| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) |
੩. ਅਸ੍ਸਲਾਯਨਸੁਤ੍ਤવਣ੍ਣਨਾ
3. Assalāyanasuttavaṇṇanā
੪੦੧. ਏવਂ ਮੇ ਸੁਤਨ੍ਤਿ ਅਸ੍ਸਲਾਯਨਸੁਤ੍ਤਂ। ਤਤ੍ਥ ਨਾਨਾવੇਰਜ੍ਜਕਾਨਨ੍ਤਿ ਅਙ੍ਗਮਗਧਾਦੀਹਿ ਨਾਨਪ੍ਪਕਾਰੇਹਿ વੇਰਜ੍ਜੇਹਿ ਆਗਤਾਨਂ, ਤੇਸੁ વਾ ਰਟ੍ਠੇਸੁ ਜਾਤਸਂવਡ੍ਢਾਨਨ੍ਤਿਪਿ ਅਤ੍ਥੋ। ਕੇਨਚਿਦੇવਾਤਿ ਯਞ੍ਞੁਪਾਸਨਾਦਿਨਾ ਅਨਿਯਮਿਤਕਿਚ੍ਚੇਨ। ਚਾਤੁવਣ੍ਣਿਨ੍ਤਿ ਚਤੁવਣ੍ਣਸਾਧਾਰਣਂ। ਮਯਂ ਪਨ ਨ੍ਹਾਨਸੁਦ੍ਧਿਯਾ ਭਾવਨਾਸੁਦ੍ਧਿਯਾਪਿ ਬ੍ਰਾਹ੍ਮਣਾવ ਸੁਜ੍ਝਨ੍ਤੀਤਿ વਦਾਮ, ਅਯੁਤ੍ਤਮ੍ਪਿ ਸਮਣੋ ਗੋਤਮੋ ਕਰੋਤੀਤਿ ਮਞ੍ਞਮਾਨਾ ਏવਂ ਚਿਨ੍ਤਯਿਂਸੁ। વੁਤ੍ਤਸਿਰੋਤਿ વਾਪਿਤਸਿਰੋ।
401.Evaṃme sutanti assalāyanasuttaṃ. Tattha nānāverajjakānanti aṅgamagadhādīhi nānappakārehi verajjehi āgatānaṃ, tesu vā raṭṭhesu jātasaṃvaḍḍhānantipi attho. Kenacidevāti yaññupāsanādinā aniyamitakiccena. Cātuvaṇṇinti catuvaṇṇasādhāraṇaṃ. Mayaṃ pana nhānasuddhiyā bhāvanāsuddhiyāpi brāhmaṇāva sujjhantīti vadāma, ayuttampi samaṇo gotamo karotīti maññamānā evaṃ cintayiṃsu. Vuttasiroti vāpitasiro.
ਧਮ੍ਮવਾਦੀਤਿ ਸਭਾવવਾਦੀ। ਦੁਪ੍ਪਟਿਮਨ੍ਤਿਯਾਤਿ ਅਮ੍ਹਾਦਿਸੇਹਿ ਅਧਮ੍ਮવਾਦੀਹਿ ਦੁਕ੍ਖੇਨ ਪਟਿਮਨ੍ਤਿਤਬ੍ਬਾ ਹੋਨ੍ਤਿ। ਧਮ੍ਮવਾਦਿਨੋ ਨਾਮ ਪਰਾਜਯੋ ਨ ਸਕ੍ਕਾ ਕਾਤੁਨ੍ਤਿ ਦਸ੍ਸੇਤਿ। ਪਰਿਬ੍ਬਾਜਕਨ੍ਤਿ ਪਬ੍ਬਜ੍ਜਾવਿਧਾਨਂ, ਤਯੋ વੇਦੇ ਉਗ੍ਗਹੇਤ੍વਾ ਸਬ੍ਬਪਚ੍ਛਾ ਪਬ੍ਬਜਨ੍ਤਾ ਯੇਹਿ ਮਨ੍ਤੇਹਿ ਪਬ੍ਬਜਨ੍ਤਿ, ਪਬ੍ਬਜਿਤਾ ਚ ਯੇ ਮਨ੍ਤੇ ਪਰਿਹਰਨ੍ਤਿ, ਯਂ વਾ ਆਚਾਰਂ ਆਚਰਨ੍ਤਿ, ਤਂ ਸਬ੍ਬਂ ਭੋਤਾ ਚਰਿਤਂ ਸਿਕ੍ਖਿਤਂ। ਤਸ੍ਮਾ ਤੁਯ੍ਹਂ ਪਰਾਜਯੋ ਨਤ੍ਥਿ, ਜਯੋવ ਭવਿਸ੍ਸਤੀਤਿ ਮਞ੍ਞਨ੍ਤਾ ਏવਮਾਹਂਸੁ।
Dhammavādīti sabhāvavādī. Duppaṭimantiyāti amhādisehi adhammavādīhi dukkhena paṭimantitabbā honti. Dhammavādino nāma parājayo na sakkā kātunti dasseti. Paribbājakanti pabbajjāvidhānaṃ, tayo vede uggahetvā sabbapacchā pabbajantā yehi mantehi pabbajanti, pabbajitā ca ye mante pariharanti, yaṃ vā ācāraṃ ācaranti, taṃ sabbaṃ bhotā caritaṃ sikkhitaṃ. Tasmā tuyhaṃ parājayo natthi, jayova bhavissatīti maññantā evamāhaṃsu.
੪੦੨. ਦਿਸ੍ਸਨ੍ਤਿ ਖੋ ਪਨਾਤਿਆਦਿ ਤੇਸਂ ਲਦ੍ਧਿਭਿਨ੍ਦਨਤ੍ਥਂ વੁਤ੍ਤਂ। ਤਤ੍ਥ ਬ੍ਰਾਹ੍ਮਣਿਯੋਤਿ ਬ੍ਰਾਹ੍ਮਣਾਨਂ ਪੁਤ੍ਤਪਟਿਲਾਭਤ੍ਥਾਯ ਆવਾਹવਿવਾਹવਸੇਨ ਕੁਲਾ ਆਨੀਤਾ ਬ੍ਰਾਹ੍ਮਣਿਯੋ ਦਿਸ੍ਸਨ੍ਤਿ । ਤਾ ਖੋ ਪਨੇਤਾ ਅਪਰੇਨ ਸਮਯੇਨ ਉਤੁਨਿਯੋਪਿ ਹੋਨ੍ਤਿ, ਸਞ੍ਜਾਤਪੁਪ੍ਫਾਤਿ ਅਤ੍ਥੋ। ਗਬ੍ਭਿਨਿਯੋਤਿ ਸਞ੍ਜਾਤਗਬ੍ਭਾ। વਿਜਾਯਮਾਨਾਤਿ ਪੁਤ੍ਤਧੀਤਰੋ ਜਨਯਮਾਨਾ। ਪਾਯਮਾਨਾਤਿ ਦਾਰਕੇ ਥਞ੍ਞਂ ਪਾਯਨ੍ਤਿਯੋ। ਯੋਨਿਜਾવ ਸਮਾਨਾਤਿ ਬ੍ਰਾਹ੍ਮਣੀਨਂ ਪਸ੍ਸਾવਮਗ੍ਗੇਨ ਜਾਤਾ ਸਮਾਨਾ। ਏવਮਾਹਂਸੂਤਿ ਏવਂ વਦਨ੍ਤਿ। ਕਥਂ? ਬ੍ਰਾਹ੍ਮਣੋવ ਸੇਟ੍ਠੋ વਣ੍ਣੋ…ਪੇ॰… ਬ੍ਰਹ੍ਮਦਾਯਾਦਾਤਿ। ਯਦਿ ਪਨ ਨੇਸਂ ਸਚ੍ਚવਚਨਂ ਸਿਯਾ, ਬ੍ਰਾਹ੍ਮਣੀਨਂ ਕੁਚ੍ਛਿ ਮਹਾਬ੍ਰਹ੍ਮੁਨੋ ਉਰੋ ਭવੇਯ੍ਯ, ਬ੍ਰਾਹ੍ਮਣੀਨਂ ਪਸ੍ਸਾવਮਗ੍ਗੋ ਮਹਾਬ੍ਰਹ੍ਮੁਨੋ ਮੁਖਂ ਭવੇਯ੍ਯ, ਏਤ੍ਤਾવਤਾ ‘‘ਮਯਂ ਮਹਾਬ੍ਰਹ੍ਮੁਨੋ ਉਰੇ વਸਿਤ੍વਾ ਮੁਖਤੋ ਨਿਕ੍ਖਨ੍ਤਾ’’ਤਿ વਤ੍ਤੁਂ ਮਾ ਲਭਨ੍ਤੂਤਿ ਅਯਂ ਮੁਖਤੋ ਜਾਤਚ੍ਛੇਦਕવਾਦੋ વੁਤ੍ਤੋ।
402.Dissanti kho panātiādi tesaṃ laddhibhindanatthaṃ vuttaṃ. Tattha brāhmaṇiyoti brāhmaṇānaṃ puttapaṭilābhatthāya āvāhavivāhavasena kulā ānītā brāhmaṇiyo dissanti . Tā kho panetā aparena samayena utuniyopi honti, sañjātapupphāti attho. Gabbhiniyoti sañjātagabbhā. Vijāyamānāti puttadhītaro janayamānā. Pāyamānāti dārake thaññaṃ pāyantiyo. Yonijāva samānāti brāhmaṇīnaṃ passāvamaggena jātā samānā. Evamāhaṃsūti evaṃ vadanti. Kathaṃ? Brāhmaṇova seṭṭho vaṇṇo…pe… brahmadāyādāti. Yadi pana nesaṃ saccavacanaṃ siyā, brāhmaṇīnaṃ kucchi mahābrahmuno uro bhaveyya, brāhmaṇīnaṃ passāvamaggo mahābrahmuno mukhaṃ bhaveyya, ettāvatā ‘‘mayaṃ mahābrahmuno ure vasitvā mukhato nikkhantā’’ti vattuṃ mā labhantūti ayaṃ mukhato jātacchedakavādo vutto.
੪੦੩. ਅਯ੍ਯੋ ਹੁਤ੍વਾ ਦਾਸੋ ਹੋਤਿ, ਦਾਸੋ ਹੁਤ੍વਾ ਅਯ੍ਯੋ ਹੋਤੀਤਿ ਬ੍ਰਾਹ੍ਮਣੋ ਸਭਰਿਯੋ વਣਿਜ੍ਜਂ ਪਯੋਜੇਨ੍ਤੋ ਯੋਨਕਰਟ੍ਠਂ વਾ ਕਮ੍ਬੋਜਰਟ੍ਠਂ વਾ ਗਨ੍ਤ੍વਾ ਕਾਲਂ ਕਰੋਤਿ, ਤਸ੍ਸ ਗੇਹੇ વਯਪ੍ਪਤ੍ਤੇ ਪੁਤ੍ਤੇ ਅਸਤਿ ਬ੍ਰਾਹ੍ਮਣੀ ਦਾਸੇਨ વਾ ਕਮ੍ਮਕਰੇਨ વਾ ਸਦ੍ਧਿਂ ਸਂવਾਸਂ ਕਪ੍ਪੇਤਿ। ਏਕਸ੍ਮਿਂ ਦਾਰਕੇ ਜਾਤੇ ਸੋ ਪੁਰਿਸੋ ਦਾਸੋવ ਹੋਤਿ, ਤਸ੍ਸ ਜਾਤਦਾਰਕੋ ਪਨ ਦਾਯਜ੍ਜਸਾਮਿਕੋ ਹੋਤਿ। ਮਾਤਿਤੋ ਸੁਦ੍ਧੋ ਪਿਤਿਤੋ ਅਸੁਦ੍ਧੋ ਸੋ વਣਿਜ੍ਜਂ ਪਯੋਜੇਨ੍ਤੋ ਮਜ੍ਝਿਮਪਦੇਸਂ ਗਨ੍ਤ੍વਾ ਬ੍ਰਾਹ੍ਮਣਦਾਰਿਕਂ ਗਹੇਤ੍વਾ ਤਸ੍ਸਾ ਕੁਚ੍ਛਿਸ੍ਮਿਂ ਪੁਤ੍ਤਂ ਪਟਿਲਭਤਿ, ਸੋਪਿ ਮਾਤਿਤੋવ ਸੁਦ੍ਧੋ ਹੋਤਿ ਪਿਤਿਤੋ ਅਸੁਦ੍ਧੋ। ਏવਂ ਬ੍ਰਾਹ੍ਮਣਸਮਯਸ੍ਮਿਞ੍ਞੇવ ਜਾਤਿਸਮ੍ਭੇਦੋ ਹੋਤੀਤਿ ਦਸ੍ਸਨਤ੍ਥਮੇਤਂ વੁਤ੍ਤਂ। ਕਿਂ ਬਲਂ, ਕੋ ਅਸ੍ਸਾਸੋਤਿ ਯਤ੍ਥ ਤੁਮ੍ਹੇ ਦਾਸਾ ਹੋਨ੍ਤਾ ਸਬ੍ਬੇવ ਦਾਸਾ ਹੋਥ, ਅਯ੍ਯਾ ਹੋਨ੍ਤਾ ਸਬ੍ਬੇવ ਅਯ੍ਯਾ ਹੋਥ, ਏਤ੍ਥ વੋ ਕੋ ਥਾਮੋ, ਕੋ ਅવਸ੍ਸਯੋ, ਯਂ ਬ੍ਰਾਹ੍ਮਣੋવ ਸੇਟ੍ਠੋ વਣ੍ਣੋਤਿ વਦਥਾਤਿ ਦੀਪੇਤਿ।
403.Ayyo hutvā dāso hoti, dāso hutvā ayyo hotīti brāhmaṇo sabhariyo vaṇijjaṃ payojento yonakaraṭṭhaṃ vā kambojaraṭṭhaṃ vā gantvā kālaṃ karoti, tassa gehe vayappatte putte asati brāhmaṇī dāsena vā kammakarena vā saddhiṃ saṃvāsaṃ kappeti. Ekasmiṃ dārake jāte so puriso dāsova hoti, tassa jātadārako pana dāyajjasāmiko hoti. Mātito suddho pitito asuddho so vaṇijjaṃ payojento majjhimapadesaṃ gantvā brāhmaṇadārikaṃ gahetvā tassā kucchismiṃ puttaṃ paṭilabhati, sopi mātitova suddho hoti pitito asuddho. Evaṃ brāhmaṇasamayasmiññeva jātisambhedo hotīti dassanatthametaṃ vuttaṃ. Kiṃbalaṃ, ko assāsoti yattha tumhe dāsā hontā sabbeva dāsā hotha, ayyā hontā sabbeva ayyā hotha, ettha vo ko thāmo, ko avassayo, yaṃ brāhmaṇova seṭṭho vaṇṇoti vadathāti dīpeti.
੪੦੪. ਖਤ੍ਤਿਯੋવ ਨੁ ਖੋਤਿਆਦਯੋ ਸੁਤ੍ਤਚ੍ਛੇਦਕવਾਦਾ ਨਾਮ ਹੋਨ੍ਤਿ।
404.Khattiyova nu khotiādayo suttacchedakavādā nāma honti.
੪੦੮. ਇਦਾਨਿ ਚਾਤੁવਣ੍ਣਿਸੁਦ੍ਧਿਂ ਦਸ੍ਸੇਨ੍ਤੋ ਇਧ ਰਾਜਾਤਿਆਦਿਮਾਹ। ਸਾਪਾਨਦੋਣਿਯਾਤਿ ਸੁਨਖਾਨਂ ਪਿવਨਦੋਣਿਯਾ। ਅਗ੍ਗਿਕਰਣੀਯਨ੍ਤਿ ਸੀਤવਿਨੋਦਨਅਨ੍ਧਕਾਰવਿਧਮਨਭਤ੍ਤਪਚਨਾਦਿ ਅਗ੍ਗਿਕਿਚ੍ਚਂ। ਏਤ੍ਥ ਅਸ੍ਸਲਾਯਨਾਤਿ ਏਤ੍ਥ ਸਬ੍ਬਸ੍ਮਿਂ ਅਗ੍ਗਿਕਿਚ੍ਚਂ ਕਰੋਨ੍ਤੇ।
408. Idāni cātuvaṇṇisuddhiṃ dassento idha rājātiādimāha. Sāpānadoṇiyāti sunakhānaṃ pivanadoṇiyā. Aggikaraṇīyanti sītavinodanaandhakāravidhamanabhattapacanādi aggikiccaṃ. Ettha assalāyanāti ettha sabbasmiṃ aggikiccaṃ karonte.
੪੦੯. ਇਦਾਨਿ ਯਦੇਤਂ ਬ੍ਰਾਹ੍ਮਣਾ ਚਾਤੁવਣ੍ਣਿਸੁਦ੍ਧੀਤਿ વਦਨ੍ਤਿ, ਏਤ੍ਥ ਚਾਤੁવਣ੍ਣਾਤਿ ਨਿਯਮੋ ਨਤ੍ਥਿ। ਪਞ੍ਚਮੋ ਹਿ ਪਾਦਸਿਕવਣ੍ਣੋਪਿ ਅਤ੍ਥੀਤਿ ਸਂਖਿਤ੍ਤੇਨ ਤੇਸਂ વਾਦੇ ਦੋਸਦਸ੍ਸਨਤ੍ਥਂ ਇਧ ਖਤ੍ਤਿਯਕੁਮਾਰੋਤਿਆਦਿਮਾਹ। ਤਤ੍ਰ ਅਮੁਤ੍ਰ ਚ ਪਨੇਸਾਨਨ੍ਤਿ ਅਮੁਸ੍ਮਿਞ੍ਚ ਪਨ ਪੁਰਿਮਨਯੇ ਏਤੇਸਂ ਮਾਣવਕਾਨਂ ਕਿਞ੍ਚਿ ਨਾਨਾਕਰਣਂ ਨ ਪਸ੍ਸਾਮੀਤਿ વਦਤਿ। ਨਾਨਾਕਰਣਂ ਪਨ ਤੇਸਮ੍ਪਿ ਅਤ੍ਥਿਯੇવ। ਖਤ੍ਤਿਯਕੁਮਾਰਸ੍ਸ ਹਿ ਬ੍ਰਾਹ੍ਮਣਕਞ੍ਞਾਯ ਉਪ੍ਪਨ੍ਨੋ ਖਤ੍ਤਿਯਪਾਦਸਿਕੋ ਨਾਮ, ਇਤਰੋ ਬ੍ਰਾਹ੍ਮਣਪਾਦਸਿਕੋ ਨਾਮ, ਏਤੇ ਹੀਨਜਾਤਿਮਾਣવਕਾ।
409. Idāni yadetaṃ brāhmaṇā cātuvaṇṇisuddhīti vadanti, ettha cātuvaṇṇāti niyamo natthi. Pañcamo hi pādasikavaṇṇopi atthīti saṃkhittena tesaṃ vāde dosadassanatthaṃ idha khattiyakumārotiādimāha. Tatra amutra ca panesānanti amusmiñca pana purimanaye etesaṃ māṇavakānaṃ kiñci nānākaraṇaṃ na passāmīti vadati. Nānākaraṇaṃ pana tesampi atthiyeva. Khattiyakumārassa hi brāhmaṇakaññāya uppanno khattiyapādasiko nāma, itaro brāhmaṇapādasiko nāma, ete hīnajātimāṇavakā.
ਏવਂ ਪਞ੍ਚਮਸ੍ਸ વਣ੍ਣਸ੍ਸ ਅਤ੍ਥਿਤਾਯ ਚਾਤੁવਣ੍ਣਿਸੁਦ੍ਧੀਤਿ ਏਤੇਸਂ વਾਦੇ ਦੋਸਂ ਦਸ੍ਸੇਤ੍વਾ ਇਦਾਨਿ ਪੁਨ ਚਾਤੁવਣ੍ਣਿਸੁਦ੍ਧਿਯਂ ਓવਦਨ੍ਤੋ ਤਂ ਕਿਂ ਮਞ੍ਞਸੀਤਿਆਦਿਮਾਹ। ਤਤ੍ਥ ਸਦ੍ਧੇਤਿ ਮਤਕਭਤ੍ਤੇ। ਥਾਲਿਪਾਕੇਤਿ ਪਣ੍ਣਾਕਾਰਭਤ੍ਤੇ। ਯਞ੍ਞੇਤਿ ਯਞ੍ਞਭਤ੍ਤੇ। ਪਾਹੁਨੇਤਿ ਆਗਨ੍ਤੁਕਾਨਂ ਕਤਭਤ੍ਤੇ। ਕਿਂ ਹੀਤਿ ਕਿਂ ਮਹਪ੍ਫਲਂ ਭવਿਸ੍ਸਤਿ, ਨੋ ਭવਿਸ੍ਸਤੀਤਿ ਦੀਪੇਤਿ।
Evaṃ pañcamassa vaṇṇassa atthitāya cātuvaṇṇisuddhīti etesaṃ vāde dosaṃ dassetvā idāni puna cātuvaṇṇisuddhiyaṃ ovadanto taṃ kiṃ maññasītiādimāha. Tattha saddheti matakabhatte. Thālipāketi paṇṇākārabhatte. Yaññeti yaññabhatte. Pāhuneti āgantukānaṃ katabhatte. Kiṃ hīti kiṃ mahapphalaṃ bhavissati, no bhavissatīti dīpeti.
੪੧੦. ਭੂਤਪੁਬ੍ਬਨ੍ਤਿ ਅਸ੍ਸਲਾਯਨ ਪੁਬ੍ਬੇ ਮਯਿ ਜਾਤਿਯਾ ਹੀਨਤਰੇ ਤੁਮ੍ਹੇ ਸੇਟ੍ਠਤਰਾ ਸਮਾਨਾਪਿ ਮਯਾ ਜਾਤਿવਾਦੇ ਪਞ੍ਹਂ ਪੁਟ੍ਠਾ ਸਮ੍ਪਾਦੇਤੁਂ ਨ ਸਕ੍ਖਿਤ੍ਥ, ਇਦਾਨਿ ਤੁਮ੍ਹੇ ਹੀਨਤਰਾ ਹੁਤ੍વਾ ਮਯਾ ਸੇਟ੍ਠਤਰੇਨ ਬੁਦ੍ਧਾਨਂ ਸਕੇ ਜਾਤਿવਾਦਪਞ੍ਹਂ ਪੁਟ੍ਠਾ ਕਿਂ ਸਮ੍ਪਾਦੇਸ੍ਸਥ? ਨ ਏਤ੍ਥ ਚਿਨ੍ਤਾ ਕਾਤਬ੍ਬਾਤਿ ਮਾਣવਂ ਉਪਤ੍ਥਮ੍ਭੇਨ੍ਤੋ ਇਮਂ ਦੇਸਨਂ ਆਰਭਿ। ਤਤ੍ਥ ਅਸਿਤੋਤਿ ਕਾਲ਼ਕੋ। ਦੇવਲੋਤਿ ਤਸ੍ਸ ਨਾਮਂ, ਅਯਮੇવ ਭਗવਾ ਤੇਨ ਸਮਯੇਨ। ਪਟਲਿਯੋਤਿ ਗਣਙ੍ਗਣੁਪਾਹਨਾ। ਪਤ੍ਥਣ੍ਡਿਲੇਤਿ ਪਣ੍ਣਸਾਲਪਰਿવੇਣੇ। ਕੋ ਨੁ ਖੋਤਿ ਕਹਂ ਨੁ ਖੋ। ਗਾਮਣ੍ਡਲਰੂਪੋ વਿਯਾਤਿ ਗਾਮਦਾਰਕਰੂਪੋ વਿਯ। ਸੋ ਖ੍વਾਹਂ, ਭੋ, ਹੋਮੀਤਿ ਸੋ ਅਹਂ, ਭੋ, ਅਸਿਤਦੇવਲੋ ਹੋਮੀਤਿ વਦਤਿ। ਤਦਾ ਕਿਰ ਮਹਾਸਤ੍ਤੋ ਕੋਣ੍ਡਦਮਕੋ ਹੁਤ੍વਾ વਿਚਰਤਿ। ਅਭਿવਾਦੇਤੁਂ ਉਪਕ੍ਕਮਿਂਸੂਤਿ વਨ੍ਦਿਤੁਂ ਉਪਕ੍ਕਮਂ ਅਕਂਸੁ। ਤਤੋ ਪਟ੍ਠਾਯ ਚ વਸ੍ਸਸਤਿਕਤਾਪਸੋਪਿ ਤਦਹੁਜਾਤਂ ਬ੍ਰਾਹ੍ਮਣਕੁਮਾਰਂ ਅવਨ੍ਦਨ੍ਤੋ ਕੋਣ੍ਡਿਤੋ ਹੋਤਿ।
410.Bhūtapubbanti assalāyana pubbe mayi jātiyā hīnatare tumhe seṭṭhatarā samānāpi mayā jātivāde pañhaṃ puṭṭhā sampādetuṃ na sakkhittha, idāni tumhe hīnatarā hutvā mayā seṭṭhatarena buddhānaṃ sake jātivādapañhaṃ puṭṭhā kiṃ sampādessatha? Na ettha cintā kātabbāti māṇavaṃ upatthambhento imaṃ desanaṃ ārabhi. Tattha asitoti kāḷako. Devaloti tassa nāmaṃ, ayameva bhagavā tena samayena. Paṭaliyoti gaṇaṅgaṇupāhanā. Patthaṇḍileti paṇṇasālapariveṇe. Ko nu khoti kahaṃ nu kho. Gāmaṇḍalarūpo viyāti gāmadārakarūpo viya. So khvāhaṃ, bho, homīti so ahaṃ, bho, asitadevalo homīti vadati. Tadā kira mahāsatto koṇḍadamako hutvā vicarati. Abhivādetuṃ upakkamiṃsūti vandituṃ upakkamaṃ akaṃsu. Tato paṭṭhāya ca vassasatikatāpasopi tadahujātaṃ brāhmaṇakumāraṃ avandanto koṇḍito hoti.
੪੧੧. ਜਨਿਕਾ ਮਾਤਾਤਿ ਯਾਯ ਤੁਮ੍ਹੇ ਜਨਿਤਾ, ਸਾ વੋ ਜਨਿਕਾ ਮਾਤਾ। ਜਨਿਕਾਮਾਤੂਤਿ ਜਨਿਕਾਯ ਮਾਤੁ। ਯੋ ਜਨਕੋਤਿ ਯੋ ਜਨਕੋ ਪਿਤਾ। ‘‘ਯੋ ਜਨਿਕੋ ਪਿਤਾਤੇવ’’ વਾ ਪਾਠੋ।
411.Janikā mātāti yāya tumhe janitā, sā vo janikā mātā. Janikāmātūti janikāya mātu. Yo janakoti yo janako pitā. ‘‘Yo janiko pitāteva’’ vā pāṭho.
ਅਸਿਤੇਨਾਤਿ ਪਞ੍ਚਾਭਿਞ੍ਞੇਨ ਅਸਿਤੇਨ ਦੇવਲੇਨ ਇਸਿਨਾ ਇਮਂ ਗਨ੍ਧਬ੍ਬਪਞ੍ਹਂ ਪੁਟ੍ਠਾ ਨ ਸਮ੍ਪਾਯਿਸ੍ਸਨ੍ਤਿ। ਯੇਸਨ੍ਤਿ ਯੇਸਂ ਸਤ੍ਤਨ੍ਨਂ ਇਸੀਨਂ। ਨ ਪੁਣ੍ਣੋ ਦਬ੍ਬਿਗਾਹੋਤਿ ਤੇਸਂ ਸਤ੍ਤਨ੍ਨਂ ਇਸੀਨਂ ਦਬ੍ਬਿਂ ਗਹੇਤ੍વਾ ਪਣ੍ਣਂ ਪਚਿਤ੍વਾ ਦਾਯਕੋ ਪੁਣ੍ਣੋ ਨਾਮ ਏਕੋ ਅਹੋਸਿ, ਸੋ ਦਬ੍ਬਿਗਹਣਸਿਪ੍ਪਂ ਜਾਨਾਤਿ। ਤ੍વਂ ਸਾਚਰਿਯਕੋ ਤੇਸਂ ਪੁਣ੍ਣੋਪਿ ਨ ਹੋਤਿ, ਤੇਨ ਞਾਤਂ ਦਬ੍ਬਿਗਹਣਸਿਪ੍ਪਮਤ੍ਤਮ੍ਪਿ ਨ ਜਾਨਾਸੀਤਿ। ਸੇਸਂ ਸਬ੍ਬਤ੍ਥ ਉਤ੍ਤਾਨਮੇવਾਤਿ।
Asitenāti pañcābhiññena asitena devalena isinā imaṃ gandhabbapañhaṃ puṭṭhā na sampāyissanti. Yesanti yesaṃ sattannaṃ isīnaṃ. Na puṇṇo dabbigāhoti tesaṃ sattannaṃ isīnaṃ dabbiṃ gahetvā paṇṇaṃ pacitvā dāyako puṇṇo nāma eko ahosi, so dabbigahaṇasippaṃ jānāti. Tvaṃ sācariyako tesaṃ puṇṇopi na hoti, tena ñātaṃ dabbigahaṇasippamattampi na jānāsīti. Sesaṃ sabbattha uttānamevāti.
ਅਯਂ ਪਨ ਅਸ੍ਸਲਾਯਨੋ ਸਦ੍ਧੋ ਅਹੋਸਿ ਪਸਨ੍ਨੋ, ਅਤ੍ਤਨੋ ਅਨ੍ਤੋਨਿવੇਸਨੇਯੇવ ਚੇਤਿਯਂ ਕਾਰੇਸਿ। ਯਾવਜ੍ਜਦਿવਸਾ ਅਸ੍ਸਲਾਯਨવਂਸੇ ਜਾਤਾ ਨਿવੇਸਨਂ ਕਾਰੇਤ੍વਾ ਅਨ੍ਤੋਨਿવੇਸਨੇ ਚੇਤਿਯਂ ਕਰੋਨ੍ਤੇવਾਤਿ।
Ayaṃ pana assalāyano saddho ahosi pasanno, attano antonivesaneyeva cetiyaṃ kāresi. Yāvajjadivasā assalāyanavaṃse jātā nivesanaṃ kāretvā antonivesane cetiyaṃ karontevāti.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
Papañcasūdaniyā majjhimanikāyaṭṭhakathāya
ਅਸ੍ਸਲਾਯਨਸੁਤ੍ਤવਣ੍ਣਨਾ ਨਿਟ੍ਠਿਤਾ।
Assalāyanasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਮਜ੍ਝਿਮਨਿਕਾਯ • Majjhimanikāya / ੩. ਅਸ੍ਸਲਾਯਨਸੁਤ੍ਤਂ • 3. Assalāyanasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) / ੩. ਅਸ੍ਸਲਾਯਨਸੁਤ੍ਤવਣ੍ਣਨਾ • 3. Assalāyanasuttavaṇṇanā
