| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. மஹாவக்³கோ³
7. Mahāvaggo
1. அஸ்ஸுதவாஸுத்தங்
1. Assutavāsuttaṃ
61. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே…பே॰… ‘‘அஸ்ஸுதவா, பி⁴க்க²வே, புது²ஜ்ஜனோ இமஸ்மிங் சாதுமஹாபூ⁴திகஸ்மிங் காயஸ்மிங் நிப்³பி³ந்தெ³ய்யபி விரஜ்ஜெய்யபி விமுச்செய்யபி. தங் கிஸ்ஸ ஹேது? 1 தி³ஸ்ஸதி, பி⁴க்க²வே 2, இமஸ்ஸ சாதுமஹாபூ⁴திகஸ்ஸ காயஸ்ஸ ஆசயோபி அபசயோபி ஆதா³னம்பி நிக்கே²பனம்பி. தஸ்மா தத்ராஸ்ஸுதவா புது²ஜ்ஜனோ நிப்³பி³ந்தெ³ய்யபி விரஜ்ஜெய்யபி விமுச்செய்யபி’’.
61. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme…pe… ‘‘assutavā, bhikkhave, puthujjano imasmiṃ cātumahābhūtikasmiṃ kāyasmiṃ nibbindeyyapi virajjeyyapi vimucceyyapi. Taṃ kissa hetu? 3 Dissati, bhikkhave 4, imassa cātumahābhūtikassa kāyassa ācayopi apacayopi ādānampi nikkhepanampi. Tasmā tatrāssutavā puthujjano nibbindeyyapi virajjeyyapi vimucceyyapi’’.
‘‘யஞ்ச கோ² ஏதங், பி⁴க்க²வே, வுச்சதி சித்தங் இதிபி, மனோ இதிபி, விஞ்ஞாணங் இதிபி, தத்ராஸ்ஸுதவா புது²ஜ்ஜனோ நாலங் நிப்³பி³ந்தி³துங் நாலங் விரஜ்ஜிதுங் நாலங் விமுச்சிதுங். தங் கிஸ்ஸ ஹேது? தீ³க⁴ரத்தஞ்ஹேதங், பி⁴க்க²வே, அஸ்ஸுதவதோ புது²ஜ்ஜனஸ்ஸ அஜ்ஜோ²ஸிதங் மமாயிதங் பராமட்ட²ங் – ‘ஏதங் மம, ஏஸோஹமஸ்மி, ஏஸோ மே அத்தா’தி. தஸ்மா தத்ராஸ்ஸுதவா புது²ஜ்ஜனோ நாலங் நிப்³பி³ந்தி³துங் நாலங் விரஜ்ஜிதுங் நாலங் விமுச்சிதுங்.
‘‘Yañca kho etaṃ, bhikkhave, vuccati cittaṃ itipi, mano itipi, viññāṇaṃ itipi, tatrāssutavā puthujjano nālaṃ nibbindituṃ nālaṃ virajjituṃ nālaṃ vimuccituṃ. Taṃ kissa hetu? Dīgharattañhetaṃ, bhikkhave, assutavato puthujjanassa ajjhositaṃ mamāyitaṃ parāmaṭṭhaṃ – ‘etaṃ mama, esohamasmi, eso me attā’ti. Tasmā tatrāssutavā puthujjano nālaṃ nibbindituṃ nālaṃ virajjituṃ nālaṃ vimuccituṃ.
‘‘வரங் , பி⁴க்க²வே, அஸ்ஸுதவா புது²ஜ்ஜனோ இமங் சாதுமஹாபூ⁴திகங் காயங் அத்ததோ உபக³ச்செ²ய்ய, ந த்வேவ சித்தங். தங் கிஸ்ஸ ஹேது? தி³ஸ்ஸதாயங், பி⁴க்க²வே, சாதுமஹாபூ⁴திகோ காயோ ஏகம்பி வஸ்ஸங் திட்ட²மானோ த்³வேபி வஸ்ஸானி திட்ட²மானோ தீணிபி வஸ்ஸானி திட்ட²மானோ சத்தாரிபி வஸ்ஸானி திட்ட²மானோ பஞ்சபி வஸ்ஸானி திட்ட²மானோ த³ஸபி வஸ்ஸானி திட்ட²மானோ வீஸதிபி வஸ்ஸானி திட்ட²மானோ திங்ஸம்பி வஸ்ஸானி திட்ட²மானோ சத்தாரீஸம்பி வஸ்ஸானி திட்ட²மானோ பஞ்ஞாஸம்பி வஸ்ஸானி திட்ட²மானோ வஸ்ஸஸதம்பி திட்ட²மானோ, பி⁴ய்யோபி திட்ட²மானோ.
‘‘Varaṃ , bhikkhave, assutavā puthujjano imaṃ cātumahābhūtikaṃ kāyaṃ attato upagaccheyya, na tveva cittaṃ. Taṃ kissa hetu? Dissatāyaṃ, bhikkhave, cātumahābhūtiko kāyo ekampi vassaṃ tiṭṭhamāno dvepi vassāni tiṭṭhamāno tīṇipi vassāni tiṭṭhamāno cattāripi vassāni tiṭṭhamāno pañcapi vassāni tiṭṭhamāno dasapi vassāni tiṭṭhamāno vīsatipi vassāni tiṭṭhamāno tiṃsampi vassāni tiṭṭhamāno cattārīsampi vassāni tiṭṭhamāno paññāsampi vassāni tiṭṭhamāno vassasatampi tiṭṭhamāno, bhiyyopi tiṭṭhamāno.
‘‘யஞ்ச கோ² ஏதங், பி⁴க்க²வே, வுச்சதி சித்தங் இதிபி, மனோ இதிபி, விஞ்ஞாணங் இதிபி, தங் ரத்தியா ச தி³வஸஸ்ஸ ச அஞ்ஞதே³வ உப்பஜ்ஜதி அஞ்ஞங் நிருஜ்ஜ²தி. ஸெய்யதா²பி, பி⁴க்க²வே, மக்கடோ அரஞ்ஞே பவனே சரமானோ ஸாக²ங் க³ண்ஹதி, தங் முஞ்சித்வா அஞ்ஞங் க³ண்ஹதி, தங் முஞ்சித்வா அஞ்ஞங் க³ண்ஹதி; ஏவமேவ கோ², பி⁴க்க²வே, யமித³ங் வுச்சதி சித்தங் இதிபி, மனோ இதிபி, விஞ்ஞாணங் இதிபி, தங் ரத்தியா ச தி³வஸஸ்ஸ ச அஞ்ஞதே³வ உப்பஜ்ஜதி அஞ்ஞங் நிருஜ்ஜ²தி.
‘‘Yañca kho etaṃ, bhikkhave, vuccati cittaṃ itipi, mano itipi, viññāṇaṃ itipi, taṃ rattiyā ca divasassa ca aññadeva uppajjati aññaṃ nirujjhati. Seyyathāpi, bhikkhave, makkaṭo araññe pavane caramāno sākhaṃ gaṇhati, taṃ muñcitvā aññaṃ gaṇhati, taṃ muñcitvā aññaṃ gaṇhati; evameva kho, bhikkhave, yamidaṃ vuccati cittaṃ itipi, mano itipi, viññāṇaṃ itipi, taṃ rattiyā ca divasassa ca aññadeva uppajjati aññaṃ nirujjhati.
‘‘தத்ர, பி⁴க்க²வே, ஸுதவா அரியஸாவகோ படிச்சஸமுப்பாத³ங்யேவ ஸாது⁴கங் யோனிஸோ மனஸி கரோதி – ‘இதி இமஸ்மிங் ஸதி இத³ங் ஹோதி, இமஸ்ஸுப்பாதா³ இத³ங் உப்பஜ்ஜதி; இமஸ்மிங் அஸதி இத³ங் ந ஹோதி, இமஸ்ஸ நிரோதா⁴ இத³ங் நிருஜ்ஜ²தி – யதி³த³ங் அவிஜ்ஜாபச்சயா ஸங்கா²ரா; ஸங்கா²ரபச்சயா விஞ்ஞாணங்…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. அவிஜ்ஜாய த்வேவ அஸேஸவிராக³னிரோதா⁴ ஸங்கா²ரனிரோதோ⁴; ஸங்கா²ரனிரோதா⁴ விஞ்ஞாணனிரோதோ⁴…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’’தி.
‘‘Tatra, bhikkhave, sutavā ariyasāvako paṭiccasamuppādaṃyeva sādhukaṃ yoniso manasi karoti – ‘iti imasmiṃ sati idaṃ hoti, imassuppādā idaṃ uppajjati; imasmiṃ asati idaṃ na hoti, imassa nirodhā idaṃ nirujjhati – yadidaṃ avijjāpaccayā saṅkhārā; saṅkhārapaccayā viññāṇaṃ…pe… evametassa kevalassa dukkhakkhandhassa samudayo hoti. Avijjāya tveva asesavirāganirodhā saṅkhāranirodho; saṅkhāranirodhā viññāṇanirodho…pe… evametassa kevalassa dukkhakkhandhassa nirodho hotī’’’ti.
‘‘ஏவங் பஸ்ஸங், பி⁴க்க²வே, ஸுதவா அரியஸாவகோ ரூபஸ்மிம்பி நிப்³பி³ந்த³தி, வேத³னாயபி நிப்³பி³ந்த³தி, ஸஞ்ஞாயபி நிப்³பி³ந்த³தி, ஸங்கா²ரேஸுபி நிப்³பி³ந்த³தி, விஞ்ஞாணஸ்மிம்பி நிப்³பி³ந்த³தி; நிப்³பி³ந்த³ங் விரஜ்ஜதி, விராகா³ விமுச்சதி, விமுத்தஸ்மிங் விமுத்தமிதி ஞாணங் ஹோதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதீ’’தி. பட²மங்.
‘‘Evaṃ passaṃ, bhikkhave, sutavā ariyasāvako rūpasmimpi nibbindati, vedanāyapi nibbindati, saññāyapi nibbindati, saṅkhāresupi nibbindati, viññāṇasmimpi nibbindati; nibbindaṃ virajjati, virāgā vimuccati, vimuttasmiṃ vimuttamiti ñāṇaṃ hoti. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānātī’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. அஸ்ஸுதவாஸுத்தவண்ணனா • 1. Assutavāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. அஸ்ஸுதவாஸுத்தவண்ணனா • 1. Assutavāsuttavaṇṇanā
