| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
६. असुभानुपस्सीसुत्तं
6. Asubhānupassīsuttaṃ
८५. वुत्तञ्हेतं भगवता, वुत्तमरहताति मे सुतं –
85. Vuttañhetaṃ bhagavatā, vuttamarahatāti me sutaṃ –
‘‘असुभानुपस्सी, भिक्खवे, कायस्मिं विहरथ; आनापानस्सति च वो अज्झत्तं परिमुखं सूपट्ठिता होतु; सब्बसङ्खारेसु अनिच्चानुपस्सिनो विहरथ। असुभानुपस्सीनं, भिक्खवे, कायस्मिं विहरतं यो सुभाय धातुया रागानुसयो सो पहीयति 1। आनापानस्सतिया अज्झत्तं परिमुखं सूपट्ठितिताय ये बाहिरा वितक्कासया विघातपक्खिका, ते न होन्ति। सब्बसङ्खारेसु अनिच्चानुपस्सीनं विहरतं या अविज्जा सा पहीयति, या विज्जा सा उप्पज्जती’’ति। एतमत्थं भगवा अवोच। तत्थेतं इति वुच्चति –
‘‘Asubhānupassī, bhikkhave, kāyasmiṃ viharatha; ānāpānassati ca vo ajjhattaṃ parimukhaṃ sūpaṭṭhitā hotu; sabbasaṅkhāresu aniccānupassino viharatha. Asubhānupassīnaṃ, bhikkhave, kāyasmiṃ viharataṃ yo subhāya dhātuyā rāgānusayo so pahīyati 2. Ānāpānassatiyā ajjhattaṃ parimukhaṃ sūpaṭṭhititāya ye bāhirā vitakkāsayā vighātapakkhikā, te na honti. Sabbasaṅkhāresu aniccānupassīnaṃ viharataṃ yā avijjā sā pahīyati, yā vijjā sā uppajjatī’’ti. Etamatthaṃ bhagavā avoca. Tatthetaṃ iti vuccati –
‘‘असुभानुपस्सी कायस्मिं, आनापाने पटिस्सतो।
‘‘Asubhānupassī kāyasmiṃ, ānāpāne paṭissato;
सब्बसङ्खारसमथं, पस्सं आतापि सब्बदा॥
Sabbasaṅkhārasamathaṃ, passaṃ ātāpi sabbadā.
‘‘स वे सम्मद्दसो भिक्खु, यतो तत्थ विमुच्चति।
‘‘Sa ve sammaddaso bhikkhu, yato tattha vimuccati;
अभिञ्ञावोसितो सन्तो, स वे योगातिगो मुनी’’ति॥
Abhiññāvosito santo, sa ve yogātigo munī’’ti.
अयम्पि अत्थो वुत्तो भगवता, इति मे सुतन्ति। छट्ठं।
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ६. असुभानुपस्सीसुत्तवण्णना • 6. Asubhānupassīsuttavaṇṇanā
