| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၁၀. အာသီဝိသသုတ္တဝဏ္ဏနာ
10. Āsīvisasuttavaṇṇanā
၁၁၀. ဒသမေ ယသ္သ ဝိသံ ပဇ္ဇလိတတိဏုက္ကာယ အဂ္ဂိ ဝိယ သီဃံ အဘိရုဟိတ္ဝာ အက္ခီနိ ဂဟေတ္ဝာ ခန္ဓံ ဂဟေတ္ဝာ သီသံ ဂဟေတ္ဝာ ဌိတန္တိ ဝတ္တဗ္ဗတံ အာပဇ္ဇတိ မဏိသပ္ပာဒီနံ ဝိသံ ဝိယ, မန္တံ ပန ပရိဝတ္တေတ္ဝာ ကဏ္ဏဝာတံ ဒတ္ဝာ ဒဏ္ဍကေန ပဟဋမတ္တေ ဩတရိတ္ဝာ ဒဋ္ဌဋ္ဌာနေယေဝ တိဋ္ဌတိ, အယံ အာဂတဝိသော န ဃောရဝိသော နာမ။ ယသ္သ ပန ဝိသံ သဏိကံ အဘိရုဟတိ, အာရုဠ္ဟာရုဠ္ဟဋ္ဌာနေ ပန အာသိတ္တဥဒကံ ဝိယ ဟောတိ ဥဒကသပ္ပာဒီနံ ဝိယ, ဒ္ဝာဒသဝသ္သစ္စယေနပိ ကဏ္ဏဝိဒ္ဓခန္ဓပိဋ္ဌိကာဒီသု ပညာယတိ, မန္တပရိဝတ္တနာဒီသု စ ကရိယမာနေသု သီဃံ န ဩတရတိ, အယံ ဃောရဝိသော န အာဂတဝိသော နာမ။ ယသ္သ ပန ဝိသံ သီဃံ အဘိရုဟတိ, န သီဃံ ဩတရတိ အနေဠကသပ္ပာဒီနံ ဝိသံ ဝိယ, အယံ အာဂတဝိသော စ ဃောရဝိသော စ။ အနေဠကသပ္ပော နာမ မဟာအာသီဝိသော။ ယသ္သ ဝိသံ မန္ဒံ ဟောတိ, ဩဟာရိယမာနမ္ပိ သုခေနေဝ ဩတရတိ နီလသပ္ပဓမနိသပ္ပာဒီနံ ဝိသံ ဝိယ, အယံ နေဝ အာဂတဝိသော န ဃောရဝိသော။ နီလသပ္ပော နာမ သာခဝဏ္ဏော ရုက္ခဂ္ဂာဒီသု ဝိစရဏသပ္ပော။
110. Dasame yassa visaṃ pajjalitatiṇukkāya aggi viya sīghaṃ abhiruhitvā akkhīni gahetvā khandhaṃ gahetvā sīsaṃ gahetvā ṭhitanti vattabbataṃ āpajjati maṇisappādīnaṃ visaṃ viya, mantaṃ pana parivattetvā kaṇṇavātaṃ datvā daṇḍakena pahaṭamatte otaritvā daṭṭhaṭṭhāneyeva tiṭṭhati, ayaṃ āgataviso na ghoraviso nāma. Yassa pana visaṃ saṇikaṃ abhiruhati, āruḷhāruḷhaṭṭhāne pana āsittaudakaṃ viya hoti udakasappādīnaṃ viya, dvādasavassaccayenapi kaṇṇaviddhakhandhapiṭṭhikādīsu paññāyati, mantaparivattanādīsu ca kariyamānesu sīghaṃ na otarati, ayaṃ ghoraviso na āgataviso nāma. Yassa pana visaṃ sīghaṃ abhiruhati, na sīghaṃ otarati aneḷakasappādīnaṃ visaṃ viya, ayaṃ āgataviso ca ghoraviso ca. Aneḷakasappo nāma mahāāsīviso. Yassa visaṃ mandaṃ hoti, ohāriyamānampi sukheneva otarati nīlasappadhamanisappādīnaṃ visaṃ viya, ayaṃ neva āgataviso na ghoraviso. Nīlasappo nāma sākhavaṇṇo rukkhaggādīsu vicaraṇasappo.
အာသီဝိသသုတ္တဝဏ္ဏနာ နိဋ္ဌိတာ။
Āsīvisasuttavaṇṇanā niṭṭhitā.
ဝလာဟကဝဂ္ဂဝဏ္ဏနာ နိဋ္ဌိတာ။
Valāhakavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. အာသီဝိသသုတ္တံ • 10. Āsīvisasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၀. အာသီဝိသသုတ္တဝဏ္ဏနာ • 10. Āsīvisasuttavaṇṇanā
