| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၃. အသ္သုသုတ္တဝဏ္ဏနာ
3. Assusuttavaṇṇanā
၁၂၆. တတိယေ ကန္ဒန္တာနန္တိ သသဒ္ဒံ ရုဒမာနာနံ။ ပသ္သန္နန္တိ သန္ဒိတံ ပဝတ္တံ။ စတူသု မဟာသမုဒ္ဒေသူတိ သိနေရုရသ္မီဟိ ပရိစ္ဆိန္နေသု စတူသု မဟာသမုဒ္ဒေသု။ သိနေရုသ္သ ဟိ ပာစီနပသ္သံ ရဇတမယံ, ဒက္ခိဏပသ္သံ မဏိမယံ, ပစ္ဆိမပသ္သံ ဖလိကမယံ, ဥတ္တရပသ္သံ သုဝဏ္ဏမယံ။ ပုဗ္ဗဒက္ခိဏပသ္သေဟိ နိက္ခန္တာ ရဇတမဏိရသ္မိယော ဧကတော ဟုတ္ဝာ မဟာသမုဒ္ဒပိဋ္ဌေန ဂန္တ္ဝာ စက္ကဝာဠပဗ္ဗတံ အာဟစ္စ တိဋ္ဌန္တိ, ဒက္ခိဏပစ္ဆိမပသ္သေဟိ နိက္ခန္တာ မဏိဖလိကရသ္မိယော, ပစ္ဆိမုတ္တရပသ္သေဟိ နိက္ခန္တာ ဖလိကသုဝဏ္ဏရသ္မိယော, ဥတ္တရပာစီနပသ္သေဟိ နိက္ခန္တာ သုဝဏ္ဏရဇတရသ္မိယော ဧကတော ဟုတ္ဝာ မဟာသမုဒ္ဒပိဋ္ဌေန ဂန္တ္ဝာ စက္ကဝာဠပဗ္ဗတံ အာဟစ္စ တိဋ္ဌန္တိ။ တာသံ ရသ္မီနံ အန္တရေသု စတ္တာရော မဟာသမုဒ္ဒာ ဟောန္တိ။ တေ သန္ဓာယ ဝုတ္တံ ‘‘စတူသု မဟာသမုဒ္ဒေသူ’’တိ။ ဉာတိဗ္ယသနန္တိအာဒီသု ဗ္ယသနန္တိ ဝိအသနံ, ဝိနာသောတိ အတ္ထော။ ဉာတီနံ ဗ္ယသနံ ဉာတိဗ္ယသနံ, ဘောဂာနံ ဗ္ယသနံ ဘောဂဗ္ယသနံ။ ရောဂော ပန သယမေဝ အာရောဂ္ယံ ဝိယသတိ ဝိနာသေတီတိ ဗ္ယသနံ, ရောဂောဝ ဗ္ယသနံ ရောဂဗ္ယသနံ။ တတိယံ။
126. Tatiye kandantānanti sasaddaṃ rudamānānaṃ. Passannanti sanditaṃ pavattaṃ. Catūsu mahāsamuddesūti sinerurasmīhi paricchinnesu catūsu mahāsamuddesu. Sinerussa hi pācīnapassaṃ rajatamayaṃ, dakkhiṇapassaṃ maṇimayaṃ, pacchimapassaṃ phalikamayaṃ, uttarapassaṃ suvaṇṇamayaṃ. Pubbadakkhiṇapassehi nikkhantā rajatamaṇirasmiyo ekato hutvā mahāsamuddapiṭṭhena gantvā cakkavāḷapabbataṃ āhacca tiṭṭhanti, dakkhiṇapacchimapassehi nikkhantā maṇiphalikarasmiyo, pacchimuttarapassehi nikkhantā phalikasuvaṇṇarasmiyo, uttarapācīnapassehi nikkhantā suvaṇṇarajatarasmiyo ekato hutvā mahāsamuddapiṭṭhena gantvā cakkavāḷapabbataṃ āhacca tiṭṭhanti. Tāsaṃ rasmīnaṃ antaresu cattāro mahāsamuddā honti. Te sandhāya vuttaṃ ‘‘catūsu mahāsamuddesū’’ti. Ñātibyasanantiādīsu byasananti viasanaṃ, vināsoti attho. Ñātīnaṃ byasanaṃ ñātibyasanaṃ, bhogānaṃ byasanaṃ bhogabyasanaṃ. Rogo pana sayameva ārogyaṃ viyasati vināsetīti byasanaṃ, rogova byasanaṃ rogabyasanaṃ. Tatiyaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၃. အသ္သုသုတ္တံ • 3. Assusuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃. အသ္သုသုတ္တဝဏ္ဏနာ • 3. Assusuttavaṇṇanā
