| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. අස්‌සඛළුඞ්‌කසුත්‌තං
2. Assakhaḷuṅkasuttaṃ
‘‘කතමෙ ච, භික්‌ඛවෙ, තයො අස්‌සඛළුඞ්‌කා? ඉධ, භික්‌ඛවෙ, එකච්‌චො අස්‌සඛළුඞ්‌කො ජවසම්‌පන්‌නො හොති, න වණ්‌ණසම්‌පන්‌නො, න ආරොහපරිණාහසම්‌පන්‌නො. ඉධ පන, භික්‌ඛවෙ, එකච්‌චො අස්‌සඛළුඞ්‌කො ජවසම්‌පන්‌නො ච හොති වණ්‌ණසම්‌පන්‌නො ච, න ආරොහපරිණාහසම්‌පන්‌නො. ඉධ පන, භික්‌ඛවෙ, එකච්‌චො අස්‌සඛළුඞ්‌කො ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච. ඉමෙ ඛො, භික්‌ඛවෙ, තයො අස්‌සඛළුඞ්‌කා.
‘‘Katame ca, bhikkhave, tayo assakhaḷuṅkā? Idha, bhikkhave, ekacco assakhaḷuṅko javasampanno hoti, na vaṇṇasampanno, na ārohapariṇāhasampanno. Idha pana, bhikkhave, ekacco assakhaḷuṅko javasampanno ca hoti vaṇṇasampanno ca, na ārohapariṇāhasampanno. Idha pana, bhikkhave, ekacco assakhaḷuṅko javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo assakhaḷuṅkā.
‘‘කතමෙ ච, භික්‌ඛවෙ, තයො පුරිසඛළුඞ්‌කා? ඉධ, භික්‌ඛවෙ, එකච්‌චො පුරිසඛළුඞ්‌කො ජවසම්‌පන්‌නො හොති, න වණ්‌ණසම්‌පන්‌නො, න ආරොහපරිණාහසම්‌පන්‌නො. ඉධ පන, භික්‌ඛවෙ, එකච්‌චො පුරිසඛළුඞ්‌කො ජවසම්‌පන්‌නො ච හොති වණ්‌ණසම්‌පන්‌නො ච, න ආරොහපරිණාහසම්‌පන්‌නො. ඉධ පන, භික්‌ඛවෙ, එකච්‌චො පුරිසඛළුඞ්‌කො ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච.
‘‘Katame ca, bhikkhave, tayo purisakhaḷuṅkā? Idha, bhikkhave, ekacco purisakhaḷuṅko javasampanno hoti, na vaṇṇasampanno, na ārohapariṇāhasampanno. Idha pana, bhikkhave, ekacco purisakhaḷuṅko javasampanno ca hoti vaṇṇasampanno ca, na ārohapariṇāhasampanno. Idha pana, bhikkhave, ekacco purisakhaḷuṅko javasampanno ca hoti vaṇṇasampanno ca ārohapariṇāhasampanno ca.
‘‘කථඤ්‌ච, භික්‌ඛවෙ, පුරිසඛළුඞ්‌කො ජවසම්‌පන්‌නො හොති, න වණ්‌ණසම්‌පන්‌නො න ආරොහපරිණාහසම්‌පන්‌නො? ඉධ, භික්‌ඛවෙ, භික්‌ඛු ‘ඉදං දුක්‌ඛ’න්‌ති යථාභූතං පජානාති, ‘අයං දුක්‌ඛසමුදයො’ති යථාභූතං පජානාති, ‘අයං දුක්‌ඛනිරොධො’ති යථාභූතං පජානාති, ‘අයං දුක්‌ඛනිරොධගාමිනී පටිපදා’ති යථාභූතං පජානාති. ඉදමස්‌ස ජවස්‌මිං වදාමි. අභිධම්‌මෙ ඛො පන අභිවිනයෙ පඤ්‌හං පුට්‌ඨො සංසාදෙති 7, නො විස්‌සජ්‌ජෙති. ඉදමස්‌ස න වණ්‌ණස්‌මිං වදාමි. න ඛො පන ලාභී හොති චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරානං. ඉදමස්‌ස න ආරොහපරිණාහස්‌මිං වදාමි. එවං ඛො, භික්‌ඛවෙ, පුරිසඛළුඞ්‌කො ජවසම්‌පන්‌නො හොති, න වණ්‌ණසම්‌පන්‌නො න ආරොහපරිණාහසම්‌පන්‌නො.
‘‘Kathañca, bhikkhave, purisakhaḷuṅko javasampanno hoti, na vaṇṇasampanno na ārohapariṇāhasampanno? Idha, bhikkhave, bhikkhu ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti. Idamassa javasmiṃ vadāmi. Abhidhamme kho pana abhivinaye pañhaṃ puṭṭho saṃsādeti 8, no vissajjeti. Idamassa na vaṇṇasmiṃ vadāmi. Na kho pana lābhī hoti cīvarapiṇḍapātasenāsanagilānapaccayabhesajjaparikkhārānaṃ. Idamassa na ārohapariṇāhasmiṃ vadāmi. Evaṃ kho, bhikkhave, purisakhaḷuṅko javasampanno hoti, na vaṇṇasampanno na ārohapariṇāhasampanno.
‘‘කථඤ්‌ච, භික්‌ඛවෙ, පුරිසඛළුඞ්‌කො ජවසම්‌පන්‌නො ච හොති වණ්‌ණසම්‌පන්‌නො ච, න ආරොහපරිණාහසම්‌පන්‌නො? ඉධ, භික්‌ඛවෙ, භික්‌ඛු ‘ඉදං දුක්‌ඛ’න්‌ති යථාභූතං පජානාති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං පජානාති. ඉදමස්‌ස ජවස්‌මිං වදාමි. අභිධම්‌මෙ ඛො පන අභිවිනයෙ පඤ්‌හං පුට්‌ඨො විස්‌සජ්‌ජෙති, නො සංසාදෙති. ඉදමස්‌ස වණ්‌ණස්‌මිං වදාමි. න ඛො පන ලාභී හොති චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරානං. ඉදමස්‌ස න ආරොහපරිණාහස්‌මිං වදාමි. එවං ඛො, භික්‌ඛවෙ, පුරිසඛළුඞ්‌කො ජවසම්‌පන්‌නො ච හොති වණ්‌ණසම්‌පන්‌නො ච, න ආරොහපරිණාහසම්‌පන්‌නො.
‘‘Kathañca, bhikkhave, purisakhaḷuṅko javasampanno ca hoti vaṇṇasampanno ca, na ārohapariṇāhasampanno? Idha, bhikkhave, bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti, no saṃsādeti. Idamassa vaṇṇasmiṃ vadāmi. Na kho pana lābhī hoti cīvarapiṇḍapātasenāsanagilānapaccayabhesajjaparikkhārānaṃ. Idamassa na ārohapariṇāhasmiṃ vadāmi. Evaṃ kho, bhikkhave, purisakhaḷuṅko javasampanno ca hoti vaṇṇasampanno ca, na ārohapariṇāhasampanno.
‘‘කථඤ්‌ච , භික්‌ඛවෙ, පුරිසඛළුඞ්‌කො ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච? ඉධ, භික්‌ඛවෙ, භික්‌ඛු ‘ඉදං දුක්‌ඛ’න්‌ති යථාභූතං පජානාති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං පජානාති. ඉදමස්‌ස ජවස්‌මිං වදාමි. අභිධම්‌මෙ ඛො පන අභිවිනයෙ පඤ්‌හං පුට්‌ඨො විස්‌සජ්‌ජෙති, නො සංසාදෙති. ඉදමස්‌ස වණ්‌ණස්‌මිං වදාමි. ලාභී ඛො පන හොති චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරානං. ඉදමස්‌ස ආරොහපරිණාහස්‌මිං වදාමි. එවං ඛො, භික්‌ඛවෙ, පුරිසඛළුඞ්‌කො ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච. ඉමෙ ඛො, භික්‌ඛවෙ, තයො පුරිසඛළුඞ්‌කා.
‘‘Kathañca , bhikkhave, purisakhaḷuṅko javasampanno ca hoti vaṇṇasampanno ca ārohapariṇāhasampanno ca? Idha, bhikkhave, bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti, no saṃsādeti. Idamassa vaṇṇasmiṃ vadāmi. Lābhī kho pana hoti cīvarapiṇḍapātasenāsanagilānapaccayabhesajjaparikkhārānaṃ. Idamassa ārohapariṇāhasmiṃ vadāmi. Evaṃ kho, bhikkhave, purisakhaḷuṅko javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo purisakhaḷuṅkā.
‘‘කතමෙ ච, භික්‌ඛවෙ, තයො අස්‌සපරස්‌සා? ඉධ, භික්‌ඛවෙ, එකච්‌චො අස්‌සපරස්‌සො…පෙ.… ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච. ඉමෙ ඛො, භික්‌ඛවෙ, තයො අස්‌සපරස්‌සා.
‘‘Katame ca, bhikkhave, tayo assaparassā? Idha, bhikkhave, ekacco assaparasso…pe… javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo assaparassā.
‘‘කතමෙ ච, භික්‌ඛවෙ, තයො පුරිසපරස්‌සා? ඉධ, භික්‌ඛවෙ, එකච්‌චො පුරිසපරස්‌සො…පෙ.… ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච.
‘‘Katame ca, bhikkhave, tayo purisaparassā? Idha, bhikkhave, ekacco purisaparasso…pe… javasampanno ca hoti vaṇṇasampanno ca ārohapariṇāhasampanno ca.
‘‘කථඤ්‌ච , භික්‌ඛවෙ, පුරිසපරස්‌සො…පෙ.… ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච? ඉධ, භික්‌ඛවෙ, භික්‌ඛු පඤ්‌චන්‌නං ඔරම්‌භාගියානං සංයොජනානං පරික්‌ඛයා ඔපපාතිකො හොති, තත්‌ථ පරිනිබ්‌බායී අනාවත්‌තිධම්‌මො තස්‌මා ලොකා. ඉදමස්‌ස ජවස්‌මිං වදාමි. අභිධම්‌මෙ ඛො පන අභිවිනයෙ පඤ්‌හං පුට්‌ඨො විස්‌සජ්‌ජෙති, නො සංසාදෙති. ඉදමස්‌ස වණ්‌ණස්‌මිං වදාමි. ලාභී ඛො පන හොති චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරානං. ඉදමස්‌ස ආරොහපරිණාහස්‌මිං වදාමි. එවං ඛො, භික්‌ඛවෙ, පුරිසපරස්‌සො ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච. ඉමෙ ඛො, භික්‌ඛවෙ, තයො පුරිසපරස්‌සා.
‘‘Kathañca , bhikkhave, purisaparasso…pe… javasampanno ca hoti vaṇṇasampanno ca ārohapariṇāhasampanno ca? Idha, bhikkhave, bhikkhu pañcannaṃ orambhāgiyānaṃ saṃyojanānaṃ parikkhayā opapātiko hoti, tattha parinibbāyī anāvattidhammo tasmā lokā. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti, no saṃsādeti. Idamassa vaṇṇasmiṃ vadāmi. Lābhī kho pana hoti cīvarapiṇḍapātasenāsanagilānapaccayabhesajjaparikkhārānaṃ. Idamassa ārohapariṇāhasmiṃ vadāmi. Evaṃ kho, bhikkhave, purisaparasso javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo purisaparassā.
‘‘කතමෙ ච, භික්‌ඛවෙ, තයො භද්‌දා අස්‌සාජානීයා? ඉධ, භික්‌ඛවෙ, එකච්‌චො භද්‌දො අස්‌සාජානීයො…පෙ.… ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච. ඉමෙ ඛො, භික්‌ඛවෙ, තයො භද්‌දා අස්‌සාජානීයා.
‘‘Katame ca, bhikkhave, tayo bhaddā assājānīyā? Idha, bhikkhave, ekacco bhaddo assājānīyo…pe… javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo bhaddā assājānīyā.
‘‘කතමෙ ච, භික්‌ඛවෙ, තයො භද්‌දා පුරිසාජානීයා? ඉධ, භික්‌ඛවෙ, එකච්‌චො භද්‌දො පුරිසාජානීයො…පෙ.… ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච.
‘‘Katame ca, bhikkhave, tayo bhaddā purisājānīyā? Idha, bhikkhave, ekacco bhaddo purisājānīyo…pe… javasampanno ca hoti vaṇṇasampanno ca ārohapariṇāhasampanno ca.
‘‘කථඤ්‌ච, භික්‌ඛවෙ, භද්‌දො පුරිසාජානීයො…පෙ.… ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච? ඉධ, භික්‌ඛවෙ, භික්‌ඛු ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති. ඉදමස්‌ස ජවස්‌මිං වදාමි. අභිධම්‌මෙ ඛො පන අභිවිනයෙ පඤ්‌හං පුට්‌ඨො විස්‌සජ්‌ජෙති, නො සංසාදෙති. ඉදමස්‌ස වණ්‌ණස්‌මිං වදාමි. ලාභී ඛො පන හොති චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරානං. ඉදමස්‌ස ආරොහපරිණාහස්‌මිං වදාමි. එවං ඛො, භික්‌ඛවෙ, භද්‌දො පුරිසාජානීයො ජවසම්‌පන්‌නො ච හොති වණ්‌ණසම්‌පන්‌නො ච ආරොහපරිණාහසම්‌පන්‌නො ච. ඉමෙ ඛො, භික්‌ඛවෙ, තයො භද්‌දා පුරිසාජානීයා’’ති. දුතියං.
‘‘Kathañca, bhikkhave, bhaddo purisājānīyo…pe… javasampanno ca hoti vaṇṇasampanno ca ārohapariṇāhasampanno ca? Idha, bhikkhave, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Idamassa javasmiṃ vadāmi. Abhidhamme kho pana abhivinaye pañhaṃ puṭṭho vissajjeti, no saṃsādeti. Idamassa vaṇṇasmiṃ vadāmi. Lābhī kho pana hoti cīvarapiṇḍapātasenāsanagilānapaccayabhesajjaparikkhārānaṃ. Idamassa ārohapariṇāhasmiṃ vadāmi. Evaṃ kho, bhikkhave, bhaddo purisājānīyo javasampanno ca hoti vaṇṇasampanno ca ārohapariṇāhasampanno ca. Ime kho, bhikkhave, tayo bhaddā purisājānīyā’’ti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 2. අස්‌සඛළුඞ්‌කසුත්‌තවණ්‌ණනා • 2. Assakhaḷuṅkasuttavaṇṇanā
