| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༢. ཨསྶདྡྷསུཏྟཾ
2. Assaddhasuttaṃ
༢༠༢. ‘‘ཨསཔྤུརིསཉྩ ཝོ, བྷིཀྑཝེ, དེསེསྶཱམི, ཨསཔྤུརིསེན ཨསཔྤུརིསཏརཉྩ; སཔྤུརིསཉྩ, སཔྤུརིསེན སཔྤུརིསཏརཉྩ། ཏཾ སུཎཱཐ…པེ॰…།
202. ‘‘Asappurisañca vo, bhikkhave, desessāmi, asappurisena asappurisatarañca; sappurisañca, sappurisena sappurisatarañca. Taṃ suṇātha…pe….
‘‘ཀཏམོ ཙ, བྷིཀྑཝེ, ཨསཔྤུརིསོ? ཨིདྷ, བྷིཀྑཝེ, ཨེཀཙྩོ ཨསྶདྡྷོ ཧོཏི, ཨཧིརིཀོ ཧོཏི, ཨནོཏྟཔྤཱི ཧོཏི, ཨཔྤསྶུཏོ ཧོཏི, ཀུསཱིཏོ ཧོཏི, མུཊྛསྶཏི ཧོཏི, དུཔྤཉྙོ ཧོཏི། ཨཡཾ ཝུཙྩཏི, བྷིཀྑཝེ, ཨསཔྤུརིསོ།
‘‘Katamo ca, bhikkhave, asappuriso? Idha, bhikkhave, ekacco assaddho hoti, ahiriko hoti, anottappī hoti, appassuto hoti, kusīto hoti, muṭṭhassati hoti, duppañño hoti. Ayaṃ vuccati, bhikkhave, asappuriso.
‘‘ཀཏམོ ཙ, བྷིཀྑཝེ, ཨསཔྤུརིསེན ཨསཔྤུརིསཏརོ? ཨིདྷ, བྷིཀྑཝེ, ཨེཀཙྩོ ཨཏྟནཱ ཙ ཨསྶདྡྷོ ཧོཏི, པརཉྩ ཨསྶདྡྷིཡེ 1 སམཱདཔེཏི; ཨཏྟནཱ ཙ ཨཧིརིཀོ ཧོཏི, པརཉྩ ཨཧིརིཀཏཱཡ སམཱདཔེཏི; ཨཏྟནཱ ཙ ཨནོཏྟཔྤཱི ཧོཏི, པརཉྩ ཨནོཏྟཔྤེ སམཱདཔེཏི; ཨཏྟནཱ ཙ ཨཔྤསྶུཏོ ཧོཏི, པརཉྩ ཨཔྤསྶུཏེ སམཱདཔེཏི; ཨཏྟནཱ ཙ ཀུསཱིཏོ ཧོཏི, པརཉྩ ཀོསཛྫེ སམཱདཔེཏི; ཨཏྟནཱ ཙ མུཊྛསྶཏི ཧོཏི, པརཉྩ མུཊྛསྶཙྩེ 2 སམཱདཔེཏི; ཨཏྟནཱ ཙ དུཔྤཉྙོ ཧོཏི, པརཉྩ དུཔྤཉྙཏཱཡ སམཱདཔེཏི། ཨཡཾ ཝུཙྩཏི, བྷིཀྑཝེ, ཨསཔྤུརིསེན ཨསཔྤུརིསཏརོ།
‘‘Katamo ca, bhikkhave, asappurisena asappurisataro? Idha, bhikkhave, ekacco attanā ca assaddho hoti, parañca assaddhiye 3 samādapeti; attanā ca ahiriko hoti, parañca ahirikatāya samādapeti; attanā ca anottappī hoti, parañca anottappe samādapeti; attanā ca appassuto hoti, parañca appassute samādapeti; attanā ca kusīto hoti, parañca kosajje samādapeti; attanā ca muṭṭhassati hoti, parañca muṭṭhassacce 4 samādapeti; attanā ca duppañño hoti, parañca duppaññatāya samādapeti. Ayaṃ vuccati, bhikkhave, asappurisena asappurisataro.
‘‘ཀཏམོ ཙ, བྷིཀྑཝེ, སཔྤུརིསོ? ཨིདྷ, བྷིཀྑཝེ, ཨེཀཙྩོ སདྡྷོ ཧོཏི, ཧིརིམཱ ཧོཏི, ཨོཏྟཔྤཱི ཧོཏི, བཧུསྶུཏོ ཧོཏི, ཨཱརདྡྷཝཱིརིཡོ ཧོཏི, སཏིམཱ ཧོཏི, པཉྙཝཱ ཧོཏི། ཨཡཾ ཝུཙྩཏི, བྷིཀྑཝེ, སཔྤུརིསོ།
‘‘Katamo ca, bhikkhave, sappuriso? Idha, bhikkhave, ekacco saddho hoti, hirimā hoti, ottappī hoti, bahussuto hoti, āraddhavīriyo hoti, satimā hoti, paññavā hoti. Ayaṃ vuccati, bhikkhave, sappuriso.
‘‘ཀཏམོ ཙ, བྷིཀྑཝེ, སཔྤུརིསེན སཔྤུརིསཏརོ? ཨིདྷ, བྷིཀྑཝེ, ཨེཀཙྩོ ཨཏྟནཱ ཙ སདྡྷཱསམྤནྣོ ཧོཏི, པརཉྩ སདྡྷཱསམྤདཱཡ སམཱདཔེཏི ; ཨཏྟནཱ ཙ ཧིརིམཱ ཧོཏི, པརཉྩ ཧིརིམཏཱཡ 5 སམཱདཔེཏི; ཨཏྟནཱ ཙ ཨོཏྟཔྤཱི ཧོཏི, པརཉྩ ཨོཏྟཔྤེ སམཱདཔེཏི; ཨཏྟནཱ ཙ བཧུསྶུཏོ ཧོཏི, པརཉྩ བཱཧུསཙྩེ སམཱདཔེཏི; ཨཏྟནཱ ཙ ཨཱརདྡྷཝཱིརིཡོ ཧོཏི, པརཉྩ ཝཱིརིཡཱརམྦྷེ སམཱདཔེཏི; ཨཏྟནཱ ཙ ཨུཔཊྛིཏསྶཏི ཧོཏི, པརཉྩ སཏིཨུཔཊྛཱནེ 6 སམཱདཔེཏི; ཨཏྟནཱ ཙ པཉྙཱསམྤནྣོ ཧོཏི, པརཉྩ པཉྙཱསམྤདཱཡ སམཱདཔེཏི། ཨཡཾ ཝུཙྩཏི, བྷིཀྑཝེ, སཔྤུརིསེན སཔྤུརིསཏརོ’’ཏི། དུཏིཡཾ།
‘‘Katamo ca, bhikkhave, sappurisena sappurisataro? Idha, bhikkhave, ekacco attanā ca saddhāsampanno hoti, parañca saddhāsampadāya samādapeti ; attanā ca hirimā hoti, parañca hirimatāya 7 samādapeti; attanā ca ottappī hoti, parañca ottappe samādapeti; attanā ca bahussuto hoti, parañca bāhusacce samādapeti; attanā ca āraddhavīriyo hoti, parañca vīriyārambhe samādapeti; attanā ca upaṭṭhitassati hoti, parañca satiupaṭṭhāne 8 samādapeti; attanā ca paññāsampanno hoti, parañca paññāsampadāya samādapeti. Ayaṃ vuccati, bhikkhave, sappurisena sappurisataro’’ti. Dutiyaṃ.
Footnotes:
Related texts:
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༡༠. སིཀྑཱཔདསུཏྟཱདིཝཎྞནཱ • 1-10. Sikkhāpadasuttādivaṇṇanā
