| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
10. අස්‌සාජානීයසුත්‌තං
10. Assājānīyasuttaṃ
143. ‘‘තයො ච, භික්‌ඛවෙ, භද්‍රෙ අස්‌සාජානීයෙ දෙසෙස්‌සාමි තයො ච භද්‍රෙ පුරිසාජානීයෙ. තං සුණාථ, සාධුකං මනසි කරොථ; භාසිස්‌සාමී’’ති. ‘‘එවං, භන්‌තෙ’’ති ඛො තෙ භික්‌ඛූ භගවතො පච්‌චස්‌සොසුං. භගවා එතදවොච –
143. ‘‘Tayo ca, bhikkhave, bhadre assājānīye desessāmi tayo ca bhadre purisājānīye. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘කතමෙ ච, භික්‌ඛවෙ, තයො භද්‍රා අස්‌සාජානීයා? ඉධ, භික්‌ඛවෙ, එකච්‌චො භද්‍රො අස්‌සාජානීයො …පෙ.… ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච. ඉමෙ ඛො, භික්‌ඛවෙ, තයො භද්‍රා අස්‌සාජානීයා.
‘‘Katame ca, bhikkhave, tayo bhadrā assājānīyā? Idha, bhikkhave, ekacco bhadro assājānīyo …pe… javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo bhadrā assājānīyā.
‘‘කතමෙ ච භික්‌ඛවෙ, තයො භද්‍රා පුරිසාජානීයා? ඉධ, භික්‌ඛවෙ, එකච්‌චො භද්‍රො පුරිසාජානීයො…පෙ.… ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච.
‘‘Katame ca bhikkhave, tayo bhadrā purisājānīyā? Idha, bhikkhave, ekacco bhadro purisājānīyo…pe… javasampanno ca hoti vaṇṇasampanno ca ārohapariṇāhasampanno ca.
‘‘කථඤ්‌ච, භික්‌ඛවෙ, භද්‍රො පුරිසාජානීයො…පෙ.… ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච? ඉධ, භික්‌ඛවෙ, භික්‌ඛු ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති. ඉදමස්‌ස ජවස්‌මිං වදාමි. අභිධම්‌මෙ ඛො පන අභිවිනයෙ පඤ්‌හං පුට්‌ඨො විස්‌සජ්‌ජෙති, නො සංසාදෙති. ඉදමස්‌ස වණ්‌ණස්‌මිං වදාමි. ලාභී ඛො පන හොති චීවරපිණ්‌ඩපාතසෙනාසනගිලානප්‌පච්‌චයභෙසජ්‌ජපරික්‌ඛාරානං. ඉදමස්‌ස ආරොහපරිණාහස්‌මිං වදාමි. එවං ඛො, භික්‌ඛවෙ, භද්‍රො පුරිසාජානීයො ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච. ඉමෙ ඛො, භික්‌ඛවෙ, තයො භද්‍රා පුරිසාජානීයා’’ති. දසමං.
‘‘Kathañca, bhikkhave, bhadro purisājānīyo…pe… javasampanno ca hoti vaṇṇasampanno ca ārohapariṇāhasampanno ca? Idha, bhikkhave, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti, no saṃsādeti. Idamassa vaṇṇasmiṃ vadāmi. Lābhī kho pana hoti cīvarapiṇḍapātasenāsanagilānappaccayabhesajjaparikkhārānaṃ. Idamassa ārohapariṇāhasmiṃ vadāmi. Evaṃ kho, bhikkhave, bhadro purisājānīyo javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo bhadrā purisājānīyā’’ti. Dasamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 10. අස්‌සාජානීයසුත්‌තවණ්‌ණනා • 10. Assājānīyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5-10. කෙසකම්‌බලසුත්‌තාදිවණ්‌ණනා • 5-10. Kesakambalasuttādivaṇṇanā
