| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
៦. អសុភានុបស្សីសុត្តំ
6. Asubhānupassīsuttaṃ
៨៥. វុត្តញ្ហេតំ ភគវតា, វុត្តមរហតាតិ មេ សុតំ –
85. Vuttañhetaṃ bhagavatā, vuttamarahatāti me sutaṃ –
‘‘អសុភានុបស្សី, ភិក្ខវេ, កាយស្មិំ វិហរថ; អានាបានស្សតិ ច វោ អជ្ឈត្តំ បរិមុខំ សូបដ្ឋិតា ហោតុ; សព្ពសង្ខារេសុ អនិច្ចានុបស្សិនោ វិហរថ។ អសុភានុបស្សីនំ, ភិក្ខវេ, កាយស្មិំ វិហរតំ យោ សុភាយ ធាតុយា រាគានុសយោ សោ បហីយតិ 1។ អានាបានស្សតិយា អជ្ឈត្តំ បរិមុខំ សូបដ្ឋិតិតាយ យេ ពាហិរា វិតក្កាសយា វិឃាតបក្ខិកា, តេ ន ហោន្តិ។ សព្ពសង្ខារេសុ អនិច្ចានុបស្សីនំ វិហរតំ យា អវិជ្ជា សា បហីយតិ, យា វិជ្ជា សា ឧប្បជ្ជតី’’តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Asubhānupassī, bhikkhave, kāyasmiṃ viharatha; ānāpānassati ca vo ajjhattaṃ parimukhaṃ sūpaṭṭhitā hotu; sabbasaṅkhāresu aniccānupassino viharatha. Asubhānupassīnaṃ, bhikkhave, kāyasmiṃ viharataṃ yo subhāya dhātuyā rāgānusayo so pahīyati 2. Ānāpānassatiyā ajjhattaṃ parimukhaṃ sūpaṭṭhititāya ye bāhirā vitakkāsayā vighātapakkhikā, te na honti. Sabbasaṅkhāresu aniccānupassīnaṃ viharataṃ yā avijjā sā pahīyati, yā vijjā sā uppajjatī’’ti. Etamatthaṃ bhagavā avoca. Tatthetaṃ iti vuccati –
‘‘អសុភានុបស្សី កាយស្មិំ, អានាបានេ បដិស្សតោ;
‘‘Asubhānupassī kāyasmiṃ, ānāpāne paṭissato;
សព្ពសង្ខារសមថំ, បស្សំ អាតាបិ សព្ពទា។
Sabbasaṅkhārasamathaṃ, passaṃ ātāpi sabbadā.
‘‘ស វេ សម្មទ្ទសោ ភិក្ខុ, យតោ តត្ថ វិមុច្ចតិ;
‘‘Sa ve sammaddaso bhikkhu, yato tattha vimuccati;
អភិញ្ញាវោសិតោ សន្តោ, ស វេ យោគាតិគោ មុនី’’តិ។
Abhiññāvosito santo, sa ve yogātigo munī’’ti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ ឆដ្ឋំ។
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ៦. អសុភានុបស្សីសុត្តវណ្ណនា • 6. Asubhānupassīsuttavaṇṇanā
