| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೩. ಅಸ್ಸಾಜಾನೀಯಸುತ್ತವಣ್ಣನಾ
3. Assājānīyasuttavaṇṇanā
೧೩. ತತಿಯೇ ಅಙ್ಗೇಹೀತಿ ಗುಣಙ್ಗೇಹಿ। ತಸ್ಸಂ ದಿಸಾಯಂ ಜಾತೋ ಹೋತೀತಿ ತಸ್ಸಂ ಸಿನ್ಧುನದೀತೀರದಿಸಾಯಂ ಜಾತೋ ಹೋತಿ। ಅಞ್ಞೇಪಿ ಭದ್ರಾ ಅಸ್ಸಾಜಾನೀಯಾ ತತ್ಥೇವ ಜಾಯನ್ತಿ। ಅಲ್ಲಂ ವಾ ಸುಕ್ಖಂ ವಾತಿ ಅಲ್ಲತಿಣಂ ವಾ ಸುಕ್ಖತಿಣಂ ವಾ। ನಾಞ್ಞೇ ಅಸ್ಸೇ ಉಬ್ಬೇಜೇತಾತಿ ಅಞ್ಞೇ ಅಸ್ಸೇ ನ ಉಬ್ಬೇಜೇತಿ ನ ಪಹರತಿ ನ ಡಂಸತಿ ನ ಕಲಹಂ ಕರೋತಿ। ಸಾಠೇಯ್ಯಾನೀತಿ ಸಠಭಾವೋ। ಕೂಟೇಯ್ಯಾನೀತಿ ಕೂಟಭಾವೋ। ಜಿಮ್ಹೇಯ್ಯಾನೀತಿ ಜಿಮ್ಹಭಾವೋ। ವಙ್ಕೇಯ್ಯಾನೀತಿ ವಙ್ಕಭಾವಾ। ಇಚ್ಚಸ್ಸ ಚತೂಹಿಪಿ ಪದೇಹಿ ಅಸಿಕ್ಖಿತಭಾವೋವ ಕಥಿತೋ । ವಾಹೀತಿ ವಹನಸಭಾವೋ ದಿನ್ನೋವಾದಪಟಿಕರೋ। ಯಾವ ಜೀವಿತಮರಣಪರಿಯಾದಾನಾತಿ ಯಾವ ಜೀವಿತಸ್ಸ ಮರಣೇನ ಪರಿಯೋಸಾನಾ। ಸಕ್ಕಚ್ಚಂ ಪರಿಭುಞ್ಜತೀತಿ ಅಮತಂ ವಿಯ ಪಚ್ಚವೇಕ್ಖಿತ್ವಾ ಪರಿಭುಞ್ಜತಿ। ಪುರಿಸಥಾಮೇನಾತಿಆದೀಸು ಞಾಣಥಾಮಾದಯೋ ಕಥಿತಾ। ಸಣ್ಠಾನನ್ತಿ ಓಸಕ್ಕನಂ ಪಟಿಪ್ಪಸ್ಸದ್ಧಿ।
13. Tatiye aṅgehīti guṇaṅgehi. Tassaṃ disāyaṃ jāto hotīti tassaṃ sindhunadītīradisāyaṃ jāto hoti. Aññepi bhadrā assājānīyā tattheva jāyanti. Allaṃ vā sukkhaṃ vāti allatiṇaṃ vā sukkhatiṇaṃ vā. Nāññe asse ubbejetāti aññe asse na ubbejeti na paharati na ḍaṃsati na kalahaṃ karoti. Sāṭheyyānīti saṭhabhāvo. Kūṭeyyānīti kūṭabhāvo. Jimheyyānīti jimhabhāvo. Vaṅkeyyānīti vaṅkabhāvā. Iccassa catūhipi padehi asikkhitabhāvova kathito . Vāhīti vahanasabhāvo dinnovādapaṭikaro. Yāvajīvitamaraṇapariyādānāti yāva jīvitassa maraṇena pariyosānā. Sakkaccaṃ paribhuñjatīti amataṃ viya paccavekkhitvā paribhuñjati. Purisathāmenātiādīsu ñāṇathāmādayo kathitā. Saṇṭhānanti osakkanaṃ paṭippassaddhi.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೩. ಅಸ್ಸಾಜಾನೀಯಸುತ್ತಂ • 3. Assājānīyasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೩-೪. ಅಸ್ಸಾಜಾನೀಯಸುತ್ತಾದಿವಣ್ಣನಾ • 3-4. Assājānīyasuttādivaṇṇanā
