| Library / Tipiṭaka / ติปิฎก • Tipiṭaka / ปฎิสมฺภิทามคฺคปาฬิ • Paṭisambhidāmaggapāḷi |
๑. อสฺสาททิฎฺฐินิเทฺทโส
1. Assādadiṭṭhiniddeso
๑๒๘. อสฺสาททิฎฺฐิยา กตเมหิ ปญฺจติํสาย อากาเรหิ อภินิเวโส โหติ? ยํ รูปํ ปฎิจฺจ อุปฺปชฺชติ สุขํ โสมนสฺสํ, อยํ รูปสฺส อสฺสาโทติ – อภินิเวสปรามาโส ทิฎฺฐิฯ ทิฎฺฐิ น อสฺสาโท, อสฺสาโท น ทิฎฺฐิฯ อญฺญา ทิฎฺฐิ, อโญฺญ อสฺสาโทฯ ยา จ ทิฎฺฐิ โย จ อสฺสาโท – อยํ วุจฺจติ อสฺสาททิฎฺฐิฯ
128. Assādadiṭṭhiyā katamehi pañcatiṃsāya ākārehi abhiniveso hoti? Yaṃ rūpaṃ paṭicca uppajjati sukhaṃ somanassaṃ, ayaṃ rūpassa assādoti – abhinivesaparāmāso diṭṭhi. Diṭṭhi na assādo, assādo na diṭṭhi. Aññā diṭṭhi, añño assādo. Yā ca diṭṭhi yo ca assādo – ayaṃ vuccati assādadiṭṭhi.
อสฺสาททิฎฺฐิ มิจฺฉาทิฎฺฐิ ทิฎฺฐิวิปตฺติฯ ตาย ทิฎฺฐิวิปตฺติยา สมนฺนาคโต ปุคฺคโล ทิฎฺฐิวิปโนฺนฯ ทิฎฺฐิวิปโนฺน ปุคฺคโล น เสวิตโพฺพ น ภชิตโพฺพ น ปยิรุปาสิตโพฺพฯ ตํ กิสฺส เหตุ? ทิฎฺฐิ หิสฺส ปาปิกาฯ โย ทิฎฺฐิยา ราโค 1, โส น ทิฎฺฐิฯ ทิฎฺฐิ น ราโคฯ อญฺญา ทิฎฺฐิ, อโญฺญ ราโคฯ ยา จ ทิฎฺฐิ โย จ ราโค – อยํ วุจฺจติ ทิฎฺฐิราโคฯ ตาย จ ทิฎฺฐิยา เตน จ ราเคน สมนฺนาคโต ปุคฺคโล ทิฎฺฐิราครโตฺตฯ ทิฎฺฐิราครเตฺต ปุคฺคเล ทินฺนํ ทานํ น มหปฺผลํ โหติ น มหานิสํสํฯ ตํ กิสฺส เหตุ? ทิฎฺฐิ หิสฺส ปาปิกา อสฺสาททิฎฺฐิ มิจฺฉาทิฎฺฐิฯ
Assādadiṭṭhi micchādiṭṭhi diṭṭhivipatti. Tāya diṭṭhivipattiyā samannāgato puggalo diṭṭhivipanno. Diṭṭhivipanno puggalo na sevitabbo na bhajitabbo na payirupāsitabbo. Taṃ kissa hetu? Diṭṭhi hissa pāpikā. Yo diṭṭhiyā rāgo 2, so na diṭṭhi. Diṭṭhi na rāgo. Aññā diṭṭhi, añño rāgo. Yā ca diṭṭhi yo ca rāgo – ayaṃ vuccati diṭṭhirāgo. Tāya ca diṭṭhiyā tena ca rāgena samannāgato puggalo diṭṭhirāgaratto. Diṭṭhirāgaratte puggale dinnaṃ dānaṃ na mahapphalaṃ hoti na mahānisaṃsaṃ. Taṃ kissa hetu? Diṭṭhi hissa pāpikā assādadiṭṭhi micchādiṭṭhi.
มิจฺฉาทิฎฺฐิกสฺส ปุริสปุคฺคลสฺส เทฺวว คติโย – นิรโย วา ติรจฺฉานโยนิ วาฯ มิจฺฉาทิฎฺฐิกสฺส ปุริสปุคฺคลสฺส ยเญฺจว กายกมฺมํ ยถาทิฎฺฐิ สมตฺตํ สมาทินฺนํ, ยญฺจ วจีกมฺมํ…เป.… ยญฺจ มโนกมฺมํ ยถาทิฎฺฐิ สมตฺตํ สมาทินฺนํ, ยา จ เจตนา ยา จ ปตฺถนา โย จ ปณิธิ เย จ สงฺขารา, สเพฺพ เต ธมฺมา อนิฎฺฐาย อกนฺตาย อมนาปาย อหิตาย ทุกฺขาย สํวตฺตนฺติฯ ตํ กิสฺส เหตุ? ทิฎฺฐิ หิสฺส ปาปิกาฯ เสยฺยถาปิ นิมฺพพีชํ วา โกสาตกีพีชํ วา ติตฺตกาลาพุพีชํ วา อลฺลาย ปถวิยา นิกฺขิตฺตํ ยํ เจว ปถวิรสํ อุปาทิยติ, ยญฺจ อาโปรสํ อุปาทิยติ, สพฺพํ ตํ ติตฺตกตฺตาย กฎุกตฺตาย อสาตตฺตาย 3 สํวตฺตติฯ ตํ กิสฺส เหตุ? พีชํ หิสฺส ปาปิกํฯ เอวเมวํ มิจฺฉาทิฎฺฐิกสฺส ปุริสปุคฺคลสฺส ยเญฺจว กายกมฺมํ ยถาทิฎฺฐิ สมตฺตํ สมาทินฺนํ, ยญฺจ วจีกมฺมํ…เป.… ยญฺจ มโนกมฺมํ ยถาทิฎฺฐิ สมตฺตํ สมาทินฺนํ, ยา จ เจตนา ยา จ ปตฺถนา โย จ ปณิธิ เย จ สงฺขารา, สเพฺพ เต ธมฺมา อนิฎฺฐาย อกนฺตาย อมนาปาย อหิตาย ทุกฺขาย สํวตฺตนฺติฯ ตํ กิสฺส เหตุ? ทิฎฺฐิ หิสฺส ปาปิกา อสฺสาททิฎฺฐิ มิจฺฉาทิฎฺฐิฯ
Micchādiṭṭhikassa purisapuggalassa dveva gatiyo – nirayo vā tiracchānayoni vā. Micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ, yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa pāpikā. Seyyathāpi nimbabījaṃ vā kosātakībījaṃ vā tittakālābubījaṃ vā allāya pathaviyā nikkhittaṃ yaṃ ceva pathavirasaṃ upādiyati, yañca āporasaṃ upādiyati, sabbaṃ taṃ tittakattāya kaṭukattāya asātattāya 4 saṃvattati. Taṃ kissa hetu? Bījaṃ hissa pāpikaṃ. Evamevaṃ micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ, yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa pāpikā assādadiṭṭhi micchādiṭṭhi.
มิจฺฉาทิฎฺฐิ ทิฎฺฐิคตํ, ทิฎฺฐิคหนํ, ทิฎฺฐิกนฺตารํ, ทิฎฺฐิวิสูกํ, ทิฎฺฐิวิปฺผนฺทิตํ, ทิฎฺฐิสโญฺญชนํ, ทิฎฺฐิสลฺลํ, ทิฎฺฐิสมฺพาโธ, ทิฎฺฐิปลิโพโธ, ทิฎฺฐิพนฺธนํ, ทิฎฺฐิปปาโต, ทิฎฺฐานุสโย, ทิฎฺฐิสนฺตาโป, ทิฎฺฐิปริฬาโห, ทิฎฺฐิคโนฺถ, ทิฎฺฐุปาทานํ, ทิฎฺฐาภินิเวโส, ทิฎฺฐิปรามาโส – อิเมหิ อฎฺฐารสหิ อากาเรหิ ปริยุฎฺฐิตจิตฺตสฺส สโญฺญโคฯ
Micchādiṭṭhi diṭṭhigataṃ, diṭṭhigahanaṃ, diṭṭhikantāraṃ, diṭṭhivisūkaṃ, diṭṭhivipphanditaṃ, diṭṭhisaññojanaṃ, diṭṭhisallaṃ, diṭṭhisambādho, diṭṭhipalibodho, diṭṭhibandhanaṃ, diṭṭhipapāto, diṭṭhānusayo, diṭṭhisantāpo, diṭṭhipariḷāho, diṭṭhigantho, diṭṭhupādānaṃ, diṭṭhābhiniveso, diṭṭhiparāmāso – imehi aṭṭhārasahi ākārehi pariyuṭṭhitacittassa saññogo.
๑๒๙. อตฺถิ สโญฺญชนานิ เจว ทิฎฺฐิโย จ, อตฺถิ สโญฺญชนานิ น จ ทิฎฺฐิโยฯ กตมานิ สโญฺญชนานิ เจว ทิฎฺฐิโย จ? สกฺกายทิฎฺฐิ, สีลพฺพตปรามาโส – อิมานิ สโญฺญชนานิ เจว ทิฎฺฐิโย จฯ กตมานิ สโญฺญชนานิ, น จ ทิฎฺฐิโย? กามราคสโญฺญชนํ, ปฎิฆสโญฺญชนํ, มานสโญฺญชนํ, วิจิกิจฺฉาสโญฺญชนํ, ภวราคสโญฺญชนํ, อิสฺสาสโญฺญชนํ, มจฺฉริยสโญฺญชนํ, อนุนยสโญฺญชนํ, อวิชฺชาสโญฺญชนํ – อิมานิ สโญฺญชนานิ, น จ ทิฎฺฐิโยฯ
129. Atthi saññojanāni ceva diṭṭhiyo ca, atthi saññojanāni na ca diṭṭhiyo. Katamāni saññojanāni ceva diṭṭhiyo ca? Sakkāyadiṭṭhi, sīlabbataparāmāso – imāni saññojanāni ceva diṭṭhiyo ca. Katamāni saññojanāni, na ca diṭṭhiyo? Kāmarāgasaññojanaṃ, paṭighasaññojanaṃ, mānasaññojanaṃ, vicikicchāsaññojanaṃ, bhavarāgasaññojanaṃ, issāsaññojanaṃ, macchariyasaññojanaṃ, anunayasaññojanaṃ, avijjāsaññojanaṃ – imāni saññojanāni, na ca diṭṭhiyo.
ยํ เวทนํ ปฎิจฺจ…เป.… ยํ สญฺญํ ปฎิจฺจ…เป.… ยํ สงฺขาเร 5 ปฎิจฺจ…เป.… ยํ วิญฺญาณํ ปฎิจฺจ… ยํ จกฺขุํ ปฎิจฺจ… ยํ โสตํ ปฎิจฺจ… ยํ ฆานํ ปฎิจฺจ… ยํ ชิวฺหํ ปฎิจฺจ… ยํ กายํ ปฎิจฺจ… ยํ มนํ ปฎิจฺจ… ยํ รูเป ปฎิจฺจ… ยํ สเทฺท ปฎิจฺจ… ยํ คเนฺธ ปฎิจฺจ … ยํ รเส ปฎิจฺจ… ยํ โผฎฺฐเพฺพ ปฎิจฺจ… ยํ ธเมฺม ปฎิจฺจ… ยํ จกฺขุวิญฺญาณํ ปฎิจฺจ… ยํ โสตวิญฺญาณํ ปฎิจฺจ… ยํ ฆานวิญฺญาณํ ปฎิจฺจ… ยํ ชิวฺหาวิญฺญาณํ ปฎิจฺจ… ยํ กายวิญฺญาณํ ปฎิจฺจ… ยํ มโนวิญฺญาณํ ปฎิจฺจ … ยํ จกฺขุสมฺผสฺสํ ปฎิจฺจ… ยํ โสตสมฺผสฺสํ ปฎิจฺจ… ยํ ฆานสมฺผสฺสํ ปฎิจฺจ… ยํ ชิวฺหาสมฺผสฺสํ ปฎิจฺจ… ยํ กายสมฺผสฺสํ ปฎิจฺจ… ยํ มโนสมฺผสฺสํ ปฎิจฺจ… ยํ จกฺขุสมฺผสฺสชํ เวทนํ ปฎิจฺจ… ยํ โสตสมฺผสฺสชํ เวทนํ ปฎิจฺจ… ยํ ฆานสมฺผสฺสชํ เวทนํ ปฎิจฺจ… ยํ ชิวฺหาสมฺผสฺสชํ เวทนํ ปฎิจฺจ… ยํ กายสมฺผสฺสชํ เวทนํ ปฎิจฺจ… ยํ มโนสมฺผสฺสชํ เวทนํ ปฎิจฺจ อุปฺปชฺชติ สุขํ โสมนสฺสํ, อยํ มโนสมฺผสฺสชาย เวทนาย อสฺสาโทติ – อภินิเวสปรามาโส ทิฎฺฐิฯ ทิฎฺฐิ น อสฺสาโท, อสฺสาโท น ทิฎฺฐิฯ อญฺญา ทิฎฺฐิ, อโญฺญ อสฺสาโทฯ ยา จ ทิฎฺฐิ โย จ อสฺสาโท – อยํ วุจฺจติ อสฺสาททิฎฺฐิฯ
Yaṃ vedanaṃ paṭicca…pe… yaṃ saññaṃ paṭicca…pe… yaṃ saṅkhāre 6 paṭicca…pe… yaṃ viññāṇaṃ paṭicca… yaṃ cakkhuṃ paṭicca… yaṃ sotaṃ paṭicca… yaṃ ghānaṃ paṭicca… yaṃ jivhaṃ paṭicca… yaṃ kāyaṃ paṭicca… yaṃ manaṃ paṭicca… yaṃ rūpe paṭicca… yaṃ sadde paṭicca… yaṃ gandhe paṭicca … yaṃ rase paṭicca… yaṃ phoṭṭhabbe paṭicca… yaṃ dhamme paṭicca… yaṃ cakkhuviññāṇaṃ paṭicca… yaṃ sotaviññāṇaṃ paṭicca… yaṃ ghānaviññāṇaṃ paṭicca… yaṃ jivhāviññāṇaṃ paṭicca… yaṃ kāyaviññāṇaṃ paṭicca… yaṃ manoviññāṇaṃ paṭicca … yaṃ cakkhusamphassaṃ paṭicca… yaṃ sotasamphassaṃ paṭicca… yaṃ ghānasamphassaṃ paṭicca… yaṃ jivhāsamphassaṃ paṭicca… yaṃ kāyasamphassaṃ paṭicca… yaṃ manosamphassaṃ paṭicca… yaṃ cakkhusamphassajaṃ vedanaṃ paṭicca… yaṃ sotasamphassajaṃ vedanaṃ paṭicca… yaṃ ghānasamphassajaṃ vedanaṃ paṭicca… yaṃ jivhāsamphassajaṃ vedanaṃ paṭicca… yaṃ kāyasamphassajaṃ vedanaṃ paṭicca… yaṃ manosamphassajaṃ vedanaṃ paṭicca uppajjati sukhaṃ somanassaṃ, ayaṃ manosamphassajāya vedanāya assādoti – abhinivesaparāmāso diṭṭhi. Diṭṭhi na assādo, assādo na diṭṭhi. Aññā diṭṭhi, añño assādo. Yā ca diṭṭhi yo ca assādo – ayaṃ vuccati assādadiṭṭhi.
อสฺสาททิฎฺฐิ มิจฺฉาทิฎฺฐิ ทิฎฺฐิวิปตฺติฯ ตาย ทิฎฺฐิวิปตฺติยา สมนฺนาคโต ปุคฺคโล ทิฎฺฐิวิปโนฺนฯ ทิฎฺฐิวิปโนฺน ปุคฺคโล น เสวิตโพฺพ น ภชิตโพฺพ น ปยิรุปาสิตโพฺพฯ ตํ กิสฺส เหตุ? ทิฎฺฐิ หิสฺส ปาปิกาฯ โย ทิฎฺฐิยา ราโค, โส น ทิฎฺฐิฯ ทิฎฺฐิ น ราโคฯ อญฺญา ทิฎฺฐิ, อโญฺญ ราโคฯ ยา จ ทิฎฺฐิ โย จ ราโค, อยํ วุจฺจติ ทิฎฺฐิราโคฯ ตาย จ ทิฎฺฐิยา เตน จ ราเคน สมนฺนาคโต ปุคฺคโล ทิฎฺฐิราครโตฺตฯ ทิฎฺฐิราครเตฺต ปุคฺคเล ทินฺนํ ทานํ น มหปฺผลํ โหติ น มหานิสํสํฯ ตํ กิสฺส เหตุ? ทิฎฺฐิ หิสฺส ปาปิกา อสฺสาททิฎฺฐิ มิจฺฉาทิฎฺฐิฯ
Assādadiṭṭhi micchādiṭṭhi diṭṭhivipatti. Tāya diṭṭhivipattiyā samannāgato puggalo diṭṭhivipanno. Diṭṭhivipanno puggalo na sevitabbo na bhajitabbo na payirupāsitabbo. Taṃ kissa hetu? Diṭṭhi hissa pāpikā. Yo diṭṭhiyā rāgo, so na diṭṭhi. Diṭṭhi na rāgo. Aññā diṭṭhi, añño rāgo. Yā ca diṭṭhi yo ca rāgo, ayaṃ vuccati diṭṭhirāgo. Tāya ca diṭṭhiyā tena ca rāgena samannāgato puggalo diṭṭhirāgaratto. Diṭṭhirāgaratte puggale dinnaṃ dānaṃ na mahapphalaṃ hoti na mahānisaṃsaṃ. Taṃ kissa hetu? Diṭṭhi hissa pāpikā assādadiṭṭhi micchādiṭṭhi.
มิจฺฉาทิฎฺฐิกสฺส ปุริสปุคฺคลสฺส เทฺวว คติโย – นิรโย วา ติรจฺฉานโยนิ วาฯ มิจฺฉาทิฎฺฐิกสฺส ปุริสปุคฺคลสฺส ยเญฺจว กายกมฺมํ ยถาทิฎฺฐิ สมตฺตํ สมาทินฺนํ, ยญฺจ วจีกมฺมํ…เป.… ยญฺจ มโนกมฺมํ ยถาทิฎฺฐิ สมตฺตํ สมาทินฺนํ, ยา จ เจตนา ยา จ ปตฺถนา โย จ ปณิธิ เย จ สงฺขารา, สเพฺพ เต ธมฺมา อนิฎฺฐาย อกนฺตาย อมนาปาย อหิตาย ทุกฺขาย สํวตฺตนฺติฯ ตํ กิสฺส เหตุ? ทิฎฺฐิ หิสฺส ปาปิกาฯ เสยฺยถาปิ นิมฺพพีชํ วา โกสาตกีพีชํ วา ติตฺตกาลาพุพีชํ วา อลฺลาย ปถวิยา นิกฺขิตฺตํ ยเญฺจว ปถวิรสํ อุปาทิยติ ยญฺจ อาโปรสํ อุปาทิยติ, สพฺพํ ตํ ติตฺตกตฺตาย กฎุกตฺตาย อสาตตฺตาย สํวตฺตติฯ ตํ กิสฺส เหตุ? พีชํ หิสฺส ปาปิกํฯ เอวเมวํ มิจฺฉาทิฎฺฐิกสฺส ปุริสปุคฺคลสฺส ยเญฺจว กายกมฺมํ ยถาทิฎฺฐิ สมตฺตํ สมาทินฺนํ ยญฺจ วจีกมฺมํ…เป.… ยญฺจ มโนกมฺมํ ยถาทิฎฺฐิ สมตฺตํ สมาทินฺนํ, ยา จ เจตนา ยา จ ปตฺถนา โย จ ปณิธิ เย จ สงฺขารา, สเพฺพ เต ธมฺมา อนิฎฺฐาย อกนฺตาย อมนาปาย อหิตาย ทุกฺขาย สํวตฺตนฺติฯ ตํ กิสฺส เหตุ? ทิฎฺฐิ หิสฺส ปาปิกา อสฺสาททิฎฺฐิ มิจฺฉาทิฎฺฐิฯ
Micchādiṭṭhikassa purisapuggalassa dveva gatiyo – nirayo vā tiracchānayoni vā. Micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ, yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa pāpikā. Seyyathāpi nimbabījaṃ vā kosātakībījaṃ vā tittakālābubījaṃ vā allāya pathaviyā nikkhittaṃ yañceva pathavirasaṃ upādiyati yañca āporasaṃ upādiyati, sabbaṃ taṃ tittakattāya kaṭukattāya asātattāya saṃvattati. Taṃ kissa hetu? Bījaṃ hissa pāpikaṃ. Evamevaṃ micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa pāpikā assādadiṭṭhi micchādiṭṭhi.
มิจฺฉาทิฎฺฐิ ทิฎฺฐิคตํ ทิฎฺฐิคหนํ…เป.… ทิฎฺฐาภินิเวโส ทิฎฺฐิปรามาโส – อิเมหิ อฎฺฐารสหิ อากาเรหิ ปริยุฎฺฐิตจิตฺตสฺส สโญฺญโคฯ
Micchādiṭṭhi diṭṭhigataṃ diṭṭhigahanaṃ…pe… diṭṭhābhiniveso diṭṭhiparāmāso – imehi aṭṭhārasahi ākārehi pariyuṭṭhitacittassa saññogo.
อตฺถิ สโญฺญชนานิ เจว ทิฎฺฐิโย จ, อตฺถิ สโญฺญชนานิ น จ ทิฎฺฐิโยฯ กตมานิ สโญฺญชนานิ เจว ทิฎฺฐิโย จ? สกฺกายทิฎฺฐิ, สีลพฺพตปรามาโส – อิมานิ สโญฺญชนานิ เจว ทิฎฺฐิโย จฯ กตมานิ สโญฺญชนานิ, น จ ทิฎฺฐิโย? กามราคสโญฺญชนํ, ปฎิฆสโญฺญชนํ, มานสโญฺญชนํ, วิจิกิจฺฉาสโญฺญชนํ, ภวราคสโญฺญชนํ, อิสฺสาสโญฺญชนํ, มจฺฉริยสโญฺญชนํ, อนุนยสโญฺญชนํ, อวิชฺชาสโญฺญชนํ – อิมานิ สโญฺญชนานิ, น จ ทิฎฺฐิโยฯ อสฺสาททิฎฺฐิยา อิเมหิ ปญฺจติํสาย อากาเรหิ อภินิเวโส โหติฯ
Atthi saññojanāni ceva diṭṭhiyo ca, atthi saññojanāni na ca diṭṭhiyo. Katamāni saññojanāni ceva diṭṭhiyo ca? Sakkāyadiṭṭhi, sīlabbataparāmāso – imāni saññojanāni ceva diṭṭhiyo ca. Katamāni saññojanāni, na ca diṭṭhiyo? Kāmarāgasaññojanaṃ, paṭighasaññojanaṃ, mānasaññojanaṃ, vicikicchāsaññojanaṃ, bhavarāgasaññojanaṃ, issāsaññojanaṃ, macchariyasaññojanaṃ, anunayasaññojanaṃ, avijjāsaññojanaṃ – imāni saññojanāni, na ca diṭṭhiyo. Assādadiṭṭhiyā imehi pañcatiṃsāya ākārehi abhiniveso hoti.
อสฺสาททิฎฺฐินิเทฺทโส ปฐโมฯ
Assādadiṭṭhiniddeso paṭhamo.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ปฎิสมฺภิทามคฺค-อฎฺฐกถา • Paṭisambhidāmagga-aṭṭhakathā / ๑. อสฺสาททิฎฺฐินิเทฺทสวณฺณนา • 1. Assādadiṭṭhiniddesavaṇṇanā
