| Library / Tipiṭaka / तिपिटक • Tipiṭaka / संयुत्तनिकाय (अट्ठकथा) • Saṃyuttanikāya (aṭṭhakathā) |
७. अस्सद्धसंसन्दनसुत्तवण्णना
7. Assaddhasaṃsandanasuttavaṇṇanā
१०१. सत्तमे अस्सद्धा अस्सद्धेहीतिआदीसु बुद्धे वा धम्मे वा सङ्घे वा सद्धाविरहिता निरोजा निरसा पुग्गला समुद्दस्स ओरिमतीरे ठिता पारिमतीरेपि ठितेहि अस्सद्धेहि सद्धिं ताय अस्सद्धताय एकसदिसा निरन्तरा होन्ति। तथा अहिरिका भिन्नमरियादा अलज्जिपुग्गला अहिरिकेहि, अनोत्तप्पिनो पापकिरियाय अभायमाना अनोत्तप्पीहि, अप्पस्सुता सुतविरहिता अप्पस्सुतेहि, कुसीता आलसियपुग्गला कुसीतेहि, मुट्ठस्सतिनो भत्तनिक्खित्तकाकमंसनिक्खित्तसिङ्गालसदिसा मुट्ठस्सतीहि, दुप्पञ्ञा खन्धादिपरिच्छेदिकाय पञ्ञाय अभावेन निप्पञ्ञा तादिसेहेव दुप्पञ्ञेहि, सद्धासम्पन्ना चेतियवन्दनादिकिच्चपसुता सद्धेहि, हिरिमना लज्जिपुग्गला हिरिमनेहि, ओत्तप्पिनो पापभीरुका ओत्तप्पीहि, बहुस्सुता सुतधरा आगमधरा तन्तिपालका वंसानुरक्खका बहुस्सुतेहि, आरद्धवीरिया परिपुण्णपरक्कमा आरद्धवीरियेहि, उपट्ठितस्सती सब्बकिच्चपरिग्गाहिकाय सतिया समन्नागता उपट्ठितस्सतीहि, पञ्ञवन्तो महापञ्ञेहि वजिरूपमञाणेहि पञ्ञवन्तेहि सद्धिं दूरे ठितापि ताय पञ्ञासम्पत्तिया संसन्दन्ति समेन्ति। सत्तमं।
101. Sattame assaddhā assaddhehītiādīsu buddhe vā dhamme vā saṅghe vā saddhāvirahitā nirojā nirasā puggalā samuddassa orimatīre ṭhitā pārimatīrepi ṭhitehi assaddhehi saddhiṃ tāya assaddhatāya ekasadisā nirantarā honti. Tathā ahirikā bhinnamariyādā alajjipuggalā ahirikehi, anottappino pāpakiriyāya abhāyamānā anottappīhi, appassutā sutavirahitā appassutehi, kusītā ālasiyapuggalā kusītehi, muṭṭhassatino bhattanikkhittakākamaṃsanikkhittasiṅgālasadisā muṭṭhassatīhi, duppaññā khandhādiparicchedikāya paññāya abhāvena nippaññā tādiseheva duppaññehi, saddhāsampannā cetiyavandanādikiccapasutā saddhehi, hirimanā lajjipuggalā hirimanehi, ottappino pāpabhīrukā ottappīhi, bahussutā sutadharā āgamadharā tantipālakā vaṃsānurakkhakā bahussutehi, āraddhavīriyā paripuṇṇaparakkamā āraddhavīriyehi, upaṭṭhitassatī sabbakiccapariggāhikāya satiyā samannāgatā upaṭṭhitassatīhi, paññavanto mahāpaññehi vajirūpamañāṇehi paññavantehi saddhiṃ dūre ṭhitāpi tāya paññāsampattiyā saṃsandanti samenti. Sattamaṃ.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ७. अस्सद्धसंसन्दनसुत्तं • 7. Assaddhasaṃsandanasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ७. अस्सद्धसंसन्दनसुत्तवण्णना • 7. Assaddhasaṃsandanasuttavaṇṇanā
