| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৪. অস্সখল়ুঙ্কসুত্তং
4. Assakhaḷuṅkasuttaṃ
‘‘কতমে চ, ভিক্খৰে, অট্ঠ অস্সখল়ুঙ্কা অট্ঠ চ অস্সদোসা? ইধ, ভিক্খৰে, একচ্চো অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা পচ্ছতো পটিক্কমতি, পিট্ঠিতো রথং পৰত্তেতি। এৰরূপোপি, ভিক্খৰে, ইধেকচ্চো অস্সখল়ুঙ্কো হোতি। অযং, ভিক্খৰে, পঠমো অস্সদোসো।
‘‘Katame ca, bhikkhave, aṭṭha assakhaḷuṅkā aṭṭha ca assadosā? Idha, bhikkhave, ekacco assakhaḷuṅko ‘pehī’ti vutto, viddho samāno codito sārathinā pacchato paṭikkamati, piṭṭhito rathaṃ pavatteti. Evarūpopi, bhikkhave, idhekacco assakhaḷuṅko hoti. Ayaṃ, bhikkhave, paṭhamo assadoso.
‘‘পুন চপরং, ভিক্খৰে, ইধেকচ্চো অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা পচ্ছা লঙ্ঘতি, কুব্বরং হনতি, তিদণ্ডং ভঞ্জতি। এৰরূপোপি, ভিক্খৰে, ইধেকচ্চো অস্সখল়ুঙ্কো হোতি। অযং, ভিক্খৰে, দুতিযো অস্সদোসো।
‘‘Puna caparaṃ, bhikkhave, idhekacco assakhaḷuṅko ‘pehī’ti vutto, viddho samāno codito sārathinā pacchā laṅghati, kubbaraṃ hanati, tidaṇḍaṃ bhañjati. Evarūpopi, bhikkhave, idhekacco assakhaḷuṅko hoti. Ayaṃ, bhikkhave, dutiyo assadoso.
‘‘পুন চপরং, ভিক্খৰে, ইধেকচ্চো অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা রথীসায সত্থিং উস্সজ্জিত্ৰা রথীসংযেৰ অজ্ঝোমদ্দতি। এৰরূপোপি, ভিক্খৰে, ইধেকচ্চো অস্সখল়ুঙ্কো হোতি। অযং, ভিক্খৰে, ততিযো অস্সদোসো।
‘‘Puna caparaṃ, bhikkhave, idhekacco assakhaḷuṅko ‘pehī’ti vutto, viddho samāno codito sārathinā rathīsāya satthiṃ ussajjitvā rathīsaṃyeva ajjhomaddati. Evarūpopi, bhikkhave, idhekacco assakhaḷuṅko hoti. Ayaṃ, bhikkhave, tatiyo assadoso.
‘‘পুন চপরং, ভিক্খৰে, ইধেকচ্চো অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা উম্মগ্গং গণ্হতি, উব্বটুমং রথং করোতি। এৰরূপোপি , ভিক্খৰে, ইধেকচ্চো অস্সখল়ুঙ্কো হোতি। অযং, ভিক্খৰে, চতুত্থো অস্সদোসো।
‘‘Puna caparaṃ, bhikkhave, idhekacco assakhaḷuṅko ‘pehī’ti vutto, viddho samāno codito sārathinā ummaggaṃ gaṇhati, ubbaṭumaṃ rathaṃ karoti. Evarūpopi , bhikkhave, idhekacco assakhaḷuṅko hoti. Ayaṃ, bhikkhave, catuttho assadoso.
‘‘পুন চপরং, ভিক্খৰে, ইধেকচ্চো অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা লঙ্ঘতি পুরিমকাযং পগ্গণ্হতি পুরিমে পাদে। এৰরূপোপি, ভিক্খৰে, ইধেকচ্চো অস্সখল়ুঙ্কো হোতি। অযং, ভিক্খৰে, পঞ্চমো অস্সদোসো।
‘‘Puna caparaṃ, bhikkhave, idhekacco assakhaḷuṅko ‘pehī’ti vutto, viddho samāno codito sārathinā laṅghati purimakāyaṃ paggaṇhati purime pāde. Evarūpopi, bhikkhave, idhekacco assakhaḷuṅko hoti. Ayaṃ, bhikkhave, pañcamo assadoso.
‘‘পুন চপরং, ভিক্খৰে, ইধেকচ্চো অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা নেৰ অভিক্কমতি নো পটিক্কমতি তত্থেৰ খীলট্ঠাযী ঠিতো হোতি। এৰরূপোপি, ভিক্খৰে, ইধেকচ্চো অস্সখল়ুঙ্কো হোতি। অযং, ভিক্খৰে, সত্তমো অস্সদোসো।
‘‘Puna caparaṃ, bhikkhave, idhekacco assakhaḷuṅko ‘pehī’ti vutto, viddho samāno codito sārathinā neva abhikkamati no paṭikkamati tattheva khīlaṭṭhāyī ṭhito hoti. Evarūpopi, bhikkhave, idhekacco assakhaḷuṅko hoti. Ayaṃ, bhikkhave, sattamo assadoso.
‘‘পুন চপরং, ভিক্খৰে, ইধেকচ্চো অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা পুরিমে চ পাদে সংহরিত্ৰা পচ্ছিমে চ পাদে সংহরিত্ৰা 9 তত্থেৰ চত্তারো পাদে অভিনিসীদতি। এৰরূপোপি, ভিক্খৰে, ইধেকচ্চো অস্সখল়ুঙ্কো হোতি। অযং, ভিক্খৰে, অট্ঠমো অস্সদোসো। ইমে খো, ভিক্খৰে, অট্ঠ অস্সখল়ুঙ্কা অট্ঠ চ অস্সদোসা।
‘‘Puna caparaṃ, bhikkhave, idhekacco assakhaḷuṅko ‘pehī’ti vutto, viddho samāno codito sārathinā purime ca pāde saṃharitvā pacchime ca pāde saṃharitvā 10 tattheva cattāro pāde abhinisīdati. Evarūpopi, bhikkhave, idhekacco assakhaḷuṅko hoti. Ayaṃ, bhikkhave, aṭṭhamo assadoso. Ime kho, bhikkhave, aṭṭha assakhaḷuṅkā aṭṭha ca assadosā.
11 ‘‘কতমে চ, ভিক্খৰে, অট্ঠ পুরিসখল়ুঙ্কা অট্ঠ চ পুরিসদোসা? ইধ, ভিক্খৰে, ভিক্খূ ভিক্খুং আপত্তিযা চোদেন্তি। সো ভিক্খু ভিক্খূহি আপত্তিযা চোদিযমানো ‘ন সরামী’তি অসতিযা নিব্বেঠেতি। সেয্যথাপি সো, ভিক্খৰে, অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা পচ্ছতো পটিক্কমতি, পিট্ঠিতো রথং ৰত্তেতি; তথূপমাহং, ভিক্খৰে, ইমং পুগ্গলং ৰদামি। এৰরূপোপি, ভিক্খৰে, ইধেকচ্চো পুরিসখল়ুঙ্কো হোতি। অযং, ভিক্খৰে, পঠমো পুরিসদোসো।
12 ‘‘Katame ca, bhikkhave, aṭṭha purisakhaḷuṅkā aṭṭha ca purisadosā? Idha, bhikkhave, bhikkhū bhikkhuṃ āpattiyā codenti. So bhikkhu bhikkhūhi āpattiyā codiyamāno ‘na sarāmī’ti asatiyā nibbeṭheti. Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā pacchato paṭikkamati, piṭṭhito rathaṃ vatteti; tathūpamāhaṃ, bhikkhave, imaṃ puggalaṃ vadāmi. Evarūpopi, bhikkhave, idhekacco purisakhaḷuṅko hoti. Ayaṃ, bhikkhave, paṭhamo purisadoso.
‘‘পুন চপরং, ভিক্খৰে , ভিক্খূ ভিক্খুং আপত্তিযা চোদেন্তি। সো ভিক্খু ভিক্খূহি আপত্তিযা চোদিযমানো চোদকংযেৰ পটিপ্ফরতি – ‘কিং নু খো তুয্হং বালস্স অব্যত্তস্স ভণিতেন! ত্ৰম্পি নাম ভণিতব্বং মঞ্ঞসী’তি! সেয্যথাপি সো, ভিক্খৰে, অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা পচ্ছা লঙ্ঘতি, কুব্বরং হনতি, তিদণ্ডং ভঞ্জতি; তথূপমাহং, ভিক্খৰে, ইমং পুগ্গলং ৰদামি। এৰরূপোপি, ভিক্খৰে, ইধেকচ্চো পুরিসখল়ুঙ্কো হোতি। অযং, ভিক্খৰে, দুতিযো পুরিসদোসো।
‘‘Puna caparaṃ, bhikkhave , bhikkhū bhikkhuṃ āpattiyā codenti. So bhikkhu bhikkhūhi āpattiyā codiyamāno codakaṃyeva paṭippharati – ‘kiṃ nu kho tuyhaṃ bālassa abyattassa bhaṇitena! Tvampi nāma bhaṇitabbaṃ maññasī’ti! Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā pacchā laṅghati, kubbaraṃ hanati, tidaṇḍaṃ bhañjati; tathūpamāhaṃ, bhikkhave, imaṃ puggalaṃ vadāmi. Evarūpopi, bhikkhave, idhekacco purisakhaḷuṅko hoti. Ayaṃ, bhikkhave, dutiyo purisadoso.
‘‘পুন চপরং, ভিক্খৰে, ভিক্খূ ভিক্খুং আপত্তিযা চোদেন্তি। সো ভিক্খু ভিক্খূহি আপত্তিযা চোদিযমানো চোদকস্সেৰ পচ্চারোপেতি – ‘ত্ৰং খোসি ইত্থন্নামং আপত্তিং আপন্নো, ত্ৰং তাৰ পঠমং পটিকরোহী’তি। সেয্যথাপি সো, ভিক্খৰে, অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা রথীসায সত্থিং উস্সজ্জিত্ৰা রথীসংযেৰ অজ্ঝোমদ্দতি; তথূপমাহং, ভিক্খৰে, ইমং পুগ্গলং ৰদামি। এৰরূপোপি, ভিক্খৰে, ইধেকচ্চো পুরিসখল়ুঙ্কো হোতি। অযং, ভিক্খৰে, ততিযো পুরিসদোসো।
‘‘Puna caparaṃ, bhikkhave, bhikkhū bhikkhuṃ āpattiyā codenti. So bhikkhu bhikkhūhi āpattiyā codiyamāno codakasseva paccāropeti – ‘tvaṃ khosi itthannāmaṃ āpattiṃ āpanno, tvaṃ tāva paṭhamaṃ paṭikarohī’ti. Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā rathīsāya satthiṃ ussajjitvā rathīsaṃyeva ajjhomaddati; tathūpamāhaṃ, bhikkhave, imaṃ puggalaṃ vadāmi. Evarūpopi, bhikkhave, idhekacco purisakhaḷuṅko hoti. Ayaṃ, bhikkhave, tatiyo purisadoso.
‘‘পুন চপরং, ভিক্খৰে, ভিক্খূ ভিক্খুং আপত্তিযা চোদেন্তি। সো ভিক্খু ভিক্খূহি আপত্তিযা চোদিযমানো অঞ্ঞেনাঞ্ঞং পটিচরতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকরোতি। সেয্যথাপি সো, ভিক্খৰে, অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা উম্মগ্গং গণ্হতি, উব্বটুমং রথং করোতি; তথূপমাহং, ভিক্খৰে, ইমং পুগ্গলং ৰদামি। এৰরূপোপি, ভিক্খৰে, ইধেকচ্চো পুরিসখল়ুঙ্কো হোতি। অযং, ভিক্খৰে, চতুত্থো পুরিসদোসো।
‘‘Puna caparaṃ, bhikkhave, bhikkhū bhikkhuṃ āpattiyā codenti. So bhikkhu bhikkhūhi āpattiyā codiyamāno aññenāññaṃ paṭicarati, bahiddhā kathaṃ apanāmeti, kopañca dosañca appaccayañca pātukaroti. Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā ummaggaṃ gaṇhati, ubbaṭumaṃ rathaṃ karoti; tathūpamāhaṃ, bhikkhave, imaṃ puggalaṃ vadāmi. Evarūpopi, bhikkhave, idhekacco purisakhaḷuṅko hoti. Ayaṃ, bhikkhave, catuttho purisadoso.
‘‘পুন চপরং, ভিক্খৰে, ভিক্খূ ভিক্খুং আপত্তিযা চোদেন্তি। সো ভিক্খু ভিক্খূহি আপত্তিযা চোদিযমানো সঙ্ঘমজ্ঝে বাহুৰিক্খেপং করোতি। সেয্যথাপি সো, ভিক্খৰে , অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা লঙ্ঘতি, পুরিমকাযং পগ্গণ্হতি পুরিমে পাদে; তথূপমাহং, ভিক্খৰে, ইমং পুগ্গলং ৰদামি। এৰরূপোপি, ভিক্খৰে, ইধেকচ্চো পুরিসখল়ুঙ্কো হোতি। অযং, ভিক্খৰে, পঞ্চমো পুরিসদোসো।
‘‘Puna caparaṃ, bhikkhave, bhikkhū bhikkhuṃ āpattiyā codenti. So bhikkhu bhikkhūhi āpattiyā codiyamāno saṅghamajjhe bāhuvikkhepaṃ karoti. Seyyathāpi so, bhikkhave , assakhaḷuṅko ‘pehī’ti vutto, viddho samāno codito sārathinā laṅghati, purimakāyaṃ paggaṇhati purime pāde; tathūpamāhaṃ, bhikkhave, imaṃ puggalaṃ vadāmi. Evarūpopi, bhikkhave, idhekacco purisakhaḷuṅko hoti. Ayaṃ, bhikkhave, pañcamo purisadoso.
‘‘পুন চপরং, ভিক্খৰে, ভিক্খূ ভিক্খুং আপত্তিযা চোদেন্তি। সো ভিক্খু ভিক্খূহি আপত্তিযা চোদিযমানো অনাদিযিত্ৰা সঙ্ঘং অনাদিযিত্ৰা চোদকং সাপত্তিকোৰ যেন কামং পক্কমতি। সেয্যথাপি সো, ভিক্খৰে, অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা অনাদিযিত্ৰা সারথিং অনাদিযিত্ৰা পতোদলট্ঠিং দন্তেহি মুখাধানং ৰিধংসিত্ৰা যেন কামং পক্কমতি; তথূপমাহং, ভিক্খৰে, ইমং পুগ্গলং ৰদামি। এৰরূপোপি, ভিক্খৰে, ইধেকচ্চো পুরিসখল়ুঙ্কো হোতি। অযং, ভিক্খৰে, ছট্ঠো পুরিসদোসো।
‘‘Puna caparaṃ, bhikkhave, bhikkhū bhikkhuṃ āpattiyā codenti. So bhikkhu bhikkhūhi āpattiyā codiyamāno anādiyitvā saṅghaṃ anādiyitvā codakaṃ sāpattikova yena kāmaṃ pakkamati. Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā anādiyitvā sārathiṃ anādiyitvā patodalaṭṭhiṃ dantehi mukhādhānaṃ vidhaṃsitvā yena kāmaṃ pakkamati; tathūpamāhaṃ, bhikkhave, imaṃ puggalaṃ vadāmi. Evarūpopi, bhikkhave, idhekacco purisakhaḷuṅko hoti. Ayaṃ, bhikkhave, chaṭṭho purisadoso.
‘‘পুন চপরং, ভিক্খৰে, ভিক্খূ ভিক্খুং আপত্তিযা চোদেন্তি। সো ভিক্খু ভিক্খূহি আপত্তিযা চোদিযমানো ‘নেৰাহং আপন্নোম্হি, ন পনাহং আপন্নোম্হী’তি সো তুণ্হীভাৰেন সঙ্ঘং ৰিহেঠেতি 13। সেয্যথাপি সো, ভিক্খৰে, অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা নেৰ অভিক্কমতি নো পটিক্কমতি তত্থেৰ খীলট্ঠাযী ঠিতো হোতি; তথূপমাহং, ভিক্খৰে, ইমং পুগ্গলং ৰদামি। এৰরূপোপি, ভিক্খৰে, ইধেকচ্চো পুরিসখল়ুঙ্কো হোতি। অযং, ভিক্খৰে, সত্তমো পুরিসদোসো।
‘‘Puna caparaṃ, bhikkhave, bhikkhū bhikkhuṃ āpattiyā codenti. So bhikkhu bhikkhūhi āpattiyā codiyamāno ‘nevāhaṃ āpannomhi, na panāhaṃ āpannomhī’ti so tuṇhībhāvena saṅghaṃ viheṭheti 14. Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā neva abhikkamati no paṭikkamati tattheva khīlaṭṭhāyī ṭhito hoti; tathūpamāhaṃ, bhikkhave, imaṃ puggalaṃ vadāmi. Evarūpopi, bhikkhave, idhekacco purisakhaḷuṅko hoti. Ayaṃ, bhikkhave, sattamo purisadoso.
‘‘পুন চপরং, ভিক্খৰে, ভিক্খূ ভিক্খুং আপত্তিযা চোদেন্তি। সো ভিক্খু ভিক্খূহি আপত্তিযা চোদিযমানো এৰমাহ – ‘কিং নু খো তুম্হে আযস্মন্তো অতিবাল়্হং মযি ব্যাৰটা যাৰ 15 ইদানাহং সিক্খং পচ্চক্খায হীনাযাৰত্তিস্সামী’তি। সো সিক্খং পচ্চক্খায হীনাযাৰত্তিত্ৰা এৰমাহ – ‘ইদানি খো তুম্হে আযস্মন্তো অত্তমনা হোথা’তি? সেয্যথাপি সো, ভিক্খৰে, অস্সখল়ুঙ্কো ‘পেহী’তি ৰুত্তো, ৰিদ্ধো সমানো চোদিতো সারথিনা পুরিমে চ পাদে সংহরিত্ৰা পচ্ছিমে চ পাদে সংহরিত্ৰা তত্থেৰ চত্তারো পাদে অভিনিসীদতি; তথূপমাহং, ভিক্খৰে, ইমং পুগ্গলং ৰদামি। এৰরূপোপি, ভিক্খৰে, ইধেকচ্চো পুরিসখল়ুঙ্কো হোতি। অযং, ভিক্খৰে, অট্ঠমো পুরিসদোসো। ইমে খো, ভিক্খৰে, অট্ঠ পুরিসখল়ুঙ্কা অট্ঠ চ পুরিসদোসা’’তি। চতুত্থং।
‘‘Puna caparaṃ, bhikkhave, bhikkhū bhikkhuṃ āpattiyā codenti. So bhikkhu bhikkhūhi āpattiyā codiyamāno evamāha – ‘kiṃ nu kho tumhe āyasmanto atibāḷhaṃ mayi byāvaṭā yāva 16 idānāhaṃ sikkhaṃ paccakkhāya hīnāyāvattissāmī’ti. So sikkhaṃ paccakkhāya hīnāyāvattitvā evamāha – ‘idāni kho tumhe āyasmanto attamanā hothā’ti? Seyyathāpi so, bhikkhave, assakhaḷuṅko ‘pehī’ti vutto, viddho samāno codito sārathinā purime ca pāde saṃharitvā pacchime ca pāde saṃharitvā tattheva cattāro pāde abhinisīdati; tathūpamāhaṃ, bhikkhave, imaṃ puggalaṃ vadāmi. Evarūpopi, bhikkhave, idhekacco purisakhaḷuṅko hoti. Ayaṃ, bhikkhave, aṭṭhamo purisadoso. Ime kho, bhikkhave, aṭṭha purisakhaḷuṅkā aṭṭha ca purisadosā’’ti. Catutthaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৪. অস্সখল়ুঙ্কসুত্তৰণ্ণনা • 4. Assakhaḷuṅkasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৩-৪. অস্সাজানীযসুত্তাদিৰণ্ণনা • 3-4. Assājānīyasuttādivaṇṇanā
