| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
3. அஸ்ஸலாயனஸுத்தவண்ணனா
3. Assalāyanasuttavaṇṇanā
401. அஞ்ஞமஞ்ஞவிஸிட்ட²த்தா விஸதி³ஸங் ரஜ்ஜங் விரஜ்ஜங், விரஜ்ஜதோ ஆக³தா, தத்த² ஜாதாதி வா வேரஜ்ஜகா, ஏவங் ஜாதா கோ² பன தே, யஸ்மா வத்தா²ப⁴ரணாதி³விபா⁴கே³ன நானப்பகாரா ஹொந்தி, தஸ்மா வுத்தங் ‘‘நானாவேரஜ்ஜகான’’ந்தி. அட்ட²கதா²யங் பன வேரஜ்ஜஸ்ஸேவ வஸேன நானப்பகாரதா வுத்தா. யஞ்ஞுபாஸனாதி³னாதி யஞ்ஞானுப⁴வனமந்தஜ்ஜே²னத³க்கி²ணபரியேஸனாதி³னா. சதுவண்ணஸாதா⁴ரணந்தி க²த்தியாதீ³னங் சதுன்னங் வண்ணானங் ஸாதா⁴ரணங் ஸங்ஸாரஸுத்³தி⁴பாபதஸ்ஸனங். ந்ஹானஸுத்³தி⁴யாதி தித்த²ஸமுத்³த³கா²தேஸு மந்தஜப்பனபுப்³ப³கங் ஸாயங்ததியஉத³கோரோஹனாதி³ன்ஹானஸுத்³தி⁴யா. பா⁴வனாஸுத்³தி⁴யாதி பரமஜோதிபூ⁴தாய புரிஸபா⁴வனாஸங்கா²தாய ஸுத்³தி⁴யா. வாபிதஸிரோதி ஓரோபிதகேஸோ. தமேவ ஹி ஸிரோ வாபிதந்தி வுச்சதி.
401. Aññamaññavisiṭṭhattā visadisaṃ rajjaṃ virajjaṃ, virajjato āgatā, tattha jātāti vā verajjakā, evaṃ jātā kho pana te, yasmā vatthābharaṇādivibhāgena nānappakārā honti, tasmā vuttaṃ ‘‘nānāverajjakāna’’nti. Aṭṭhakathāyaṃ pana verajjasseva vasena nānappakāratā vuttā. Yaññupāsanādināti yaññānubhavanamantajjhenadakkhiṇapariyesanādinā. Catuvaṇṇasādhāraṇanti khattiyādīnaṃ catunnaṃ vaṇṇānaṃ sādhāraṇaṃ saṃsārasuddhipāpatassanaṃ. Nhānasuddhiyāti titthasamuddakhātesu mantajappanapubbakaṃ sāyaṃtatiyaudakorohanādinhānasuddhiyā. Bhāvanāsuddhiyāti paramajotibhūtāya purisabhāvanāsaṅkhātāya suddhiyā. Vāpitasiroti oropitakeso. Tameva hi siro vāpitanti vuccati.
ஸபா⁴வவாதீ³தி யதா²பூ⁴தவாதீ³. பப்³ப³ஜந்தாதி ப்³ராஹ்மணபப்³ப³ஜ்ஜங் உபக³ச்ச²ந்தா, தஸ்மா ப்³ராஹ்மணானங் பப்³ப³ஜ்ஜாவிதா⁴னங் ஸிக்க²ந்தேன போ⁴தா ‘‘ப்³ராஹ்மணாவ ஸுஜ்ஜ²ந்தி, நோ அப்³ராஹ்மணா’’தி அயங் விதி⁴ ஸஹேதுகோ ஸஉபாதா³னோ ஸக்கச்சங் உக்³க³ஹிதோ, தஸ்மா துய்ஹங் பராஜயோ நத்தி²…பே॰… ஏவமாஹங்ஸு.
Sabhāvavādīti yathābhūtavādī. Pabbajantāti brāhmaṇapabbajjaṃ upagacchantā, tasmā brāhmaṇānaṃ pabbajjāvidhānaṃ sikkhantena bhotā ‘‘brāhmaṇāva sujjhanti, no abrāhmaṇā’’ti ayaṃ vidhi sahetuko saupādāno sakkaccaṃ uggahito, tasmā tuyhaṃ parājayo natthi…pe… evamāhaṃsu.
402. லத்³தி⁴பி⁴ந்த³னத்த²ந்தி ‘‘ப்³ராஹ்மணாவ ப்³ரஹ்முனோ புத்தா ஓரஸா முக²தோ ஜாதா ப்³ரஹ்மஜா’’தி ஏவங் பவத்தலத்³தி⁴யா வினிவேட²னத்த²ங். புத்தபடிலாப⁴த்தா²யாதி ‘‘ஏவங் மயங் பெத்திகங் இணதா⁴ரங் ஸோதெ⁴ய்யாமா’’தி லத்³தி⁴யங் ட²த்வா புத்தபடிலாப⁴த்தா²ய. அயஞ்ஹெத்த² அத⁴ம்மிகானங் ப்³ராஹ்மணானங் அஜ்ஜா²ஸயோ. நேஸந்தி ப்³ராஹ்மணானங். ஸச்சவசனங் ஸியாதி ‘‘ப்³ரஹ்முனோ புத்தா’’திஆதி³வசனங் ஸச்சங் யதி³ ஸியா ப்³ராஹ்மணீனங்…பே॰… ப⁴வெய்ய, ந சேதங் அத்தி². மஹாப்³ரஹ்முனோ முக²தோ ஜாதோதி வாத³ச்சே²த³கவாதோ³ முக²தோஜாதச்சே²கவாதோ³. அஸ்ஸலாயனோவிஞ்ஞூ ஜாதிகோ ‘‘நிரக்கே²பங் ஸமணேன கோ³தமேன வுத்த’’ந்தி ஜானந்தோபி ஸஹக³தானங் ப்³ராஹ்மணானங் சித்தானுரக்க²ணத்த²ங் ‘‘கிஞ்சாபி ப⁴வங் கோ³தமோ’’திஆதி³மாஹ.
402.Laddhibhindanatthanti ‘‘brāhmaṇāva brahmuno puttā orasā mukhato jātā brahmajā’’ti evaṃ pavattaladdhiyā viniveṭhanatthaṃ. Puttapaṭilābhatthāyāti ‘‘evaṃ mayaṃ pettikaṃ iṇadhāraṃ sodheyyāmā’’ti laddhiyaṃ ṭhatvā puttapaṭilābhatthāya. Ayañhettha adhammikānaṃ brāhmaṇānaṃ ajjhāsayo. Nesanti brāhmaṇānaṃ. Saccavacanaṃ siyāti ‘‘brahmuno puttā’’tiādivacanaṃ saccaṃ yadi siyā brāhmaṇīnaṃ…pe… bhaveyya, na cetaṃ atthi. Mahābrahmuno mukhato jātoti vādacchedakavādo mukhatojātacchekavādo. Assalāyanoviññū jātiko ‘‘nirakkhepaṃ samaṇena gotamena vutta’’nti jānantopi sahagatānaṃ brāhmaṇānaṃ cittānurakkhaṇatthaṃ ‘‘kiñcāpi bhavaṃ gotamo’’tiādimāha.
403. இதா³னி ப்³ராஹ்மணோவ ஸெட்டோ² வண்ணோதி வாத³ங் பி⁴ந்தி³துங் ‘‘ஸுதங் தே யோனககம்போ³ஜேஸூ’’திஆதி³ ஆரத்³த⁴ங். யதி³ ப்³ராஹ்மணோவ ஸெட்டோ² வண்ணோ, ஸப்³ப³த்த² ப்³ராஹ்மணோவ ஸெட்டோ² ப⁴வெய்ய, அத² கஸ்மா யோனககம்போ³ஜாதி³ஜனபதே³ஸு ப்³ராஹ்மணானங் ஸெட்ட²பா⁴வோ நத்தி²? ஏவஞ்ஹி தத்த² வண்ணா , தஸ்மா ‘‘ப்³ராஹ்மணோவ ஸெட்டோ²’’தி லத்³தி⁴மத்தமேதங். தேஸு ஹி ஜனபதே³ஸு ஜனா ஏகஜ்ஜ²ங் ஸன்னிபதித்வா ஸம்மந்தயித்வா கதிகங் அகங்ஸு, தா³ஸங் ஸாமிகங் கத்வா இதரே ஸப்³பே³ தங் பூஜெத்வா தஸ்ஸ வஸே வத்தந்தி, யோ தேஸங் அய்யோ ஹோதி இதரே ஸப்³பே³ தஸ்ஸ தா³ஸா ஹொந்தி, தே கதிபயஸங்வச்ச²ராதிக்கமேன தஸ்ஸ கிஞ்சி தோ³ஸங் தி³ஸ்வா தங் ததோ டா²னதோ அபனெத்வா அஞ்ஞங் ட²பெந்தி, இதி ஸோ அய்யோ ஹுத்வா தா³ஸோ ஹோதி, இதரோ தா³ஸோ ஹுத்வா அய்யோ ஹோதி, ஏவங் தாவ கேசி ‘‘அய்யோ ஹுத்வா தா³ஸோ ஹோதி, தா³ஸோ ஹுத்வா அய்யோ ஹோதீ’’தி எத்த² அத்த²ங் வத³ந்தி. அட்ட²கதா²யங் பன புரிமவஸேனேவ தமத்த²ங் த³ஸ்ஸேதுங் ‘‘ப்³ராஹ்மணோ ஸப⁴ரியோ’’திஆதி³ வுத்தங். வயப்பத்தே புத்தே அஸதீதி இத³ங் வக்க²மானஸ்ஸ தா³ரகஸ்ஸ தா³யஜ்ஜஸாமிகபா⁴வஸ்ஸ தாவ த³ஸ்ஸனங். மாதிதோ ஸுத்³தோ⁴தி எத்த² யோ மாதிதோ ஸுத்³த⁴த்தா அய்யோ, பிதிதோ அஸுத்³த⁴த்தா தா³ஸோ ஹோதி, ஸோ ஏவ பிதிதோ அஸுத்³த⁴த்தா தா³ஸோ ஹுத்வா மாதிதோ அய்யோ ஹோதீதி ஜாதிங் ஸம்பே⁴தே³தி. ஸோவ ஸப்³பே³ன ஸப்³ப³ங் ஹோதீதி ந ஸக்கா வத்துந்தி அபரே. கோ தா²மோதி மஹந்தே லோகஸன்னிவாஸே அனமதக்³கே³ அதீதே காலே இத்தீ²னங் வா சித்தே அனவட்டி²தே தா³ஸா தா³ஸா ஏவ ஹொந்தி, அய்யா அய்யா ஏவ ஹொந்தீதி எத்த² கோ ஏகந்திகோ ஸஹேதுகோ அவஸ்ஸயோ, தஸ்ஸ ஸாத⁴கோ ஸித்³த⁴ந்தோ, கிங் நித³ஸ்ஸனந்தி அத்தோ².
403. Idāni brāhmaṇova seṭṭho vaṇṇoti vādaṃ bhindituṃ ‘‘sutaṃ te yonakakambojesū’’tiādi āraddhaṃ. Yadi brāhmaṇova seṭṭho vaṇṇo, sabbattha brāhmaṇova seṭṭho bhaveyya, atha kasmā yonakakambojādijanapadesu brāhmaṇānaṃ seṭṭhabhāvo natthi? Evañhi tattha vaṇṇā , tasmā ‘‘brāhmaṇova seṭṭho’’ti laddhimattametaṃ. Tesu hi janapadesu janā ekajjhaṃ sannipatitvā sammantayitvā katikaṃ akaṃsu, dāsaṃ sāmikaṃ katvā itare sabbe taṃ pūjetvā tassa vase vattanti, yo tesaṃ ayyo hoti itare sabbe tassa dāsā honti, te katipayasaṃvaccharātikkamena tassa kiñci dosaṃ disvā taṃ tato ṭhānato apanetvā aññaṃ ṭhapenti, iti so ayyo hutvā dāso hoti, itaro dāso hutvā ayyo hoti, evaṃ tāva keci ‘‘ayyo hutvā dāso hoti, dāso hutvā ayyo hotī’’ti ettha atthaṃ vadanti. Aṭṭhakathāyaṃ pana purimavaseneva tamatthaṃ dassetuṃ ‘‘brāhmaṇo sabhariyo’’tiādi vuttaṃ. Vayappatte putte asatīti idaṃ vakkhamānassa dārakassa dāyajjasāmikabhāvassa tāva dassanaṃ. Mātito suddhoti ettha yo mātito suddhattā ayyo, pitito asuddhattā dāso hoti, so eva pitito asuddhattā dāso hutvā mātito ayyo hotīti jātiṃ sambhedeti. Sova sabbena sabbaṃ hotīti na sakkā vattunti apare. Ko thāmoti mahante lokasannivāse anamatagge atīte kāle itthīnaṃ vā citte anavaṭṭhite dāsā dāsā eva honti, ayyā ayyā eva hontīti ettha ko ekantiko sahetuko avassayo, tassa sādhako siddhanto, kiṃ nidassananti attho.
404. ஸுக்கச்சே²த³கவாதோ³ நாமாதி ‘‘ப்³ராஹ்மணோவ ஸுக்கோ வண்ணோ’’தி ஏவங் வுத்தோ ஸுக்கச்சே²த³கவாரோ நாம.
404.Sukkacchedakavādo nāmāti ‘‘brāhmaṇova sukko vaṇṇo’’ti evaṃ vutto sukkacchedakavāro nāma.
408. ஸப்³ப³ஸ்மிங் அக்³கி³கிச்சங் கரொந்தேதி ஏதேன யதா² யதோ குதோசி நிஸ்ஸயதோ உப்பன்னோ அக்³கி³உபாதா³னஸம்பன்னோ அக்³கி³கிச்சங் கரோதி, ஏவங் யஸ்மிங் கஸ்மிஞ்சி தா³ஸகுலே ஜாதோ உபனிஸ்ஸயஸம்பன்னோ ஸம்மாபடிபஜ்ஜமானோ ஸங்ஸாரதோ ஸுஜ்ஜ²தி ஏவாதி த³ஸ்ஸேதி.
408.Sabbasmiṃ aggikiccaṃ karonteti etena yathā yato kutoci nissayato uppanno aggiupādānasampanno aggikiccaṃ karoti, evaṃ yasmiṃ kasmiñci dāsakule jāto upanissayasampanno sammāpaṭipajjamāno saṃsārato sujjhati evāti dasseti.
409. பாத³ஸிகவண்ணோதி அந்தராளவண்ணோ. ஏதேஸந்தி க²த்தியகுமாரேன ப்³ராஹ்மணகஞ்ஞாய உப்பன்னபுத்தோ, ப்³ராஹ்மணகுமாரேன க²த்தியகஞ்ஞாய உப்பன்னபுத்தோதி ஏதேஸங் த்³வின்னங் மாணவகானங். மதகப⁴த்தேதி மதே உத்³தி³ஸ்ஸ கதப⁴த்தே. தா²லிபாகேதி கதமங்க³லப⁴த்தே.
409.Pādasikavaṇṇoti antarāḷavaṇṇo. Etesanti khattiyakumārena brāhmaṇakaññāya uppannaputto, brāhmaṇakumārena khattiyakaññāya uppannaputtoti etesaṃ dvinnaṃ māṇavakānaṃ. Matakabhatteti mate uddissa katabhatte. Thālipāketi katamaṅgalabhatte.
410. தும்ஹேதி ஜாதிஸாமஞ்ஞதோ மாணவங் ப்³ராஹ்மணேஹி ஸத்³தி⁴ங் ஏகஜ்ஜ²ங் ஸங்க³ண்ஹந்தோ ஆஹ. கோ நு கோ²தி அவங்ஸிரோ இஸிவாதோ³, தேஸங் ப்³ராஹ்மணீஸீனங் அஸாமத்தி²யத³ஸ்ஸனேன ஜாதியா அப்பமாணதங் விபா⁴வேதுங் கா³மதா³ரகவேஸேன உபக³ச்சி². தேன வுத்தங் ‘‘கா³மண்ட³லரூபோ வியா’’தி. கொண்ட³த³மகோதி அத³ந்தத³மகோ.
410.Tumheti jātisāmaññato māṇavaṃ brāhmaṇehi saddhiṃ ekajjhaṃ saṅgaṇhanto āha. Ko nu khoti avaṃsiro isivādo, tesaṃ brāhmaṇīsīnaṃ asāmatthiyadassanena jātiyā appamāṇataṃ vibhāvetuṃ gāmadārakavesena upagacchi. Tena vuttaṃ ‘‘gāmaṇḍalarūpo viyā’’ti. Koṇḍadamakoti adantadamako.
411. ஜனேதீதி ஜனிகா ஜனெத்தி. ஜனகோ பிதாதி எத்தா²பி ஏஸேவ நயோ. க³ந்த⁴ப்³ப³பஞ்ஹந்தி க³ந்த⁴ப்³ப³ஸ்ஸ மாதுகுச்சி²யங் உப்பஜ்ஜனகஸத்தஸ்ஸ க²த்தியபா⁴வாதி³புச்ச²ங். த³ப்³பி³க³ஹணஸிப்பம்பி ஏகா விஜ்ஜா வேதி³தப்³பா³. தத்த² கிர குஸலோ யங் கிஞ்சி ஆஹாரூபக³பண்ணபுப்ப²ப²லபீ³ஜங் அந்தமஸோ ஏலாலுகம்பி க³ஹெத்வா பே⁴ஸஜ்ஜேஹி யோஜெத்வா பசந்தோ ஸப்பிமது⁴பா²ணிதேஹி ஸமானரஸங் கத்வா ஸம்பாதே³துங் ஸக்கோதி, புண்ணோபி தாதி³ஸோ, தேன ஞாதங் த்வங் த³ப்³பி³க³ஹணஸிப்பமத்தம்பி ந ஜானாஸீதி ஸம்ப³ந்தோ⁴. ஸத்³தோ⁴தி கம்மப²லஸத்³தா⁴ய ஸத்³தோ⁴, போது²ஜ்ஜனிகேனேவ ரதனத்தயபஸாதே³ன பஸன்னோ. தேனேவாஹ – ‘‘உபாஸகங் மங் ப⁴வங்…பே॰… ஸரணங் க³த’’ந்தி.
411. Janetīti janikā janetti. Janako pitāti etthāpi eseva nayo. Gandhabbapañhanti gandhabbassa mātukucchiyaṃ uppajjanakasattassa khattiyabhāvādipucchaṃ. Dabbigahaṇasippampi ekā vijjā veditabbā. Tattha kira kusalo yaṃ kiñci āhārūpagapaṇṇapupphaphalabījaṃ antamaso elālukampi gahetvā bhesajjehi yojetvā pacanto sappimadhuphāṇitehi samānarasaṃ katvā sampādetuṃ sakkoti, puṇṇopi tādiso, tena ñātaṃ tvaṃ dabbigahaṇasippamattampi na jānāsīti sambandho. Saddhoti kammaphalasaddhāya saddho, pothujjanikeneva ratanattayapasādena pasanno. Tenevāha – ‘‘upāsakaṃ maṃ bhavaṃ…pe… saraṇaṃ gata’’nti.
அஸ்ஸலாயனஸுத்தவண்ணனாய லீனத்த²ப்பகாஸனா ஸமத்தா.
Assalāyanasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. அஸ்ஸலாயனஸுத்தங் • 3. Assalāyanasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 3. அஸ்ஸலாயனஸுத்தவண்ணனா • 3. Assalāyanasuttavaṇṇanā
