| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၁၁. အသ္သာသပသ္သာသနိရောဓပဉ္ဟော
11. Assāsapassāsanirodhapañho
၁၁. ရာဇာ အာဟ ‘‘ဘန္တေ နာဂသေန, တုမ္ဟေ ဧဝံ ဘဏထ ‘သက္ကာ အသ္သာသပသ္သာသေ နိရောဓေတု’’’န္တိ? ‘‘အာမ, မဟာရာဇ, သက္ကာ အသ္သာသပသ္သာသေ နိရောဓေတု’’န္တိ။ ‘‘ကထံ, ဘန္တေ နာဂသေန, သက္ကာ အသ္သာသပသ္သာသေ နိရောဓေတု’’န္တိ။ ‘‘တံ ကိံ မညသိ, မဟာရာဇ, သုတပုဗ္ဗော တေ ကောစိ ကာကစ္ဆမာနော’’တိ။ ‘‘အာမ, ဘန္တေ, သုတပုဗ္ဗော’’တိ။ ‘‘ကိံ နု ခော, မဟာရာဇ, သော သဒ္ဒော ကာယေ နမိတေ ဝိရမေယ္ယာ’’တိ။ ‘‘အာမ, ဘန္တေ, ဝိရမေယ္ယာ’’တိ။ ‘‘သော ဟိ နာမ, မဟာရာဇ, သဒ္ဒော အဘာဝိတကာယသ္သ အဘာဝိတသီလသ္သ အဘာဝိတစိတ္တသ္သ အဘာဝိတပညသ္သ ကာယေ နမိတေ ဝိရမိသ္သတိ, ကိံ ပန ဘာဝိတကာယသ္သ ဘာဝိတသီလသ္သ ဘာဝိတစိတ္တသ္သ ဘာဝိတပညသ္သ စတုတ္ထဇ္ဈာနံ သမာပန္နသ္သ အသ္သာသပသ္သာသာ န နိရုဇ္ဈိသ္သန္တီ’’တိ။
11. Rājā āha ‘‘bhante nāgasena, tumhe evaṃ bhaṇatha ‘sakkā assāsapassāse nirodhetu’’’nti? ‘‘Āma, mahārāja, sakkā assāsapassāse nirodhetu’’nti. ‘‘Kathaṃ, bhante nāgasena, sakkā assāsapassāse nirodhetu’’nti. ‘‘Taṃ kiṃ maññasi, mahārāja, sutapubbo te koci kākacchamāno’’ti. ‘‘Āma, bhante, sutapubbo’’ti. ‘‘Kiṃ nu kho, mahārāja, so saddo kāye namite virameyyā’’ti. ‘‘Āma, bhante, virameyyā’’ti. ‘‘So hi nāma, mahārāja, saddo abhāvitakāyassa abhāvitasīlassa abhāvitacittassa abhāvitapaññassa kāye namite viramissati, kiṃ pana bhāvitakāyassa bhāvitasīlassa bhāvitacittassa bhāvitapaññassa catutthajjhānaṃ samāpannassa assāsapassāsā na nirujjhissantī’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
အသ္သာသပသ္သာသနိရောဓပဉ္ဟော ဧကာဒသမော။
Assāsapassāsanirodhapañho ekādasamo.
