| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৭. অস্সদ্ধসংসন্দনসুত্তৰণ্ণনা
7. Assaddhasaṃsandanasuttavaṇṇanā
১০১. সত্তমে অস্সদ্ধা অস্সদ্ধেহীতিআদীসু বুদ্ধে ৰা ধম্মে ৰা সঙ্ঘে ৰা সদ্ধাৰিরহিতা নিরোজা নিরসা পুগ্গলা সমুদ্দস্স ওরিমতীরে ঠিতা পারিমতীরেপি ঠিতেহি অস্সদ্ধেহি সদ্ধিং তায অস্সদ্ধতায একসদিসা নিরন্তরা হোন্তি। তথা অহিরিকা ভিন্নমরিযাদা অলজ্জিপুগ্গলা অহিরিকেহি, অনোত্তপ্পিনো পাপকিরিযায অভাযমানা অনোত্তপ্পীহি, অপ্পস্সুতা সুতৰিরহিতা অপ্পস্সুতেহি, কুসীতা আলসিযপুগ্গলা কুসীতেহি, মুট্ঠস্সতিনো ভত্তনিক্খিত্তকাকমংসনিক্খিত্তসিঙ্গালসদিসা মুট্ঠস্সতীহি, দুপ্পঞ্ঞা খন্ধাদিপরিচ্ছেদিকায পঞ্ঞায অভাৰেন নিপ্পঞ্ঞা তাদিসেহেৰ দুপ্পঞ্ঞেহি, সদ্ধাসম্পন্না চেতিযৰন্দনাদিকিচ্চপসুতা সদ্ধেহি, হিরিমনা লজ্জিপুগ্গলা হিরিমনেহি, ওত্তপ্পিনো পাপভীরুকা ওত্তপ্পীহি, বহুস্সুতা সুতধরা আগমধরা তন্তিপালকা ৰংসানুরক্খকা বহুস্সুতেহি, আরদ্ধৰীরিযা পরিপুণ্ণপরক্কমা আরদ্ধৰীরিযেহি, উপট্ঠিতস্সতী সব্বকিচ্চপরিগ্গাহিকায সতিযা সমন্নাগতা উপট্ঠিতস্সতীহি, পঞ্ঞৰন্তো মহাপঞ্ঞেহি ৰজিরূপমঞাণেহি পঞ্ঞৰন্তেহি সদ্ধিং দূরে ঠিতাপি তায পঞ্ঞাসম্পত্তিযা সংসন্দন্তি সমেন্তি। সত্তমং।
101. Sattame assaddhā assaddhehītiādīsu buddhe vā dhamme vā saṅghe vā saddhāvirahitā nirojā nirasā puggalā samuddassa orimatīre ṭhitā pārimatīrepi ṭhitehi assaddhehi saddhiṃ tāya assaddhatāya ekasadisā nirantarā honti. Tathā ahirikā bhinnamariyādā alajjipuggalā ahirikehi, anottappino pāpakiriyāya abhāyamānā anottappīhi, appassutā sutavirahitā appassutehi, kusītā ālasiyapuggalā kusītehi, muṭṭhassatino bhattanikkhittakākamaṃsanikkhittasiṅgālasadisā muṭṭhassatīhi, duppaññā khandhādiparicchedikāya paññāya abhāvena nippaññā tādiseheva duppaññehi, saddhāsampannā cetiyavandanādikiccapasutā saddhehi, hirimanā lajjipuggalā hirimanehi, ottappino pāpabhīrukā ottappīhi, bahussutā sutadharā āgamadharā tantipālakā vaṃsānurakkhakā bahussutehi, āraddhavīriyā paripuṇṇaparakkamā āraddhavīriyehi, upaṭṭhitassatī sabbakiccapariggāhikāya satiyā samannāgatā upaṭṭhitassatīhi, paññavanto mahāpaññehi vajirūpamañāṇehi paññavantehi saddhiṃ dūre ṭhitāpi tāya paññāsampattiyā saṃsandanti samenti. Sattamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৭. অস্সদ্ধসংসন্দনসুত্তং • 7. Assaddhasaṃsandanasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭. অস্সদ্ধসংসন্দনসুত্তৰণ্ণনা • 7. Assaddhasaṃsandanasuttavaṇṇanā
