| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၄. အသ္သခဠုင္ကသုတ္တဝဏ္ဏနာ
4. Assakhaḷuṅkasuttavaṇṇanā
၁၄. စတုတ္ထေ ‘‘ပေဟီ’’တိ ဝုတ္တောတိ ‘‘ဂစ္ဆာ’’တိ ဝုတ္တော။ ပိဋ္ဌိတော ရထံ ပဝတ္တေတီတိ ခန္ဓဋ္ဌိကေန ယုဂံ ဥပ္ပီဠိတ္ဝာ ပစ္ဆိမဘာဂေန ရထံ ပဝဋ္ဋေန္တော ဩသက္ကတိ။ ပစ္ဆာ လင္ဃတိ, ကုဗ္ဗရံ ဟနတီတိ ဒ္ဝေ ပစ္ဆိမပာဒေ ဥက္ခိပိတ္ဝာ တေဟိ ပဟရိတ္ဝာ ရထကုဗ္ဗရံ ဘိန္ဒတိ။ တိဒဏ္ဍံ ဘဉ္ဇတီတိ ရထသ္သ ပုရတော တယော ဒဏ္ဍကာ ဟောန္တိ, တေ ဘဉ္ဇတိ။ ရထီသာယ သတ္ထိံ ဥသ္သဇ္ဇိတ္ဝာတိ သီသံ နာမေတ္ဝာ ယုဂံ ဘူမိယံ ပာတေတ္ဝာ သတ္ထိနာ ရထီသံ ပဟရိတ္ဝာ။ အဇ္ဈောမဒ္ဒတီတိ ဒ္ဝီဟိ ပုရိမပာဒေဟိ ဤသံ မဒ္ဒန္တော တိဋ္ဌတိ။ ဥဗ္ဗဋုမံ ရထံ ကရောတီတိ ထလံ ဝာ ကဏ္ဍကဋ္ဌာနံ ဝာ ရထံ အာရောပေတိ။ အနာဒိယိတ္ဝာတိ အမနသိကတ္ဝာ အဂဏိတ္ဝာ။ မုခာဓာနန္တိ မုခဌပနတ္ထာယ ဒိန္နံ အယသင္ခလိကံ။ ခီလဋ္ဌာယီတိ စတ္တာရော ပာဒေ ထမ္ဘေ ဝိယ နိစ္စလံ ဌပေတ္ဝာ ခီလဋ္ဌာနသဒိသေန ဌာနေန တိဋ္ဌတိ။ ဣမသ္မိံ သုတ္တေ ဝဋ္ဋမေဝ ကထိတံ။
14. Catutthe ‘‘pehī’’ti vuttoti ‘‘gacchā’’ti vutto. Piṭṭhito rathaṃ pavattetīti khandhaṭṭhikena yugaṃ uppīḷitvā pacchimabhāgena rathaṃ pavaṭṭento osakkati. Pacchā laṅghati, kubbaraṃ hanatīti dve pacchimapāde ukkhipitvā tehi paharitvā rathakubbaraṃ bhindati. Tidaṇḍaṃ bhañjatīti rathassa purato tayo daṇḍakā honti, te bhañjati. Rathīsāya satthiṃ ussajjitvāti sīsaṃ nāmetvā yugaṃ bhūmiyaṃ pātetvā satthinā rathīsaṃ paharitvā. Ajjhomaddatīti dvīhi purimapādehi īsaṃ maddanto tiṭṭhati. Ubbaṭumaṃ rathaṃ karotīti thalaṃ vā kaṇḍakaṭṭhānaṃ vā rathaṃ āropeti. Anādiyitvāti amanasikatvā agaṇitvā. Mukhādhānanti mukhaṭhapanatthāya dinnaṃ ayasaṅkhalikaṃ. Khīlaṭṭhāyīti cattāro pāde thambhe viya niccalaṃ ṭhapetvā khīlaṭṭhānasadisena ṭhānena tiṭṭhati. Imasmiṃ sutte vaṭṭameva kathitaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၄. အသ္သခဠုင္ကသုတ္တံ • 4. Assakhaḷuṅkasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၃-၄. အသ္သာဇာနီယသုတ္တာဒိဝဏ္ဏနာ • 3-4. Assājānīyasuttādivaṇṇanā
