| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༡. ཨསྶཱདདིཊྛིནིདྡེསོ
1. Assādadiṭṭhiniddeso
༡༢༨. ཨསྶཱདདིཊྛིཡཱ ཀཏམེཧི པཉྩཏིཾསཱཡ ཨཱཀཱརེཧི ཨབྷིནིཝེསོ ཧོཏི? ཡཾ རཱུཔཾ པཊིཙྩ ཨུཔྤཛྫཏི སུཁཾ སོམནསྶཾ, ཨཡཾ རཱུཔསྶ ཨསྶཱདོཏི – ཨབྷིནིཝེསཔརཱམཱསོ དིཊྛི། དིཊྛི ན ཨསྶཱདོ, ཨསྶཱདོ ན དིཊྛི། ཨཉྙཱ དིཊྛི, ཨཉྙོ ཨསྶཱདོ། ཡཱ ཙ དིཊྛི ཡོ ཙ ཨསྶཱདོ – ཨཡཾ ཝུཙྩཏི ཨསྶཱདདིཊྛི།
128. Assādadiṭṭhiyā katamehi pañcatiṃsāya ākārehi abhiniveso hoti? Yaṃ rūpaṃ paṭicca uppajjati sukhaṃ somanassaṃ, ayaṃ rūpassa assādoti – abhinivesaparāmāso diṭṭhi. Diṭṭhi na assādo, assādo na diṭṭhi. Aññā diṭṭhi, añño assādo. Yā ca diṭṭhi yo ca assādo – ayaṃ vuccati assādadiṭṭhi.
ཨསྶཱདདིཊྛི མིཙྪཱདིཊྛི དིཊྛིཝིཔཏྟི། ཏཱཡ དིཊྛིཝིཔཏྟིཡཱ སམནྣཱགཏོ པུགྒལོ དིཊྛིཝིཔནྣོ། དིཊྛིཝིཔནྣོ པུགྒལོ ན སེཝིཏབྦོ ན བྷཛིཏབྦོ ན པཡིརུཔཱསིཏབྦོ། ཏཾ ཀིསྶ ཧེཏུ? དིཊྛི ཧིསྶ པཱཔིཀཱ། ཡོ དིཊྛིཡཱ རཱགོ 1, སོ ན དིཊྛི། དིཊྛི ན རཱགོ། ཨཉྙཱ དིཊྛི, ཨཉྙོ རཱགོ། ཡཱ ཙ དིཊྛི ཡོ ཙ རཱགོ – ཨཡཾ ཝུཙྩཏི དིཊྛིརཱགོ། ཏཱཡ ཙ དིཊྛིཡཱ ཏེན ཙ རཱགེན སམནྣཱགཏོ པུགྒལོ དིཊྛིརཱགརཏྟོ། དིཊྛིརཱགརཏྟེ པུགྒལེ དིནྣཾ དཱནཾ ན མཧཔྥལཾ ཧོཏི ན མཧཱནིསཾསཾ། ཏཾ ཀིསྶ ཧེཏུ? དིཊྛི ཧིསྶ པཱཔིཀཱ ཨསྶཱདདིཊྛི མིཙྪཱདིཊྛི།
Assādadiṭṭhi micchādiṭṭhi diṭṭhivipatti. Tāya diṭṭhivipattiyā samannāgato puggalo diṭṭhivipanno. Diṭṭhivipanno puggalo na sevitabbo na bhajitabbo na payirupāsitabbo. Taṃ kissa hetu? Diṭṭhi hissa pāpikā. Yo diṭṭhiyā rāgo 2, so na diṭṭhi. Diṭṭhi na rāgo. Aññā diṭṭhi, añño rāgo. Yā ca diṭṭhi yo ca rāgo – ayaṃ vuccati diṭṭhirāgo. Tāya ca diṭṭhiyā tena ca rāgena samannāgato puggalo diṭṭhirāgaratto. Diṭṭhirāgaratte puggale dinnaṃ dānaṃ na mahapphalaṃ hoti na mahānisaṃsaṃ. Taṃ kissa hetu? Diṭṭhi hissa pāpikā assādadiṭṭhi micchādiṭṭhi.
མིཙྪཱདིཊྛིཀསྶ པུརིསཔུགྒལསྶ དྭེཝ གཏིཡོ – ནིརཡོ ཝཱ ཏིརཙྪཱནཡོནི ཝཱ། མིཙྪཱདིཊྛིཀསྶ པུརིསཔུགྒལསྶ ཡཉྩེཝ ཀཱཡཀམྨཾ ཡཐཱདིཊྛི སམཏྟཾ སམཱདིནྣཾ, ཡཉྩ ཝཙཱིཀམྨཾ…པེ॰… ཡཉྩ མནོཀམྨཾ ཡཐཱདིཊྛི སམཏྟཾ སམཱདིནྣཾ, ཡཱ ཙ ཙེཏནཱ ཡཱ ཙ པཏྠནཱ ཡོ ཙ པཎིདྷི ཡེ ཙ སངྑཱརཱ, སབྦེ ཏེ དྷམྨཱ ཨནིཊྛཱཡ ཨཀནྟཱཡ ཨམནཱཔཱཡ ཨཧིཏཱཡ དུཀྑཱཡ སཾཝཏྟནྟི། ཏཾ ཀིསྶ ཧེཏུ? དིཊྛི ཧིསྶ པཱཔིཀཱ། སེཡྻཐཱཔི ནིམྦབཱིཛཾ ཝཱ ཀོསཱཏཀཱིབཱིཛཾ ཝཱ ཏིཏྟཀཱལཱབུབཱིཛཾ ཝཱ ཨལླཱཡ པཐཝིཡཱ ནིཀྑིཏྟཾ ཡཾ ཙེཝ པཐཝིརསཾ ཨུཔཱདིཡཏི, ཡཉྩ ཨཱཔོརསཾ ཨུཔཱདིཡཏི, སབྦཾ ཏཾ ཏིཏྟཀཏྟཱཡ ཀཊུཀཏྟཱཡ ཨསཱཏཏྟཱཡ 3 སཾཝཏྟཏི། ཏཾ ཀིསྶ ཧེཏུ? བཱིཛཾ ཧིསྶ པཱཔིཀཾ། ཨེཝམེཝཾ མིཙྪཱདིཊྛིཀསྶ པུརིསཔུགྒལསྶ ཡཉྩེཝ ཀཱཡཀམྨཾ ཡཐཱདིཊྛི སམཏྟཾ སམཱདིནྣཾ, ཡཉྩ ཝཙཱིཀམྨཾ…པེ॰… ཡཉྩ མནོཀམྨཾ ཡཐཱདིཊྛི སམཏྟཾ སམཱདིནྣཾ, ཡཱ ཙ ཙེཏནཱ ཡཱ ཙ པཏྠནཱ ཡོ ཙ པཎིདྷི ཡེ ཙ སངྑཱརཱ, སབྦེ ཏེ དྷམྨཱ ཨནིཊྛཱཡ ཨཀནྟཱཡ ཨམནཱཔཱཡ ཨཧིཏཱཡ དུཀྑཱཡ སཾཝཏྟནྟི། ཏཾ ཀིསྶ ཧེཏུ? དིཊྛི ཧིསྶ པཱཔིཀཱ ཨསྶཱདདིཊྛི མིཙྪཱདིཊྛི།
Micchādiṭṭhikassa purisapuggalassa dveva gatiyo – nirayo vā tiracchānayoni vā. Micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ, yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa pāpikā. Seyyathāpi nimbabījaṃ vā kosātakībījaṃ vā tittakālābubījaṃ vā allāya pathaviyā nikkhittaṃ yaṃ ceva pathavirasaṃ upādiyati, yañca āporasaṃ upādiyati, sabbaṃ taṃ tittakattāya kaṭukattāya asātattāya 4 saṃvattati. Taṃ kissa hetu? Bījaṃ hissa pāpikaṃ. Evamevaṃ micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ, yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa pāpikā assādadiṭṭhi micchādiṭṭhi.
མིཙྪཱདིཊྛི དིཊྛིགཏཾ, དིཊྛིགཧནཾ, དིཊྛིཀནྟཱརཾ, དིཊྛིཝིསཱུཀཾ, དིཊྛིཝིཔྥནྡིཏཾ, དིཊྛིསཉྙོཛནཾ, དིཊྛིསལླཾ, དིཊྛིསམྦཱདྷོ, དིཊྛིཔལིབོདྷོ, དིཊྛིབནྡྷནཾ, དིཊྛིཔཔཱཏོ, དིཊྛཱནུསཡོ, དིཊྛིསནྟཱཔོ, དིཊྛིཔརིལཱ༹ཧོ, དིཊྛིགནྠོ, དིཊྛུཔཱདཱནཾ, དིཊྛཱབྷིནིཝེསོ, དིཊྛིཔརཱམཱསོ – ཨིམེཧི ཨཊྛཱརསཧི ཨཱཀཱརེཧི པརིཡུཊྛིཏཙིཏྟསྶ སཉྙོགོ།
Micchādiṭṭhi diṭṭhigataṃ, diṭṭhigahanaṃ, diṭṭhikantāraṃ, diṭṭhivisūkaṃ, diṭṭhivipphanditaṃ, diṭṭhisaññojanaṃ, diṭṭhisallaṃ, diṭṭhisambādho, diṭṭhipalibodho, diṭṭhibandhanaṃ, diṭṭhipapāto, diṭṭhānusayo, diṭṭhisantāpo, diṭṭhipariḷāho, diṭṭhigantho, diṭṭhupādānaṃ, diṭṭhābhiniveso, diṭṭhiparāmāso – imehi aṭṭhārasahi ākārehi pariyuṭṭhitacittassa saññogo.
༡༢༩. ཨཏྠི སཉྙོཛནཱནི ཙེཝ དིཊྛིཡོ ཙ, ཨཏྠི སཉྙོཛནཱནི ན ཙ དིཊྛིཡོ། ཀཏམཱནི སཉྙོཛནཱནི ཙེཝ དིཊྛིཡོ ཙ? སཀྐཱཡདིཊྛི, སཱིལབྦཏཔརཱམཱསོ – ཨིམཱནི སཉྙོཛནཱནི ཙེཝ དིཊྛིཡོ ཙ། ཀཏམཱནི སཉྙོཛནཱནི, ན ཙ དིཊྛིཡོ? ཀཱམརཱགསཉྙོཛནཾ, པཊིགྷསཉྙོཛནཾ, མཱནསཉྙོཛནཾ, ཝིཙིཀིཙྪཱསཉྙོཛནཾ, བྷཝརཱགསཉྙོཛནཾ, ཨིསྶཱསཉྙོཛནཾ, མཙྪརིཡསཉྙོཛནཾ, ཨནུནཡསཉྙོཛནཾ, ཨཝིཛྫཱསཉྙོཛནཾ – ཨིམཱནི སཉྙོཛནཱནི, ན ཙ དིཊྛིཡོ།
129. Atthi saññojanāni ceva diṭṭhiyo ca, atthi saññojanāni na ca diṭṭhiyo. Katamāni saññojanāni ceva diṭṭhiyo ca? Sakkāyadiṭṭhi, sīlabbataparāmāso – imāni saññojanāni ceva diṭṭhiyo ca. Katamāni saññojanāni, na ca diṭṭhiyo? Kāmarāgasaññojanaṃ, paṭighasaññojanaṃ, mānasaññojanaṃ, vicikicchāsaññojanaṃ, bhavarāgasaññojanaṃ, issāsaññojanaṃ, macchariyasaññojanaṃ, anunayasaññojanaṃ, avijjāsaññojanaṃ – imāni saññojanāni, na ca diṭṭhiyo.
ཡཾ ཝེདནཾ པཊིཙྩ…པེ॰… ཡཾ སཉྙཾ པཊིཙྩ…པེ॰… ཡཾ སངྑཱརེ 5 པཊིཙྩ…པེ॰… ཡཾ ཝིཉྙཱཎཾ པཊིཙྩ… ཡཾ ཙཀྑུཾ པཊིཙྩ… ཡཾ སོཏཾ པཊིཙྩ… ཡཾ གྷཱནཾ པཊིཙྩ… ཡཾ ཛིཝ྄ཧཾ པཊིཙྩ… ཡཾ ཀཱཡཾ པཊིཙྩ… ཡཾ མནཾ པཊིཙྩ… ཡཾ རཱུཔེ པཊིཙྩ… ཡཾ སདྡེ པཊིཙྩ… ཡཾ གནྡྷེ པཊིཙྩ … ཡཾ རསེ པཊིཙྩ… ཡཾ ཕོཊྛབྦེ པཊིཙྩ… ཡཾ དྷམྨེ པཊིཙྩ… ཡཾ ཙཀྑུཝིཉྙཱཎཾ པཊིཙྩ… ཡཾ སོཏཝིཉྙཱཎཾ པཊིཙྩ… ཡཾ གྷཱནཝིཉྙཱཎཾ པཊིཙྩ… ཡཾ ཛིཝ྄ཧཱཝིཉྙཱཎཾ པཊིཙྩ… ཡཾ ཀཱཡཝིཉྙཱཎཾ པཊིཙྩ… ཡཾ མནོཝིཉྙཱཎཾ པཊིཙྩ … ཡཾ ཙཀྑུསམྥསྶཾ པཊིཙྩ… ཡཾ སོཏསམྥསྶཾ པཊིཙྩ… ཡཾ གྷཱནསམྥསྶཾ པཊིཙྩ… ཡཾ ཛིཝ྄ཧཱསམྥསྶཾ པཊིཙྩ… ཡཾ ཀཱཡསམྥསྶཾ པཊིཙྩ… ཡཾ མནོསམྥསྶཾ པཊིཙྩ… ཡཾ ཙཀྑུསམྥསྶཛཾ ཝེདནཾ པཊིཙྩ… ཡཾ སོཏསམྥསྶཛཾ ཝེདནཾ པཊིཙྩ… ཡཾ གྷཱནསམྥསྶཛཾ ཝེདནཾ པཊིཙྩ… ཡཾ ཛིཝ྄ཧཱསམྥསྶཛཾ ཝེདནཾ པཊིཙྩ… ཡཾ ཀཱཡསམྥསྶཛཾ ཝེདནཾ པཊིཙྩ… ཡཾ མནོསམྥསྶཛཾ ཝེདནཾ པཊིཙྩ ཨུཔྤཛྫཏི སུཁཾ སོམནསྶཾ, ཨཡཾ མནོསམྥསྶཛཱཡ ཝེདནཱཡ ཨསྶཱདོཏི – ཨབྷིནིཝེསཔརཱམཱསོ དིཊྛི། དིཊྛི ན ཨསྶཱདོ, ཨསྶཱདོ ན དིཊྛི། ཨཉྙཱ དིཊྛི, ཨཉྙོ ཨསྶཱདོ། ཡཱ ཙ དིཊྛི ཡོ ཙ ཨསྶཱདོ – ཨཡཾ ཝུཙྩཏི ཨསྶཱདདིཊྛི།
Yaṃ vedanaṃ paṭicca…pe… yaṃ saññaṃ paṭicca…pe… yaṃ saṅkhāre 6 paṭicca…pe… yaṃ viññāṇaṃ paṭicca… yaṃ cakkhuṃ paṭicca… yaṃ sotaṃ paṭicca… yaṃ ghānaṃ paṭicca… yaṃ jivhaṃ paṭicca… yaṃ kāyaṃ paṭicca… yaṃ manaṃ paṭicca… yaṃ rūpe paṭicca… yaṃ sadde paṭicca… yaṃ gandhe paṭicca … yaṃ rase paṭicca… yaṃ phoṭṭhabbe paṭicca… yaṃ dhamme paṭicca… yaṃ cakkhuviññāṇaṃ paṭicca… yaṃ sotaviññāṇaṃ paṭicca… yaṃ ghānaviññāṇaṃ paṭicca… yaṃ jivhāviññāṇaṃ paṭicca… yaṃ kāyaviññāṇaṃ paṭicca… yaṃ manoviññāṇaṃ paṭicca … yaṃ cakkhusamphassaṃ paṭicca… yaṃ sotasamphassaṃ paṭicca… yaṃ ghānasamphassaṃ paṭicca… yaṃ jivhāsamphassaṃ paṭicca… yaṃ kāyasamphassaṃ paṭicca… yaṃ manosamphassaṃ paṭicca… yaṃ cakkhusamphassajaṃ vedanaṃ paṭicca… yaṃ sotasamphassajaṃ vedanaṃ paṭicca… yaṃ ghānasamphassajaṃ vedanaṃ paṭicca… yaṃ jivhāsamphassajaṃ vedanaṃ paṭicca… yaṃ kāyasamphassajaṃ vedanaṃ paṭicca… yaṃ manosamphassajaṃ vedanaṃ paṭicca uppajjati sukhaṃ somanassaṃ, ayaṃ manosamphassajāya vedanāya assādoti – abhinivesaparāmāso diṭṭhi. Diṭṭhi na assādo, assādo na diṭṭhi. Aññā diṭṭhi, añño assādo. Yā ca diṭṭhi yo ca assādo – ayaṃ vuccati assādadiṭṭhi.
ཨསྶཱདདིཊྛི མིཙྪཱདིཊྛི དིཊྛིཝིཔཏྟི། ཏཱཡ དིཊྛིཝིཔཏྟིཡཱ སམནྣཱགཏོ པུགྒལོ དིཊྛིཝིཔནྣོ། དིཊྛིཝིཔནྣོ པུགྒལོ ན སེཝིཏབྦོ ན བྷཛིཏབྦོ ན པཡིརུཔཱསིཏབྦོ། ཏཾ ཀིསྶ ཧེཏུ? དིཊྛི ཧིསྶ པཱཔིཀཱ། ཡོ དིཊྛིཡཱ རཱགོ, སོ ན དིཊྛི། དིཊྛི ན རཱགོ། ཨཉྙཱ དིཊྛི, ཨཉྙོ རཱགོ། ཡཱ ཙ དིཊྛི ཡོ ཙ རཱགོ, ཨཡཾ ཝུཙྩཏི དིཊྛིརཱགོ། ཏཱཡ ཙ དིཊྛིཡཱ ཏེན ཙ རཱགེན སམནྣཱགཏོ པུགྒལོ དིཊྛིརཱགརཏྟོ། དིཊྛིརཱགརཏྟེ པུགྒལེ དིནྣཾ དཱནཾ ན མཧཔྥལཾ ཧོཏི ན མཧཱནིསཾསཾ། ཏཾ ཀིསྶ ཧེཏུ? དིཊྛི ཧིསྶ པཱཔིཀཱ ཨསྶཱདདིཊྛི མིཙྪཱདིཊྛི།
Assādadiṭṭhi micchādiṭṭhi diṭṭhivipatti. Tāya diṭṭhivipattiyā samannāgato puggalo diṭṭhivipanno. Diṭṭhivipanno puggalo na sevitabbo na bhajitabbo na payirupāsitabbo. Taṃ kissa hetu? Diṭṭhi hissa pāpikā. Yo diṭṭhiyā rāgo, so na diṭṭhi. Diṭṭhi na rāgo. Aññā diṭṭhi, añño rāgo. Yā ca diṭṭhi yo ca rāgo, ayaṃ vuccati diṭṭhirāgo. Tāya ca diṭṭhiyā tena ca rāgena samannāgato puggalo diṭṭhirāgaratto. Diṭṭhirāgaratte puggale dinnaṃ dānaṃ na mahapphalaṃ hoti na mahānisaṃsaṃ. Taṃ kissa hetu? Diṭṭhi hissa pāpikā assādadiṭṭhi micchādiṭṭhi.
མིཙྪཱདིཊྛིཀསྶ པུརིསཔུགྒལསྶ དྭེཝ གཏིཡོ – ནིརཡོ ཝཱ ཏིརཙྪཱནཡོནི ཝཱ། མིཙྪཱདིཊྛིཀསྶ པུརིསཔུགྒལསྶ ཡཉྩེཝ ཀཱཡཀམྨཾ ཡཐཱདིཊྛི སམཏྟཾ སམཱདིནྣཾ, ཡཉྩ ཝཙཱིཀམྨཾ…པེ॰… ཡཉྩ མནོཀམྨཾ ཡཐཱདིཊྛི སམཏྟཾ སམཱདིནྣཾ, ཡཱ ཙ ཙེཏནཱ ཡཱ ཙ པཏྠནཱ ཡོ ཙ པཎིདྷི ཡེ ཙ སངྑཱརཱ, སབྦེ ཏེ དྷམྨཱ ཨནིཊྛཱཡ ཨཀནྟཱཡ ཨམནཱཔཱཡ ཨཧིཏཱཡ དུཀྑཱཡ སཾཝཏྟནྟི། ཏཾ ཀིསྶ ཧེཏུ? དིཊྛི ཧིསྶ པཱཔིཀཱ། སེཡྻཐཱཔི ནིམྦབཱིཛཾ ཝཱ ཀོསཱཏཀཱིབཱིཛཾ ཝཱ ཏིཏྟཀཱལཱབུབཱིཛཾ ཝཱ ཨལླཱཡ པཐཝིཡཱ ནིཀྑིཏྟཾ ཡཉྩེཝ པཐཝིརསཾ ཨུཔཱདིཡཏི ཡཉྩ ཨཱཔོརསཾ ཨུཔཱདིཡཏི, སབྦཾ ཏཾ ཏིཏྟཀཏྟཱཡ ཀཊུཀཏྟཱཡ ཨསཱཏཏྟཱཡ སཾཝཏྟཏི། ཏཾ ཀིསྶ ཧེཏུ? བཱིཛཾ ཧིསྶ པཱཔིཀཾ། ཨེཝམེཝཾ མིཙྪཱདིཊྛིཀསྶ པུརིསཔུགྒལསྶ ཡཉྩེཝ ཀཱཡཀམྨཾ ཡཐཱདིཊྛི སམཏྟཾ སམཱདིནྣཾ ཡཉྩ ཝཙཱིཀམྨཾ…པེ॰… ཡཉྩ མནོཀམྨཾ ཡཐཱདིཊྛི སམཏྟཾ སམཱདིནྣཾ, ཡཱ ཙ ཙེཏནཱ ཡཱ ཙ པཏྠནཱ ཡོ ཙ པཎིདྷི ཡེ ཙ སངྑཱརཱ, སབྦེ ཏེ དྷམྨཱ ཨནིཊྛཱཡ ཨཀནྟཱཡ ཨམནཱཔཱཡ ཨཧིཏཱཡ དུཀྑཱཡ སཾཝཏྟནྟི། ཏཾ ཀིསྶ ཧེཏུ? དིཊྛི ཧིསྶ པཱཔིཀཱ ཨསྶཱདདིཊྛི མིཙྪཱདིཊྛི།
Micchādiṭṭhikassa purisapuggalassa dveva gatiyo – nirayo vā tiracchānayoni vā. Micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ, yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa pāpikā. Seyyathāpi nimbabījaṃ vā kosātakībījaṃ vā tittakālābubījaṃ vā allāya pathaviyā nikkhittaṃ yañceva pathavirasaṃ upādiyati yañca āporasaṃ upādiyati, sabbaṃ taṃ tittakattāya kaṭukattāya asātattāya saṃvattati. Taṃ kissa hetu? Bījaṃ hissa pāpikaṃ. Evamevaṃ micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa pāpikā assādadiṭṭhi micchādiṭṭhi.
མིཙྪཱདིཊྛི དིཊྛིགཏཾ དིཊྛིགཧནཾ…པེ॰… དིཊྛཱབྷིནིཝེསོ དིཊྛིཔརཱམཱསོ – ཨིམེཧི ཨཊྛཱརསཧི ཨཱཀཱརེཧི པརིཡུཊྛིཏཙིཏྟསྶ སཉྙོགོ།
Micchādiṭṭhi diṭṭhigataṃ diṭṭhigahanaṃ…pe… diṭṭhābhiniveso diṭṭhiparāmāso – imehi aṭṭhārasahi ākārehi pariyuṭṭhitacittassa saññogo.
ཨཏྠི སཉྙོཛནཱནི ཙེཝ དིཊྛིཡོ ཙ, ཨཏྠི སཉྙོཛནཱནི ན ཙ དིཊྛིཡོ། ཀཏམཱནི སཉྙོཛནཱནི ཙེཝ དིཊྛིཡོ ཙ? སཀྐཱཡདིཊྛི, སཱིལབྦཏཔརཱམཱསོ – ཨིམཱནི སཉྙོཛནཱནི ཙེཝ དིཊྛིཡོ ཙ། ཀཏམཱནི སཉྙོཛནཱནི, ན ཙ དིཊྛིཡོ? ཀཱམརཱགསཉྙོཛནཾ, པཊིགྷསཉྙོཛནཾ, མཱནསཉྙོཛནཾ, ཝིཙིཀིཙྪཱསཉྙོཛནཾ, བྷཝརཱགསཉྙོཛནཾ, ཨིསྶཱསཉྙོཛནཾ, མཙྪརིཡསཉྙོཛནཾ, ཨནུནཡསཉྙོཛནཾ, ཨཝིཛྫཱསཉྙོཛནཾ – ཨིམཱནི སཉྙོཛནཱནི, ན ཙ དིཊྛིཡོ། ཨསྶཱདདིཊྛིཡཱ ཨིམེཧི པཉྩཏིཾསཱཡ ཨཱཀཱརེཧི ཨབྷིནིཝེསོ ཧོཏི།
Atthi saññojanāni ceva diṭṭhiyo ca, atthi saññojanāni na ca diṭṭhiyo. Katamāni saññojanāni ceva diṭṭhiyo ca? Sakkāyadiṭṭhi, sīlabbataparāmāso – imāni saññojanāni ceva diṭṭhiyo ca. Katamāni saññojanāni, na ca diṭṭhiyo? Kāmarāgasaññojanaṃ, paṭighasaññojanaṃ, mānasaññojanaṃ, vicikicchāsaññojanaṃ, bhavarāgasaññojanaṃ, issāsaññojanaṃ, macchariyasaññojanaṃ, anunayasaññojanaṃ, avijjāsaññojanaṃ – imāni saññojanāni, na ca diṭṭhiyo. Assādadiṭṭhiyā imehi pañcatiṃsāya ākārehi abhiniveso hoti.
ཨསྶཱདདིཊྛིནིདྡེསོ པཋམོ།
Assādadiṭṭhiniddeso paṭhamo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༡. ཨསྶཱདདིཊྛིནིདྡེསཝཎྞནཱ • 1. Assādadiṭṭhiniddesavaṇṇanā
