஸங்கா²தேன ஆஸேவனேன பகு³ணதரப³லவதரபா⁴வவிஸிட்ட²ங் அத்தனோ குஸலாதி³பா⁴வஸங்கா²தங் க³திங் கா³ஹாபேதுங் ஸக்கொந்தி, தேஸங் தேஹி ஸமானஜாதிகேஹேவ ஸத்³தி⁴ங் நித்³தே³ஸோ கதோதி வேதி³தப்³போ³. அத² விபாகாப்³யாகதங் கஸ்மா ந க³ஹிதந்தி? ஆஸேவனாபா⁴வேன. விபாகஞ்ஹி கம்மவஸேன விபாகபா⁴வப்பத்தங் கம்மபரிணாமிதங் ஹுத்வா வத்ததி நிருஸ்ஸாஹங் து³ப்³ப³லந்தி தங் ஆஸேவனகு³ணேன அத்தனோ ஸபா⁴வங் கா³ஹாபெத்வா பரிபா⁴வெத்வா நேவ அஞ்ஞங் விபாகங் உப்பாதே³துங் ஸக்கோதி, ந புரிமவிபாகானுபா⁴வங் க³ஹெத்வா உப்பஜ்ஜிதுந்தி. கம்மவேக³க்கி²த்தங் பன பதிதங் விய ஹுத்வா உப்பஜ்ஜதீதி ஸப்³ப³தா²பி விபாகே ஆஸேவனங் நத்தீ²தி ஆஸேவனாபா⁴வேன விபாகங் ந க³ஹிதங். குஸலாகுஸலகிரியானந்தரங் உப்பஜ்ஜமானம்பி சேதங் கம்மபடிப³த்³த⁴வுத்திதாய ஆஸேவனகு³ணங் ந க³ண்ஹாதீதி குஸலாத³யோபிஸ்ஸ ஆஸேவனபச்சயா ந ஹொந்தி. அபிச நானாஜாதிகத்தாபேதே ந ஹொந்தியேவ. பூ⁴மிதோ பன ஆரம்மணதோ வா நானாஜாதிகத்தங் நாம நத்தி². தஸ்மா காமாவசரகுஸலகிரியாமஹக்³க³தகுஸலகிரியானம்பி, ஸங்கா²ராரம்மணஞ்ச அனுலோமகுஸலங் நிப்³பா³னாரம்மணஸ்ஸ கொ³த்ரபு⁴குஸலஸ்ஸ ஆஸேவனபச்சயோ ஹோதியேவாதி அயங் தாவெத்த² பாளிவண்ணனா. அயங் பன ஆஸேவனபச்சயோ ஜாதிதோ தாவ குஸலோ அகுஸலோ கிரியாப்³யாகதோதி திதா⁴ டி²தோ. தத்த² குஸலோ பூ⁴மிதோ காமாவசரோ ரூபாவசரோ அரூபாவசரோதி திவிதோ⁴ ஹோதி, அகுஸலோ காமாவசரோவ கிரியாப்³யாகதோ காமாவசரோ ரூபாவசரோ அரூபாவசரோதி திவிதோ⁴வ, லோகுத்தரோ ஆஸேவனபச்சயோ நாம நத்தீ²தி ஏவமெத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.
12. Āsevanapaccayaniddese purimā purimāti sabbanayesu samanantarātītāva daṭṭhabbā. Kasmā panettha anantarapaccaye viya ‘‘purimā purimā kusalā dhammā pacchimānaṃ pacchimānaṃ abyākatānaṃ dhammāna’’ntiādinā nayena bhinnajātikehi saddhiṃ niddeso na katoti? Attano gatiṃ gāhāpetuṃ asamatthatāya. Bhinnajātikā hi bhinnajātikānaṃ arūpadhammānaṃ āsevanaguṇena paguṇabalavabhāvaṃ sādhayamānā attano kusalādibhāvasaṅkhātaṃ gatiṃ gāhāpetuṃ na sakkonti. Tasmā tehi saddhiṃ niddesaṃ akatvā ye yesaṃ vāsanāsaṅkhātena āsevanena paguṇatarabalavatarabhāvavisiṭṭhaṃ attano kusalādibhāvasaṅkhātaṃ gatiṃ gāhāpetuṃ sakkonti, tesaṃ tehi samānajātikeheva saddhiṃ niddeso katoti veditabbo. Atha vipākābyākataṃ kasmā na gahitanti? Āsevanābhāvena. Vipākañhi kammavasena vipākabhāvappattaṃ kammapariṇāmitaṃ hutvā vattati nirussāhaṃ dubbalanti taṃ āsevanaguṇena attano sabhāvaṃ gāhāpetvā paribhāvetvā neva aññaṃ vipākaṃ uppādetuṃ sakkoti, na purimavipākānubhāvaṃ gahetvā uppajjitunti. Kammavegakkhittaṃ pana patitaṃ viya hutvā uppajjatīti sabbathāpi vipāke āsevanaṃ natthīti āsevanābhāvena vipākaṃ na gahitaṃ. Kusalākusalakiriyānantaraṃ uppajjamānampi cetaṃ kammapaṭibaddhavuttitāya āsevanaguṇaṃ na gaṇhātīti kusalādayopissa āsevanapaccayā na honti. Apica nānājātikattāpete na hontiyeva. Bhūmito pana ārammaṇato vā nānājātikattaṃ nāma natthi. Tasmā kāmāvacarakusalakiriyāmahaggatakusalakiriyānampi, saṅkhārārammaṇañca anulomakusalaṃ nibbānārammaṇassa gotrabhukusalassa āsevanapaccayo hotiyevāti ayaṃ tāvettha pāḷivaṇṇanā. Ayaṃ pana āsevanapaccayo jātito tāva kusalo akusalo kiriyābyākatoti tidhā ṭhito. Tattha kusalo bhūmito kāmāvacaro rūpāvacaro arūpāvacaroti tividho hoti, akusalo kāmāvacarova kiriyābyākato kāmāvacaro rūpāvacaro arūpāvacaroti tividhova, lokuttaro āsevanapaccayo nāma natthīti evamettha nānappakārabhedato viññātabbo vinicchayo.
ஏவங் பி⁴ன்னே பனெத்த² காமாவசரகுஸலங் அத்தனோ அனந்தரஸ்ஸ காமாவசரகுஸலஸ்ஸேவ. யங் பனெத்த² ஞாணஸம்பயுத்தங், தங் அத்தனா ஸதி³ஸவேத³னஸ்ஸ ரூபாவசரகுஸலஸ்ஸ அரூபாவசரகுஸலஸ்ஸ லோகுத்தரகுஸலஸ்ஸாதி இமேஸங் ராஸீனங் ஆஸேவனபச்சயோ ஹோதி. ரூபாவசரகுஸலங் பன ரூபாவசரகுஸலஸ்ஸேவ. அரூபாவசரகுஸலங் அரூபாவசரகுஸலஸ்ஸேவ. அகுஸலங் பன அகுஸலஸ்ஸேவ ஆஸேவனபச்சயோ ஹோதி. கிரியதோ பன காமாவசரகிரியஸங்கா²தோ தாவ காமாவசரகிரியஸ்ஸேவ. யோ பனெத்த² ஞாணஸம்பயுத்தோ, ஸோ அத்தனா ஸதி³ஸவேத³னஸ்ஸ ரூபாவசரகிரியஸ்ஸ அரூபாவசரகிரியஸ்ஸாதி இமேஸங் ராஸீனங் ஆஸேவனபச்சயோ ஹோதி. ரூபாவசரகிரியஸங்கா²தோ பன ரூபாவசரகிரியஸ்ஸேவ, அரூபாவசரகிரியஸங்கா²தோ அரூபாவசரகிரியஸ்ஸேவ ஆஸேவனபச்சயோ ஹோதி. விபாகோ பன ஏகத⁴ம்மஸ்ஸாபி ஏகத⁴ம்மோபி வா கோசி விபாகஸ்ஸ ஆஸேவனபச்சயோ நத்தீ²தி ஏவமெத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.
Evaṃ bhinne panettha kāmāvacarakusalaṃ attano anantarassa kāmāvacarakusalasseva. Yaṃ panettha ñāṇasampayuttaṃ, taṃ attanā sadisavedanassa rūpāvacarakusalassa arūpāvacarakusalassa lokuttarakusalassāti imesaṃ rāsīnaṃ āsevanapaccayo hoti. Rūpāvacarakusalaṃ pana rūpāvacarakusalasseva. Arūpāvacarakusalaṃ arūpāvacarakusalasseva. Akusalaṃ pana akusalasseva āsevanapaccayo hoti. Kiriyato pana kāmāvacarakiriyasaṅkhāto tāva kāmāvacarakiriyasseva. Yo panettha ñāṇasampayutto, so attanā sadisavedanassa rūpāvacarakiriyassa arūpāvacarakiriyassāti imesaṃ rāsīnaṃ āsevanapaccayo hoti. Rūpāvacarakiriyasaṅkhāto pana rūpāvacarakiriyasseva, arūpāvacarakiriyasaṅkhāto arūpāvacarakiriyasseva āsevanapaccayo hoti. Vipāko pana ekadhammassāpi ekadhammopi vā koci vipākassa āsevanapaccayo natthīti evamettha paccayuppannatopi viññātabbo vinicchayoti.
ஆஸேவனபச்சயனித்³தே³ஸவண்ணனா.
Āsevanapaccayaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
