| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๘. อสฺสทฺธมูลกสุตฺตํ
8. Assaddhamūlakasuttaṃ
๑๐๒. สาวตฺถิยํ วิหรติ…เป.… ‘‘ธาตุโสว, ภิกฺขเว, สตฺตา สํสนฺทนฺติ สเมนฺติฯ อสฺสทฺธา อสฺสเทฺธหิ สทฺธิํ สํสนฺทนฺติ สเมนฺติ; อหิริกา อหิริเกหิ สทฺธิํ สํสนฺทนฺติ สเมนฺติ; ทุปฺปญฺญา ทุปฺปเญฺญหิ สทฺธิํ สํสนฺทนฺติ สเมนฺติ; สทฺธา สเทฺธหิ สทฺธิํ สํสนฺทนฺติ สเมนฺติ; หิริมนา หิริมเนหิ สทฺธิํ สํสนฺทนฺติ สเมนฺติ; ปญฺญวโนฺต ปญฺญวเนฺตหิ สทฺธิํ สํสนฺทนฺติ สเมนฺติฯ อตีตมฺปิ โข, ภิกฺขเว, อทฺธานํ ธาตุโสว สตฺตา สํสนฺทิํสุ สมิํสุ…เป.… อนาคตมฺปิ โข, ภิกฺขเว, อทฺธานํ ธาตุโสว สตฺตา สํสนฺทิสฺสนฺติ สเมสฺสนฺติ…เป.…ฯ
102. Sāvatthiyaṃ viharati…pe… ‘‘dhātusova, bhikkhave, sattā saṃsandanti samenti. Assaddhā assaddhehi saddhiṃ saṃsandanti samenti; ahirikā ahirikehi saddhiṃ saṃsandanti samenti; duppaññā duppaññehi saddhiṃ saṃsandanti samenti; saddhā saddhehi saddhiṃ saṃsandanti samenti; hirimanā hirimanehi saddhiṃ saṃsandanti samenti; paññavanto paññavantehi saddhiṃ saṃsandanti samenti. Atītampi kho, bhikkhave, addhānaṃ dhātusova sattā saṃsandiṃsu samiṃsu…pe… anāgatampi kho, bhikkhave, addhānaṃ dhātusova sattā saṃsandissanti samessanti…pe….
‘‘เอตรหิปิ โข, ภิกฺขเว, ปจฺจุปฺปนฺนํ อทฺธานํ ธาตุโสว สตฺตา สํสนฺทนฺติ สเมนฺติฯ อสฺสทฺธา อสฺสเทฺธหิ สทฺธิํ สํสนฺทนฺติ สเมนฺติ; อหิริกา อหิริเกหิ สทฺธิํ สํสนฺทนฺติ สเมนฺติ, ทุปฺปญฺญา ทุปฺปเญฺญหิ สทฺธิํ สํสนฺทนฺติ สเมนฺติ; สทฺธา สเทฺธหิ สทฺธิํ สํสนฺทนฺติ สเมนฺติ; หิริมนา หิริมเนหิ สทฺธิํ สํสนฺทนฺติ สเมนฺติ; ปญฺญวโนฺต ปญฺญวเนฺตหิ สทฺธิํ สํสนฺทนฺติ สเมนฺตีติฯ (๑)
‘‘Etarahipi kho, bhikkhave, paccuppannaṃ addhānaṃ dhātusova sattā saṃsandanti samenti. Assaddhā assaddhehi saddhiṃ saṃsandanti samenti; ahirikā ahirikehi saddhiṃ saṃsandanti samenti, duppaññā duppaññehi saddhiṃ saṃsandanti samenti; saddhā saddhehi saddhiṃ saṃsandanti samenti; hirimanā hirimanehi saddhiṃ saṃsandanti samenti; paññavanto paññavantehi saddhiṃ saṃsandanti samentīti. (1)
‘‘ธาตุโสว, ภิกฺขเว, สตฺตา สํสนฺทนฺติ สเมนฺติฯ อสฺสทฺธา อสฺสเทฺธหิ สทฺธิํ สํสนฺทนฺติ สเมนฺติ; อโนตฺตปฺปิโน อโนตฺตปฺปีหิ สทฺธิํ สํสนฺทนฺติ สเมนฺติ; ทุปฺปญฺญา ทุปฺปเญฺญหิ สทฺธิํ สํสนฺทนฺติ สเมนฺติ ; สทฺธา สเทฺธหิ สทฺธิํ สํสนฺทนฺติ สเมนฺติ; โอตฺตปฺปิโน โอตฺตปฺปีหิ สทฺธิํ สํสนฺทนฺติ สเมนฺติ; ปญฺญวโนฺต ปญฺญวเนฺตหิ สทฺธิํ สํสนฺทนฺติ สเมนฺติ…เป.… ปฐมวาโร วิย วิตฺถาเรตโพฺพฯ (๒)
‘‘Dhātusova, bhikkhave, sattā saṃsandanti samenti. Assaddhā assaddhehi saddhiṃ saṃsandanti samenti; anottappino anottappīhi saddhiṃ saṃsandanti samenti; duppaññā duppaññehi saddhiṃ saṃsandanti samenti ; saddhā saddhehi saddhiṃ saṃsandanti samenti; ottappino ottappīhi saddhiṃ saṃsandanti samenti; paññavanto paññavantehi saddhiṃ saṃsandanti samenti…pe… paṭhamavāro viya vitthāretabbo. (2)
‘‘ธาตุโสว , ภิกฺขเว…เป.… อสฺสทฺธา อสฺสเทฺธหิ สทฺธิํ สํสนฺทนฺติ สเมนฺติ; อปฺปสฺสุตา อปฺปสฺสุเตหิ สทฺธิํ สํสนฺทนฺติ สเมนฺติ; ทุปฺปญฺญา ทุปฺปเญฺญหิ สทฺธิํ สํสนฺทนฺติ สเมนฺติ; สทฺธา สเทฺธหิ สทฺธิํ สํสนฺทนฺติ สเมนฺติ; พหุสฺสุตา พหุสฺสุเตหิ สทฺธิํ สํสนฺทนฺติ สเมนฺติ, ปญฺญวโนฺต ปญฺญวเนฺตหิ สทฺธิํ สํสนฺทนฺติ สเมนฺติ…เป.… ฯ (๓)
‘‘Dhātusova , bhikkhave…pe… assaddhā assaddhehi saddhiṃ saṃsandanti samenti; appassutā appassutehi saddhiṃ saṃsandanti samenti; duppaññā duppaññehi saddhiṃ saṃsandanti samenti; saddhā saddhehi saddhiṃ saṃsandanti samenti; bahussutā bahussutehi saddhiṃ saṃsandanti samenti, paññavanto paññavantehi saddhiṃ saṃsandanti samenti…pe… . (3)
‘‘ธาตุโสว, ภิกฺขเว…เป.… อสฺสทฺธา อสฺสเทฺธหิ สทฺธิํ สํสนฺทนฺติ สเมนฺติ; กุสีตา กุสีเตหิ สทฺธิํ สํสนฺทนฺติ สเมนฺติ; ทุปฺปญฺญา ทุปฺปเญฺญหิ สทฺธิํ สํสนฺทนฺติ สเมนฺติ; สทฺธา สเทฺธหิ สทฺธิํ สํสนฺทนฺติ สเมนฺติ; อารทฺธวีริยา อารทฺธวีริเยหิ สทฺธิํ สํสนฺทนฺติ สเมนฺติ; ปญฺญวโนฺต ปญฺญวเนฺตหิ สทฺธิํ สํสนฺทนฺติ สเมนฺติ…เป.…ฯ (๔)
‘‘Dhātusova, bhikkhave…pe… assaddhā assaddhehi saddhiṃ saṃsandanti samenti; kusītā kusītehi saddhiṃ saṃsandanti samenti; duppaññā duppaññehi saddhiṃ saṃsandanti samenti; saddhā saddhehi saddhiṃ saṃsandanti samenti; āraddhavīriyā āraddhavīriyehi saddhiṃ saṃsandanti samenti; paññavanto paññavantehi saddhiṃ saṃsandanti samenti…pe…. (4)
‘‘ธาตุโสว , ภิกฺขเว…เป.… อสฺสทฺธา อสฺสเทฺธหิ สทฺธิํ สํสนฺทนฺติ สเมนฺติ; มุฎฺฐสฺสติโน มุฎฺฐสฺสตีหิ สทฺธิํ สํสนฺทนฺติ สเมนฺติ; ทุปฺปญฺญา ทุปฺปเญฺญหิ สทฺธิํ สํสนฺทนฺติ สเมนฺติ; สทฺธา สเทฺธหิ สทฺธิํ สํสนฺทนฺติ สเมนฺติ; อุปฎฺฐิตสฺสติโน อุปฎฺฐิตสฺสตีหิ สทฺธิํ สํสนฺทนฺติ สเมนฺติ; ปญฺญวโนฺต ปญฺญวเนฺตหิ สทฺธิํ สํสนฺทนฺติ สเมนฺตีติ…เป.…ฯ อฎฺฐมํฯ (๕)
‘‘Dhātusova , bhikkhave…pe… assaddhā assaddhehi saddhiṃ saṃsandanti samenti; muṭṭhassatino muṭṭhassatīhi saddhiṃ saṃsandanti samenti; duppaññā duppaññehi saddhiṃ saṃsandanti samenti; saddhā saddhehi saddhiṃ saṃsandanti samenti; upaṭṭhitassatino upaṭṭhitassatīhi saddhiṃ saṃsandanti samenti; paññavanto paññavantehi saddhiṃ saṃsandanti samentīti…pe…. Aṭṭhamaṃ. (5)
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๘-๑๒. อสฺสทฺธมูลกสุตฺตาทิวณฺณนา • 8-12. Assaddhamūlakasuttādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๘-๑๒. อสฺสทฺธมูลกสุตฺตาทิวณฺณนา • 8-12. Assaddhamūlakasuttādivaṇṇanā
