| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. அஸ்ஸுஸுத்தவண்ணனா
3. Assusuttavaṇṇanā
126. ததியே கந்த³ந்தானந்தி ஸஸத்³த³ங் ருத³மானானங். பஸ்ஸன்னந்தி ஸந்தி³தங் பவத்தங். சதூஸு மஹாஸமுத்³தே³ஸூதி ஸினேருரஸ்மீஹி பரிச்சி²ன்னேஸு சதூஸு மஹாஸமுத்³தே³ஸு. ஸினேருஸ்ஸ ஹி பாசீனபஸ்ஸங் ரஜதமயங், த³க்கி²ணபஸ்ஸங் மணிமயங், பச்சி²மபஸ்ஸங் ப²லிகமயங், உத்தரபஸ்ஸங் ஸுவண்ணமயங். புப்³ப³த³க்கி²ணபஸ்ஸேஹி நிக்க²ந்தா ரஜதமணிரஸ்மியோ ஏகதோ ஹுத்வா மஹாஸமுத்³த³பிட்டே²ன க³ந்த்வா சக்கவாளபப்³ப³தங் ஆஹச்ச திட்ட²ந்தி, த³க்கி²ணபச்சி²மபஸ்ஸேஹி நிக்க²ந்தா மணிப²லிகரஸ்மியோ, பச்சி²முத்தரபஸ்ஸேஹி நிக்க²ந்தா ப²லிகஸுவண்ணரஸ்மியோ, உத்தரபாசீனபஸ்ஸேஹி நிக்க²ந்தா ஸுவண்ணரஜதரஸ்மியோ ஏகதோ ஹுத்வா மஹாஸமுத்³த³பிட்டே²ன க³ந்த்வா சக்கவாளபப்³ப³தங் ஆஹச்ச திட்ட²ந்தி. தாஸங் ரஸ்மீனங் அந்தரேஸு சத்தாரோ மஹாஸமுத்³தா³ ஹொந்தி. தே ஸந்தா⁴ய வுத்தங் ‘‘சதூஸு மஹாஸமுத்³தே³ஸூ’’தி. ஞாதிப்³யஸனந்திஆதீ³ஸு ப்³யஸனந்தி விஅஸனங், வினாஸோதி அத்தோ². ஞாதீனங் ப்³யஸனங் ஞாதிப்³யஸனங், போ⁴கா³னங் ப்³யஸனங் போ⁴க³ப்³யஸனங். ரோகோ³ பன ஸயமேவ ஆரொக்³யங் வியஸதி வினாஸேதீதி ப்³யஸனங், ரோகோ³வ ப்³யஸனங் ரோக³ப்³யஸனங். ததியங்.
126. Tatiye kandantānanti sasaddaṃ rudamānānaṃ. Passannanti sanditaṃ pavattaṃ. Catūsu mahāsamuddesūti sinerurasmīhi paricchinnesu catūsu mahāsamuddesu. Sinerussa hi pācīnapassaṃ rajatamayaṃ, dakkhiṇapassaṃ maṇimayaṃ, pacchimapassaṃ phalikamayaṃ, uttarapassaṃ suvaṇṇamayaṃ. Pubbadakkhiṇapassehi nikkhantā rajatamaṇirasmiyo ekato hutvā mahāsamuddapiṭṭhena gantvā cakkavāḷapabbataṃ āhacca tiṭṭhanti, dakkhiṇapacchimapassehi nikkhantā maṇiphalikarasmiyo, pacchimuttarapassehi nikkhantā phalikasuvaṇṇarasmiyo, uttarapācīnapassehi nikkhantā suvaṇṇarajatarasmiyo ekato hutvā mahāsamuddapiṭṭhena gantvā cakkavāḷapabbataṃ āhacca tiṭṭhanti. Tāsaṃ rasmīnaṃ antaresu cattāro mahāsamuddā honti. Te sandhāya vuttaṃ ‘‘catūsu mahāsamuddesū’’ti. Ñātibyasanantiādīsu byasananti viasanaṃ, vināsoti attho. Ñātīnaṃ byasanaṃ ñātibyasanaṃ, bhogānaṃ byasanaṃ bhogabyasanaṃ. Rogo pana sayameva ārogyaṃ viyasati vināsetīti byasanaṃ, rogova byasanaṃ rogabyasanaṃ. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. அஸ்ஸுஸுத்தங் • 3. Assusuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. அஸ்ஸுஸுத்தவண்ணனா • 3. Assusuttavaṇṇanā
