| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৬. অসুভানুপস্সীসুত্তং
6. Asubhānupassīsuttaṃ
৮৫. ৰুত্তঞ্হেতং ভগৰতা, ৰুত্তমরহতাতি মে সুতং –
85. Vuttañhetaṃ bhagavatā, vuttamarahatāti me sutaṃ –
‘‘অসুভানুপস্সী, ভিক্খৰে, কাযস্মিং ৰিহরথ; আনাপানস্সতি চ ৰো অজ্ঝত্তং পরিমুখং সূপট্ঠিতা হোতু; সব্বসঙ্খারেসু অনিচ্চানুপস্সিনো ৰিহরথ। অসুভানুপস্সীনং, ভিক্খৰে, কাযস্মিং ৰিহরতং যো সুভায ধাতুযা রাগানুসযো সো পহীযতি 1। আনাপানস্সতিযা অজ্ঝত্তং পরিমুখং সূপট্ঠিতিতায যে বাহিরা ৰিতক্কাসযা ৰিঘাতপক্খিকা, তে ন হোন্তি। সব্বসঙ্খারেসু অনিচ্চানুপস্সীনং ৰিহরতং যা অৰিজ্জা সা পহীযতি, যা ৰিজ্জা সা উপ্পজ্জতী’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Asubhānupassī, bhikkhave, kāyasmiṃ viharatha; ānāpānassati ca vo ajjhattaṃ parimukhaṃ sūpaṭṭhitā hotu; sabbasaṅkhāresu aniccānupassino viharatha. Asubhānupassīnaṃ, bhikkhave, kāyasmiṃ viharataṃ yo subhāya dhātuyā rāgānusayo so pahīyati 2. Ānāpānassatiyā ajjhattaṃ parimukhaṃ sūpaṭṭhititāya ye bāhirā vitakkāsayā vighātapakkhikā, te na honti. Sabbasaṅkhāresu aniccānupassīnaṃ viharataṃ yā avijjā sā pahīyati, yā vijjā sā uppajjatī’’ti. Etamatthaṃ bhagavā avoca. Tatthetaṃ iti vuccati –
‘‘অসুভানুপস্সী কাযস্মিং, আনাপানে পটিস্সতো।
‘‘Asubhānupassī kāyasmiṃ, ānāpāne paṭissato;
সব্বসঙ্খারসমথং, পস্সং আতাপি সব্বদা॥
Sabbasaṅkhārasamathaṃ, passaṃ ātāpi sabbadā.
‘‘স ৰে সম্মদ্দসো ভিক্খু, যতো তত্থ ৰিমুচ্চতি।
‘‘Sa ve sammaddaso bhikkhu, yato tattha vimuccati;
অভিঞ্ঞাৰোসিতো সন্তো, স ৰে যোগাতিগো মুনী’’তি॥
Abhiññāvosito santo, sa ve yogātigo munī’’ti.
অযম্পি অত্থো ৰুত্তো ভগৰতা, ইতি মে সুতন্তি। ছট্ঠং।
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৬. অসুভানুপস্সীসুত্তৰণ্ণনা • 6. Asubhānupassīsuttavaṇṇanā
