| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3-4. அஸ்ஸாஜானீயஸுத்தாதி³வண்ணனா
3-4. Assājānīyasuttādivaṇṇanā
13-14. ததியே ஸாடெ²ய்யானீதி ஸட²த்தானி. ஸேஸபதே³ஸுபி ஏஸேவ நயோ. தானி பனஸ்ஸ ஸாடெ²ய்யாதீ³னி காயசித்துஜுகதாபடிபக்க²பூ⁴தா லோப⁴ஸஹக³தசித்துப்பாத³ஸ்ஸ பவத்திஆகாரவிஸேஸா. தத்த² யஸ்ஸ கிஸ்மிஞ்சிதே³வ டா²னே டா²துகாமஸ்ஸ ஸதோ யங் டா²னங் மனுஸ்ஸானங் ஸப்படிப⁴யங், புரதோ க³ந்த்வா ததே²வ ஸப்படிப⁴யட்டா²னேவ ட²ஸ்ஸாமீதி ந ஹோதி, வஞ்சனாதி⁴ப்பாயபா⁴வதோ டா²துகாமட்டா²னேயேவ நிகா²தத்த²ம்போ⁴ விய சத்தாரோ பாதே³ நிச்சாலெத்வா திட்ட²தி, அயங் ஸடோ² நாம, இமஸ்ஸ ஸாடெ²ய்யஸ்ஸ பாகடகரணங். ததா² யஸ்ஸ கிஸ்மிஞ்சிதே³வ டா²னே நிவத்தித்வா க²ந்த⁴க³தங் பாதேதுகாமஸ்ஸ ஸதோ யங் டா²னங் மனுஸ்ஸானங் ஸப்படிப⁴யங், புரதோ க³ந்த்வா ததே²வ பாதெஸ்ஸாமீதி ந ஹோதி, பாதேதுகாமட்டா²னேயேவ நிவத்தித்வா பாதேதி, அயங் கூடோ நாம. யஸ்ஸ காலேன வாமதோ, காலேன த³க்கி²ணதோ, காலேன உஜுமக்³கே³னேவ ச க³ந்துகாமஸ்ஸ ஸதோ யங் டா²னங் மனுஸ்ஸானங் ஸப்படிப⁴யங், புரதோ க³ந்த்வா ததே²வ ஏவங் கரிஸ்ஸாமீதி ந ஹோதி, யதி³ச்ச²கங் க³ந்துகாமட்டா²னேயேவ காலேன வாமதோ, காலேன த³க்கி²ணதோ, காலேன உஜுமக்³க³ங் க³ச்ச²தி, ததா² லெண்ட³ங் வா பஸ்ஸாவங் வா விஸ்ஸஜ்ஜேதுகாமஸ்ஸ இத³ங் டா²னங் ஸுஸம்மட்ட²ங் ஆகிண்ணமனுஸ்ஸங் ரமணீயங். இமஸ்மிங் டா²னே ஏவரூபங் காதுங் ந யுத்தங், புரதோ க³ந்த்வா படிச்ச²ன்னட்டா²னே கரிஸ்ஸாமீதி ந ஹோதி, தத்தே²வ கரோதி, அயங் ஜிம்ஹோ நாம. யஸ்ஸ பன கிஸ்மிஞ்சி டா²னே மக்³கா³ உக்கம்ம நிவத்தித்வா படிமக்³க³ங் ஆரோஹிதுகாமஸ்ஸ ஸதோ யங் டா²னங் மனுஸ்ஸானங் ஸப்படிப⁴யங், புரதோ க³ந்த்வா தத்தே²வ ஏவங் கரிஸ்ஸாமீதி ந ஹோதி, படிமக்³க³ங் ஆரோஹிதுகாமட்டா²னேயேவ மக்³கா³ உக்கம்ம நிவத்தித்வா படிமக்³க³ங் ஆரோஹதி, அயங் வங்கோ நாம. இதி இமங் சதுப்³பி³த⁴ம்பி கிரியங் ஸந்தா⁴யேதங் வுத்தங் ‘‘யானி கோ² பனஸ்ஸ தானி ஸாடெ²ய்யானி…பே॰… ஆவிகத்தா ஹோதீ’’தி. சதுத்தே² நத்தி² வத்தப்³ப³ங்.
13-14. Tatiye sāṭheyyānīti saṭhattāni. Sesapadesupi eseva nayo. Tāni panassa sāṭheyyādīni kāyacittujukatāpaṭipakkhabhūtā lobhasahagatacittuppādassa pavattiākāravisesā. Tattha yassa kismiñcideva ṭhāne ṭhātukāmassa sato yaṃ ṭhānaṃ manussānaṃ sappaṭibhayaṃ, purato gantvā tatheva sappaṭibhayaṭṭhāneva ṭhassāmīti na hoti, vañcanādhippāyabhāvato ṭhātukāmaṭṭhāneyeva nikhātatthambho viya cattāro pāde niccāletvā tiṭṭhati, ayaṃ saṭho nāma, imassa sāṭheyyassa pākaṭakaraṇaṃ. Tathā yassa kismiñcideva ṭhāne nivattitvā khandhagataṃ pātetukāmassa sato yaṃ ṭhānaṃ manussānaṃ sappaṭibhayaṃ, purato gantvā tatheva pātessāmīti na hoti, pātetukāmaṭṭhāneyeva nivattitvā pāteti, ayaṃ kūṭo nāma. Yassa kālena vāmato, kālena dakkhiṇato, kālena ujumaggeneva ca gantukāmassa sato yaṃ ṭhānaṃ manussānaṃ sappaṭibhayaṃ, purato gantvā tatheva evaṃ karissāmīti na hoti, yadicchakaṃ gantukāmaṭṭhāneyeva kālena vāmato, kālena dakkhiṇato, kālena ujumaggaṃ gacchati, tathā leṇḍaṃ vā passāvaṃ vā vissajjetukāmassa idaṃ ṭhānaṃ susammaṭṭhaṃ ākiṇṇamanussaṃ ramaṇīyaṃ. Imasmiṃ ṭhāne evarūpaṃ kātuṃ na yuttaṃ, purato gantvā paṭicchannaṭṭhāne karissāmīti na hoti, tattheva karoti, ayaṃ jimho nāma. Yassa pana kismiñci ṭhāne maggā ukkamma nivattitvā paṭimaggaṃ ārohitukāmassa sato yaṃ ṭhānaṃ manussānaṃ sappaṭibhayaṃ, purato gantvā tattheva evaṃ karissāmīti na hoti, paṭimaggaṃ ārohitukāmaṭṭhāneyeva maggā ukkamma nivattitvā paṭimaggaṃ ārohati, ayaṃ vaṅko nāma. Iti imaṃ catubbidhampi kiriyaṃ sandhāyetaṃ vuttaṃ ‘‘yāni kho panassa tāni sāṭheyyāni…pe… āvikattā hotī’’ti. Catutthe natthi vattabbaṃ.
அஸ்ஸாஜானீயஸுத்தாதி³வண்ணனா நிட்டி²தா.
Assājānīyasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
3. அஸ்ஸாஜானீயஸுத்தங் • 3. Assājānīyasuttaṃ
4. அஸ்ஸக²ளுங்கஸுத்தங் • 4. Assakhaḷuṅkasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
3. அஸ்ஸாஜானீயஸுத்தவண்ணனா • 3. Assājānīyasuttavaṇṇanā
4. அஸ்ஸக²ளுங்கஸுத்தவண்ணனா • 4. Assakhaḷuṅkasuttavaṇṇanā
