| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. অস্সারোহসুত্তং
5. Assārohasuttaṃ
৩৫৭. অথ খো অস্সারোহো গামণি যেন ভগৰা তেনুপসঙ্কমি; উপসঙ্কমিত্ৰা একমন্তং নিসীদি। একমন্তং নিসিন্নো খো অস্সারোহো গামণি ভগৰন্তং এতদৰোচ – ‘‘সুতং মেতং, ভন্তে, পুব্বকানং আচরিযপাচরিযানং অস্সারোহানং ভাসমানানং – ‘যো সো অস্সারোহো সঙ্গামে উস্সহতি ৰাযমতি, তমেনং উস্সহন্তং ৰাযমন্তং পরে হনন্তি পরিযাপাদেন্তি, সো কাযস্স ভেদা পরং মরণা পরজিতানং দেৰানং সহব্যতং উপপজ্জতী’তি। ইধ ভগৰা কিমাহা’’তি? ‘‘অলং, গামণি, তিট্ঠতেতং; মা মং এতং পুচ্ছী’’তি। দুতিযম্পি খো…পে॰… ততিযম্পি খো অস্সারোহো গামণি ভগৰন্তং এতদৰোচ – ‘‘সুতং মেতং, ভন্তে, পুব্বকানং আচরিযপাচরিযানং অস্সারোহানং ভাসমানানং – ‘যো সো অস্সারোহো সঙ্গামে উস্সহতি ৰাযমতি, তমেনং উস্সহন্তং ৰাযমন্তং পরে হনন্তি পরিযাপাদেন্তি, সো কাযস্স ভেদা পরং মরণা পরজিতানং দেৰানং সহব্যতং উপপজ্জতী’তি। ইধ ভগৰা কিমাহা’’তি?
357. Atha kho assāroho gāmaṇi yena bhagavā tenupasaṅkami; upasaṅkamitvā ekamantaṃ nisīdi. Ekamantaṃ nisinno kho assāroho gāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ assārohānaṃ bhāsamānānaṃ – ‘yo so assāroho saṅgāme ussahati vāyamati, tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajitānaṃ devānaṃ sahabyataṃ upapajjatī’ti. Idha bhagavā kimāhā’’ti? ‘‘Alaṃ, gāmaṇi, tiṭṭhatetaṃ; mā maṃ etaṃ pucchī’’ti. Dutiyampi kho…pe… tatiyampi kho assāroho gāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ assārohānaṃ bhāsamānānaṃ – ‘yo so assāroho saṅgāme ussahati vāyamati, tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajitānaṃ devānaṃ sahabyataṃ upapajjatī’ti. Idha bhagavā kimāhā’’ti?
‘‘অদ্ধা খো ত্যাহং, গামণি, ন লভামি – ‘অলং, গামণি, তিট্ঠতেতং; মা মং এতং পুচ্ছী’তি। অপি চ খো ত্যাহং ব্যাকরিস্সামি। যো সো, গামণি, অস্সারোহো সঙ্গামে উস্সহতি ৰাযমতি তস্স তং চিত্তং পুব্বে গহিতং দুক্কটং দুপ্পণিহিতং – ‘ইমে সত্তা হঞ্ঞন্তু ৰা বজ্ঝন্তু ৰা উচ্ছিজ্জন্তু ৰা ৰিনস্সন্তু ৰা মা অহেসুং ইতি ৰা’তি। তমেনং উস্সহন্তং ৰাযমন্তং পরে হনন্তি পরিযাপাদেন্তি, সো কাযস্স ভেদা পরং মরণা পরজিতো নাম নিরযো তত্থ উপপজ্জতি। সচে খো পনস্স এৰং দিট্ঠি হোতি – ‘যো সো অস্সারোহো সঙ্গামে উস্সহতি ৰাযমতি, তমেনং উস্সহন্তং ৰাযমন্তং পরে হনন্তি পরিযাপাদেন্তি, সো কাযস্স ভেদা পরং মরণা পরজিতানং দেৰানং সহব্যতং উপপজ্জতী’তি, সাস্স হোতি মিচ্ছাদিট্ঠি। মিচ্ছাদিট্ঠিকস্স খো পনাহং গামণি, পুরিসপুগ্গলস্স দ্ৰিন্নং গতীনং অঞ্ঞতরং গতিং ৰদামি – নিরযং ৰা তিরচ্ছানযোনিং ৰা’’তি।
‘‘Addhā kho tyāhaṃ, gāmaṇi, na labhāmi – ‘alaṃ, gāmaṇi, tiṭṭhatetaṃ; mā maṃ etaṃ pucchī’ti. Api ca kho tyāhaṃ byākarissāmi. Yo so, gāmaṇi, assāroho saṅgāme ussahati vāyamati tassa taṃ cittaṃ pubbe gahitaṃ dukkaṭaṃ duppaṇihitaṃ – ‘ime sattā haññantu vā bajjhantu vā ucchijjantu vā vinassantu vā mā ahesuṃ iti vā’ti. Tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajito nāma nirayo tattha upapajjati. Sace kho panassa evaṃ diṭṭhi hoti – ‘yo so assāroho saṅgāme ussahati vāyamati, tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajitānaṃ devānaṃ sahabyataṃ upapajjatī’ti, sāssa hoti micchādiṭṭhi. Micchādiṭṭhikassa kho panāhaṃ gāmaṇi, purisapuggalassa dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā’’ti.
এৰং ৰুত্তে, অস্সারোহো গামণি পরোদি, অস্সূনি পৰত্তেসি। ‘‘এতং খো ত্যাহং, গামণি, নালত্থং – ‘অলং, গামণি, তিট্ঠতেতং; মা মং এতং পুচ্ছী’’’তি। ‘‘নাহং, ভন্তে, এতং রোদামি যং মং ভগৰা এৰমাহ। অপিচাহং, ভন্তে, পুব্বকেহি আচরিযপাচরিযেহি অস্সারোহেহি দীঘরত্তং নিকতো ৰঞ্চিতো পলুদ্ধো – ‘যো সো অস্সারোহো সঙ্গামে উস্সহতি ৰাযমতি, তমেনং উস্সহন্তং ৰাযমন্তং পরে হনন্তি পরিযাপাদেন্তি, সো কাযস্স ভেদা পরং মরণা পরজিতানং দেৰানং সহব্যতং উপপজ্জতী’’’তি। ‘‘অভিক্কন্তং, ভন্তে…পে॰… অজ্জতগ্গে পাণুপেতং সরণং গত’’ন্তি। পঞ্চমং।
Evaṃ vutte, assāroho gāmaṇi parodi, assūni pavattesi. ‘‘Etaṃ kho tyāhaṃ, gāmaṇi, nālatthaṃ – ‘alaṃ, gāmaṇi, tiṭṭhatetaṃ; mā maṃ etaṃ pucchī’’’ti. ‘‘Nāhaṃ, bhante, etaṃ rodāmi yaṃ maṃ bhagavā evamāha. Apicāhaṃ, bhante, pubbakehi ācariyapācariyehi assārohehi dīgharattaṃ nikato vañcito paluddho – ‘yo so assāroho saṅgāme ussahati vāyamati, tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajitānaṃ devānaṃ sahabyataṃ upapajjatī’’’ti. ‘‘Abhikkantaṃ, bhante…pe… ajjatagge pāṇupetaṃ saraṇaṃ gata’’nti. Pañcamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩-৫. যোধাজীৰসুত্তাদিৰণ্ণনা • 3-5. Yodhājīvasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩-৫. যোধাজীৰসুত্তাদিৰণ্ণনা • 3-5. Yodhājīvasuttādivaṇṇanā
