| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. অস্সখল়ুঙ্কসুত্তং
2. Assakhaḷuṅkasuttaṃ
‘‘কতমে চ, ভিক্খৰে, তযো অস্সখল়ুঙ্কা? ইধ, ভিক্খৰে, একচ্চো অস্সখল়ুঙ্কো জৰসম্পন্নো হোতি, ন ৰণ্ণসম্পন্নো, ন আরোহপরিণাহসম্পন্নো। ইধ পন, ভিক্খৰে, একচ্চো অস্সখল়ুঙ্কো জৰসম্পন্নো চ হোতি ৰণ্ণসম্পন্নো চ, ন আরোহপরিণাহসম্পন্নো। ইধ পন, ভিক্খৰে, একচ্চো অস্সখল়ুঙ্কো জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ। ইমে খো, ভিক্খৰে, তযো অস্সখল়ুঙ্কা।
‘‘Katame ca, bhikkhave, tayo assakhaḷuṅkā? Idha, bhikkhave, ekacco assakhaḷuṅko javasampanno hoti, na vaṇṇasampanno, na ārohapariṇāhasampanno. Idha pana, bhikkhave, ekacco assakhaḷuṅko javasampanno ca hoti vaṇṇasampanno ca, na ārohapariṇāhasampanno. Idha pana, bhikkhave, ekacco assakhaḷuṅko javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo assakhaḷuṅkā.
‘‘কতমে চ, ভিক্খৰে, তযো পুরিসখল়ুঙ্কা? ইধ, ভিক্খৰে, একচ্চো পুরিসখল়ুঙ্কো জৰসম্পন্নো হোতি, ন ৰণ্ণসম্পন্নো, ন আরোহপরিণাহসম্পন্নো। ইধ পন, ভিক্খৰে, একচ্চো পুরিসখল়ুঙ্কো জৰসম্পন্নো চ হোতি ৰণ্ণসম্পন্নো চ, ন আরোহপরিণাহসম্পন্নো। ইধ পন, ভিক্খৰে, একচ্চো পুরিসখল়ুঙ্কো জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ।
‘‘Katame ca, bhikkhave, tayo purisakhaḷuṅkā? Idha, bhikkhave, ekacco purisakhaḷuṅko javasampanno hoti, na vaṇṇasampanno, na ārohapariṇāhasampanno. Idha pana, bhikkhave, ekacco purisakhaḷuṅko javasampanno ca hoti vaṇṇasampanno ca, na ārohapariṇāhasampanno. Idha pana, bhikkhave, ekacco purisakhaḷuṅko javasampanno ca hoti vaṇṇasampanno ca ārohapariṇāhasampanno ca.
‘‘কথঞ্চ, ভিক্খৰে, পুরিসখল়ুঙ্কো জৰসম্পন্নো হোতি, ন ৰণ্ণসম্পন্নো ন আরোহপরিণাহসম্পন্নো? ইধ, ভিক্খৰে, ভিক্খু ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি যথাভূতং পজানাতি, ‘অযং দুক্খনিরোধগামিনী পটিপদা’তি যথাভূতং পজানাতি। ইদমস্স জৰস্মিং ৰদামি। অভিধম্মে খো পন অভিৰিনযে পঞ্হং পুট্ঠো সংসাদেতি 7, নো ৰিস্সজ্জেতি। ইদমস্স ন ৰণ্ণস্মিং ৰদামি। ন খো পন লাভী হোতি চীৰরপিণ্ডপাতসেনাসনগিলানপচ্চযভেসজ্জপরিক্খারানং। ইদমস্স ন আরোহপরিণাহস্মিং ৰদামি। এৰং খো, ভিক্খৰে, পুরিসখল়ুঙ্কো জৰসম্পন্নো হোতি, ন ৰণ্ণসম্পন্নো ন আরোহপরিণাহসম্পন্নো।
‘‘Kathañca, bhikkhave, purisakhaḷuṅko javasampanno hoti, na vaṇṇasampanno na ārohapariṇāhasampanno? Idha, bhikkhave, bhikkhu ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti. Idamassa javasmiṃ vadāmi. Abhidhamme kho pana abhivinaye pañhaṃ puṭṭho saṃsādeti 8, no vissajjeti. Idamassa na vaṇṇasmiṃ vadāmi. Na kho pana lābhī hoti cīvarapiṇḍapātasenāsanagilānapaccayabhesajjaparikkhārānaṃ. Idamassa na ārohapariṇāhasmiṃ vadāmi. Evaṃ kho, bhikkhave, purisakhaḷuṅko javasampanno hoti, na vaṇṇasampanno na ārohapariṇāhasampanno.
‘‘কথঞ্চ, ভিক্খৰে, পুরিসখল়ুঙ্কো জৰসম্পন্নো চ হোতি ৰণ্ণসম্পন্নো চ, ন আরোহপরিণাহসম্পন্নো? ইধ, ভিক্খৰে, ভিক্খু ‘ইদং দুক্খ’ন্তি যথাভূতং পজানাতি…পে॰… ‘অযং দুক্খনিরোধগামিনী পটিপদা’তি যথাভূতং পজানাতি। ইদমস্স জৰস্মিং ৰদামি। অভিধম্মে খো পন অভিৰিনযে পঞ্হং পুট্ঠো ৰিস্সজ্জেতি, নো সংসাদেতি। ইদমস্স ৰণ্ণস্মিং ৰদামি। ন খো পন লাভী হোতি চীৰরপিণ্ডপাতসেনাসনগিলানপচ্চযভেসজ্জপরিক্খারানং। ইদমস্স ন আরোহপরিণাহস্মিং ৰদামি। এৰং খো, ভিক্খৰে, পুরিসখল়ুঙ্কো জৰসম্পন্নো চ হোতি ৰণ্ণসম্পন্নো চ, ন আরোহপরিণাহসম্পন্নো।
‘‘Kathañca, bhikkhave, purisakhaḷuṅko javasampanno ca hoti vaṇṇasampanno ca, na ārohapariṇāhasampanno? Idha, bhikkhave, bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti, no saṃsādeti. Idamassa vaṇṇasmiṃ vadāmi. Na kho pana lābhī hoti cīvarapiṇḍapātasenāsanagilānapaccayabhesajjaparikkhārānaṃ. Idamassa na ārohapariṇāhasmiṃ vadāmi. Evaṃ kho, bhikkhave, purisakhaḷuṅko javasampanno ca hoti vaṇṇasampanno ca, na ārohapariṇāhasampanno.
‘‘কথঞ্চ , ভিক্খৰে, পুরিসখল়ুঙ্কো জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ? ইধ, ভিক্খৰে, ভিক্খু ‘ইদং দুক্খ’ন্তি যথাভূতং পজানাতি…পে॰… ‘অযং দুক্খনিরোধগামিনী পটিপদা’তি যথাভূতং পজানাতি। ইদমস্স জৰস্মিং ৰদামি। অভিধম্মে খো পন অভিৰিনযে পঞ্হং পুট্ঠো ৰিস্সজ্জেতি, নো সংসাদেতি। ইদমস্স ৰণ্ণস্মিং ৰদামি। লাভী খো পন হোতি চীৰরপিণ্ডপাতসেনাসনগিলানপচ্চযভেসজ্জপরিক্খারানং। ইদমস্স আরোহপরিণাহস্মিং ৰদামি। এৰং খো, ভিক্খৰে, পুরিসখল়ুঙ্কো জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ। ইমে খো, ভিক্খৰে, তযো পুরিসখল়ুঙ্কা।
‘‘Kathañca , bhikkhave, purisakhaḷuṅko javasampanno ca hoti vaṇṇasampanno ca ārohapariṇāhasampanno ca? Idha, bhikkhave, bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti, no saṃsādeti. Idamassa vaṇṇasmiṃ vadāmi. Lābhī kho pana hoti cīvarapiṇḍapātasenāsanagilānapaccayabhesajjaparikkhārānaṃ. Idamassa ārohapariṇāhasmiṃ vadāmi. Evaṃ kho, bhikkhave, purisakhaḷuṅko javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo purisakhaḷuṅkā.
‘‘কতমে চ, ভিক্খৰে, তযো অস্সপরস্সা? ইধ, ভিক্খৰে, একচ্চো অস্সপরস্সো…পে॰… জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ। ইমে খো, ভিক্খৰে, তযো অস্সপরস্সা।
‘‘Katame ca, bhikkhave, tayo assaparassā? Idha, bhikkhave, ekacco assaparasso…pe… javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo assaparassā.
‘‘কতমে চ, ভিক্খৰে, তযো পুরিসপরস্সা? ইধ, ভিক্খৰে, একচ্চো পুরিসপরস্সো…পে॰… জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ।
‘‘Katame ca, bhikkhave, tayo purisaparassā? Idha, bhikkhave, ekacco purisaparasso…pe… javasampanno ca hoti vaṇṇasampanno ca ārohapariṇāhasampanno ca.
‘‘কথঞ্চ , ভিক্খৰে, পুরিসপরস্সো…পে॰… জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ? ইধ, ভিক্খৰে, ভিক্খু পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি, তত্থ পরিনিব্বাযী অনাৰত্তিধম্মো তস্মা লোকা। ইদমস্স জৰস্মিং ৰদামি। অভিধম্মে খো পন অভিৰিনযে পঞ্হং পুট্ঠো ৰিস্সজ্জেতি, নো সংসাদেতি। ইদমস্স ৰণ্ণস্মিং ৰদামি। লাভী খো পন হোতি চীৰরপিণ্ডপাতসেনাসনগিলানপচ্চযভেসজ্জপরিক্খারানং। ইদমস্স আরোহপরিণাহস্মিং ৰদামি। এৰং খো, ভিক্খৰে, পুরিসপরস্সো জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ। ইমে খো, ভিক্খৰে, তযো পুরিসপরস্সা।
‘‘Kathañca , bhikkhave, purisaparasso…pe… javasampanno ca hoti vaṇṇasampanno ca ārohapariṇāhasampanno ca? Idha, bhikkhave, bhikkhu pañcannaṃ orambhāgiyānaṃ saṃyojanānaṃ parikkhayā opapātiko hoti, tattha parinibbāyī anāvattidhammo tasmā lokā. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti, no saṃsādeti. Idamassa vaṇṇasmiṃ vadāmi. Lābhī kho pana hoti cīvarapiṇḍapātasenāsanagilānapaccayabhesajjaparikkhārānaṃ. Idamassa ārohapariṇāhasmiṃ vadāmi. Evaṃ kho, bhikkhave, purisaparasso javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo purisaparassā.
‘‘কতমে চ, ভিক্খৰে, তযো ভদ্দা অস্সাজানীযা? ইধ, ভিক্খৰে, একচ্চো ভদ্দো অস্সাজানীযো…পে॰… জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ। ইমে খো, ভিক্খৰে, তযো ভদ্দা অস্সাজানীযা।
‘‘Katame ca, bhikkhave, tayo bhaddā assājānīyā? Idha, bhikkhave, ekacco bhaddo assājānīyo…pe… javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo bhaddā assājānīyā.
‘‘কতমে চ, ভিক্খৰে, তযো ভদ্দা পুরিসাজানীযা? ইধ, ভিক্খৰে, একচ্চো ভদ্দো পুরিসাজানীযো…পে॰… জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ।
‘‘Katame ca, bhikkhave, tayo bhaddā purisājānīyā? Idha, bhikkhave, ekacco bhaddo purisājānīyo…pe… javasampanno ca hoti vaṇṇasampanno ca ārohapariṇāhasampanno ca.
‘‘কথঞ্চ, ভিক্খৰে, ভদ্দো পুরিসাজানীযো…পে॰… জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ? ইধ, ভিক্খৰে, ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি। ইদমস্স জৰস্মিং ৰদামি। অভিধম্মে খো পন অভিৰিনযে পঞ্হং পুট্ঠো ৰিস্সজ্জেতি, নো সংসাদেতি। ইদমস্স ৰণ্ণস্মিং ৰদামি। লাভী খো পন হোতি চীৰরপিণ্ডপাতসেনাসনগিলানপচ্চযভেসজ্জপরিক্খারানং। ইদমস্স আরোহপরিণাহস্মিং ৰদামি। এৰং খো, ভিক্খৰে, ভদ্দো পুরিসাজানীযো জৰসম্পন্নো চ হোতি ৰণ্ণসম্পন্নো চ আরোহপরিণাহসম্পন্নো চ। ইমে খো, ভিক্খৰে, তযো ভদ্দা পুরিসাজানীযা’’তি। দুতিযং।
‘‘Kathañca, bhikkhave, bhaddo purisājānīyo…pe… javasampanno ca hoti vaṇṇasampanno ca ārohapariṇāhasampanno ca? Idha, bhikkhave, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti, no saṃsādeti. Idamassa vaṇṇasmiṃ vadāmi. Lābhī kho pana hoti cīvarapiṇḍapātasenāsanagilānapaccayabhesajjaparikkhārānaṃ. Idamassa ārohapariṇāhasmiṃ vadāmi. Evaṃ kho, bhikkhave, bhaddo purisājānīyo javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo bhaddā purisājānīyā’’ti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. অস্সখল়ুঙ্কসুত্তৰণ্ণনা • 2. Assakhaḷuṅkasuttavaṇṇanā
