| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༧. ཨསྶདྡྷསཾསནྡནསུཏྟཝཎྞནཱ
7. Assaddhasaṃsandanasuttavaṇṇanā
༡༠༡. སཏྟམེ ཨསྶདྡྷཱ ཨསྶདྡྷེཧཱིཏིཨཱདཱིསུ བུདྡྷེ ཝཱ དྷམྨེ ཝཱ སངྒྷེ ཝཱ སདྡྷཱཝིརཧིཏཱ ནིརོཛཱ ནིརསཱ པུགྒལཱ སམུདྡསྶ ཨོརིམཏཱིརེ ཋིཏཱ པཱརིམཏཱིརེཔི ཋིཏེཧི ཨསྶདྡྷེཧི སདྡྷིཾ ཏཱཡ ཨསྶདྡྷཏཱཡ ཨེཀསདིསཱ ནིརནྟརཱ ཧོནྟི། ཏཐཱ ཨཧིརིཀཱ བྷིནྣམརིཡཱདཱ ཨལཛྫིཔུགྒལཱ ཨཧིརིཀེཧི, ཨནོཏྟཔྤིནོ པཱཔཀིརིཡཱཡ ཨབྷཱཡམཱནཱ ཨནོཏྟཔྤཱིཧི, ཨཔྤསྶུཏཱ སུཏཝིརཧིཏཱ ཨཔྤསྶུཏེཧི, ཀུསཱིཏཱ ཨཱལསིཡཔུགྒལཱ ཀུསཱིཏེཧི, མུཊྛསྶཏིནོ བྷཏྟནིཀྑིཏྟཀཱཀམཾསནིཀྑིཏྟསིངྒཱལསདིསཱ མུཊྛསྶཏཱིཧི, དུཔྤཉྙཱ ཁནྡྷཱདིཔརིཙྪེདིཀཱཡ པཉྙཱཡ ཨབྷཱཝེན ནིཔྤཉྙཱ ཏཱདིསེཧེཝ དུཔྤཉྙེཧི, སདྡྷཱསམྤནྣཱ ཙེཏིཡཝནྡནཱདིཀིཙྩཔསུཏཱ སདྡྷེཧི, ཧིརིམནཱ ལཛྫིཔུགྒལཱ ཧིརིམནེཧི, ཨོཏྟཔྤིནོ པཱཔབྷཱིརུཀཱ ཨོཏྟཔྤཱིཧི, བཧུསྶུཏཱ སུཏདྷརཱ ཨཱགམདྷརཱ ཏནྟིཔཱལཀཱ ཝཾསཱནུརཀྑཀཱ བཧུསྶུཏེཧི, ཨཱརདྡྷཝཱིརིཡཱ པརིཔུཎྞཔརཀྐམཱ ཨཱརདྡྷཝཱིརིཡེཧི, ཨུཔཊྛིཏསྶཏཱི སབྦཀིཙྩཔརིགྒཱཧིཀཱཡ སཏིཡཱ སམནྣཱགཏཱ ཨུཔཊྛིཏསྶཏཱིཧི, པཉྙཝནྟོ མཧཱཔཉྙེཧི ཝཛིརཱུཔམཉཱཎེཧི པཉྙཝནྟེཧི སདྡྷིཾ དཱུརེ ཋིཏཱཔི ཏཱཡ པཉྙཱསམྤཏྟིཡཱ སཾསནྡནྟི སམེནྟི། སཏྟམཾ།
101. Sattame assaddhā assaddhehītiādīsu buddhe vā dhamme vā saṅghe vā saddhāvirahitā nirojā nirasā puggalā samuddassa orimatīre ṭhitā pārimatīrepi ṭhitehi assaddhehi saddhiṃ tāya assaddhatāya ekasadisā nirantarā honti. Tathā ahirikā bhinnamariyādā alajjipuggalā ahirikehi, anottappino pāpakiriyāya abhāyamānā anottappīhi, appassutā sutavirahitā appassutehi, kusītā ālasiyapuggalā kusītehi, muṭṭhassatino bhattanikkhittakākamaṃsanikkhittasiṅgālasadisā muṭṭhassatīhi, duppaññā khandhādiparicchedikāya paññāya abhāvena nippaññā tādiseheva duppaññehi, saddhāsampannā cetiyavandanādikiccapasutā saddhehi, hirimanā lajjipuggalā hirimanehi, ottappino pāpabhīrukā ottappīhi, bahussutā sutadharā āgamadharā tantipālakā vaṃsānurakkhakā bahussutehi, āraddhavīriyā paripuṇṇaparakkamā āraddhavīriyehi, upaṭṭhitassatī sabbakiccapariggāhikāya satiyā samannāgatā upaṭṭhitassatīhi, paññavanto mahāpaññehi vajirūpamañāṇehi paññavantehi saddhiṃ dūre ṭhitāpi tāya paññāsampattiyā saṃsandanti samenti. Sattamaṃ.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༧. ཨསྶདྡྷསཾསནྡནསུཏྟཾ • 7. Assaddhasaṃsandanasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༧. ཨསྶདྡྷསཾསནྡནསུཏྟཝཎྞནཱ • 7. Assaddhasaṃsandanasuttavaṇṇanā
