| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. அஸ்ஸுஸுத்தங்
3. Assusuttaṃ
126. ஸாவத்தி²யங் விஹரதி…பே॰… ‘‘அனமதக்³கோ³யங், பி⁴க்க²வே, ஸங்ஸாரோ. புப்³பா³ கோடி ந பஞ்ஞாயதி அவிஜ்ஜானீவரணானங் ஸத்தானங் தண்ஹாஸங்யோஜனானங் ஸந்தா⁴வதங் ஸங்ஸரதங். தங் கிங் மஞ்ஞத², பி⁴க்க²வே, கதமங் நு கோ² ப³ஹுதரங், யங் வா வோ இமினா தீ³கே⁴ன அத்³து⁴னா ஸந்தா⁴வதங் ஸங்ஸரதங் அமனாபஸம்பயோகா³ மனாபவிப்பயோகா³ கந்த³ந்தானங் ரோத³ந்தானங் 1 அஸ்ஸு பஸ்ஸன்னங் 2 பக்³க⁴ரிதங், யங் வா சதூஸு மஹாஸமுத்³தே³ஸு உத³க’’ந்தி? ‘‘யதா² கோ² மயங், ப⁴ந்தே, ப⁴க³வதா த⁴ம்மங் தே³ஸிதங் ஆஜானாம, ஏததே³வ, ப⁴ந்தே, ப³ஹுதரங் யங் நோ இமினா தீ³கே⁴ன அத்³து⁴னா ஸந்தா⁴வதங் ஸங்ஸரதங் அமனாபஸம்பயோகா³ மனாபவிப்பயோகா³ கந்த³ந்தானங் ரோத³ந்தானங் அஸ்ஸு பஸ்ஸன்னங் பக்³க⁴ரிதங், ந த்வேவ சதூஸு மஹாஸமுத்³தே³ஸு உத³க’’ந்தி.
126. Sāvatthiyaṃ viharati…pe… ‘‘anamataggoyaṃ, bhikkhave, saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Taṃ kiṃ maññatha, bhikkhave, katamaṃ nu kho bahutaraṃ, yaṃ vā vo iminā dīghena addhunā sandhāvataṃ saṃsarataṃ amanāpasampayogā manāpavippayogā kandantānaṃ rodantānaṃ 3 assu passannaṃ 4 paggharitaṃ, yaṃ vā catūsu mahāsamuddesu udaka’’nti? ‘‘Yathā kho mayaṃ, bhante, bhagavatā dhammaṃ desitaṃ ājānāma, etadeva, bhante, bahutaraṃ yaṃ no iminā dīghena addhunā sandhāvataṃ saṃsarataṃ amanāpasampayogā manāpavippayogā kandantānaṃ rodantānaṃ assu passannaṃ paggharitaṃ, na tveva catūsu mahāsamuddesu udaka’’nti.
‘‘ஸாது⁴ ஸாது⁴, பி⁴க்க²வே, ஸாது⁴ கோ² மே தும்ஹே, பி⁴க்க²வே, ஏவங் த⁴ம்மங் தே³ஸிதங் ஆஜானாத². ஏததே³வ, பி⁴க்க²வே, ப³ஹுதரங் யங் வோ இமினா தீ³கே⁴ன அத்³து⁴னா ஸந்தா⁴வதங் ஸங்ஸரதங் அமனாபஸம்பயோகா³ மனாபவிப்பயோகா³ கந்த³ந்தானங் ரோத³ந்தானங் அஸ்ஸு பஸ்ஸன்னங் பக்³க⁴ரிதங், ந த்வேவ சதூஸு மஹாஸமுத்³தே³ஸு உத³கங். தீ³க⁴ரத்தங் வோ, பி⁴க்க²வே, மாதுமரணங் பச்சனுபூ⁴தங்; தேஸங் வா மாதுமரணங் பச்சனுபொ⁴ந்தானங் அமனாபஸம்பயோகா³ மனாபவிப்பயோகா³ கந்த³ந்தானங் ரோத³ந்தானங் அஸ்ஸு பஸ்ஸன்னங் பக்³க⁴ரிதங், ந த்வேவ சதூஸு மஹாஸமுத்³தே³ஸு உத³கங். தீ³க⁴ரத்தங் வோ, பி⁴க்க²வே, பிதுமரணங் பச்சனுபூ⁴தங் …பே॰… பா⁴துமரணங் பச்சனுபூ⁴தங்… ப⁴கி³னிமரணங் பச்சனுபூ⁴தங்… புத்தமரணங் பச்சனுபூ⁴தங்… தீ⁴துமரணங் பச்சனுபூ⁴தங்… ஞாதிப்³யஸனங் பச்சனுபூ⁴தங்… போ⁴க³ப்³யஸனங் பச்சனுபூ⁴தங். தீ³க⁴ரத்தங் வோ, பி⁴க்க²வே , ரோக³ப்³யஸனங் பச்சனுபூ⁴தங், தேஸங் வோ ரோக³ப்³யஸனங் பச்சனுபொ⁴ந்தானங் அமனாபஸம்பயோகா³ மனாபவிப்பயோகா³ கந்த³ந்தானங் ரோத³ந்தானங் அஸ்ஸு பஸ்ஸன்னங் பக்³க⁴ரிதங், ந த்வேவ சதூஸு மஹாஸமுத்³தே³ஸு உத³கங். தங் கிஸ்ஸ ஹேது? அனமதக்³கோ³யங், பி⁴க்க²வே, ஸங்ஸாரோ …பே॰… யாவஞ்சித³ங், பி⁴க்க²வே, அலமேவ ஸப்³ப³ஸங்கா²ரேஸு நிப்³பி³ந்தி³துங், அலங் விரஜ்ஜிதுங், அலங் விமுச்சிது’’ந்தி. ததியங்.
‘‘Sādhu sādhu, bhikkhave, sādhu kho me tumhe, bhikkhave, evaṃ dhammaṃ desitaṃ ājānātha. Etadeva, bhikkhave, bahutaraṃ yaṃ vo iminā dīghena addhunā sandhāvataṃ saṃsarataṃ amanāpasampayogā manāpavippayogā kandantānaṃ rodantānaṃ assu passannaṃ paggharitaṃ, na tveva catūsu mahāsamuddesu udakaṃ. Dīgharattaṃ vo, bhikkhave, mātumaraṇaṃ paccanubhūtaṃ; tesaṃ vā mātumaraṇaṃ paccanubhontānaṃ amanāpasampayogā manāpavippayogā kandantānaṃ rodantānaṃ assu passannaṃ paggharitaṃ, na tveva catūsu mahāsamuddesu udakaṃ. Dīgharattaṃ vo, bhikkhave, pitumaraṇaṃ paccanubhūtaṃ …pe… bhātumaraṇaṃ paccanubhūtaṃ… bhaginimaraṇaṃ paccanubhūtaṃ… puttamaraṇaṃ paccanubhūtaṃ… dhītumaraṇaṃ paccanubhūtaṃ… ñātibyasanaṃ paccanubhūtaṃ… bhogabyasanaṃ paccanubhūtaṃ. Dīgharattaṃ vo, bhikkhave , rogabyasanaṃ paccanubhūtaṃ, tesaṃ vo rogabyasanaṃ paccanubhontānaṃ amanāpasampayogā manāpavippayogā kandantānaṃ rodantānaṃ assu passannaṃ paggharitaṃ, na tveva catūsu mahāsamuddesu udakaṃ. Taṃ kissa hetu? Anamataggoyaṃ, bhikkhave, saṃsāro …pe… yāvañcidaṃ, bhikkhave, alameva sabbasaṅkhāresu nibbindituṃ, alaṃ virajjituṃ, alaṃ vimuccitu’’nti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. அஸ்ஸுஸுத்தவண்ணனா • 3. Assusuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. அஸ்ஸுஸுத்தவண்ணனா • 3. Assusuttavaṇṇanā
