1. аасийвисобамасуд̇д̇ам̣

1. Āsīvisopamasuttaṃ

238. ‘‘сзяяат̇ааби , бхигкавз, жад̇д̇ааро аасийвисаа уг̇г̇ад̇зж̇аа гхорависаа. ат̇а бурисо ааг̇ажчзяяа ж̇ийвид̇угаамо амарид̇угаамо сукагаамо д̣̇угкаббадигууло. д̇амзнам̣ звам̣ вад̣̇зяяум̣ – ‘имз д̇з, амбхо буриса, жад̇д̇ааро аасийвисаа уг̇г̇ад̇зж̇аа гхорависаа гаалзна гаалам̣ вудтаабзд̇аб̣б̣аа, гаалзна гаалам̣ нхаабзд̇аб̣б̣аа, гаалзна гаалам̣ бхож̇зд̇аб̣б̣аа, гаалзна гаалам̣ сам̣взсзд̇аб̣б̣аа ¹. яад̣̇аа жа ко д̇з, амбхо буриса, имзсам̣ жад̇уннам̣ аасийвисаанам̣ уг̇г̇ад̇зж̇аанам̣ гхорависаанам̣ ан̃н̃ад̇аро ваа ан̃н̃ад̇аро ваа губбиссад̇и, д̇ад̇о д̇вам̣, амбхо буриса, маран̣ам̣ ваа ниг̇ажчаси, маран̣амад̇д̇ам̣ ваа д̣̇угкам̣. яам̣ д̇з, амбхо буриса, гаран̣ийяам̣ д̇ам̣ гарохий’’’д̇и.

238. ‘‘Seyyathāpi , bhikkhave, cattāro āsīvisā uggatejā ghoravisā. Atha puriso āgaccheyya jīvitukāmo amaritukāmo sukhakāmo dukkhappaṭikūlo. Tamenaṃ evaṃ vadeyyuṃ – ‘ime te, ambho purisa, cattāro āsīvisā uggatejā ghoravisā kālena kālaṃ vuṭṭhāpetabbā, kālena kālaṃ nhāpetabbā, kālena kālaṃ bhojetabbā, kālena kālaṃ saṃvesetabbā ². Yadā ca kho te, ambho purisa, imesaṃ catunnaṃ āsīvisānaṃ uggatejānaṃ ghoravisānaṃ aññataro vā aññataro vā kuppissati, tato tvaṃ, ambho purisa, maraṇaṃ vā nigacchasi, maraṇamattaṃ vā dukkhaṃ. Yaṃ te, ambho purisa, karaṇīyaṃ taṃ karohī’’’ti.

‘‘ат̇а ко со, бхигкавз, бурисо бхийд̇о жад̇уннам̣ аасийвисаанам̣ уг̇г̇ад̇зж̇аанам̣ гхорависаанам̣ язна ваа д̇зна ваа балааязт̇а. д̇амзнам̣ звам̣ вад̣̇зяяум̣ – ‘имз ко, амбхо буриса, бан̃жа вад̇хагаа бажжад̇т̇игаа бидтид̇о бидтид̇о ануб̣анд̇хаа, яад̇т̇зва нам̣ бассиссаама д̇ад̇т̇зва ж̇ийвид̇аа воробзссаамаад̇и. яам̣ д̇з, амбхо буриса, гаран̣ийяам̣ д̇ам̣ гарохий’’’д̇и.

‘‘Atha kho so, bhikkhave, puriso bhīto catunnaṃ āsīvisānaṃ uggatejānaṃ ghoravisānaṃ yena vā tena vā palāyetha. Tamenaṃ evaṃ vadeyyuṃ – ‘ime kho, ambho purisa, pañca vadhakā paccatthikā piṭṭhito piṭṭhito anubandhā, yattheva naṃ passissāma tattheva jīvitā voropessāmāti. Yaṃ te, ambho purisa, karaṇīyaṃ taṃ karohī’’’ti.

‘‘ат̇а ко со, бхигкавз, бурисо бхийд̇о жад̇уннам̣ аасийвисаанам̣ уг̇г̇ад̇зж̇аанам̣ гхорависаанам̣, бхийд̇о бан̃жаннам̣ вад̇хагаанам̣ бажжад̇т̇игаанам̣ язна ваа д̇зна ваа балааязт̇а. д̇амзнам̣ звам̣ вад̣̇зяяум̣ – ‘аяам̣ д̇з, амбхо буриса, чадто анд̇аражаро вад̇хаго угкид̇д̇аасиго бидтид̇о бидтид̇о ануб̣анд̇хо яад̇т̇зва нам̣ бассиссаами д̇ад̇т̇зва сиро баад̇зссаамийд̇и. яам̣ д̇з, амбхо буриса, гаран̣ийяам̣ д̇ам̣ гарохий’’’д̇и.

‘‘Atha kho so, bhikkhave, puriso bhīto catunnaṃ āsīvisānaṃ uggatejānaṃ ghoravisānaṃ, bhīto pañcannaṃ vadhakānaṃ paccatthikānaṃ yena vā tena vā palāyetha. Tamenaṃ evaṃ vadeyyuṃ – ‘ayaṃ te, ambho purisa, chaṭṭho antaracaro vadhako ukkhittāsiko piṭṭhito piṭṭhito anubandho yattheva naṃ passissāmi tattheva siro pātessāmīti. Yaṃ te, ambho purisa, karaṇīyaṃ taṃ karohī’’’ti.

‘‘ат̇а ко со, бхигкавз, бурисо бхийд̇о жад̇уннам̣ аасийвисаанам̣ уг̇г̇ад̇зж̇аанам̣ гхорависаанам̣, бхийд̇о бан̃жаннам̣ вад̇хагаанам̣ бажжад̇т̇игаанам̣, бхийд̇о чадтасса анд̇аражарасса вад̇хагасса угкид̇д̇аасигасса язна ваа д̇зна ваа балааязт̇а. со бассзяяа сун̃н̃ам̣ г̇аамам̣. яан̃н̃ад̣̇зва гхарам̣ бависзяяа рид̇д̇аган̃н̃зва бависзяяа д̇ужчаган̃н̃зва бависзяяа сун̃н̃аган̃н̃зва бависзяяа. яан̃н̃ад̣̇зва бхааж̇анам̣ баримасзяяа рид̇д̇аган̃н̃зва баримасзяяа д̇ужчаган̃н̃зва баримасзяяа сун̃н̃аган̃н̃зва баримасзяяа. д̇амзнам̣ звам̣ вад̣̇зяяум̣ – ‘ид̣̇аани, амбхо буриса, имам̣ сун̃н̃ам̣ г̇аамам̣ жораа г̇аамагхаад̇агаа бависанд̇и ³. яам̣ д̇з, амбхо буриса, гаран̣ийяам̣ д̇ам̣ гарохий’’’д̇и.

‘‘Atha kho so, bhikkhave, puriso bhīto catunnaṃ āsīvisānaṃ uggatejānaṃ ghoravisānaṃ, bhīto pañcannaṃ vadhakānaṃ paccatthikānaṃ, bhīto chaṭṭhassa antaracarassa vadhakassa ukkhittāsikassa yena vā tena vā palāyetha. So passeyya suññaṃ gāmaṃ. Yaññadeva gharaṃ paviseyya rittakaññeva paviseyya tucchakaññeva paviseyya suññakaññeva paviseyya. Yaññadeva bhājanaṃ parimaseyya rittakaññeva parimaseyya tucchakaññeva parimaseyya suññakaññeva parimaseyya. Tamenaṃ evaṃ vadeyyuṃ – ‘idāni, ambho purisa, imaṃ suññaṃ gāmaṃ corā gāmaghātakā pavisanti ⁴. Yaṃ te, ambho purisa, karaṇīyaṃ taṃ karohī’’’ti.

‘‘ат̇а ко со, бхигкавз, бурисо бхийд̇о жад̇уннам̣ аасийвисаанам̣ уг̇г̇ад̇зж̇аанам̣ гхорависаанам̣, бхийд̇о бан̃жаннам̣ вад̇хагаанам̣ бажжад̇т̇игаанам̣, бхийд̇о чадтасса анд̇аражарасса вад̇хагасса угкид̇д̇аасигасса, бхийд̇о жораанам̣ г̇аамагхаад̇агаанам̣ язна ваа д̇зна ваа балааязт̇а. со бассзяяа маханд̇ам̣ уд̣̇аган̣н̣авам̣ оримам̣ д̇ийрам̣ саасан̇гам̣ саббадибхаяам̣, бааримам̣ д̇ийрам̣ кзмам̣ аббадибхаяам̣. на жасса нааваа санд̇ааран̣ий уд̇д̇арасзд̇у ваа абаараа баарам̣ г̇аманааяа. ат̇а ко, бхигкавз, д̇асса бурисасса звамасса – ‘аяам̣ ко махаауд̣̇аган̣н̣аво оримам̣ д̇ийрам̣ саасан̇гам̣ саббадибхаяам̣, бааримам̣ д̇ийрам̣ кзмам̣ аббадибхаяам̣, над̇т̇и жа ⁵ нааваа санд̇ааран̣ий уд̇д̇арасзд̇у ваа абаараа баарам̣ г̇аманааяа. яам̣нуунаахам̣ д̇ин̣агадтасаакаабалаасам̣ сам̣гад̣дхид̇ваа гуллам̣ б̣анд̇хид̇ваа д̇ам̣ гуллам̣ ниссааяа хад̇т̇зхи жа баад̣̇зхи жа вааяамамаано сод̇т̇инаа баарам̣ г̇ажчзяяа’’’нд̇и.

‘‘Atha kho so, bhikkhave, puriso bhīto catunnaṃ āsīvisānaṃ uggatejānaṃ ghoravisānaṃ, bhīto pañcannaṃ vadhakānaṃ paccatthikānaṃ, bhīto chaṭṭhassa antaracarassa vadhakassa ukkhittāsikassa, bhīto corānaṃ gāmaghātakānaṃ yena vā tena vā palāyetha. So passeyya mahantaṃ udakaṇṇavaṃ orimaṃ tīraṃ sāsaṅkaṃ sappaṭibhayaṃ, pārimaṃ tīraṃ khemaṃ appaṭibhayaṃ. Na cassa nāvā santāraṇī uttarasetu vā apārā pāraṃ gamanāya. Atha kho, bhikkhave, tassa purisassa evamassa – ‘ayaṃ kho mahāudakaṇṇavo orimaṃ tīraṃ sāsaṅkaṃ sappaṭibhayaṃ, pārimaṃ tīraṃ khemaṃ appaṭibhayaṃ, natthi ca ⁶ nāvā santāraṇī uttarasetu vā apārā pāraṃ gamanāya. Yaṃnūnāhaṃ tiṇakaṭṭhasākhāpalāsaṃ saṃkaḍḍhitvā kullaṃ bandhitvā taṃ kullaṃ nissāya hatthehi ca pādehi ca vāyamamāno sotthinā pāraṃ gaccheyya’’’nti.

‘‘ат̇а ко со, бхигкавз, бурисо д̇ин̣агадтасаакаабалаасам̣ сам̣гад̣дхид̇ваа гуллам̣ б̣анд̇хид̇ваа д̇ам̣ гуллам̣ ниссааяа хад̇т̇зхи жа баад̣̇зхи жа вааяамамаано сод̇т̇инаа баарам̣ г̇ажчзяяа, д̇ин̣н̣о бааран̇г̇ад̇о ⁷ т̇алз д̇идтад̇и б̣раахман̣о.

‘‘Atha kho so, bhikkhave, puriso tiṇakaṭṭhasākhāpalāsaṃ saṃkaḍḍhitvā kullaṃ bandhitvā taṃ kullaṃ nissāya hatthehi ca pādehi ca vāyamamāno sotthinā pāraṃ gaccheyya, tiṇṇo pāraṅgato ⁸ thale tiṭṭhati brāhmaṇo.

‘‘убамаа ко мяааяам̣, бхигкавз, гад̇аа ад̇т̇асса вин̃н̃аабанааяа. аяан̃жзд̇т̇а ⁹ ад̇т̇о – жад̇д̇ааро аасийвисаа уг̇г̇ад̇зж̇аа гхорависаад̇и ко, бхигкавз, жад̇уннзд̇ам̣ махаабхууд̇аанам̣ ад̇хиважанам̣ – бат̇авийд̇хаад̇уяаа, аабод̇хаад̇уяаа, д̇зж̇од̇хаад̇уяаа, вааяод̇хаад̇уяаа.

‘‘Upamā kho myāyaṃ, bhikkhave, katā atthassa viññāpanāya. Ayañcettha ¹⁰ attho – cattāro āsīvisā uggatejā ghoravisāti kho, bhikkhave, catunnetaṃ mahābhūtānaṃ adhivacanaṃ – pathavīdhātuyā, āpodhātuyā, tejodhātuyā, vāyodhātuyā.

‘‘бан̃жа вад̇хагаа бажжад̇т̇игаад̇и ко, бхигкавз, бан̃жаннзд̇ам̣ убаад̣̇аанагканд̇хаанам̣ ад̇хиважанам̣, сзяяат̇ид̣̇ам̣ – руубубаад̣̇аанагканд̇хасса, взд̣̇анубаад̣̇аанагканд̇хасса, сан̃н̃убаад̣̇аанагканд̇хасса, сан̇каарубаад̣̇аанагканд̇хасса, вин̃н̃аан̣убаад̣̇аанагканд̇хасса.

‘‘Pañca vadhakā paccatthikāti kho, bhikkhave, pañcannetaṃ upādānakkhandhānaṃ adhivacanaṃ, seyyathidaṃ – rūpupādānakkhandhassa, vedanupādānakkhandhassa, saññupādānakkhandhassa, saṅkhārupādānakkhandhassa, viññāṇupādānakkhandhassa.

‘‘чадто анд̇аражаро вад̇хаго угкид̇д̇аасигод̇и ко, бхигкавз, нанд̣̇ийрааг̇ассзд̇ам̣ ад̇хиважанам̣.

‘‘Chaṭṭho antaracaro vadhako ukkhittāsikoti kho, bhikkhave, nandīrāgassetaṃ adhivacanaṃ.

‘‘сун̃н̃о г̇аамод̇и ко, бхигкавз, чаннзд̇ам̣ аж̇жхад̇д̇игаанам̣ ааяад̇анаанам̣ ад̇хиважанам̣. жагкуд̇о жзби нам̣, бхигкавз, бан̣д̣ид̇о б̣яад̇д̇о мзд̇хаавий убабаригкад̇и рид̇д̇аган̃н̃зва кааяад̇и, д̇ужчаган̃н̃зва кааяад̇и, сун̃н̃аган̃н̃зва кааяад̇и…бз… ж̇ивхаад̇о жзби нам̣, бхигкавз…бз… манад̇о жзби нам̣, бхигкавз, бан̣д̣ид̇о б̣яад̇д̇о мзд̇хаавий убабаригкад̇и рид̇д̇аган̃н̃зва кааяад̇и, д̇ужчаган̃н̃зва кааяад̇и, сун̃н̃аган̃н̃зва кааяад̇и.

‘‘Suñño gāmoti kho, bhikkhave, channetaṃ ajjhattikānaṃ āyatanānaṃ adhivacanaṃ. Cakkhuto cepi naṃ, bhikkhave, paṇḍito byatto medhāvī upaparikkhati rittakaññeva khāyati, tucchakaññeva khāyati, suññakaññeva khāyati…pe… jivhāto cepi naṃ, bhikkhave…pe… manato cepi naṃ, bhikkhave, paṇḍito byatto medhāvī upaparikkhati rittakaññeva khāyati, tucchakaññeva khāyati, suññakaññeva khāyati.

‘‘жораа г̇аамагхаад̇агаад̇и ко, бхигкавз, чаннзд̇ам̣ б̣аахираанам̣ ааяад̇анаанам̣ ад̇хиважанам̣. жагку, бхигкавз, хан̃н̃ад̇и манаабааманаабзсу руубзсу; сод̇ам̣, бхигкавз…бз… гхаанам̣, бхигкавз…бз… ж̇ивхаа, бхигкавз, хан̃н̃ад̇и манаабааманаабзсу расзсу; гааяо, бхигкавз…бз… мано, бхигкавз, хан̃н̃ад̇и манаабааманаабзсу д̇хаммзсу.

‘‘Corā gāmaghātakāti kho, bhikkhave, channetaṃ bāhirānaṃ āyatanānaṃ adhivacanaṃ. Cakkhu, bhikkhave, haññati manāpāmanāpesu rūpesu; sotaṃ, bhikkhave…pe… ghānaṃ, bhikkhave…pe… jivhā, bhikkhave, haññati manāpāmanāpesu rasesu; kāyo, bhikkhave…pe… mano, bhikkhave, haññati manāpāmanāpesu dhammesu.

‘‘махаа уд̣̇аган̣н̣авод̇и ко, бхигкавз, жад̇уннзд̇ам̣ огхаанам̣ ад̇хиважанам̣ – гаамогхасса, бхавогхасса, д̣̇идтогхасса, авиж̇ж̇огхасса.

‘‘Mahā udakaṇṇavoti kho, bhikkhave, catunnetaṃ oghānaṃ adhivacanaṃ – kāmoghassa, bhavoghassa, diṭṭhoghassa, avijjoghassa.

‘‘оримам̣ д̇ийрам̣ саасан̇гам̣ саббадибхаяанд̇и ко, бхигкавз, саггааяассзд̇ам̣ ад̇хиважанам̣.

‘‘Orimaṃ tīraṃ sāsaṅkaṃ sappaṭibhayanti kho, bhikkhave, sakkāyassetaṃ adhivacanaṃ.

‘‘бааримам̣ д̇ийрам̣ кзмам̣ аббадибхаяанд̇и ко, бхигкавз, ниб̣б̣аанассзд̇ам̣ ад̇хиважанам̣.

‘‘Pārimaṃ tīraṃ khemaṃ appaṭibhayanti kho, bhikkhave, nibbānassetaṃ adhivacanaṃ.

‘‘гулланд̇и ко, бхигкавз, арияассзд̇ам̣ адтан̇г̇игасса маг̇г̇асса ад̇хиважанам̣, сзяяат̇ид̣̇ам̣ – саммаад̣̇идти…бз… саммаасамаад̇хи.

‘‘Kullanti kho, bhikkhave, ariyassetaṃ aṭṭhaṅgikassa maggassa adhivacanaṃ, seyyathidaṃ – sammādiṭṭhi…pe… sammāsamādhi.

‘‘д̇асса хад̇т̇зхи жа баад̣̇зхи жа вааяаамод̇и ко, бхигкавз, вийрияаарамбхассзд̇ам̣ ад̇хиважанам̣.

‘‘Tassa hatthehi ca pādehi ca vāyāmoti kho, bhikkhave, vīriyārambhassetaṃ adhivacanaṃ.

‘‘д̇ин̣н̣о бааран̇г̇ад̇о т̇алз д̇идтад̇и б̣раахман̣од̇и ко, бхигкавз, арахад̇о зд̇ам̣ ад̇хиважана’’нд̇и. батамам̣.

‘‘Tiṇṇo pāraṅgato thale tiṭṭhati brāhmaṇoti kho, bhikkhave, arahato etaṃ adhivacana’’nti. Paṭhamaṃ.

Next: 2. рат̇обамасуд̇д̇ам̣ • 2. Rathopamasuttaṃ

Footnotes:

1. бавзсзд̇аб̣б̣аа (сяаа. гам̣. бий. га.)

2. pavesetabbā (syā. kaṃ. pī. ka.)

3. вад̇хиссанд̇и (сий. бий.)

4. vadhissanti (sī. pī.)

5. на жасса (сий. га.), над̇т̇асса (сяаа. гам̣.)

6. na cassa (sī. ka.), natthassa (syā. kaṃ.)

7. баараг̇ад̇о (сий. сяаа. гам̣.)

8. pāragato (sī. syā. kaṃ.)

9. аяам̣ жзвзд̇т̇а (сий.)

10. ayaṃ cevettha (sī.)

Related texts:

адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 1. аасийвисобамасуд̇д̇аван̣н̣анаа • 1. Āsīvisopamasuttavaṇṇanā

дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 1. аасийвисобамасуд̇д̇аван̣н̣анаа • 1. Āsīvisopamasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact