| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
3. асубхасуд̇д̇аван̣н̣анаа
3. Asubhasuttavaṇṇanā
163. д̇ад̇ияз ‘‘яат̇аа зд̇ам̣, д̇ат̇аа ид̣̇а’’нд̇и иминаа наязнаад̇и зд̇зна –
163. Tatiye ‘‘yathā etaṃ, tathā ida’’nti iminā nayenāti etena –
‘‘яат̇аа ид̣̇ам̣ д̇ат̇аа зд̇ам̣, яат̇аа зд̇ам̣ д̇ат̇аа ид̣̇ам̣;
‘‘Yathā idaṃ tathā etaṃ, yathā etaṃ tathā idaṃ;
аж̇жхад̇д̇ан̃жа б̣ахид̣̇д̇хаа жа, гааяз чанд̣̇ам̣ вирааж̇аяз’’д̇и. (су. ни. 205); –
Ajjhattañca bahiddhā ca, kāye chandaṃ virājaye’’ti. (su. ni. 205); –
имам̣ д̣̇зсанаанаяам̣ сан̇г̇ан̣хаад̇и. д̇ассад̇т̇о – яат̇аа ид̣̇ам̣ савин̃н̃аан̣агаасубхам̣ ааяуусмаавин̃н̃аан̣аанам̣ анабаг̇амаа жарад̇и д̇идтад̇и нисийд̣̇ад̇и саяад̇и, д̇ат̇аа зд̇ам̣ зд̇арахи сусаанз саяид̇ам̣ авин̃н̃аан̣агамби буб̣б̣з д̇зсам̣ д̇хаммаанам̣ анабаг̇амаа ахоси. яат̇аа жа зд̇ам̣ зд̇арахи мад̇асарийрам̣ д̇зсам̣ д̇хаммаанам̣ абаг̇амаа на жарад̇и на д̇идтад̇и на нисийд̣̇ад̇и на сзяяам̣ габбзд̇и, д̇ат̇аа ид̣̇ам̣ савин̃н̃аан̣агамби д̇зсам̣ д̇хаммаанам̣ абаг̇амаа бхависсад̇и. яат̇аа жа ид̣̇ам̣ савин̃н̃аан̣агам̣ нзд̇арахи сусаанз мад̇ам̣ сзд̇и на уд̣̇д̇хумаад̇агаад̣̇ибхаавамубаг̇ад̇ам̣, д̇ат̇аа зд̇ам̣ зд̇арахи мад̇асарийрамби буб̣б̣з ахоси. яат̇аа банзд̇ам̣ зд̇арахи авин̃н̃аан̣агаасубхам̣ мад̇агасусаанз сзд̇и уд̣̇д̇хумаад̇агаад̣̇ибхааван̃жа убаг̇ад̇ам̣, д̇ат̇аа ид̣̇ам̣ савин̃н̃аан̣агамби бхависсад̇ийд̇и. д̇ад̇т̇а яат̇аа ид̣̇ам̣ д̇ат̇аа зд̇анд̇и ад̇д̇анаа мад̇асарийрасса самаанабхаавам̣ гаронд̇о б̣аахирз д̣̇осам̣ баж̇ахад̇и. яат̇аа зд̇ам̣ д̇ат̇аа ид̣̇анд̇и мад̇асарийрзна ад̇д̇ано самаанабхаавам̣ гаронд̇о аж̇жхад̇д̇игз рааг̇ам̣ баж̇ахад̇и. язнаагаарзна убхаяам̣ самам̣ гарод̇и, д̇ам̣ самбаж̇аананд̇о убхаяад̇т̇а мохам̣ баж̇ахад̇и.
Imaṃ desanānayaṃ saṅgaṇhāti. Tassattho – yathā idaṃ saviññāṇakāsubhaṃ āyuusmāviññāṇānaṃ anapagamā carati tiṭṭhati nisīdati sayati, tathā etaṃ etarahi susāne sayitaṃ aviññāṇakampi pubbe tesaṃ dhammānaṃ anapagamā ahosi. Yathā ca etaṃ etarahi matasarīraṃ tesaṃ dhammānaṃ apagamā na carati na tiṭṭhati na nisīdati na seyyaṃ kappeti, tathā idaṃ saviññāṇakampi tesaṃ dhammānaṃ apagamā bhavissati. Yathā ca idaṃ saviññāṇakaṃ netarahi susāne mataṃ seti na uddhumātakādibhāvamupagataṃ, tathā etaṃ etarahi matasarīrampi pubbe ahosi. Yathā panetaṃ etarahi aviññāṇakāsubhaṃ matakasusāne seti uddhumātakādibhāvañca upagataṃ, tathā idaṃ saviññāṇakampi bhavissatīti. Tattha yathā idaṃ tathā etanti attanā matasarīrassa samānabhāvaṃ karonto bāhire dosaṃ pajahati. Yathā etaṃ tathā idanti matasarīrena attano samānabhāvaṃ karonto ajjhattike rāgaṃ pajahati. Yenākārena ubhayaṃ samaṃ karoti, taṃ sampajānanto ubhayattha mohaṃ pajahati.
б̣ахид̣̇д̇хаа д̣̇идтаананд̇и б̣ахид̣̇д̇хаа сусаанаад̣̇ийсу д̣̇идтаанам̣ уд̣̇д̇хумаад̇агаад̣̇ид̣̇асаннам̣ асубхаанам̣. ‘‘наваннам̣ баадигуляаанам̣ васзнаа’’д̇и гасмаа вуд̇д̇ам̣, нану анд̇имаж̇ийвигаабхаавад̇о бин̣д̣абаад̇асса алаабхалаабхзсу барид̇ассанаг̇зд̇хаад̣̇исамуббад̇д̇ид̇о бхад̇д̇асса саммад̣̇аж̇ананад̇о гимигуласам̣вад̣̇д̇ханад̇од̇и звамаад̣̇ийхиби аагаарзхи аахаарзбадигуулад̇аа бажжавзгкид̇аб̣б̣аа. вуд̇д̇ан̃хзд̇ам̣ – ‘‘анд̇амид̣̇ам̣, бхигкавз, ж̇ийвигаанам̣ яад̣̇ид̣̇ам̣ бин̣д̣оляам̣ ад̇ибаабояам̣ логасмим̣ яад̣̇ид̣̇ам̣ бин̣д̣оляо вижарад̇и бад̇д̇абаан̣ийд̇и (сам̣. ни. 3.80; ид̇иву. 91). алад̣̇д̇хаа жа бин̣д̣абаад̇ам̣ барид̇ассад̇и, лад̣̇д̇хаа жа бин̣д̣абаад̇ам̣ г̇ад̇хид̇о мужчид̇о аж̇жхобанно анаад̣̇ийнавад̣̇ассаавий аниссаран̣абан̃н̃о барибхун̃ж̇ад̇ийд̇и (а. ни. 3.124). бхуд̇д̇о жа аахааро гассажи гад̣̇аажи маран̣ам̣ ваа маран̣амад̇д̇ам̣ ваа д̣̇угкам̣ аавахад̇ий’’д̇и.
Bahiddhā diṭṭhānanti bahiddhā susānādīsu diṭṭhānaṃ uddhumātakādidasannaṃ asubhānaṃ. ‘‘Navannaṃ pāṭikulyānaṃ vasenā’’ti kasmā vuttaṃ, nanu antimajīvikābhāvato piṇḍapātassa alābhalābhesu paritassanagedhādisamuppattito bhattassa sammadajananato kimikulasaṃvaddhanatoti evamādīhipi ākārehi āhārepaṭikūlatā paccavekkhitabbā. Vuttañhetaṃ – ‘‘antamidaṃ, bhikkhave, jīvikānaṃ yadidaṃ piṇḍolyaṃ atipāpoyaṃ lokasmiṃ yadidaṃ piṇḍolyo vicarati pattapāṇīti (saṃ. ni. 3.80; itivu. 91). Aladdhā ca piṇḍapātaṃ paritassati, laddhā ca piṇḍapātaṃ gadhito mucchito ajjhopanno anādīnavadassāvī anissaraṇapañño paribhuñjatīti (a. ni. 3.124). Bhutto ca āhāro kassaci kadāci maraṇaṃ vā maraṇamattaṃ vā dukkhaṃ āvahatī’’ti.
гадугийдагаад̣̇аяо д̣̇вад̇д̇им̣сагулаббабхзд̣̇аа гимияо нам̣ убаниссааяа ж̇ийванд̇ийд̇и? вужжад̇з – анд̇имаж̇ийвигаабхааво д̇аава жид̇д̇асам̣гилзсависод̇ханад̇т̇ам̣ гаммадтаанаабхинивзсанад̇о баг̇зва манаси гаад̇аб̣б̣о ‘‘маахам̣ чаваалаад̇асад̣̇исо бхавзяяа’’нд̇и. д̇ат̇аа бин̣д̣абаад̇асса алаабхалаабхзсу барид̇ассанаг̇зд̇хаад̣̇исамуббад̇д̇инивааран̣ам̣ баг̇зва анудтаад̇аб̣б̣ам̣ субарисуд̣̇д̇хасийласса бадисан̇каанавад̇о д̇ад̣̇абхаавад̇о. бхад̇д̇асаммад̣̇о анзганд̇иго барибхог̇з анд̇ог̇ад̇ховаад̇и взд̣̇ид̇аб̣б̣о. гимигуласам̣вад̣̇д̇ханам̣ бана сан̇г̇ахзд̇аб̣б̣ам̣, сан̇г̇ахид̇амзва ваа ‘‘наваннам̣ баадигуляаанам̣ васзнаа’’д̇и зд̇т̇а нияамасса агад̇ад̇д̇аа. иминаа ваа наязна ид̇арзсамбзд̇т̇а сан̇г̇ахо д̣̇адтаб̣б̣о яат̇аасамбхавамзд̇т̇а бадигуулад̇аабажжавзгкан̣асса ад̇хиббзд̇ад̇д̇аа.
Kaṭukīṭakādayo dvattiṃsakulappabhedā kimiyo naṃ upanissāya jīvantīti? Vuccate – antimajīvikābhāvo tāva cittasaṃkilesavisodhanatthaṃ kammaṭṭhānābhinivesanato pageva manasi kātabbo ‘‘māhaṃ chavālātasadiso bhaveyya’’nti. Tathā piṇḍapātassa alābhalābhesu paritassanagedhādisamuppattinivāraṇaṃ pageva anuṭṭhātabbaṃ suparisuddhasīlassa paṭisaṅkhānavato tadabhāvato. Bhattasammado anekantiko paribhoge antogadhovāti veditabbo. Kimikulasaṃvaddhanaṃ pana saṅgahetabbaṃ, saṅgahitameva vā ‘‘navannaṃ pāṭikulyānaṃ vasenā’’ti ettha niyamassa akatattā. Iminā vā nayena itaresampettha saṅgaho daṭṭhabbo yathāsambhavamettha paṭikūlatāpaccavekkhaṇassa adhippetattā.
зван̃жа гад̇ваа висуд̣̇д̇химаг̇г̇з (висуд̣̇д̇хи. 1.294-295) д̣̇асахи аагаарзхи бадигуулад̇аа взд̣̇ид̇аб̣б̣аа. сзяяат̇ид̣̇ам̣ – г̇аманад̇о, бариязсанад̇о, барибхог̇ад̇о, аасаяад̇о, нид̇хаанад̇о, абарибаггад̇о, барибаггад̇о, палад̇о, ниссанд̣̇ад̇о, саммагканад̇од̇и. звам̣ д̣̇асаннам̣ васзна баадигуляаважанзнаби ид̇ха ‘‘наванна’’нд̇и важанам̣ на вируж̇жхад̇и, саммагканасса барибхог̇аад̣̇ийсу лаб̣бхамаанабхааваа висум̣ д̇ам̣ аг̇г̇ахзд̇ваа на вад̣̇анд̇и. висуд̣̇д̇химаг̇г̇з (висуд̣̇д̇хи. 1.304) бана саммагканам̣ барибхог̇аад̣̇ийсу лаб̣бхамаанамби ниссанд̣̇авасзна висзсад̇о бадигууланд̇и д̣̇ассзд̇ум̣ саб̣б̣абажчаа табид̇аа.
Evañca katvā visuddhimagge (visuddhi. 1.294-295) dasahi ākārehi paṭikūlatā veditabbā. Seyyathidaṃ – gamanato, pariyesanato, paribhogato, āsayato, nidhānato, aparipakkato, paripakkato, phalato, nissandato, sammakkhanatoti. Evaṃ dasannaṃ vasena pāṭikulyavacanenapi idha ‘‘navanna’’nti vacanaṃ na virujjhati, sammakkhanassa paribhogādīsu labbhamānabhāvā visuṃ taṃ aggahetvā na vadanti. Visuddhimagge (visuddhi. 1.304) pana sammakkhanaṃ paribhogādīsu labbhamānampi nissandavasena visesato paṭikūlanti dassetuṃ sabbapacchā ṭhapitā.
угган̣тид̇асан̃н̃ааяа саманнааг̇ад̇од̇и д̇ийсу бхавзсу аружжанавасзна бавад̇д̇ааяа вибассанаабан̃н̃ааяа саманнааг̇ад̇о. ниб̣б̣ид̣̇аанубассанаа хзсаа сан̃н̃аасийсзна вуд̇д̇аа. сзсамзд̇т̇а уд̇д̇аанамзва.
Ukkaṇṭhitasaññāya samannāgatoti tīsu bhavesu aruccanavasena pavattāya vipassanāpaññāya samannāgato. Nibbidānupassanā hesā saññāsīsena vuttā. Sesamettha uttānameva.
асубхасуд̇д̇аван̣н̣анаа нидтид̇аа.
Asubhasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 3. асубхасуд̇д̇ам̣ • 3. Asubhasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 3. асубхасуд̇д̇аван̣н̣анаа • 3. Asubhasuttavaṇṇanā
