| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๑๑. อสฺสาสปสฺสาสนิโรธปโญฺห
11. Assāsapassāsanirodhapañho
๑๑. ราชา อาห ‘‘ภเนฺต นาคเสน, ตุเมฺห เอวํ ภณถ ‘สกฺกา อสฺสาสปสฺสาเส นิโรเธตุ’’’นฺติ? ‘‘อาม, มหาราช, สกฺกา อสฺสาสปสฺสาเส นิโรเธตุ’’นฺติฯ ‘‘กถํ, ภเนฺต นาคเสน, สกฺกา อสฺสาสปสฺสาเส นิโรเธตุ’’นฺติฯ ‘‘ตํ กิํ มญฺญสิ, มหาราช, สุตปุโพฺพ เต โกจิ กากจฺฉมาโน’’ติฯ ‘‘อาม, ภเนฺต, สุตปุโพฺพ’’ติฯ ‘‘กิํ นุ โข, มหาราช, โส สโทฺท กาเย นมิเต วิรเมยฺยา’’ติฯ ‘‘อาม, ภเนฺต, วิรเมยฺยา’’ติฯ ‘‘โส หิ นาม, มหาราช, สโทฺท อภาวิตกายสฺส อภาวิตสีลสฺส อภาวิตจิตฺตสฺส อภาวิตปญฺญสฺส กาเย นมิเต วิรมิสฺสติ, กิํ ปน ภาวิตกายสฺส ภาวิตสีลสฺส ภาวิตจิตฺตสฺส ภาวิตปญฺญสฺส จตุตฺถชฺฌานํ สมาปนฺนสฺส อสฺสาสปสฺสาสา น นิรุชฺฌิสฺสนฺตี’’ติฯ
11. Rājā āha ‘‘bhante nāgasena, tumhe evaṃ bhaṇatha ‘sakkā assāsapassāse nirodhetu’’’nti? ‘‘Āma, mahārāja, sakkā assāsapassāse nirodhetu’’nti. ‘‘Kathaṃ, bhante nāgasena, sakkā assāsapassāse nirodhetu’’nti. ‘‘Taṃ kiṃ maññasi, mahārāja, sutapubbo te koci kākacchamāno’’ti. ‘‘Āma, bhante, sutapubbo’’ti. ‘‘Kiṃ nu kho, mahārāja, so saddo kāye namite virameyyā’’ti. ‘‘Āma, bhante, virameyyā’’ti. ‘‘So hi nāma, mahārāja, saddo abhāvitakāyassa abhāvitasīlassa abhāvitacittassa abhāvitapaññassa kāye namite viramissati, kiṃ pana bhāvitakāyassa bhāvitasīlassa bhāvitacittassa bhāvitapaññassa catutthajjhānaṃ samāpannassa assāsapassāsā na nirujjhissantī’’ti.
‘‘กโลฺลสิ, ภเนฺต นาคเสนา’’ติฯ
‘‘Kallosi, bhante nāgasenā’’ti.
อสฺสาสปสฺสาสนิโรธปโญฺห เอกาทสโมฯ
Assāsapassāsanirodhapañho ekādasamo.
