| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
5. අස්‌සාරොහසුත්‌තං
5. Assārohasuttaṃ
357. අථ ඛො අස්‌සාරොහො ගාමණි යෙන භගවා තෙනුපසඞ්‌කමි; උපසඞ්‌කමිත්‌වා එකමන්‌තං නිසීදි. එකමන්‌තං නිසින්‌නො ඛො අස්‌සාරොහො ගාමණි භගවන්‌තං එතදවොච – ‘‘සුතං මෙතං, භන්‌තෙ, පුබ්‌බකානං ආචරියපාචරියානං අස්‌සාරොහානං භාසමානානං – ‘යො සො අස්‌සාරොහො සඞ්‌ගාමෙ උස්‌සහති වායමති, තමෙනං උස්‌සහන්‌තං වායමන්‌තං පරෙ හනන්‌ති පරියාපාදෙන්‌ති, සො කායස්‌ස භෙදා පරං මරණා පරජිතානං දෙවානං සහබ්‍යතං උපපජ්‌ජතී’ති. ඉධ භගවා කිමාහා’’ති? ‘‘අලං, ගාමණි, තිට්‌ඨතෙතං; මා මං එතං පුච්‌ඡී’’ති. දුතියම්‌පි ඛො…පෙ.… තතියම්‌පි ඛො අස්‌සාරොහො ගාමණි භගවන්‌තං එතදවොච – ‘‘සුතං මෙතං, භන්‌තෙ, පුබ්‌බකානං ආචරියපාචරියානං අස්‌සාරොහානං භාසමානානං – ‘යො සො අස්‌සාරොහො සඞ්‌ගාමෙ උස්‌සහති වායමති, තමෙනං උස්‌සහන්‌තං වායමන්‌තං පරෙ හනන්‌ති පරියාපාදෙන්‌ති, සො කායස්‌ස භෙදා පරං මරණා පරජිතානං දෙවානං සහබ්‍යතං උපපජ්‌ජතී’ති. ඉධ භගවා කිමාහා’’ති?
357. Atha kho assāroho gāmaṇi yena bhagavā tenupasaṅkami; upasaṅkamitvā ekamantaṃ nisīdi. Ekamantaṃ nisinno kho assāroho gāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ assārohānaṃ bhāsamānānaṃ – ‘yo so assāroho saṅgāme ussahati vāyamati, tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajitānaṃ devānaṃ sahabyataṃ upapajjatī’ti. Idha bhagavā kimāhā’’ti? ‘‘Alaṃ, gāmaṇi, tiṭṭhatetaṃ; mā maṃ etaṃ pucchī’’ti. Dutiyampi kho…pe… tatiyampi kho assāroho gāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ assārohānaṃ bhāsamānānaṃ – ‘yo so assāroho saṅgāme ussahati vāyamati, tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajitānaṃ devānaṃ sahabyataṃ upapajjatī’ti. Idha bhagavā kimāhā’’ti?
‘‘අද්‌ධා ඛො ත්‍යාහං, ගාමණි, න ලභාමි – ‘අලං, ගාමණි, තිට්‌ඨතෙතං; මා මං එතං පුච්‌ඡී’ති. අපි ච ඛො ත්‍යාහං බ්‍යාකරිස්‌සාමි. යො සො, ගාමණි, අස්‌සාරොහො සඞ්‌ගාමෙ උස්‌සහති වායමති තස්‌ස තං චිත්‌තං පුබ්‌බෙ ගහිතං දුක්‌කටං දුප්‌පණිහිතං – ‘ඉමෙ සත්‌තා හඤ්‌ඤන්‌තු වා බජ්‌ඣන්‌තු වා උච්‌ඡිජ්‌ජන්‌තු වා විනස්‌සන්‌තු වා මා අහෙසුං ඉති වා’ති. තමෙනං උස්‌සහන්‌තං වායමන්‌තං පරෙ හනන්‌ති පරියාපාදෙන්‌ති, සො කායස්‌ස භෙදා පරං මරණා පරජිතො නාම නිරයො තත්‌ථ උපපජ්‌ජති. සචෙ ඛො පනස්‌ස එවං දිට්‌ඨි හොති – ‘යො සො අස්‌සාරොහො සඞ්‌ගාමෙ උස්‌සහති වායමති, තමෙනං උස්‌සහන්‌තං වායමන්‌තං පරෙ හනන්‌ති පරියාපාදෙන්‌ති, සො කායස්‌ස භෙදා පරං මරණා පරජිතානං දෙවානං සහබ්‍යතං උපපජ්‌ජතී’ති, සාස්‌ස හොති මිච්‌ඡාදිට්‌ඨි. මිච්‌ඡාදිට්‌ඨිකස්‌ස ඛො පනාහං ගාමණි, පුරිසපුග්‌ගලස්‌ස ද්‌වින්‌නං ගතීනං අඤ්‌ඤතරං ගතිං වදාමි – නිරයං වා තිරච්‌ඡානයොනිං වා’’ති.
‘‘Addhā kho tyāhaṃ, gāmaṇi, na labhāmi – ‘alaṃ, gāmaṇi, tiṭṭhatetaṃ; mā maṃ etaṃ pucchī’ti. Api ca kho tyāhaṃ byākarissāmi. Yo so, gāmaṇi, assāroho saṅgāme ussahati vāyamati tassa taṃ cittaṃ pubbe gahitaṃ dukkaṭaṃ duppaṇihitaṃ – ‘ime sattā haññantu vā bajjhantu vā ucchijjantu vā vinassantu vā mā ahesuṃ iti vā’ti. Tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajito nāma nirayo tattha upapajjati. Sace kho panassa evaṃ diṭṭhi hoti – ‘yo so assāroho saṅgāme ussahati vāyamati, tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajitānaṃ devānaṃ sahabyataṃ upapajjatī’ti, sāssa hoti micchādiṭṭhi. Micchādiṭṭhikassa kho panāhaṃ gāmaṇi, purisapuggalassa dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā’’ti.
එවං වුත්‌තෙ, අස්‌සාරොහො ගාමණි පරොදි, අස්‌සූනි පවත්‌තෙසි. ‘‘එතං ඛො ත්‍යාහං, ගාමණි, නාලත්‌ථං – ‘අලං, ගාමණි, තිට්‌ඨතෙතං; මා මං එතං පුච්‌ඡී’’’ති. ‘‘නාහං, භන්‌තෙ, එතං රොදාමි යං මං භගවා එවමාහ. අපිචාහං, භන්‌තෙ, පුබ්‌බකෙහි ආචරියපාචරියෙහි අස්‌සාරොහෙහි දීඝරත්‌තං නිකතො වඤ්‌චිතො පලුද්‌ධො – ‘යො සො අස්‌සාරොහො සඞ්‌ගාමෙ උස්‌සහති වායමති, තමෙනං උස්‌සහන්‌තං වායමන්‌තං පරෙ හනන්‌ති පරියාපාදෙන්‌ති, සො කායස්‌ස භෙදා පරං මරණා පරජිතානං දෙවානං සහබ්‍යතං උපපජ්‌ජතී’’’ති. ‘‘අභික්‌කන්‌තං, භන්‌තෙ…පෙ.… අජ්‌ජතග්‌ගෙ පාණුපෙතං සරණං ගත’’න්‌ති. පඤ්‌චමං.
Evaṃ vutte, assāroho gāmaṇi parodi, assūni pavattesi. ‘‘Etaṃ kho tyāhaṃ, gāmaṇi, nālatthaṃ – ‘alaṃ, gāmaṇi, tiṭṭhatetaṃ; mā maṃ etaṃ pucchī’’’ti. ‘‘Nāhaṃ, bhante, etaṃ rodāmi yaṃ maṃ bhagavā evamāha. Apicāhaṃ, bhante, pubbakehi ācariyapācariyehi assārohehi dīgharattaṃ nikato vañcito paluddho – ‘yo so assāroho saṅgāme ussahati vāyamati, tamenaṃ ussahantaṃ vāyamantaṃ pare hananti pariyāpādenti, so kāyassa bhedā paraṃ maraṇā parajitānaṃ devānaṃ sahabyataṃ upapajjatī’’’ti. ‘‘Abhikkantaṃ, bhante…pe… ajjatagge pāṇupetaṃ saraṇaṃ gata’’nti. Pañcamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3-5. යොධාජීවසුත්‌තාදිවණ්‌ණනා • 3-5. Yodhājīvasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3-5. යොධාජීවසුත්‌තාදිවණ්‌ණනා • 3-5. Yodhājīvasuttādivaṇṇanā
