| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
১২. আসেৰনপচ্চযনিদ্দেসৰণ্ণনা
12. Āsevanapaccayaniddesavaṇṇanā
১২. আসেৰনপচ্চযনিদ্দেসে পুরিমা পুরিমাতি সব্বনযেসু সমনন্তরাতীতাৰ দট্ঠব্বা। কস্মা পনেত্থ অনন্তরপচ্চযে ৰিয ‘‘পুরিমা পুরিমা কুসলা ধম্মা পচ্ছিমানং পচ্ছিমানং অব্যাকতানং ধম্মান’’ন্তিআদিনা নযেন ভিন্নজাতিকেহি সদ্ধিং নিদ্দেসো ন কতোতি? অত্তনো গতিং গাহাপেতুং অসমত্থতায। ভিন্নজাতিকা হি ভিন্নজাতিকানং অরূপধম্মানং আসেৰনগুণেন পগুণবলৰভাৰং সাধযমানা অত্তনো কুসলাদিভাৰসঙ্খাতং গতিং গাহাপেতুং ন সক্কোন্তি। তস্মা তেহি সদ্ধিং নিদ্দেসং অকত্ৰা যে যেসং ৰাসনাসঙ্খাতেন আসেৰনেন পগুণতরবলৰতরভাৰৰিসিট্ঠং অত্তনো কুসলাদিভাৰসঙ্খাতং গতিং গাহাপেতুং সক্কোন্তি, তেসং তেহি সমানজাতিকেহেৰ সদ্ধিং নিদ্দেসো কতোতি ৰেদিতব্বো। অথ ৰিপাকাব্যাকতং কস্মা ন গহিতন্তি? আসেৰনাভাৰেন। ৰিপাকঞ্হি কম্মৰসেন ৰিপাকভাৰপ্পত্তং কম্মপরিণামিতং হুত্ৰা ৰত্ততি নিরুস্সাহং দুব্বলন্তি তং আসেৰনগুণেন অত্তনো সভাৰং গাহাপেত্ৰা পরিভাৰেত্ৰা নেৰ অঞ্ঞং ৰিপাকং উপ্পাদেতুং সক্কোতি, ন পুরিমৰিপাকানুভাৰং গহেত্ৰা উপ্পজ্জিতুন্তি। কম্মৰেগক্খিত্তং পন পতিতং ৰিয হুত্ৰা উপ্পজ্জতীতি সব্বথাপি ৰিপাকে আসেৰনং নত্থীতি আসেৰনাভাৰেন ৰিপাকং ন গহিতং। কুসলাকুসলকিরিযানন্তরং উপ্পজ্জমানম্পি চেতং কম্মপটিবদ্ধৰুত্তিতায আসেৰনগুণং ন গণ্হাতীতি কুসলাদযোপিস্স আসেৰনপচ্চযা ন হোন্তি। অপিচ নানাজাতিকত্তাপেতে ন হোন্তিযেৰ। ভূমিতো পন আরম্মণতো ৰা নানাজাতিকত্তং নাম নত্থি। তস্মা কামাৰচরকুসলকিরিযামহগ্গতকুসলকিরিযানম্পি, সঙ্খারারম্মণঞ্চ অনুলোমকুসলং নিব্বানারম্মণস্স গোত্রভুকুসলস্স আসেৰনপচ্চযো হোতিযেৰাতি অযং তাৰেত্থ পাল়িৰণ্ণনা। অযং পন আসেৰনপচ্চযো জাতিতো তাৰ কুসলো অকুসলো কিরিযাব্যাকতোতি তিধা ঠিতো। তত্থ কুসলো ভূমিতো কামাৰচরো রূপাৰচরো অরূপাৰচরোতি তিৰিধো হোতি, অকুসলো কামাৰচরোৰ কিরিযাব্যাকতো কামাৰচরো রূপাৰচরো অরূপাৰচরোতি তিৰিধোৰ, লোকুত্তরো আসেৰনপচ্চযো নাম নত্থীতি এৰমেত্থ নানপ্পকারভেদতো ৰিঞ্ঞাতব্বো ৰিনিচ্ছযো।
12. Āsevanapaccayaniddese purimā purimāti sabbanayesu samanantarātītāva daṭṭhabbā. Kasmā panettha anantarapaccaye viya ‘‘purimā purimā kusalā dhammā pacchimānaṃ pacchimānaṃ abyākatānaṃ dhammāna’’ntiādinā nayena bhinnajātikehi saddhiṃ niddeso na katoti? Attano gatiṃ gāhāpetuṃ asamatthatāya. Bhinnajātikā hi bhinnajātikānaṃ arūpadhammānaṃ āsevanaguṇena paguṇabalavabhāvaṃ sādhayamānā attano kusalādibhāvasaṅkhātaṃ gatiṃ gāhāpetuṃ na sakkonti. Tasmā tehi saddhiṃ niddesaṃ akatvā ye yesaṃ vāsanāsaṅkhātena āsevanena paguṇatarabalavatarabhāvavisiṭṭhaṃ attano kusalādibhāvasaṅkhātaṃ gatiṃ gāhāpetuṃ sakkonti, tesaṃ tehi samānajātikeheva saddhiṃ niddeso katoti veditabbo. Atha vipākābyākataṃ kasmā na gahitanti? Āsevanābhāvena. Vipākañhi kammavasena vipākabhāvappattaṃ kammapariṇāmitaṃ hutvā vattati nirussāhaṃ dubbalanti taṃ āsevanaguṇena attano sabhāvaṃ gāhāpetvā paribhāvetvā neva aññaṃ vipākaṃ uppādetuṃ sakkoti, na purimavipākānubhāvaṃ gahetvā uppajjitunti. Kammavegakkhittaṃ pana patitaṃ viya hutvā uppajjatīti sabbathāpi vipāke āsevanaṃ natthīti āsevanābhāvena vipākaṃ na gahitaṃ. Kusalākusalakiriyānantaraṃ uppajjamānampi cetaṃ kammapaṭibaddhavuttitāya āsevanaguṇaṃ na gaṇhātīti kusalādayopissa āsevanapaccayā na honti. Apica nānājātikattāpete na hontiyeva. Bhūmito pana ārammaṇato vā nānājātikattaṃ nāma natthi. Tasmā kāmāvacarakusalakiriyāmahaggatakusalakiriyānampi, saṅkhārārammaṇañca anulomakusalaṃ nibbānārammaṇassa gotrabhukusalassa āsevanapaccayo hotiyevāti ayaṃ tāvettha pāḷivaṇṇanā. Ayaṃ pana āsevanapaccayo jātito tāva kusalo akusalo kiriyābyākatoti tidhā ṭhito. Tattha kusalo bhūmito kāmāvacaro rūpāvacaro arūpāvacaroti tividho hoti, akusalo kāmāvacarova kiriyābyākato kāmāvacaro rūpāvacaro arūpāvacaroti tividhova, lokuttaro āsevanapaccayo nāma natthīti evamettha nānappakārabhedato viññātabbo vinicchayo.
এৰং ভিন্নে পনেত্থ কামাৰচরকুসলং অত্তনো অনন্তরস্স কামাৰচরকুসলস্সেৰ। যং পনেত্থ ঞাণসম্পযুত্তং, তং অত্তনা সদিসৰেদনস্স রূপাৰচরকুসলস্স অরূপাৰচরকুসলস্স লোকুত্তরকুসলস্সাতি ইমেসং রাসীনং আসেৰনপচ্চযো হোতি। রূপাৰচরকুসলং পন রূপাৰচরকুসলস্সেৰ। অরূপাৰচরকুসলং অরূপাৰচরকুসলস্সেৰ। অকুসলং পন অকুসলস্সেৰ আসেৰনপচ্চযো হোতি। কিরিযতো পন কামাৰচরকিরিযসঙ্খাতো তাৰ কামাৰচরকিরিযস্সেৰ। যো পনেত্থ ঞাণসম্পযুত্তো, সো অত্তনা সদিসৰেদনস্স রূপাৰচরকিরিযস্স অরূপাৰচরকিরিযস্সাতি ইমেসং রাসীনং আসেৰনপচ্চযো হোতি। রূপাৰচরকিরিযসঙ্খাতো পন রূপাৰচরকিরিযস্সেৰ, অরূপাৰচরকিরিযসঙ্খাতো অরূপাৰচরকিরিযস্সেৰ আসেৰনপচ্চযো হোতি। ৰিপাকো পন একধম্মস্সাপি একধম্মোপি ৰা কোচি ৰিপাকস্স আসেৰনপচ্চযো নত্থীতি এৰমেত্থ পচ্চযুপ্পন্নতোপি ৰিঞ্ঞাতব্বো ৰিনিচ্ছযোতি।
Evaṃ bhinne panettha kāmāvacarakusalaṃ attano anantarassa kāmāvacarakusalasseva. Yaṃ panettha ñāṇasampayuttaṃ, taṃ attanā sadisavedanassa rūpāvacarakusalassa arūpāvacarakusalassa lokuttarakusalassāti imesaṃ rāsīnaṃ āsevanapaccayo hoti. Rūpāvacarakusalaṃ pana rūpāvacarakusalasseva. Arūpāvacarakusalaṃ arūpāvacarakusalasseva. Akusalaṃ pana akusalasseva āsevanapaccayo hoti. Kiriyato pana kāmāvacarakiriyasaṅkhāto tāva kāmāvacarakiriyasseva. Yo panettha ñāṇasampayutto, so attanā sadisavedanassa rūpāvacarakiriyassa arūpāvacarakiriyassāti imesaṃ rāsīnaṃ āsevanapaccayo hoti. Rūpāvacarakiriyasaṅkhāto pana rūpāvacarakiriyasseva, arūpāvacarakiriyasaṅkhāto arūpāvacarakiriyasseva āsevanapaccayo hoti. Vipāko pana ekadhammassāpi ekadhammopi vā koci vipākassa āsevanapaccayo natthīti evamettha paccayuppannatopi viññātabbo vinicchayoti.
আসেৰনপচ্চযনিদ্দেসৰণ্ণনা।
Āsevanapaccayaniddesavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / (২) পচ্চযনিদ্দেসো • (2) Paccayaniddeso
