| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၇. အသ္သဒ္ဓသံသန္ဒနသုတ္တဝဏ္ဏနာ
7. Assaddhasaṃsandanasuttavaṇṇanā
၁၀၁. သတ္တမေ အသ္သဒ္ဓာ အသ္သဒ္ဓေဟီတိအာဒီသု ဗုဒ္ဓေ ဝာ ဓမ္မေ ဝာ သင္ဃေ ဝာ သဒ္ဓာဝိရဟိတာ နိရောဇာ နိရသာ ပုဂ္ဂလာ သမုဒ္ဒသ္သ ဩရိမတီရေ ဌိတာ ပာရိမတီရေပိ ဌိတေဟိ အသ္သဒ္ဓေဟိ သဒ္ဓိံ တာယ အသ္သဒ္ဓတာယ ဧကသဒိသာ နိရန္တရာ ဟောန္တိ။ တထာ အဟိရိကာ ဘိန္နမရိယာဒာ အလဇ္ဇိပုဂ္ဂလာ အဟိရိကေဟိ, အနောတ္တပ္ပိနော ပာပကိရိယာယ အဘာယမာနာ အနောတ္တပ္ပီဟိ, အပ္ပသ္သုတာ သုတဝိရဟိတာ အပ္ပသ္သုတေဟိ, ကုသီတာ အာလသိယပုဂ္ဂလာ ကုသီတေဟိ, မုဋ္ဌသ္သတိနော ဘတ္တနိက္ခိတ္တကာကမံသနိက္ခိတ္တသိင္ဂာလသဒိသာ မုဋ္ဌသ္သတီဟိ, ဒုပ္ပညာ ခန္ဓာဒိပရိစ္ဆေဒိကာယ ပညာယ အဘာဝေန နိပ္ပညာ တာဒိသေဟေဝ ဒုပ္ပညေဟိ, သဒ္ဓာသမ္ပန္နာ စေတိယဝန္ဒနာဒိကိစ္စပသုတာ သဒ္ဓေဟိ, ဟိရိမနာ လဇ္ဇိပုဂ္ဂလာ ဟိရိမနေဟိ, ဩတ္တပ္ပိနော ပာပဘီရုကာ ဩတ္တပ္ပီဟိ, ဗဟုသ္သုတာ သုတဓရာ အာဂမဓရာ တန္တိပာလကာ ဝံသာနုရက္ခကာ ဗဟုသ္သုတေဟိ, အာရဒ္ဓဝီရိယာ ပရိပုဏ္ဏပရက္ကမာ အာရဒ္ဓဝီရိယေဟိ, ဥပဋ္ဌိတသ္သတီ သဗ္ဗကိစ္စပရိဂ္ဂာဟိကာယ သတိယာ သမန္နာဂတာ ဥပဋ္ဌိတသ္သတီဟိ, ပညဝန္တော မဟာပညေဟိ ဝဇိရူပမဉာဏေဟိ ပညဝန္တေဟိ သဒ္ဓိံ ဒူရေ ဌိတာပိ တာယ ပညာသမ္ပတ္တိယာ သံသန္ဒန္တိ သမေန္တိ။ သတ္တမံ။
101. Sattame assaddhā assaddhehītiādīsu buddhe vā dhamme vā saṅghe vā saddhāvirahitā nirojā nirasā puggalā samuddassa orimatīre ṭhitā pārimatīrepi ṭhitehi assaddhehi saddhiṃ tāya assaddhatāya ekasadisā nirantarā honti. Tathā ahirikā bhinnamariyādā alajjipuggalā ahirikehi, anottappino pāpakiriyāya abhāyamānā anottappīhi, appassutā sutavirahitā appassutehi, kusītā ālasiyapuggalā kusītehi, muṭṭhassatino bhattanikkhittakākamaṃsanikkhittasiṅgālasadisā muṭṭhassatīhi, duppaññā khandhādiparicchedikāya paññāya abhāvena nippaññā tādiseheva duppaññehi, saddhāsampannā cetiyavandanādikiccapasutā saddhehi, hirimanā lajjipuggalā hirimanehi, ottappino pāpabhīrukā ottappīhi, bahussutā sutadharā āgamadharā tantipālakā vaṃsānurakkhakā bahussutehi, āraddhavīriyā paripuṇṇaparakkamā āraddhavīriyehi, upaṭṭhitassatī sabbakiccapariggāhikāya satiyā samannāgatā upaṭṭhitassatīhi, paññavanto mahāpaññehi vajirūpamañāṇehi paññavantehi saddhiṃ dūre ṭhitāpi tāya paññāsampattiyā saṃsandanti samenti. Sattamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. အသ္သဒ္ဓသံသန္ဒနသုတ္တံ • 7. Assaddhasaṃsandanasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. အသ္သဒ္ဓသံသန္ဒနသုတ္တဝဏ္ဏနာ • 7. Assaddhasaṃsandanasuttavaṇṇanā
