| Library / Tipiṭaka / တိပိဋက • Tipiṭaka / မဇ္ဈိမနိကာယ • Majjhimanikāya |
၃. အသ္သလာယနသုတ္တံ
3. Assalāyanasuttaṃ
၄၀၁. ဧဝံ မေ သုတံ – ဧကံ သမယံ ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန နာနာဝေရဇ္ဇကာနံ ဗ္ရာဟ္မဏာနံ ပဉ္စမတ္တာနိ ဗ္ရာဟ္မဏသတာနိ သာဝတ္ထိယံ ပဋိဝသန္တိ ကေနစိဒေဝ ကရဏီယေန။ အထ ခော တေသံ ဗ္ရာဟ္မဏာနံ ဧတဒဟောသိ – ‘‘အယံ ခော သမဏော ဂောတမော စာတုဝဏ္ဏိံ သုဒ္ဓိံ ပညပေတိ။ ကော နု ခော ပဟောတိ သမဏေန ဂောတမေန သဒ္ဓိံ အသ္မိံ ဝစနေ ပဋိမန္တေတု’’န္တိ? တေန ခော ပန သမယေန အသ္သလာယနော နာမ မာဏဝော သာဝတ္ထိယံ ပဋိဝသတိ ဒဟရော, ဝုတ္တသိရော, သောဠသဝသ္သုဒ္ဒေသိကော ဇာတိယာ, တိဏ္ဏံ ဝေဒာနံ ပာရဂူ သနိဃဏ္ဍုကေဋုဘာနံ သာက္ခရပ္ပဘေဒာနံ ဣတိဟာသပဉ္စမာနံ, ပဒကော, ဝေယ္ယာကရဏော, လောကာယတမဟာပုရိသလက္ခဏေသု အနဝယော။ အထ ခော တေသံ ဗ္ရာဟ္မဏာနံ ဧတဒဟောသိ – ‘‘အယံ ခော အသ္သလာယနော မာဏဝော သာဝတ္ထိယံ ပဋိဝသတိ ဒဟရော, ဝုတ္တသိရော, သောဠသဝသ္သုဒ္ဒေသိကော ဇာတိယာ, တိဏ္ဏံ ဝေဒာနံ ပာရဂူ။ပေ.။ အနဝယော။ သော ခော ပဟောတိ သမဏေန ဂောတမေန သဒ္ဓိံ အသ္မိံ ဝစနေ ပဋိမန္တေတု’’န္တိ။
401. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena nānāverajjakānaṃ brāhmaṇānaṃ pañcamattāni brāhmaṇasatāni sāvatthiyaṃ paṭivasanti kenacideva karaṇīyena. Atha kho tesaṃ brāhmaṇānaṃ etadahosi – ‘‘ayaṃ kho samaṇo gotamo cātuvaṇṇiṃ suddhiṃ paññapeti. Ko nu kho pahoti samaṇena gotamena saddhiṃ asmiṃ vacane paṭimantetu’’nti? Tena kho pana samayena assalāyano nāma māṇavo sāvatthiyaṃ paṭivasati daharo, vuttasiro, soḷasavassuddesiko jātiyā, tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ, padako, veyyākaraṇo, lokāyatamahāpurisalakkhaṇesu anavayo. Atha kho tesaṃ brāhmaṇānaṃ etadahosi – ‘‘ayaṃ kho assalāyano māṇavo sāvatthiyaṃ paṭivasati daharo, vuttasiro, soḷasavassuddesiko jātiyā, tiṇṇaṃ vedānaṃ pāragū…pe… anavayo. So kho pahoti samaṇena gotamena saddhiṃ asmiṃ vacane paṭimantetu’’nti.
အထ ခော တေ ဗ္ရာဟ္မဏာ ယေန အသ္သလာယနော မာဏဝော တေနုပင္ကမိံသု; ဥပသင္ကမိတ္ဝာ အသ္သလာယနံ မာဏဝံ ဧတဒဝောစုံ – ‘‘အယံ, ဘော အသ္သလာယန , သမဏော ဂောတမော စာတုဝဏ္ဏိံ သုဒ္ဓိံ ပညပေတိ။ ဧတု ဘဝံ အသ္သလာယနော သမဏေန ဂောတမေန သဒ္ဓိံ အသ္မိံ ဝစနေ ပဋိမန္တေတူ’’တိ 1။
Atha kho te brāhmaṇā yena assalāyano māṇavo tenupaṅkamiṃsu; upasaṅkamitvā assalāyanaṃ māṇavaṃ etadavocuṃ – ‘‘ayaṃ, bho assalāyana , samaṇo gotamo cātuvaṇṇiṃ suddhiṃ paññapeti. Etu bhavaṃ assalāyano samaṇena gotamena saddhiṃ asmiṃ vacane paṭimantetū’’ti 2.
ဧဝံ ဝုတ္တေ, အသ္သလာယနော မာဏဝော တေ ဗ္ရာဟ္မဏေ ဧတဒဝောစ – ‘‘သမဏော ခလု, ဘော, ဂောတမော ဓမ္မဝာဒီ; ဓမ္မဝာဒိနော စ ပန ဒုပ္ပဋိမန္တိယာ ဘဝန္တိ။ နာဟံ သက္ကောမိ သမဏေန ဂောတမေန သဒ္ဓိံ အသ္မိံ ဝစနေ ပဋိမန္တေတု’’န္တိ။ ဒုတိယမ္ပိ ခော တေ ဗ္ရာဟ္မဏာ အသ္သလာယနံ မာဏဝံ ဧတဒဝောစုံ – ‘‘အယံ, ဘော အသ္သလာယန, သမဏော ဂောတမော စာတုဝဏ္ဏိံ သုဒ္ဓိံ ပညပေတိ။ ဧတု ဘဝံ အသ္သလာယနော သမဏေန ဂောတမေန သဒ္ဓိံ အသ္မိံ ဝစနေ ပဋိမန္တေတု 3။ စရိတံ ခော ပန ဘောတာ အသ္သလာယနေန ပရိဗ္ဗာဇက’’န္တိ။ ဒုတိယမ္ပိ ခော အသ္သလာယနော မာဏဝော တေ ဗ္ရာဟ္မဏေ ဧတဒဝောစ – ‘‘သမဏော ခလု, ဘော, ဂောတမော ဓမ္မဝာဒီ; ဓမ္မဝာဒိနော စ ပန ဒုပ္ပဋိမန္တိယာ ဘဝန္တိ ။ နာဟံ သက္ကောမိ သမဏေန ဂောတမေန သဒ္ဓိံ အသ္မိံ ဝစနေ ပဋိမန္တေတု’’န္တိ။ တတိယမ္ပိ ခော တေ ဗ္ရာဟ္မဏာ အသ္သလာယနံ မာဏဝံ ဧတဒဝောစုံ – ‘‘အယံ, ဘော အသ္သလာယန, သမဏော ဂောတမော စာတုဝဏ္ဏိံ သုဒ္ဓိံ ပညပေတိ။ ဧတု ဘဝံ အသ္သလာယနော သမဏေန ဂောတမေန သဒ္ဓိံ အသ္မိံ ဝစနေ ပဋိမန္တေတု 4။ စရိတံ ခော ပန ဘောတာ အသ္သလာယနေန ပရိဗ္ဗာဇကံ။ မာ ဘဝံ အသ္သလာယနော အယုဒ္ဓပရာဇိတံ ပရာဇယီ’’တိ။
Evaṃ vutte, assalāyano māṇavo te brāhmaṇe etadavoca – ‘‘samaṇo khalu, bho, gotamo dhammavādī; dhammavādino ca pana duppaṭimantiyā bhavanti. Nāhaṃ sakkomi samaṇena gotamena saddhiṃ asmiṃ vacane paṭimantetu’’nti. Dutiyampi kho te brāhmaṇā assalāyanaṃ māṇavaṃ etadavocuṃ – ‘‘ayaṃ, bho assalāyana, samaṇo gotamo cātuvaṇṇiṃ suddhiṃ paññapeti. Etu bhavaṃ assalāyano samaṇena gotamena saddhiṃ asmiṃ vacane paṭimantetu 5. Caritaṃ kho pana bhotā assalāyanena paribbājaka’’nti. Dutiyampi kho assalāyano māṇavo te brāhmaṇe etadavoca – ‘‘samaṇo khalu, bho, gotamo dhammavādī; dhammavādino ca pana duppaṭimantiyā bhavanti . Nāhaṃ sakkomi samaṇena gotamena saddhiṃ asmiṃ vacane paṭimantetu’’nti. Tatiyampi kho te brāhmaṇā assalāyanaṃ māṇavaṃ etadavocuṃ – ‘‘ayaṃ, bho assalāyana, samaṇo gotamo cātuvaṇṇiṃ suddhiṃ paññapeti. Etu bhavaṃ assalāyano samaṇena gotamena saddhiṃ asmiṃ vacane paṭimantetu 6. Caritaṃ kho pana bhotā assalāyanena paribbājakaṃ. Mā bhavaṃ assalāyano ayuddhaparājitaṃ parājayī’’ti.
ဧဝံ ဝုတ္တေ, အသ္သလာယနော မာဏဝော တေ ဗ္ရာဟ္မဏေ ဧတဒဝောစ – ‘‘အဒ္ဓာ ခော အဟံ ဘဝန္တော န လဘာမိ။ သမဏော ခလု, ဘော, ဂောတမော ဓမ္မဝာဒီ; ဓမ္မဝာဒိနော စ ပန ဒုပ္ပဋိမန္တိယာ ဘဝန္တိ။ နာဟံ သက္ကောမိ သမဏေန ဂောတမေန သဒ္ဓိံ အသ္မိံ ဝစနေ ပဋိမန္တေတုန္တိ။ အပိ စာဟံ ဘဝန္တာနံ ဝစနေန ဂမိသ္သာမီ’’တိ။
Evaṃ vutte, assalāyano māṇavo te brāhmaṇe etadavoca – ‘‘addhā kho ahaṃ bhavanto na labhāmi. Samaṇo khalu, bho, gotamo dhammavādī; dhammavādino ca pana duppaṭimantiyā bhavanti. Nāhaṃ sakkomi samaṇena gotamena saddhiṃ asmiṃ vacane paṭimantetunti. Api cāhaṃ bhavantānaṃ vacanena gamissāmī’’ti.
၄၀၂. အထ ခော အသ္သလာယနော မာဏဝော မဟတာ ဗ္ရာဟ္မဏဂဏေန သဒ္ဓိံ ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝတာ သဒ္ဓိံ သမ္မောဒိ။ သမ္မောဒနီယံ ကထံ သာရဏီယံ ဝီတိသာရေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော အသ္သလာယနော မာဏဝော ဘဂဝန္တံ ဧတဒဝောစ – ‘‘ဗ္ရာဟ္မဏာ, ဘော ဂောတမ, ဧဝမာဟံသု – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော; ဗ္ရာဟ္မဏောဝ သုက္ကော ဝဏ္ဏော, ကဏ္ဟော အညော ဝဏ္ဏော; ဗ္ရာဟ္မဏောဝ သုဇ္ဈန္တိ, နော အဗ္ရာဟ္မဏာ; ဗ္ရာဟ္မဏာဝ ဗ္ရဟ္မုနော ပုတ္တာ ဩရသာ မုခတော ဇာတာ ဗ္ရဟ္မဇာ ဗ္ရဟ္မနိမ္မိတာ ဗ္ရဟ္မဒာယာဒာ’တိ။ ဣဓ ဘဝံ ဂောတမော ကိမာဟာ’’တိ? ‘‘ဒိသ္သန္တိ 7 ခော ပန, အသ္သလာယန, ဗ္ရာဟ္မဏာနံ ဗ္ရာဟ္မဏိယော ဥတုနိယောပိ ဂဗ္ဘိနိယောပိ ဝိဇာယမာနာပိ ပာယမာနာပိ။ တေ စ ဗ္ရာဟ္မဏိယောနိဇာဝ သမာနာ ဧဝမာဟံသု – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော; ဗ္ရာဟ္မဏောဝ သုက္ကော ဝဏ္ဏော, ကဏ္ဟော အညော ဝဏ္ဏော; ဗ္ရာဟ္မဏာဝ သုဇ္ဈန္တိ, နော အဗ္ရာဟ္မဏာ; ဗ္ရာဟ္မဏာဝ ဗ္ရဟ္မုနော ပုတ္တာ ဩရသာ မုခတော ဇာတာ ဗ္ရဟ္မဇာ ဗ္ရဟ္မနိမ္မိတာ ဗ္ရဟ္မဒာယာဒာ’’’တိ။ ‘‘ကိဉ္စာပိ ဘဝံ ဂောတမော ဧဝမာဟ, အထ ခ္ဝေတ္ထ ဗ္ရာဟ္မဏာ ဧဝမေတံ မညန္တိ – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော။ပေ.။ ဗ္ရဟ္မဒာယာဒာ’’’တိ။
402. Atha kho assalāyano māṇavo mahatā brāhmaṇagaṇena saddhiṃ yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho assalāyano māṇavo bhagavantaṃ etadavoca – ‘‘brāhmaṇā, bho gotama, evamāhaṃsu – ‘brāhmaṇova seṭṭho vaṇṇo, hīno añño vaṇṇo; brāhmaṇova sukko vaṇṇo, kaṇho añño vaṇṇo; brāhmaṇova sujjhanti, no abrāhmaṇā; brāhmaṇāva brahmuno puttā orasā mukhato jātā brahmajā brahmanimmitā brahmadāyādā’ti. Idha bhavaṃ gotamo kimāhā’’ti? ‘‘Dissanti 8 kho pana, assalāyana, brāhmaṇānaṃ brāhmaṇiyo utuniyopi gabbhiniyopi vijāyamānāpi pāyamānāpi. Te ca brāhmaṇiyonijāva samānā evamāhaṃsu – ‘brāhmaṇova seṭṭho vaṇṇo, hīno añño vaṇṇo; brāhmaṇova sukko vaṇṇo, kaṇho añño vaṇṇo; brāhmaṇāva sujjhanti, no abrāhmaṇā; brāhmaṇāva brahmuno puttā orasā mukhato jātā brahmajā brahmanimmitā brahmadāyādā’’’ti. ‘‘Kiñcāpi bhavaṃ gotamo evamāha, atha khvettha brāhmaṇā evametaṃ maññanti – ‘brāhmaṇova seṭṭho vaṇṇo, hīno añño vaṇṇo…pe… brahmadāyādā’’’ti.
၄၀၃. ‘‘တံ ကိံ မညသိ, အသ္သလာယန, သုတံ တေ – ‘ယောနကမ္ဗောဇေသု အညေသု စ ပစ္စန္တိမေသု ဇနပဒေသု ဒ္ဝေဝ ဝဏ္ဏာ – အယ္ယော စေဝ ဒာသော စ; အယ္ယော ဟုတ္ဝာ ဒာသော ဟောတိ, ဒာသော ဟုတ္ဝာ အယ္ယော ဟောတီ’’’တိ ? ‘‘ဧဝံ, ဘော, သုတံ တံ မေ – ‘ယောနကမ္ဗောဇေသု အညေသု စ ပစ္စန္တိမေသု ဇနပဒေသု ဒ္ဝေဝ ဝဏ္ဏာ – အယ္ယော စေဝ ဒာသော စ; အယ္ယော ဟုတ္ဝာ ဒာသော ဟောတိ, ဒာသော ဟုတ္ဝာ အယ္ယော ဟောတီ’’’တိ။ ‘‘ဧတ္ထ, အသ္သလာယန, ဗ္ရာဟ္မဏာနံ ကိံ ဗလံ, ကော အသ္သာသော ယဒေတ္ထ ဗ္ရာဟ္မဏာ ဧဝမာဟံသု – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော။ပေ.။ ဗ္ရဟ္မဒာယာဒာ’’’တိ? ‘‘ကိဉ္စာပိ ဘဝံ ဂောတမော ဧဝမာဟ, အထ ခ္ဝေတ္ထ ဗ္ရာဟ္မဏာ ဧဝမေတံ မညန္တိ – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော။ပေ.။ ဗ္ရဟ္မဒာယာဒာ’’’တိ။
403. ‘‘Taṃ kiṃ maññasi, assalāyana, sutaṃ te – ‘yonakambojesu aññesu ca paccantimesu janapadesu dveva vaṇṇā – ayyo ceva dāso ca; ayyo hutvā dāso hoti, dāso hutvā ayyo hotī’’’ti ? ‘‘Evaṃ, bho, sutaṃ taṃ me – ‘yonakambojesu aññesu ca paccantimesu janapadesu dveva vaṇṇā – ayyo ceva dāso ca; ayyo hutvā dāso hoti, dāso hutvā ayyo hotī’’’ti. ‘‘Ettha, assalāyana, brāhmaṇānaṃ kiṃ balaṃ, ko assāso yadettha brāhmaṇā evamāhaṃsu – ‘brāhmaṇova seṭṭho vaṇṇo, hīno añño vaṇṇo…pe… brahmadāyādā’’’ti? ‘‘Kiñcāpi bhavaṃ gotamo evamāha, atha khvettha brāhmaṇā evametaṃ maññanti – ‘brāhmaṇova seṭṭho vaṇṇo, hīno añño vaṇṇo…pe… brahmadāyādā’’’ti.
၄၀၄. ‘‘တံ ကိံ မညသိ, အသ္သလာယန, ခတ္တိယောဝ နု ခော ပာဏာတိပာတီ အဒိန္နာဒာယီ ကာမေသုမိစ္ဆာစာရီ မုသာဝာဒီ ပိသုဏဝာစော ဖရုသဝာစော သမ္ဖပ္ပလာပီ အဘိဇ္ဈာလု ဗ္ယာပန္နစိတ္တော မိစ္ဆာဒိဋ္ဌိ ကာယသ္သ ဘေဒာ ပရံ မရဏာ အပာယံ ဒုဂ္ဂတိံ ဝိနိပာတံ နိရယံ ဥပပဇ္ဇေယ္ယ, နော ဗ္ရာဟ္မဏော? ဝေသ္သောဝ နု ခော။ပေ.။ သုဒ္ဒောဝ နု ခော ပာဏာတိပာတီ အဒိန္နာဒာယီ ကာမေသုမိစ္ဆာစာရီ မုသာဝာဒီ ပိသုဏဝာစော ဖရုသဝာစော သမ္ဖပ္ပလာပီ အဘိဇ္ဈာလု ဗ္ယာပန္နစိတ္တော မိစ္ဆာဒိဋ္ဌိ ကာယသ္သ ဘေဒာ ပရံ မရဏာ အပာယံ ဒုဂ္ဂတိံ ဝိနိပာတံ နိရယံ ဥပပဇ္ဇေယ္ယ, နော ဗ္ရာဟ္မဏော’’တိ? ‘‘နော ဟိဒံ, ဘော ဂောတမ။ ခတ္တိယောပိ ဟိ, ဘော ဂောတမ, ပာဏာတိပာတီ အဒိန္နာဒာယီ ကာမေသုမိစ္ဆာစာရီ မုသာဝာဒီ ပိသုဏဝာစော ဖရုသဝာစော သမ္ဖပ္ပလာပီ အဘိဇ္ဈာလု ဗ္ယာပန္နစိတ္တော မိစ္ဆာဒိဋ္ဌိ ကာယသ္သ ဘေဒာ ပရံ မရဏာ အပာယံ ဒုဂ္ဂတိံ ဝိနိပာတံ နိရယံ ဥပပဇ္ဇေယ္ယ။ ဗ္ရာဟ္မဏောပိ ဟိ, ဘော ဂောတမ။ပေ.။ ဝေသ္သောပိ ဟိ, ဘော ဂောတမ။ပေ.။ သုဒ္ဒောပိ ဟိ, ဘော ဂောတမ။ပေ.။ သဗ္ဗေပိ ဟိ, ဘော ဂောတမ, စတ္တာရော ဝဏ္ဏာ ပာဏာတိပာတိနော အဒိန္နာဒာယိနော ကာမေသုမိစ္ဆာစာရိနော မုသာဝာဒိနော ပိသုဏဝာစာ ဖရုသဝာစာ သမ္ဖပ္ပလာပိနော အဘိဇ္ဈာလူ ဗ္ယာပန္နစိတ္တာ မိစ္ဆာဒိဋ္ဌီ ကာယသ္သ ဘေဒာ ပရံ မရဏာ အပာယံ ဒုဂ္ဂတိံ ဝိနိပာတံ နိရယံ ဥပပဇ္ဇေယ္ယု’’န္တိ။ ‘‘ဧတ္ထ, အသ္သလာယန, ဗ္ရာဟ္မဏာနံ ကိံ ဗလံ, ကော အသ္သာသော ယဒေတ္ထ ဗ္ရာဟ္မဏာ ဧဝမာဟံသု – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော။ပေ.။ ဗ္ရဟ္မဒာယာဒာ’’’တိ? ‘‘ကိဉ္စာပိ ဘဝံ ဂောတမော ဧဝမာဟ, အထ ခ္ဝေတ္ထ ဗ္ရာဟ္မဏာ ဧဝမေတံ မညန္တိ – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော။ပေ.။ ဗ္ရဟ္မဒာယာဒာ’’’တိ။
404. ‘‘Taṃ kiṃ maññasi, assalāyana, khattiyova nu kho pāṇātipātī adinnādāyī kāmesumicchācārī musāvādī pisuṇavāco pharusavāco samphappalāpī abhijjhālu byāpannacitto micchādiṭṭhi kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjeyya, no brāhmaṇo? Vessova nu kho…pe… suddova nu kho pāṇātipātī adinnādāyī kāmesumicchācārī musāvādī pisuṇavāco pharusavāco samphappalāpī abhijjhālu byāpannacitto micchādiṭṭhi kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjeyya, no brāhmaṇo’’ti? ‘‘No hidaṃ, bho gotama. Khattiyopi hi, bho gotama, pāṇātipātī adinnādāyī kāmesumicchācārī musāvādī pisuṇavāco pharusavāco samphappalāpī abhijjhālu byāpannacitto micchādiṭṭhi kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjeyya. Brāhmaṇopi hi, bho gotama…pe… vessopi hi, bho gotama…pe… suddopi hi, bho gotama…pe… sabbepi hi, bho gotama, cattāro vaṇṇā pāṇātipātino adinnādāyino kāmesumicchācārino musāvādino pisuṇavācā pharusavācā samphappalāpino abhijjhālū byāpannacittā micchādiṭṭhī kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjeyyu’’nti. ‘‘Ettha, assalāyana, brāhmaṇānaṃ kiṃ balaṃ, ko assāso yadettha brāhmaṇā evamāhaṃsu – ‘brāhmaṇova seṭṭho vaṇṇo, hīno añño vaṇṇo…pe… brahmadāyādā’’’ti? ‘‘Kiñcāpi bhavaṃ gotamo evamāha, atha khvettha brāhmaṇā evametaṃ maññanti – ‘brāhmaṇova seṭṭho vaṇṇo, hīno añño vaṇṇo…pe… brahmadāyādā’’’ti.
၄၀၅. ‘‘တံ ကိံ မညသိ, အသ္သလာယန, ဗ္ရာဟ္မဏောဝ နု ခော ပာဏာတိပာတာ ပဋိဝိရတော အဒိန္နာဒာနာ ပဋိဝိရတော ကာမေသုမိစ္ဆာစာရာ ပဋိဝိရတော မုသာဝာဒာ ပဋိဝိရတော ပိသုဏာယ ဝာစာယ ပဋိဝိရတော ဖရုသာယ ဝာစာယ ပဋိဝိရတော သမ္ဖပ္ပလာပာ ပဋိဝိရတော အနဘိဇ္ဈာလု အဗ္ယာပန္နစိတ္တော သမ္မာဒိဋ္ဌိ ကာယသ္သ ဘေဒာ ပရံ မရဏာ သုဂတိံ သဂ္ဂံ လောကံ ဥပပဇ္ဇေယ္ယ, နော 9 ခတ္တိယော နော ဝေသ္သော, နော သုဒ္ဒော’’တိ? ‘‘နော ဟိဒံ, ဘော ဂောတမ! ခတ္တိယောပိ ဟိ, ဘော ဂောတမ, ပာဏာတိပာတာ ပဋိဝိရတော အဒိန္နာဒာနာ ပဋိဝိရတော ကာမေသုမိစ္ဆာစာရာ ပဋိဝိရတော မုသာဝာဒာ ပဋိဝိရတော ပိသုဏာယ ဝာစာယ ပဋိဝိရတော ဖရုသာယ ဝာစာယ ပဋိဝိရတော သမ္ဖပ္ပလာပာ ပဋိဝိရတော အနဘိဇ္ဈာလု အဗ္ယာပန္နစိတ္တော သမ္မာဒိဋ္ဌိ ကာယသ္သ ဘေဒာ ပရံ မရဏာ သုဂတိံ သဂ္ဂံ လောကံ ဥပပဇ္ဇေယ္ယ။ ဗ္ရာဟ္မဏောပိ ဟိ, ဘော ဂောတမ။ပေ.။ ဝေသ္သောပိ ဟိ, ဘော ဂောတမ။ပေ.။ သုဒ္ဒောပိ ဟိ, ဘော ဂောတမ။ပေ.။ သဗ္ဗေပိ ဟိ, ဘော ဂောတမ, စတ္တာရော ဝဏ္ဏာ ပာဏာတိပာတာ ပဋိဝိရတာ အဒိန္နာဒာနာ ပဋိဝိရတာ ကာမေသုမိစ္ဆာစာရာ ပဋိဝိရတာ မုသာဝာဒာ ပဋိဝိရတာ ပိသုဏာယ ဝာစာယ ပဋိဝိရတာ ဖရုသာယ ဝာစာယ ပဋိဝိရတာ သမ္ဖပ္ပလာပာ ပဋိဝိရတာ အနဘိဇ္ဈာလူ အဗ္ယာပန္နစိတ္တာ သမ္မာဒိဋ္ဌီ ကာယသ္သ ဘေဒာ ပရံ မရဏာ သုဂတိံ သဂ္ဂံ လောကံ ဥပပဇ္ဇေယ္ယု’’န္တိ။ ‘‘ဧတ္ထ, အသ္သလာယန , ဗ္ရာဟ္မဏာနံ ကိံ ဗလံ, ကော အသ္သာသော ယဒေတ္ထ ဗ္ရာဟ္မဏာ ဧဝမာဟံသု – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော။ပေ.။ ဗ္ရဟ္မဒာယာဒာ’’’တိ? ‘‘ကိဉ္စာပိ ဘဝံ ဂောတမော ဧဝမာဟ, အထ ခ္ဝေတ္ထ ဗ္ရာဟ္မဏာ ဧဝမေတံ မညန္တိ – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော။ပေ.။ ဗ္ရဟ္မဒာယာဒာ’’’တိ။
405. ‘‘Taṃ kiṃ maññasi, assalāyana, brāhmaṇova nu kho pāṇātipātā paṭivirato adinnādānā paṭivirato kāmesumicchācārā paṭivirato musāvādā paṭivirato pisuṇāya vācāya paṭivirato pharusāya vācāya paṭivirato samphappalāpā paṭivirato anabhijjhālu abyāpannacitto sammādiṭṭhi kāyassa bhedā paraṃ maraṇā sugatiṃ saggaṃ lokaṃ upapajjeyya, no 10 khattiyo no vesso, no suddo’’ti? ‘‘No hidaṃ, bho gotama! Khattiyopi hi, bho gotama, pāṇātipātā paṭivirato adinnādānā paṭivirato kāmesumicchācārā paṭivirato musāvādā paṭivirato pisuṇāya vācāya paṭivirato pharusāya vācāya paṭivirato samphappalāpā paṭivirato anabhijjhālu abyāpannacitto sammādiṭṭhi kāyassa bhedā paraṃ maraṇā sugatiṃ saggaṃ lokaṃ upapajjeyya. Brāhmaṇopi hi, bho gotama…pe… vessopi hi, bho gotama…pe… suddopi hi, bho gotama…pe… sabbepi hi, bho gotama, cattāro vaṇṇā pāṇātipātā paṭiviratā adinnādānā paṭiviratā kāmesumicchācārā paṭiviratā musāvādā paṭiviratā pisuṇāya vācāya paṭiviratā pharusāya vācāya paṭiviratā samphappalāpā paṭiviratā anabhijjhālū abyāpannacittā sammādiṭṭhī kāyassa bhedā paraṃ maraṇā sugatiṃ saggaṃ lokaṃ upapajjeyyu’’nti. ‘‘Ettha, assalāyana , brāhmaṇānaṃ kiṃ balaṃ, ko assāso yadettha brāhmaṇā evamāhaṃsu – ‘brāhmaṇova seṭṭho vaṇṇo, hīno añño vaṇṇo…pe… brahmadāyādā’’’ti? ‘‘Kiñcāpi bhavaṃ gotamo evamāha, atha khvettha brāhmaṇā evametaṃ maññanti – ‘brāhmaṇova seṭṭho vaṇṇo, hīno añño vaṇṇo…pe… brahmadāyādā’’’ti.
၄၀၆. ‘‘တံ ကိံ မညသိ, အသ္သလာယန, ဗ္ရာဟ္မဏောဝ နု ခော ပဟောတိ အသ္မိံ ပဒေသေ အဝေရံ အဗ္ယာဗဇ္ဈံ မေတ္တစိတ္တံ ဘာဝေတုံ, နော ခတ္တိယော, နော ဝေသ္သော နော သုဒ္ဒော’’တိ? ‘‘နော ဟိဒံ, ဘော ဂောတမ! ခတ္တိယောပိ ဟိ, ဘော ဂောတမ, ပဟောတိ အသ္မိံ ပဒေသေ အဝေရံ အဗ္ယာဗဇ္ဈံ မေတ္တစိတ္တံ ဘာဝေတုံ; ဗ္ရာဟ္မဏောပိ ဟိ, ဘော ဂောတမ။ ဝေသ္သောပိ ဟိ , ဘော ဂောတမ။ သုဒ္ဒောပိ ဟိ, ဘော ဂောတမ။ သဗ္ဗေပိ ဟိ, ဘော ဂောတမ, စတ္တာရော ဝဏ္ဏာ ပဟောန္တိ အသ္မိံ ပဒေသေ အဝေရံ အဗ္ယာဗဇ္ဈံ မေတ္တစိတ္တံ ဘာဝေတု’’န္တိ။ ‘‘ဧတ္ထ, အသ္သလာယန, ဗ္ရာဟ္မဏာနံ ကိံ ဗလံ, ကော အသ္သာသော ယဒေတ္ထ ဗ္ရာဟ္မဏာ ဧဝမာဟံသု – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော။ပေ.။ ဗ္ရဟ္မဒာယာဒာ’’’တိ? ‘‘ကိဉ္စာပိ ဘဝံ ဂောတမော ဧဝမာဟ, အထ ခ္ဝေတ္ထ ဗ္ရာဟ္မဏာ ဧဝမေတံ မညန္တိ – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော။ပေ.။ ဗ္ရဟ္မဒာယာဒာ’’’တိ။
406. ‘‘Taṃ kiṃ maññasi, assalāyana, brāhmaṇova nu kho pahoti asmiṃ padese averaṃ abyābajjhaṃ mettacittaṃ bhāvetuṃ, no khattiyo, no vesso no suddo’’ti? ‘‘No hidaṃ, bho gotama! Khattiyopi hi, bho gotama, pahoti asmiṃ padese averaṃ abyābajjhaṃ mettacittaṃ bhāvetuṃ; brāhmaṇopi hi, bho gotama… vessopi hi , bho gotama… suddopi hi, bho gotama… sabbepi hi, bho gotama, cattāro vaṇṇā pahonti asmiṃ padese averaṃ abyābajjhaṃ mettacittaṃ bhāvetu’’nti. ‘‘Ettha, assalāyana, brāhmaṇānaṃ kiṃ balaṃ, ko assāso yadettha brāhmaṇā evamāhaṃsu – ‘brāhmaṇova seṭṭho vaṇṇo, hīno añño vaṇṇo…pe… brahmadāyādā’’’ti? ‘‘Kiñcāpi bhavaṃ gotamo evamāha, atha khvettha brāhmaṇā evametaṃ maññanti – ‘brāhmaṇova seṭṭho vaṇṇo, hīno añño vaṇṇo…pe… brahmadāyādā’’’ti.
၄၀၇. ‘‘တံ ကိံ မညသိ, အသ္သလာယန, ဗ္ရာဟ္မဏောဝ နု ခော ပဟောတိ သောတ္တိသိနာနိံ အာဒာယ နဒိံ ဂန္တ္ဝာ ရဇောဇလ္လံ ပဝာဟေတုံ, နော ခတ္တိယော, နော ဝေသ္သော, နော သုဒ္ဒော’’တိ? ‘‘နော ဟိဒံ, ဘော ဂောတမ! ခတ္တိယောပိ ဟိ, ဘော ဂောတမ, ပဟောတိ သောတ္တိသိနာနိံ အာဒာယ နဒိံ ဂန္တ္ဝာ ရဇောဇလ္လံ ပဝာဟေတုံ, ဗ္ရာဟ္မဏောပိ ဟိ, ဘော ဂောတမ။ ဝေသ္သောပိ ဟိ, ဘော ဂောတမ။ သုဒ္ဒောပိ ဟိ, ဘော ဂောတမ။ သဗ္ဗေပိ ဟိ, ဘော ဂောတမ, စတ္တာရော ဝဏ္ဏာ ပဟောန္တိ သောတ္တိသိနာနိံ အာဒာယ နဒိံ ဂန္တ္ဝာ ရဇောဇလ္လံ ပဝာဟေတု’’န္တိ။ ‘‘ဧတ္ထ, အသ္သလာယန, ဗ္ရာဟ္မဏာနံ ကိံ ဗလံ, ကော အသ္သာသော ယဒေတ္ထ ဗ္ရာဟ္မဏာ ဧဝမာဟံသု – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော။ပေ.။ ဗ္ရဟ္မဒာယာဒာ’’’တိ? ‘‘ကိဉ္စာပိ ဘဝံ ဂောတမော ဧဝမာဟ, အထ ခ္ဝေတ္ထ ဗ္ရာဟ္မဏာ ဧဝမေတံ မညန္တိ – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော။ပေ.။ ဗ္ရဟ္မဒာယာဒာ’’’တိ။
407. ‘‘Taṃ kiṃ maññasi, assalāyana, brāhmaṇova nu kho pahoti sottisināniṃ ādāya nadiṃ gantvā rajojallaṃ pavāhetuṃ, no khattiyo, no vesso, no suddo’’ti? ‘‘No hidaṃ, bho gotama! Khattiyopi hi, bho gotama, pahoti sottisināniṃ ādāya nadiṃ gantvā rajojallaṃ pavāhetuṃ, brāhmaṇopi hi, bho gotama… vessopi hi, bho gotama… suddopi hi, bho gotama… sabbepi hi, bho gotama, cattāro vaṇṇā pahonti sottisināniṃ ādāya nadiṃ gantvā rajojallaṃ pavāhetu’’nti. ‘‘Ettha, assalāyana, brāhmaṇānaṃ kiṃ balaṃ, ko assāso yadettha brāhmaṇā evamāhaṃsu – ‘brāhmaṇova seṭṭho vaṇṇo, hīno añño vaṇṇo…pe… brahmadāyādā’’’ti? ‘‘Kiñcāpi bhavaṃ gotamo evamāha, atha khvettha brāhmaṇā evametaṃ maññanti – ‘brāhmaṇova seṭṭho vaṇṇo, hīno añño vaṇṇo…pe… brahmadāyādā’’’ti.
၄၀၈. ‘‘တံ ကိံ မညသိ, အသ္သလာယန, ဣဓ ရာဇာ ခတ္တိယော မုဒ္ဓာဝသိတ္တော နာနာဇစ္စာနံ ပုရိသာနံ ပုရိသသတံ သန္နိပာတေယ္ယ – ‘အာယန္တု ဘောန္တော ယေ တတ္ထ ခတ္တိယကုလာ ဗ္ရာဟ္မဏကုလာ ရာဇညကုလာ ဥပ္ပန္နာ, သာကသ္သ ဝာ သာလသ္သ ဝာ 11 သလဠသ္သ ဝာ စန္ဒနသ္သ ဝာ ပဒုမကသ္သ ဝာ ဥတ္တရာရဏိံ အာဒာယ, အဂ္ဂိံ အဘိနိဗ္ဗတ္တေန္တု, တေဇော ပာတုကရောန္တု။ အာယန္တု ပန ဘောန္တော ယေ တတ္ထ စဏ္ဍာလကုလာ နေသာဒကုလာ ဝေနကုလာ 12 ရထကာရကုလာ ပုက္ကုသကုလာ ဥပ္ပန္နာ, သာပာနဒောဏိယာ ဝာ သူကရဒောဏိယာ ဝာ ရဇကဒောဏိယာ ဝာ ဧရဏ္ဍကဋ္ဌသ္သ ဝာ ဥတ္တရာရဏိံ အာဒာယ, အဂ္ဂိံ အဘိနိဗ္ဗတ္တေန္တု, တေဇော ပာတုကရောန္တူ’တိ။
408. ‘‘Taṃ kiṃ maññasi, assalāyana, idha rājā khattiyo muddhāvasitto nānājaccānaṃ purisānaṃ purisasataṃ sannipāteyya – ‘āyantu bhonto ye tattha khattiyakulā brāhmaṇakulā rājaññakulā uppannā, sākassa vā sālassa vā 13 salaḷassa vā candanassa vā padumakassa vā uttarāraṇiṃ ādāya, aggiṃ abhinibbattentu, tejo pātukarontu. Āyantu pana bhonto ye tattha caṇḍālakulā nesādakulā venakulā 14 rathakārakulā pukkusakulā uppannā, sāpānadoṇiyā vā sūkaradoṇiyā vā rajakadoṇiyā vā eraṇḍakaṭṭhassa vā uttarāraṇiṃ ādāya, aggiṃ abhinibbattentu, tejo pātukarontū’ti.
‘‘တံ ကိံ မညသိ, အသ္သလာယန, ယော ဧဝံ နု ခော သော 15 ခတ္တိယကုလာ ဗ္ရာဟ္မဏကုလာ ရာဇညကုလာ ဥပ္ပန္နေဟိ သာကသ္သ ဝာ သာလသ္သ ဝာ သလဠသ္သ ဝာ စန္ဒနသ္သ ဝာ ပဒုမကသ္သ ဝာ ဥတ္တရာရဏိံ အာဒာယ အဂ္ဂိ အဘိနိဗ္ဗတ္တော, တေဇော ပာတုကတော, သော ဧဝ နု ခ္ဝာသ္သ အဂ္ဂိ အစ္စိမာ စေဝ 16 ဝဏ္ဏဝာ 17 စ ပဘသ္သရော စ, တေန စ သက္ကာ အဂ္ဂိနာ အဂ္ဂိကရဏီယံ ကာတုံ; ယော ပန သော စဏ္ဍာလကုလာ နေသာဒကုလာ ဝေနကုလာ ရထကာရကုလာ ပုက္ကုသကုလာ ဥပ္ပန္နေဟိ သာပာနဒောဏိယာ ဝာ သူကရဒောဏိယာ ဝာ ရဇကဒောဏိယာ ဝာ ဧရဏ္ဍကဋ္ဌသ္သ ဝာ ဥတ္တရာရဏိံ အာဒာယ အဂ္ဂိ အဘိနိဗ္ဗတ္တော, တေဇော ပာတုကတော သ္ဝာသ္သ အဂ္ဂိ န စေဝ အစ္စိမာ န စ ဝဏ္ဏဝာ န စ ပဘသ္သရော, န စ တေန သက္ကာ အဂ္ဂိနာ အဂ္ဂိကရဏီယံ ကာတု’’န္တိ? ‘‘နော ဟိဒံ, ဘော ဂောတမ! ယောပိ ဟိ သော 18, ဘော ဂောတမ, ခတ္တိယကုလာ ဗ္ရာဟ္မဏကုလာ ရာဇညကုလာ ဥပ္ပန္နေဟိ သာကသ္သ ဝာ သာလသ္သ ဝာ သလဠသ္သ ဝာ စန္ဒနသ္သ ဝာ ပဒုမကသ္သ ဝာ ဥတ္တရာရဏိံ အာဒာယ အဂ္ဂိ အဘိနိဗ္ဗတ္တော, တေဇော ပာတုကတော သ္ဝာသ္သ 19 အဂ္ဂိ အစ္စိမာ စေဝ ဝဏ္ဏဝာ စ ပဘသ္သရော စ, တေန စ သက္ကာ အဂ္ဂိနာ အဂ္ဂိကရဏီယံ ကာတုံ; ယောပိ သော စဏ္ဍာလကုလာ နေသာဒကုလာ ဝေနကုလာ ရထကာရကုလာ ပုက္ကုသကုလာ ဥပ္ပန္နေဟိ သာပာနဒောဏိယာ ဝာ သူကရဒောဏိယာ ဝာ ရဇကဒောဏိယာ ဝာ ဧရဏ္ဍကဋ္ဌသ္သ ဝာ ဥတ္တရာရဏိံ အာဒာယ အဂ္ဂိ အဘိနိဗ္ဗတ္တော, တေဇော ပာတုကတော, သ္ဝာသ္သ အဂ္ဂိ အစ္စိမာ စေဝ ဝဏ္ဏဝာ စ ပဘသ္သရော စ, တေန စ သက္ကာ အဂ္ဂိနာ အဂ္ဂိကရဏီယံ ကာတုံ။ သဗ္ဗောပိ ဟိ, ဘော ဂောတမ, အဂ္ဂိ အစ္စိမာ စေဝ ဝဏ္ဏဝာ စ ပဘသ္သရော စ, သဗ္ဗေနပိ သက္ကာ အဂ္ဂိနာ အဂ္ဂိကရဏီယံ ကာတု’’န္တိ။ ‘‘ဧတ္ထ, အသ္သလာယန, ဗ္ရာဟ္မဏာနံ ကိံ ဗလံ, ကော အသ္သာသော ယဒေတ္ထ ဗ္ရာဟ္မဏာ ဧဝမာဟံသု – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော; ဗ္ရာဟ္မဏောဝ သုက္ကော ဝဏ္ဏော, ကဏ္ဟော အညော ဝဏ္ဏော; ဗ္ရာဟ္မဏာဝ သုဇ္ဈန္တိ, နော အဗ္ရာဟ္မဏာ; ဗ္ရာဟ္မဏာဝ ဗ္ရဟ္မုနော ပုတ္တာ ဩရသာ မုခတော ဇာတာ ဗ္ရဟ္မဇာ ဗ္ရဟ္မနိမ္မိတာ ဗ္ရဟ္မဒာယာဒာ’’’တိ? ‘‘ကိဉ္စာပိ ဘဝံ ဂောတမော ဧဝမာဟ, အထ ခ္ဝေတ္ထ ဗ္ရာဟ္မဏာ ဧဝမေတံ မညန္တိ – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော။ပေ.။ ဗ္ရဟ္မဒာယာဒာ’’’တိ။
‘‘Taṃ kiṃ maññasi, assalāyana, yo evaṃ nu kho so 20 khattiyakulā brāhmaṇakulā rājaññakulā uppannehi sākassa vā sālassa vā salaḷassa vā candanassa vā padumakassa vā uttarāraṇiṃ ādāya aggi abhinibbatto, tejo pātukato, so eva nu khvāssa aggi accimā ceva 21 vaṇṇavā 22 ca pabhassaro ca, tena ca sakkā agginā aggikaraṇīyaṃ kātuṃ; yo pana so caṇḍālakulā nesādakulā venakulā rathakārakulā pukkusakulā uppannehi sāpānadoṇiyā vā sūkaradoṇiyā vā rajakadoṇiyā vā eraṇḍakaṭṭhassa vā uttarāraṇiṃ ādāya aggi abhinibbatto, tejo pātukato svāssa aggi na ceva accimā na ca vaṇṇavā na ca pabhassaro, na ca tena sakkā agginā aggikaraṇīyaṃ kātu’’nti? ‘‘No hidaṃ, bho gotama! Yopi hi so 23, bho gotama, khattiyakulā brāhmaṇakulā rājaññakulā uppannehi sākassa vā sālassa vā salaḷassa vā candanassa vā padumakassa vā uttarāraṇiṃ ādāya aggi abhinibbatto, tejo pātukato svāssa 24 aggi accimā ceva vaṇṇavā ca pabhassaro ca, tena ca sakkā agginā aggikaraṇīyaṃ kātuṃ; yopi so caṇḍālakulā nesādakulā venakulā rathakārakulā pukkusakulā uppannehi sāpānadoṇiyā vā sūkaradoṇiyā vā rajakadoṇiyā vā eraṇḍakaṭṭhassa vā uttarāraṇiṃ ādāya aggi abhinibbatto, tejo pātukato, svāssa aggi accimā ceva vaṇṇavā ca pabhassaro ca, tena ca sakkā agginā aggikaraṇīyaṃ kātuṃ. Sabbopi hi, bho gotama, aggi accimā ceva vaṇṇavā ca pabhassaro ca, sabbenapi sakkā agginā aggikaraṇīyaṃ kātu’’nti. ‘‘Ettha, assalāyana, brāhmaṇānaṃ kiṃ balaṃ, ko assāso yadettha brāhmaṇā evamāhaṃsu – ‘brāhmaṇova seṭṭho vaṇṇo, hīno añño vaṇṇo; brāhmaṇova sukko vaṇṇo, kaṇho añño vaṇṇo; brāhmaṇāva sujjhanti, no abrāhmaṇā; brāhmaṇāva brahmuno puttā orasā mukhato jātā brahmajā brahmanimmitā brahmadāyādā’’’ti? ‘‘Kiñcāpi bhavaṃ gotamo evamāha, atha khvettha brāhmaṇā evametaṃ maññanti – ‘brāhmaṇova seṭṭho vaṇṇo, hīno añño vaṇṇo…pe… brahmadāyādā’’’ti.
၄၀၉. ‘‘တံ ကိံ မညသိ, အသ္သလာယန, ဣဓ ခတ္တိယကုမာရော ဗ္ရာဟ္မဏကညာယ သဒ္ဓိံ သံဝာသံ ကပ္ပေယ္ယ, တေသံ သံဝာသမန္ဝာယ ပုတ္တော ဇာယေထ; ယော သော ခတ္တိယကုမာရေန ဗ္ရာဟ္မဏကညာယ ပုတ္တော ဥပ္ပန္နော, သိယာ သော မာတုပိ သဒိသော ပိတုပိ သဒိသော, ‘ခတ္တိယော’တိပိ ဝတ္တဗ္ဗော ‘ဗ္ရာဟ္မဏော’တိပိ ဝတ္တဗ္ဗော’’တိ? ‘‘ယော သော, ဘော ဂောတမ, ခတ္တိယကုမာရေန ဗ္ရာဟ္မဏကညာယ ပုတ္တော ဥပ္ပန္နော, သိယာ သော မာတုပိ သဒိသော ပိတုပိ သဒိသော, ‘ခတ္တိယော’တိပိ ဝတ္တဗ္ဗော ‘ဗ္ရာဟ္မဏော’တိပိ ဝတ္တဗ္ဗော’’တိ။
409. ‘‘Taṃ kiṃ maññasi, assalāyana, idha khattiyakumāro brāhmaṇakaññāya saddhiṃ saṃvāsaṃ kappeyya, tesaṃ saṃvāsamanvāya putto jāyetha; yo so khattiyakumārena brāhmaṇakaññāya putto uppanno, siyā so mātupi sadiso pitupi sadiso, ‘khattiyo’tipi vattabbo ‘brāhmaṇo’tipi vattabbo’’ti? ‘‘Yo so, bho gotama, khattiyakumārena brāhmaṇakaññāya putto uppanno, siyā so mātupi sadiso pitupi sadiso, ‘khattiyo’tipi vattabbo ‘brāhmaṇo’tipi vattabbo’’ti.
‘‘တံ ကိံ မညသိ, အသ္သလာယန, ဣဓ ဗ္ရာဟ္မဏကုမာရော ခတ္တိယကညာယ သဒ္ဓိံ သံဝာသံ ကပ္ပေယ္ယ, တေသံ သံဝာသမန္ဝာယ ပုတ္တော ဇာယေထ; ယော သော ဗ္ရာဟ္မဏကုမာရေန ခတ္တိယကညာယ ပုတ္တော ဥပ္ပန္နော, သိယာ သော မာတုပိ သဒိသော ပိတုပိ သဒိသော, ‘ခတ္တိယော’တိပိ ဝတ္တဗ္ဗော ‘ဗ္ရာဟ္မဏော’တိပိ ဝတ္တဗ္ဗော’’တိ? ‘‘ယော သော, ဘော ဂောတမ, ဗ္ရာဟ္မဏကုမာရေန ခတ္တိယကညာယ ပုတ္တော ဥပ္ပန္နော, သိယာ သော မာတုပိ သဒိသော ပိတုပိ သဒိသော, ‘ခတ္တိယော’တိပိ ဝတ္တဗ္ဗော ‘ဗ္ရာဟ္မဏော’တိပိ ဝတ္တဗ္ဗော’’တိ။
‘‘Taṃ kiṃ maññasi, assalāyana, idha brāhmaṇakumāro khattiyakaññāya saddhiṃ saṃvāsaṃ kappeyya, tesaṃ saṃvāsamanvāya putto jāyetha; yo so brāhmaṇakumārena khattiyakaññāya putto uppanno, siyā so mātupi sadiso pitupi sadiso, ‘khattiyo’tipi vattabbo ‘brāhmaṇo’tipi vattabbo’’ti? ‘‘Yo so, bho gotama, brāhmaṇakumārena khattiyakaññāya putto uppanno, siyā so mātupi sadiso pitupi sadiso, ‘khattiyo’tipi vattabbo ‘brāhmaṇo’tipi vattabbo’’ti.
‘‘တံ ကိံ မညသိ, အသ္သလာယန ဣဓ ဝဠဝံ ဂဒ္ရဘေန သမ္ပယောဇေယ္ယုံ 25, တေသံ သမ္ပယောဂမန္ဝာယ ကိသောရော ဇာယေထ; ယော သော ဝဠဝာယ ဂဒ္ရဘေန ကိသောရော ဥပ္ပန္နော, သိယာ သော မာတုပိ သဒိသော ပိတုပိ သဒိသော, ‘အသ္သော’တိပိ ဝတ္တဗ္ဗော ‘ဂဒ္ရဘော’တိပိ ဝတ္တဗ္ဗော’’တိ? ‘‘ကုဏ္ဍဉ္ဟိ သော 26, ဘော ဂောတမ, အသ္သတရော ဟောတိ။ ဣဒံ ဟိသ္သ , ဘော ဂောတမ, နာနာကရဏံ ပသ္သာမိ; အမုတ္ရ စ ပနေသာနံ န ကိဉ္စိ နာနာကရဏံ ပသ္သာမီ’’တိ။
‘‘Taṃ kiṃ maññasi, assalāyana idha vaḷavaṃ gadrabhena sampayojeyyuṃ 27, tesaṃ sampayogamanvāya kisoro jāyetha; yo so vaḷavāya gadrabhena kisoro uppanno, siyā so mātupi sadiso pitupi sadiso, ‘asso’tipi vattabbo ‘gadrabho’tipi vattabbo’’ti? ‘‘Kuṇḍañhi so 28, bho gotama, assataro hoti. Idaṃ hissa , bho gotama, nānākaraṇaṃ passāmi; amutra ca panesānaṃ na kiñci nānākaraṇaṃ passāmī’’ti.
‘‘တံ ကိံ မညသိ, အသ္သလာယန, ဣဓာသ္သု ဒ္ဝေ မာဏဝကာ ဘာတရော သဥဒရိယာ, ဧကော အဇ္ဈာယကော ဥပနီတော ဧကော အနဇ္ဈာယကော အနုပနီတော။ ကမေတ္ထ ဗ္ရာဟ္မဏာ ပဌမံ ဘောဇေယ္ယုံ သဒ္ဓေ ဝာ ထာလိပာကေ ဝာ ယညေ ဝာ ပာဟုနေ ဝာ’’တိ? ‘‘ယော သော, ဘော ဂောတမ, မာဏဝကော အဇ္ဈာယကော ဥပနီတော တမေတ္ထ ဗ္ရာဟ္မဏာ ပဌမံ ဘောဇေယ္ယုံ သဒ္ဓေ ဝာ ထာလိပာကေ ဝာ ယညေ ဝာ ပာဟုနေ ဝာ။ ကိဉ္ဟိ, ဘော ဂောတမ, အနဇ္ဈာယကေ အနုပနီတေ ဒိန္နံ မဟပ္ဖလံ ဘဝိသ္သတီ’’တိ?
‘‘Taṃ kiṃ maññasi, assalāyana, idhāssu dve māṇavakā bhātaro saudariyā, eko ajjhāyako upanīto eko anajjhāyako anupanīto. Kamettha brāhmaṇā paṭhamaṃ bhojeyyuṃ saddhe vā thālipāke vā yaññe vā pāhune vā’’ti? ‘‘Yo so, bho gotama, māṇavako ajjhāyako upanīto tamettha brāhmaṇā paṭhamaṃ bhojeyyuṃ saddhe vā thālipāke vā yaññe vā pāhune vā. Kiñhi, bho gotama, anajjhāyake anupanīte dinnaṃ mahapphalaṃ bhavissatī’’ti?
‘‘တံ ကိံ မညသိ, အသ္သလာယန, ဣဓာသ္သု ဒ္ဝေ မာဏဝကာ ဘာတရော သဥဒရိယာ, ဧကော အဇ္ဈာယကော ဥပနီတော ဒုသ္သီလော ပာပဓမ္မော, ဧကော အနဇ္ဈာယကော အနုပနီတော သီလဝာ ကလ္ယာဏဓမ္မော။ ကမေတ္ထ ဗ္ရာဟ္မဏာ ပဌမံ ဘောဇေယ္ယုံ သဒ္ဓေ ဝာ ထာလိပာကေ ဝာ ယညေ ဝာ ပာဟုနေ ဝာ’’တိ? ‘‘ယော သော, ဘော ဂောတမ, မာဏဝကော အနဇ္ဈာယကော အနုပနီတော သီလဝာ ကလ္ယာဏဓမ္မော တမေတ္ထ ဗ္ရာဟ္မဏာ ပဌမံ ဘောဇေယ္ယုံ သဒ္ဓေ ဝာ ထာလိပာကေ ဝာ ယညေ ဝာ ပာဟုနေ ဝာ။ ကိဉ္ဟိ, ဘော ဂောတမ, ဒုသ္သီလေ ပာပဓမ္မေ ဒိန္နံ မဟပ္ဖလံ ဘဝိသ္သတီ’’တိ?
‘‘Taṃ kiṃ maññasi, assalāyana, idhāssu dve māṇavakā bhātaro saudariyā, eko ajjhāyako upanīto dussīlo pāpadhammo, eko anajjhāyako anupanīto sīlavā kalyāṇadhammo. Kamettha brāhmaṇā paṭhamaṃ bhojeyyuṃ saddhe vā thālipāke vā yaññe vā pāhune vā’’ti? ‘‘Yo so, bho gotama, māṇavako anajjhāyako anupanīto sīlavā kalyāṇadhammo tamettha brāhmaṇā paṭhamaṃ bhojeyyuṃ saddhe vā thālipāke vā yaññe vā pāhune vā. Kiñhi, bho gotama, dussīle pāpadhamme dinnaṃ mahapphalaṃ bhavissatī’’ti?
‘‘ပုဗ္ဗေ ခော တ္ဝံ, အသ္သလာယန, ဇာတိံ အဂမာသိ; ဇာတိံ ဂန္တ္ဝာ မန္တေ အဂမာသိ; မန္တေ ဂန္တ္ဝာ တပေ အဂမာသိ; တပေ ဂန္တ္ဝာ 29 စာတုဝဏ္ဏိံ သုဒ္ဓိံ ပစ္စာဂတော, ယမဟံ ပညပေမီ’’တိ။ ဧဝံ ဝုတ္တေ, အသ္သလာယနော မာဏဝော တုဏ္ဟီဘူတော မင္ကုဘူတော ပတ္တက္ခန္ဓော အဓောမုခော ပဇ္ဈာယန္တော အပ္ပဋိဘာနော နိသီဒိ။
‘‘Pubbe kho tvaṃ, assalāyana, jātiṃ agamāsi; jātiṃ gantvā mante agamāsi; mante gantvā tape agamāsi; tape gantvā 30 cātuvaṇṇiṃ suddhiṃ paccāgato, yamahaṃ paññapemī’’ti. Evaṃ vutte, assalāyano māṇavo tuṇhībhūto maṅkubhūto pattakkhandho adhomukho pajjhāyanto appaṭibhāno nisīdi.
၄၁၀. အထ ခော ဘဂဝာ အသ္သလာယနံ မာဏဝံ တုဏ္ဟီဘူတံ မင္ကုဘူတံ ပတ္တက္ခန္ဓံ အဓောမုခံ ပဇ္ဈာယန္တံ အပ္ပဋိဘာနံ ဝိဒိတ္ဝာ အသ္သလာယနံ မာဏဝံ ဧတဒဝောစ – ‘‘ဘူတပုဗ္ဗံ, အသ္သလာယန, သတ္တန္နံ ဗ္ရာဟ္မဏိသီနံ အရညာယတနေ ပဏ္ဏကုဋီသု သမ္မန္တာနံ 31 ဧဝရူပံ ပာပကံ ဒိဋ္ဌိဂတံ ဥပ္ပန္နံ ဟောတိ – ‘ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော။ပေ.။ ဗ္ရဟ္မဒာယာဒာ’တိ။ အသ္သောသိ ခော , အသ္သလာယန, အသိတော ဒေဝလော ဣသိ – ‘သတ္တန္နံ ကိရ ဗ္ရာဟ္မဏိသီနံ အရညာယတနေ ပဏ္ဏကုဋီသု သမ္မန္တာနံ ဧဝရူပံ ပာပကံ ဒိဋ္ဌိဂတံ ဥပ္ပန္နံ – ဗ္ရာဟ္မဏောဝ သေဋ္ဌော ဝဏ္ဏော။ပေ.။ ဗ္ရဟ္မဒာယာဒာ’တိ။ အထ ခော, အသ္သလာယန, အသိတော ဒေဝလော ဣသိ ကေသမသ္သုံ ကပ္ပေတ္ဝာ မဉ္ဇိဋ္ဌဝဏ္ဏာနိ ဒုသ္သာနိ နိဝာသေတ္ဝာ ပဋလိယော 32 ဥပာဟနာ အာရုဟိတ္ဝာ ဇာတရူပမယံ ဒဏ္ဍံ ဂဟေတ္ဝာ သတ္တန္နံ ဗ္ရာဟ္မဏိသီနံ ပတ္ထဏ္ဍိလေ ပာတုရဟောသိ။ အထ ခော, အသ္သလာယန, အသိတော ဒေဝလော ဣသိ သတ္တန္နံ ဗ္ရာဟ္မဏိသီနံ ပတ္ထဏ္ဍိလေ စင္ကမမာနော ဧဝမာဟ – ‘ဟန္ဒ, ကော နု ခော ဣမေ ဘဝန္တော ဗ္ရာဟ္မဏိသယော ဂတာ 33; ဟန္ဒ, ကော နု ခော ဣမေ ဘဝန္တော ဗ္ရာဟ္မဏိသယော ဂတာ’တိ? အထ ခော, အသ္သလာယန, သတ္တန္နံ ဗ္ရာဟ္မဏိသီနံ ဧတဒဟောသိ – ‘ကော နာယံ ဂာမဏ္ဍလရူပော ဝိယ သတ္တန္နံ ဗ္ရာဟ္မဏိသီနံ ပတ္ထဏ္ဍိလေ စင္ကမမာနော ဧဝမာဟ – ‘ဟန္ဒ, ကော နု ခော ဣမေ ဘဝန္တော ဗ္ရာဟ္မဏိသယော ဂတာ; ဟန္ဒ, ကော နု ခော ဣမေ ဘဝန္တော ဗ္ရာဟ္မဏိသယော ဂတာတိ? ဟန္ဒ, နံ အဘိသပာမာ’တိ။ အထ ခော, အသ္သလာယန, သတ္တ ဗ္ရာဟ္မဏိသယော အသိတံ ဒေဝလံ ဣသိံ အဘိသပိံသု – ‘ဘသ္မာ, ဝသလ 34, ဟောဟိ; ဘသ္မာ, ဝသလ, ဟောဟီ’တိ 35။ ယထာ ယထာ ခော, အသ္သလာယန, သတ္တ ဗ္ရာဟ္မဏိသယော အသိတံ ဒေဝလံ ဣသိံ အဘိသပိံသု တထာ တထာ အသိတော ဒေဝလော ဣသိ အဘိရူပတရော စေဝ ဟောတိ ဒသ္သနီယတရော စ ပာသာဒိကတရော စ။ အထ ခော, အသ္သလာယန, သတ္တန္နံ ဗ္ရာဟ္မဏိသီနံ ဧတဒဟောသိ – ‘မောဃံ ဝတ နော တပော, အဖလံ ဗ္ရဟ္မစရိယံ။ မယဉ္ဟိ ပုဗ္ဗေ ယံ အဘိသပာမ – ဘသ္မာ, ဝသလ, ဟောဟိ; ဘသ္မာ, ဝသလ, ဟောဟီတိ ဘသ္မာဝ ဘဝတိ ဧကစ္စော။ ဣမံ ပန မယံ ယထာ ယထာ အဘိသပာမ တထာ တထာ အဘိရူပတရော စေဝ ဟောတိ ဒသ္သနီယတရော စ ပာသာဒိကတရော စာ’တိ။ ‘န ဘဝန္တာနံ မောဃံ တပော, နာဖလံ ဗ္ရဟ္မစရိယံ။ ဣင္ဃ ဘဝန္တော, ယော မယိ မနောပဒောသော တံ ပဇဟထာ’တိ။ ‘ယော ဘဝတိ မနောပဒောသော တံ ပဇဟာမ။ ကော နု ဘဝံ ဟောတီ’တိ? ‘သုတော နု ဘဝတံ – အသိတော ဒေဝလော ဣသီ’တိ? ‘ဧဝံ, ဘော’။ ‘သော ခ္ဝာဟံ, ဘော, ဟောမီ’တိ။ အထ ခော, အသ္သလာယန, သတ္တ ဗ္ရာဟ္မဏိသယော အသိတံ ဒေဝလံ ဣသိံ အဘိဝာဒေတုံ ဥပက္ကမိံသု။
410. Atha kho bhagavā assalāyanaṃ māṇavaṃ tuṇhībhūtaṃ maṅkubhūtaṃ pattakkhandhaṃ adhomukhaṃ pajjhāyantaṃ appaṭibhānaṃ viditvā assalāyanaṃ māṇavaṃ etadavoca – ‘‘bhūtapubbaṃ, assalāyana, sattannaṃ brāhmaṇisīnaṃ araññāyatane paṇṇakuṭīsu sammantānaṃ 36 evarūpaṃ pāpakaṃ diṭṭhigataṃ uppannaṃ hoti – ‘brāhmaṇova seṭṭho vaṇṇo, hīno añño vaṇṇo…pe… brahmadāyādā’ti. Assosi kho , assalāyana, asito devalo isi – ‘sattannaṃ kira brāhmaṇisīnaṃ araññāyatane paṇṇakuṭīsu sammantānaṃ evarūpaṃ pāpakaṃ diṭṭhigataṃ uppannaṃ – brāhmaṇova seṭṭho vaṇṇo…pe… brahmadāyādā’ti. Atha kho, assalāyana, asito devalo isi kesamassuṃ kappetvā mañjiṭṭhavaṇṇāni dussāni nivāsetvā paṭaliyo 37 upāhanā āruhitvā jātarūpamayaṃ daṇḍaṃ gahetvā sattannaṃ brāhmaṇisīnaṃ patthaṇḍile pāturahosi. Atha kho, assalāyana, asito devalo isi sattannaṃ brāhmaṇisīnaṃ patthaṇḍile caṅkamamāno evamāha – ‘handa, ko nu kho ime bhavanto brāhmaṇisayo gatā 38; handa, ko nu kho ime bhavanto brāhmaṇisayo gatā’ti? Atha kho, assalāyana, sattannaṃ brāhmaṇisīnaṃ etadahosi – ‘ko nāyaṃ gāmaṇḍalarūpo viya sattannaṃ brāhmaṇisīnaṃ patthaṇḍile caṅkamamāno evamāha – ‘handa, ko nu kho ime bhavanto brāhmaṇisayo gatā; handa, ko nu kho ime bhavanto brāhmaṇisayo gatāti? Handa, naṃ abhisapāmā’ti. Atha kho, assalāyana, satta brāhmaṇisayo asitaṃ devalaṃ isiṃ abhisapiṃsu – ‘bhasmā, vasala 39, hohi; bhasmā, vasala, hohī’ti 40. Yathā yathā kho, assalāyana, satta brāhmaṇisayo asitaṃ devalaṃ isiṃ abhisapiṃsu tathā tathā asito devalo isi abhirūpataro ceva hoti dassanīyataro ca pāsādikataro ca. Atha kho, assalāyana, sattannaṃ brāhmaṇisīnaṃ etadahosi – ‘moghaṃ vata no tapo, aphalaṃ brahmacariyaṃ. Mayañhi pubbe yaṃ abhisapāma – bhasmā, vasala, hohi; bhasmā, vasala, hohīti bhasmāva bhavati ekacco. Imaṃ pana mayaṃ yathā yathā abhisapāma tathā tathā abhirūpataro ceva hoti dassanīyataro ca pāsādikataro cā’ti. ‘Na bhavantānaṃ moghaṃ tapo, nāphalaṃ brahmacariyaṃ. Iṅgha bhavanto, yo mayi manopadoso taṃ pajahathā’ti. ‘Yo bhavati manopadoso taṃ pajahāma. Ko nu bhavaṃ hotī’ti? ‘Suto nu bhavataṃ – asito devalo isī’ti? ‘Evaṃ, bho’. ‘So khvāhaṃ, bho, homī’ti. Atha kho, assalāyana, satta brāhmaṇisayo asitaṃ devalaṃ isiṃ abhivādetuṃ upakkamiṃsu.
၄၁၁. ‘‘အထ ခော, အသ္သလာယန, အသိတော ဒေဝလော ဣသိ သတ္တ ဗ္ရာဟ္မဏိသယော ဧတဒဝောစ – ‘သုတံ မေတံ, ဘော, သတ္တန္နံ ကိရ ဗ္ရာဟ္မဏိသီနံ အရညာယတနေ ပဏ္ဏကုဋီသု သမ္မန္တာနံ ဧဝရူပံ ပာပကံ ဒိဋ္ဌိဂတံ ဥပ္ပန္နံ – ဗ္ရာဟ္မဏောဝ သေဋ္ဌော ဝဏ္ဏော, ဟီနော အညော ဝဏ္ဏော; ဗ္ရာဟ္မဏောဝ သုက္ကော ဝဏ္ဏော , ကဏ္ဟော အညော ဝဏ္ဏော; ဗ္ရာဟ္မဏာဝ သုဇ္ဈန္တိ, နော အဗ္ရာဟ္မဏာ; ဗ္ရာဟ္မဏာဝ ဗ္ရဟ္မုနော ပုတ္တာ ဩရသာ မုခတော ဇာတာ ဗ္ရဟ္မဇာ ဗ္ရဟ္မနိမ္မိတာ ဗ္ရဟ္မဒာယာဒာ’တိ။ ‘ဧဝံ, ဘော’။
411. ‘‘Atha kho, assalāyana, asito devalo isi satta brāhmaṇisayo etadavoca – ‘sutaṃ metaṃ, bho, sattannaṃ kira brāhmaṇisīnaṃ araññāyatane paṇṇakuṭīsu sammantānaṃ evarūpaṃ pāpakaṃ diṭṭhigataṃ uppannaṃ – brāhmaṇova seṭṭho vaṇṇo, hīno añño vaṇṇo; brāhmaṇova sukko vaṇṇo , kaṇho añño vaṇṇo; brāhmaṇāva sujjhanti, no abrāhmaṇā; brāhmaṇāva brahmuno puttā orasā mukhato jātā brahmajā brahmanimmitā brahmadāyādā’ti. ‘Evaṃ, bho’.
‘‘‘ဇာနန္တိ ပန ဘောန္တော – ယာ ဇနိကာ မာတာ 41 ဗ္ရာဟ္မဏံယေဝ အဂမာသိ, နော အဗ္ရာဟ္မဏ’န္တိ? ‘နော ဟိဒံ, ဘော’။
‘‘‘Jānanti pana bhonto – yā janikā mātā 42 brāhmaṇaṃyeva agamāsi, no abrāhmaṇa’nti? ‘No hidaṃ, bho’.
‘‘‘ဇာနန္တိ ပန ဘောန္တော – ယာ ဇနိကာမာတု 43 မာတာ ယာဝ သတ္တမာ မာတုမာတာမဟယုဂာ ဗ္ရာဟ္မဏံယေဝ အဂမာသိ, နော အဗ္ရာဟ္မဏ’န္တိ? ‘နော ဟိဒံ, ဘော’။
‘‘‘Jānanti pana bhonto – yā janikāmātu 44 mātā yāva sattamā mātumātāmahayugā brāhmaṇaṃyeva agamāsi, no abrāhmaṇa’nti? ‘No hidaṃ, bho’.
‘‘‘ဇာနန္တိ ပန ဘောန္တော – ယော ဇနကော ပိတာ 45 ဗ္ရာဟ္မဏိံယေဝ အဂမာသိ, နော အဗ္ရာဟ္မဏိ’န္တိ? ‘နော ဟိဒံ, ဘော’။
‘‘‘Jānanti pana bhonto – yo janako pitā 46 brāhmaṇiṃyeva agamāsi, no abrāhmaṇi’nti? ‘No hidaṃ, bho’.
‘‘‘ဇာနန္တိ ပန ဘောန္တော – ယော ဇနကပိတု 47 ပိတာ ယာဝ သတ္တမာ ပိတုပိတာမဟယုဂာ ဗ္ရာဟ္မဏိံယေဝ အဂမာသိ, နော အဗ္ရာဟ္မဏိ’န္တိ? ‘နော ဟိဒံ, ဘော’။
‘‘‘Jānanti pana bhonto – yo janakapitu 48 pitā yāva sattamā pitupitāmahayugā brāhmaṇiṃyeva agamāsi, no abrāhmaṇi’nti? ‘No hidaṃ, bho’.
‘‘‘ဇာနန္တိ ပန ဘောန္တော – တဂ္ဃ 53, သော ဂန္ဓဗ္ဗော ခတ္တိယော ဝာ ဗ္ရာဟ္မဏော ဝာ ဝေသ္သော ဝာ သုဒ္ဒော ဝာ’တိ? ‘န မယံ, ဘော, ဇာနာမ – တဂ္ဃ သော ဂန္ဓဗ္ဗော ခတ္တိယော ဝာ ဗ္ရာဟ္မဏော ဝာ ဝေသ္သော ဝာ သုဒ္ဒော ဝာ’တိ။ ‘ဧဝံ သန္တေ, ဘော, ဇာနာထ – ကေ တုမ္ဟေ ဟောထာ’တိ? ‘ဧဝံ သန္တေ, ဘော , န မယံ ဇာနာမ – ကေ မယံ ဟောမာ’တိ။ တေ ဟိ နာမ, အသ္သလာယန, သတ္တ ဗ္ရာဟ္မဏိသယော အသိတေန ဒေဝလေန ဣသိနာ သကေ ဇာတိဝာဒေ သမနုယုဉ္ဇီယမာနာ သမနုဂ္ဂာဟီယမာနာ သမနုဘာသီယမာနာ န သမ္ပာယိသ္သန္တိ; ကိံ ပန တ္ဝံ ဧတရဟိ မယာ သကသ္မိံ ဇာတိဝာဒေ သမနုယုဉ္ဇီယမာနော သမနုဂ္ဂာဟီယမာနော သမနုဘာသီယမာနော သမ္ပာယိသ္သသိ, ယေသံ တ္ဝံ သာစရိယကော န ပုဏ္ဏော ဒဗ္ဗိဂာဟော’’တိ။
‘‘‘Jānanti pana bhonto – taggha 54, so gandhabbo khattiyo vā brāhmaṇo vā vesso vā suddo vā’ti? ‘Na mayaṃ, bho, jānāma – taggha so gandhabbo khattiyo vā brāhmaṇo vā vesso vā suddo vā’ti. ‘Evaṃ sante, bho, jānātha – ke tumhe hothā’ti? ‘Evaṃ sante, bho , na mayaṃ jānāma – ke mayaṃ homā’ti. Te hi nāma, assalāyana, satta brāhmaṇisayo asitena devalena isinā sake jātivāde samanuyuñjīyamānā samanuggāhīyamānā samanubhāsīyamānā na sampāyissanti; kiṃ pana tvaṃ etarahi mayā sakasmiṃ jātivāde samanuyuñjīyamāno samanuggāhīyamāno samanubhāsīyamāno sampāyissasi, yesaṃ tvaṃ sācariyako na puṇṇo dabbigāho’’ti.
ဧဝံ ဝုတ္တေ, အသ္သလာယနော မာဏဝော ဘဂဝန္တံ ဧတဒဝောစ – ‘‘အဘိက္ကန္တံ, ဘော ဂောတမ။ပေ.။ ဥပာသကံ မံ ဘဝံ ဂောတမော ဓာရေတု အဇ္ဇတဂ္ဂေ ပာဏုပေတံ သရဏံ ဂတ’’န္တိ။
Evaṃ vutte, assalāyano māṇavo bhagavantaṃ etadavoca – ‘‘abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
အသ္သလာယနသုတ္တံ နိဋ္ဌိတံ တတိယံ။
Assalāyanasuttaṃ niṭṭhitaṃ tatiyaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / မဇ္ဈိမနိကာယ (အဋ္ဌကထာ) • Majjhimanikāya (aṭṭhakathā) / ၃. အသ္သလာယနသုတ္တဝဏ္ဏနာ • 3. Assalāyanasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / မဇ္ဈိမနိကာယ (ဋီကာ) • Majjhimanikāya (ṭīkā) / ၃. အသ္သလာယနသုတ္တဝဏ္ဏနာ • 3. Assalāyanasuttavaṇṇanā
