| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. அஸ்ஸக²ளுங்கஸுத்தவண்ணனா
4. Assakhaḷuṅkasuttavaṇṇanā
14. சதுத்தே² ‘‘பேஹீ’’தி வுத்தோதி ‘‘க³ச்சா²’’தி வுத்தோ. பிட்டி²தோ ரத²ங் பவத்தேதீதி க²ந்த⁴ட்டி²கேன யுக³ங் உப்பீளித்வா பச்சி²மபா⁴கே³ன ரத²ங் பவட்டெந்தோ ஓஸக்கதி. பச்சா² லங்க⁴தி, குப்³ப³ரங் ஹனதீதி த்³வே பச்சி²மபாதே³ உக்கி²பித்வா தேஹி பஹரித்வா ரத²குப்³ப³ரங் பி⁴ந்த³தி. தித³ண்ட³ங் ப⁴ஞ்ஜதீதி ரத²ஸ்ஸ புரதோ தயோ த³ண்ட³கா ஹொந்தி, தே ப⁴ஞ்ஜதி. ரதீ²ஸாய ஸத்தி²ங் உஸ்ஸஜ்ஜித்வாதி ஸீஸங் நாமெத்வா யுக³ங் பூ⁴மியங் பாதெத்வா ஸத்தி²னா ரதீ²ஸங் பஹரித்வா. அஜ்ஜோ²மத்³த³தீதி த்³வீஹி புரிமபாதே³ஹி ஈஸங் மத்³த³ந்தோ திட்ட²தி. உப்³ப³டுமங் ரத²ங் கரோதீதி த²லங் வா கண்ட³கட்டா²னங் வா ரத²ங் ஆரோபேதி. அனாதி³யித்வாதி அமனஸிகத்வா அக³ணித்வா. முகா²தா⁴னந்தி முக²ட²பனத்தா²ய தி³ன்னங் அயஸங்க²லிகங். கீ²லட்டா²யீதி சத்தாரோ பாதே³ த²ம்பே⁴ விய நிச்சலங் ட²பெத்வா கீ²லட்டா²னஸதி³ஸேன டா²னேன திட்ட²தி. இமஸ்மிங் ஸுத்தே வட்டமேவ கதி²தங்.
14. Catutthe ‘‘pehī’’ti vuttoti ‘‘gacchā’’ti vutto. Piṭṭhito rathaṃ pavattetīti khandhaṭṭhikena yugaṃ uppīḷitvā pacchimabhāgena rathaṃ pavaṭṭento osakkati. Pacchā laṅghati, kubbaraṃ hanatīti dve pacchimapāde ukkhipitvā tehi paharitvā rathakubbaraṃ bhindati. Tidaṇḍaṃ bhañjatīti rathassa purato tayo daṇḍakā honti, te bhañjati. Rathīsāya satthiṃ ussajjitvāti sīsaṃ nāmetvā yugaṃ bhūmiyaṃ pātetvā satthinā rathīsaṃ paharitvā. Ajjhomaddatīti dvīhi purimapādehi īsaṃ maddanto tiṭṭhati. Ubbaṭumaṃ rathaṃ karotīti thalaṃ vā kaṇḍakaṭṭhānaṃ vā rathaṃ āropeti. Anādiyitvāti amanasikatvā agaṇitvā. Mukhādhānanti mukhaṭhapanatthāya dinnaṃ ayasaṅkhalikaṃ. Khīlaṭṭhāyīti cattāro pāde thambhe viya niccalaṃ ṭhapetvā khīlaṭṭhānasadisena ṭhānena tiṭṭhati. Imasmiṃ sutte vaṭṭameva kathitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. அஸ்ஸக²ளுங்கஸுத்தங் • 4. Assakhaḷuṅkasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-4. அஸ்ஸாஜானீயஸுத்தாதி³வண்ணனா • 3-4. Assājānīyasuttādivaṇṇanā
