| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
6. ассаж̇исуд̇д̇аван̣н̣анаа
6. Assajisuttavaṇṇanā
88. чадтз гассабагаараамзд̇и гассабасздтинаа гаарид̇з аараамз. гааяасан̇каарзд̇и ассаасабассаасз . со хи д̇з жад̇уд̇т̇аж̇жхаанзна бассамбхид̇ваа бассамбхид̇ваа вихааси. звам̣ ход̇ийд̇и ид̣̇аани д̇ам̣ самаад̇хим̣ аббадилабханд̇асса звам̣ ход̇и. но жассаахам̣ барихааяаамийд̇и гажжи ну ко ахам̣ саасанад̇о на барихааяаами? д̇асса гира ааб̣аад̇хад̣̇осзна аббид̇аббид̇аа самаабад̇д̇и барихааяи, д̇асмаа звам̣ жинд̇зси. самаад̇хисаарагаа самаад̇хисааман̃н̃аад̇и самаад̇хим̣язва сааран̃жа сааман̃н̃ан̃жа ман̃н̃анд̇и. маяхам̣ бана саасанз на зд̇ам̣ саарам̣, вибассанаамаг̇г̇апалаани саарам̣. со д̇вам̣ самаад̇хид̇о барихааяанд̇о гасмаа жинд̇зси ‘‘саасанад̇о барихааяаамий’’д̇и. звам̣ т̇зрам̣ ассаасзд̇ваа ид̣̇аанисса д̇ибариваддам̣ д̇хаммад̣̇зсанам̣ аарабханд̇о д̇ам̣ гим̣ ман̃н̃асийд̇иаад̣̇имааха. ат̇асса д̇ибариваддад̣̇зсанаавасаанз арахад̇д̇ам̣ бад̇д̇асса сад̇ад̇авихаарам̣ д̣̇ассзнд̇о со сукам̣ жз взд̣̇анам̣ взд̣̇аяад̇ийд̇иаад̣̇имааха . д̇ад̇т̇а анабхинанд̣̇ид̇аад̇и баж̇аанаад̇ийд̇и сукавзд̣̇анааяа д̇аава абхинанд̣̇анаа ход̇у, д̣̇угкавзд̣̇анааяа гат̇ам̣ ход̇ийд̇и? д̣̇угкам̣ бад̇ваа сукам̣ бад̇т̇зд̇и, яад̣̇аг̇г̇зна сукам̣ бад̇т̇зд̇и, д̇ад̣̇аг̇г̇зна д̣̇угкам̣ бад̇т̇зд̇иязва. сукавибарин̣аамзна хи д̣̇угкам̣ ааг̇ад̇амзва ход̇ийд̇и звам̣ д̣̇угкз абхинанд̣̇анаа взд̣̇ид̇аб̣б̣аа. сзсам̣ буб̣б̣з вуд̇д̇анаяамзваад̇и. чадтам̣.
88. Chaṭṭhe kassapakārāmeti kassapaseṭṭhinā kārite ārāme. Kāyasaṅkhāreti assāsapassāse . So hi te catutthajjhānena passambhitvā passambhitvā vihāsi. Evaṃ hotīti idāni taṃ samādhiṃ appaṭilabhantassa evaṃ hoti. No cassāhaṃ parihāyāmīti kacci nu kho ahaṃ sāsanato na parihāyāmi? Tassa kira ābādhadosena appitappitā samāpatti parihāyi, tasmā evaṃ cintesi. Samādhisārakā samādhisāmaññāti samādhiṃyeva sārañca sāmaññañca maññanti. Mayhaṃ pana sāsane na etaṃ sāraṃ, vipassanāmaggaphalāni sāraṃ. So tvaṃ samādhito parihāyanto kasmā cintesi ‘‘sāsanato parihāyāmī’’ti. Evaṃ theraṃ assāsetvā idānissa tiparivaṭṭaṃ dhammadesanaṃ ārabhanto taṃ kiṃ maññasītiādimāha. Athassa tiparivaṭṭadesanāvasāne arahattaṃ pattassa satatavihāraṃ dassento so sukhaṃ ce vedanaṃ vedayatītiādimāha . Tattha anabhinanditāti pajānātīti sukhavedanāya tāva abhinandanā hotu, dukkhavedanāya kathaṃ hotīti? Dukkhaṃ patvā sukhaṃ pattheti, yadaggena sukhaṃ pattheti, tadaggena dukkhaṃ patthetiyeva. Sukhavipariṇāmena hi dukkhaṃ āgatameva hotīti evaṃ dukkhe abhinandanā veditabbā. Sesaṃ pubbe vuttanayamevāti. Chaṭṭhaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 6. ассаж̇исуд̇д̇ам̣ • 6. Assajisuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 6. ассаж̇исуд̇д̇аван̣н̣анаа • 6. Assajisuttavaṇṇanā
