| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. அஸ்ஸஜிஸுத்தவண்ணனா
6. Assajisuttavaṇṇanā
88. ச²ட்டே² கஸ்ஸபகாராமேதி கஸ்ஸபஸெட்டி²னா காரிதே ஆராமே. காயஸங்கா²ரேதி அஸ்ஸாஸபஸ்ஸாஸே . ஸோ ஹி தே சதுத்த²ஜ்ஜா²னேன பஸ்ஸம்பி⁴த்வா பஸ்ஸம்பி⁴த்வா விஹாஸி. ஏவங் ஹோதீதி இதா³னி தங் ஸமாதி⁴ங் அப்படிலப⁴ந்தஸ்ஸ ஏவங் ஹோதி. நோ சஸ்ஸாஹங் பரிஹாயாமீதி கச்சி நு கோ² அஹங் ஸாஸனதோ ந பரிஹாயாமி? தஸ்ஸ கிர ஆபா³த⁴தோ³ஸேன அப்பிதப்பிதா ஸமாபத்தி பரிஹாயி, தஸ்மா ஏவங் சிந்தேஸி. ஸமாதி⁴ஸாரகா ஸமாதி⁴ஸாமஞ்ஞாதி ஸமாதி⁴ங்யேவ ஸாரஞ்ச ஸாமஞ்ஞஞ்ச மஞ்ஞந்தி. மய்ஹங் பன ஸாஸனே ந ஏதங் ஸாரங், விபஸ்ஸனாமக்³க³ப²லானி ஸாரங். ஸோ த்வங் ஸமாதி⁴தோ பரிஹாயந்தோ கஸ்மா சிந்தேஸி ‘‘ஸாஸனதோ பரிஹாயாமீ’’தி. ஏவங் தே²ரங் அஸ்ஸாஸெத்வா இதா³னிஸ்ஸ திபரிவட்டங் த⁴ம்மதே³ஸனங் ஆரப⁴ந்தோ தங் கிங் மஞ்ஞஸீதிஆதி³மாஹ. அத²ஸ்ஸ திபரிவட்டதே³ஸனாவஸானே அரஹத்தங் பத்தஸ்ஸ ஸததவிஹாரங் த³ஸ்ஸெந்தோ ஸோ ஸுக²ங் சே வேத³னங் வேத³யதீதிஆதி³மாஹ . தத்த² அனபி⁴னந்தி³தாதி பஜானாதீதி ஸுக²வேத³னாய தாவ அபி⁴னந்த³னா ஹோது, து³க்க²வேத³னாய கத²ங் ஹோதீதி? து³க்க²ங் பத்வா ஸுக²ங் பத்தே²தி, யத³க்³கே³ன ஸுக²ங் பத்தே²தி, தத³க்³கே³ன து³க்க²ங் பத்தே²தியேவ. ஸுக²விபரிணாமேன ஹி து³க்க²ங் ஆக³தமேவ ஹோதீதி ஏவங் து³க்கே² அபி⁴னந்த³னா வேதி³தப்³பா³. ஸேஸங் புப்³பே³ வுத்தனயமேவாதி. ச²ட்ட²ங்.
88. Chaṭṭhe kassapakārāmeti kassapaseṭṭhinā kārite ārāme. Kāyasaṅkhāreti assāsapassāse . So hi te catutthajjhānena passambhitvā passambhitvā vihāsi. Evaṃ hotīti idāni taṃ samādhiṃ appaṭilabhantassa evaṃ hoti. No cassāhaṃ parihāyāmīti kacci nu kho ahaṃ sāsanato na parihāyāmi? Tassa kira ābādhadosena appitappitā samāpatti parihāyi, tasmā evaṃ cintesi. Samādhisārakā samādhisāmaññāti samādhiṃyeva sārañca sāmaññañca maññanti. Mayhaṃ pana sāsane na etaṃ sāraṃ, vipassanāmaggaphalāni sāraṃ. So tvaṃ samādhito parihāyanto kasmā cintesi ‘‘sāsanato parihāyāmī’’ti. Evaṃ theraṃ assāsetvā idānissa tiparivaṭṭaṃ dhammadesanaṃ ārabhanto taṃ kiṃ maññasītiādimāha. Athassa tiparivaṭṭadesanāvasāne arahattaṃ pattassa satatavihāraṃ dassento so sukhaṃ ce vedanaṃ vedayatītiādimāha . Tattha anabhinanditāti pajānātīti sukhavedanāya tāva abhinandanā hotu, dukkhavedanāya kathaṃ hotīti? Dukkhaṃ patvā sukhaṃ pattheti, yadaggena sukhaṃ pattheti, tadaggena dukkhaṃ patthetiyeva. Sukhavipariṇāmena hi dukkhaṃ āgatameva hotīti evaṃ dukkhe abhinandanā veditabbā. Sesaṃ pubbe vuttanayamevāti. Chaṭṭhaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. அஸ்ஸஜிஸுத்தங் • 6. Assajisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. அஸ்ஸஜிஸுத்தவண்ணனா • 6. Assajisuttavaṇṇanā
