| Library / Tipiṭaka / திபிடக • Tipiṭaka / தீ³க⁴ நிகாய (அட்ட²கதா²) • Dīgha nikāya (aṭṭhakathā) |
9. ஆடானாடியஸுத்தவண்ணனா
9. Āṭānāṭiyasuttavaṇṇanā
பட²மபா⁴ணவாரவண்ணனா
Paṭhamabhāṇavāravaṇṇanā
275. ஏவங் மே ஸுதந்தி ஆடானாடியஸுத்தங். தத்ராயமபுப்³ப³பத³வண்ணனா – சதுத்³தி³ஸங் ரக்க²ங் ட²பெத்வாதி அஸுரஸேனாய நிவாரணத்த²ங் ஸக்கஸ்ஸ தே³வானமிந்த³ஸ்ஸ சதூஸு தி³ஸாஸு ஆரக்க²ங் ட²பெத்வா. கு³ம்ப³ங் ட²பெத்வாதி ப³லகு³ம்ப³ங் ட²பெத்வா. ஓவரணங் ட²பெத்வாதி சதூஸு தி³ஸாஸு ஆரக்க²கே ட²பெத்வா. ஏவங் ஸக்கஸ்ஸ தே³வானமிந்த³ஸ்ஸ ஆரக்க²ங் ஸுஸங்விஹிதங் கத்வா ஆடானாடனக³ரே நிஸின்னா ஸத்த பு³த்³தே⁴ ஆரப்³ப⁴ இமங் பரித்தங் ப³ந்தி⁴த்வா ‘‘யே ஸத்து² த⁴ம்மஆணங் அம்ஹாகஞ்ச ராஜஆணங் ந ஸுணந்தி, தேஸங் இத³ஞ்சித³ஞ்ச கரிஸ்ஸாமா’’தி ஸாவனங் கத்வா அத்தனோபி சதூஸு தி³ஸாஸு மஹதியா ச யக்க²ஸேனாயாதிஆதீ³ஹி சதூஹி ஸேனாஹி ஆரக்க²ங் ஸங்வித³ஹித்வா அபி⁴க்கந்தாய ரத்தியா…பே॰… ஏகமந்தங் நிஸீதி³ங்ஸு.
275.Evaṃme sutanti āṭānāṭiyasuttaṃ. Tatrāyamapubbapadavaṇṇanā – catuddisaṃ rakkhaṃ ṭhapetvāti asurasenāya nivāraṇatthaṃ sakkassa devānamindassa catūsu disāsu ārakkhaṃ ṭhapetvā. Gumbaṃ ṭhapetvāti balagumbaṃ ṭhapetvā. Ovaraṇaṃ ṭhapetvāti catūsu disāsu ārakkhake ṭhapetvā. Evaṃ sakkassa devānamindassa ārakkhaṃ susaṃvihitaṃ katvā āṭānāṭanagare nisinnā satta buddhe ārabbha imaṃ parittaṃ bandhitvā ‘‘ye satthu dhammaāṇaṃ amhākañca rājaāṇaṃ na suṇanti, tesaṃ idañcidañca karissāmā’’ti sāvanaṃ katvā attanopi catūsu disāsu mahatiyā ca yakkhasenāyātiādīhi catūhi senāhi ārakkhaṃ saṃvidahitvā abhikkantāya rattiyā…pe… ekamantaṃ nisīdiṃsu.
அபி⁴க்கந்தாய ரத்தியாதி எத்த² அபி⁴க்கந்தஸத்³தோ³ க²யஸுந்த³ராபி⁴ரூபஅப்³ப⁴னுமோத³னாதீ³ஸு தி³ஸ்ஸதி. தத்த² ‘‘அபி⁴க்கந்தா, ப⁴ந்தே ரத்தி, நிக்க²ந்தோ பட²மோ யாமோ, சிரனிஸின்னோ பி⁴க்கு²ஸங்கோ⁴ உத்³தி³ஸது, ப⁴ந்தே, ப⁴க³வா பி⁴க்கூ²னங் பாதிமொக்க²’’ந்தி (அ॰ நி॰ 8.20) ஏவமாதீ³ஸு க²யே தி³ஸ்ஸதி. ‘‘அயங் இமேஸங் சதுன்னங் புக்³க³லானங் அபி⁴க்கந்ததரோ பணீததரோ சா’’தி (அ॰ நி॰ 4.100) ஏவமாதீ³ஸு ஸுந்த³ரே.
Abhikkantāya rattiyāti ettha abhikkantasaddo khayasundarābhirūpaabbhanumodanādīsu dissati. Tattha ‘‘abhikkantā, bhante ratti, nikkhanto paṭhamo yāmo, ciranisinno bhikkhusaṅgho uddisatu, bhante, bhagavā bhikkhūnaṃ pātimokkha’’nti (a. ni. 8.20) evamādīsu khaye dissati. ‘‘Ayaṃ imesaṃ catunnaṃ puggalānaṃ abhikkantataro paṇītataro cā’’ti (a. ni. 4.100) evamādīsu sundare.
‘‘கோ மே வந்த³தி பாதா³னி, இத்³தி⁴யா யஸஸா ஜலங்;
‘‘Ko me vandati pādāni, iddhiyā yasasā jalaṃ;
அபி⁴க்கந்தேன வண்ணேன, ஸப்³பா³ ஓபா⁴ஸயங் தி³ஸா’’தி. (வி॰ வ॰ 857);
Abhikkantena vaṇṇena, sabbā obhāsayaṃ disā’’ti. (vi. va. 857);
ஏவமாதீ³ஸு அபி⁴ரூபே. ‘‘அபி⁴க்கந்தங், போ⁴ கோ³தமாதி (பாரா॰ 15) ஏவமாதீ³ஸு அப்³ப⁴னுமோத³னே . இத⁴ பன க²யே. தேன அபி⁴க்கந்தாய ரத்தியா, பரிக்கீ²ணாய ரத்தியாதி வுத்தங் ஹோதி.
Evamādīsu abhirūpe. ‘‘Abhikkantaṃ, bho gotamāti (pārā. 15) evamādīsu abbhanumodane . Idha pana khaye. Tena abhikkantāya rattiyā, parikkhīṇāya rattiyāti vuttaṃ hoti.
அபி⁴க்கந்தவண்ணாதி இத⁴ அபி⁴க்கந்தஸத்³தோ³ அபி⁴ரூபே. வண்ணஸத்³தோ³ பன ச²விது²திகுலவக்³க³காரணஸண்டா²னபமாணரூபாயதனாதீ³ஸு தி³ஸ்ஸதி. தத்த² ‘‘ஸுவண்ணவண்ணோஸி ப⁴க³வா’’தி (ம॰ நி॰ 2.399) ஏவமாதீ³ஸு ச²வியங். ‘‘கதா³ ஸஞ்ஞூள்ஹா பன தே, க³ஹபதி, இமே ஸமணஸ்ஸ கோ³தமஸ்ஸ வண்ணா’’தி (ம॰ நி॰ 2.77) ஏவமாதீ³ஸு து²தியங். ‘‘சத்தாரோமே , போ⁴ கோ³தம, வண்ணா’’தி (தீ³॰ நி॰ 1.266) ஏவமாதீ³ஸு குலவக்³கே³. ‘‘அத² கேன நு வண்ணேன க³ந்த⁴தே²னோதி வுச்சதீ’’திஆதீ³ஸு (ஸங்॰ நி॰ 1.234) காரணே. ‘‘மஹந்தங் ஹத்தி²ராஜவண்ணங் அபி⁴னிம்மினித்வா’’தி (ஸங்॰ நி॰ 1.138) ஏவமாதீ³ஸு ஸண்டா²னே. ‘‘தயோ பத்தஸ்ஸ வண்ணா’’தி (பாரா॰ 602) ஏவமாதீ³ஸு பமாணே. ‘‘வண்ணோ க³ந்தோ⁴ ரஸோ ஓஜா’’தி ஏவமாதீ³ஸு ரூபாயதனே. ஸோ இத⁴ ச²வியங் த³ட்ட²ப்³போ³. தேன ‘‘அபி⁴க்கந்தவண்ணா அபி⁴ரூபச்ச²வீ’’தி வுத்தங் ஹோதி.
Abhikkantavaṇṇāti idha abhikkantasaddo abhirūpe. Vaṇṇasaddo pana chavithutikulavaggakāraṇasaṇṭhānapamāṇarūpāyatanādīsu dissati. Tattha ‘‘suvaṇṇavaṇṇosi bhagavā’’ti (ma. ni. 2.399) evamādīsu chaviyaṃ. ‘‘Kadā saññūḷhā pana te, gahapati, ime samaṇassa gotamassa vaṇṇā’’ti (ma. ni. 2.77) evamādīsu thutiyaṃ. ‘‘Cattārome , bho gotama, vaṇṇā’’ti (dī. ni. 1.266) evamādīsu kulavagge. ‘‘Atha kena nu vaṇṇena gandhathenoti vuccatī’’tiādīsu (saṃ. ni. 1.234) kāraṇe. ‘‘Mahantaṃ hatthirājavaṇṇaṃ abhinimminitvā’’ti (saṃ. ni. 1.138) evamādīsu saṇṭhāne. ‘‘Tayo pattassa vaṇṇā’’ti (pārā. 602) evamādīsu pamāṇe. ‘‘Vaṇṇo gandho raso ojā’’ti evamādīsu rūpāyatane. So idha chaviyaṃ daṭṭhabbo. Tena ‘‘abhikkantavaṇṇā abhirūpacchavī’’ti vuttaṃ hoti.
கேவலகப்பந்தி எத்த² கேவலஸத்³தோ³ அனவஸேஸயேபு⁴ய்யஅப்³யாமிஸ்ஸானதிரேகத³ள்ஹத்த²விஸங்யோகா³தி³அனேகத்தோ². ததா² ஹிஸ்ஸ ‘‘கேவலபரிபுண்ணங் பரிஸுத்³த⁴ங் ப்³ரஹ்மசரிய’’ந்தி (பாரா॰ 1) ஏவமாதீ³ஸு அனவஸேஸதா அத்தோ². ‘‘கேவலகப்பா ச அங்க³மாக³தா⁴ பஹூதங் கா²த³னீயங் போ⁴ஜனீயங் ஆதா³ய அபி⁴க்கமிதுகாமா ஹொந்தீ’’தி (மஹாவ॰ 43) ஏவமாதீ³ஸு யேபு⁴ய்யதா. ‘‘கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீ’’தி (மஹாவ॰ 1) ஏவமாதீ³ஸு அப்³யாமிஸ்ஸதா. ‘‘கேவலங் ஸத்³தா⁴மத்தகங் நூன அயமாயஸ்மா’’தி (அ॰ நி॰ 6.55) ஏவமாதீ³ஸு அனதிரேகதா. ‘‘ஆயஸ்மதோ, ப⁴ந்தே, அனுருத்³த⁴ஸ்ஸ பா³ஹிகோ நாம ஸத்³தி⁴விஹாரிகோ கேவலகப்பங் ஸங்க⁴பே⁴தா³ய டி²தோ’’தி (அ॰ நி॰ 4.243) ஏவமாதீ³ஸு த³ள்ஹத்த²தா. ‘‘கேவலீ வுஸிதவா உத்தமபுரிஸோதி வுச்சதீ’’தி (அ॰ நி॰ 10.12) ஏவமாதீ³ஸு விஸங்யோகோ³. இத⁴ பனஸ்ஸ அனவஸேஸத்தோ² அதி⁴ப்பேதோ.
Kevalakappanti ettha kevalasaddo anavasesayebhuyyaabyāmissānatirekadaḷhatthavisaṃyogādianekattho. Tathā hissa ‘‘kevalaparipuṇṇaṃ parisuddhaṃ brahmacariya’’nti (pārā. 1) evamādīsu anavasesatā attho. ‘‘Kevalakappā ca aṅgamāgadhā pahūtaṃ khādanīyaṃ bhojanīyaṃ ādāya abhikkamitukāmā hontī’’ti (mahāva. 43) evamādīsu yebhuyyatā. ‘‘Kevalassa dukkhakkhandhassa samudayo hotī’’ti (mahāva. 1) evamādīsu abyāmissatā. ‘‘Kevalaṃ saddhāmattakaṃ nūna ayamāyasmā’’ti (a. ni. 6.55) evamādīsu anatirekatā. ‘‘Āyasmato, bhante, anuruddhassa bāhiko nāma saddhivihāriko kevalakappaṃ saṅghabhedāya ṭhito’’ti (a. ni. 4.243) evamādīsu daḷhatthatā. ‘‘Kevalī vusitavā uttamapurisoti vuccatī’’ti (a. ni. 10.12) evamādīsu visaṃyogo. Idha panassa anavasesattho adhippeto.
கப்பஸத்³தோ³ பனாயங் அபி⁴ஸத்³த³ஹனவோஹாரகாலபஞ்ஞத்திசே²த³னவிகப்பலேஸஸமந்தபா⁴வாதி³அனேகத்தோ². ததா² ஹிஸ்ஸ ‘‘ஓகப்பனியமேதங் போ⁴தோ கோ³தமஸ்ஸ. யதா² தங் அரஹதோ ஸம்மாஸம்பு³த்³த⁴ஸ்ஸா’’தி (ம॰ நி॰ 1.387) ஏவமாதீ³ஸு அபி⁴ஸத்³த³ஹனமத்தோ². ‘‘அனுஜானாமி, பி⁴க்க²வே, பஞ்சஹி ஸமணகப்பேஹி ப²லங் பரிபு⁴ஞ்ஜிது’’ந்தி (சூளவ॰ 250) ஏவமாதீ³ஸு வோஹாரோ. ‘‘யேன ஸுத³ங் நிச்சகப்பங் விஹராமீ’’தி (ம॰ நி॰ 1.387) ஏவமாதீ³ஸு காலோ. ‘‘இச்சாயஸ்மா கப்போ’’தி (ஸு॰ நி॰ 1098) ஏவமாதீ³ஸு பஞ்ஞத்தி. ‘‘அலங்கதோ கப்பிதகேஸமஸ்ஸூ’’தி (வி॰ வ॰ 1094) ஏவமாதீ³ஸு சே²த³னங். ‘‘கப்பதி த்³வங்கு³லகப்போ’’தி (சூளவ॰ 446) ஏவமாதீ³ஸு விகப்போ, அத்தி² கப்போ நிபஜ்ஜிது’’ந்தி (அ॰ நி॰ 8.80) ஏவமாதீ³ஸு லேஸோ. ‘‘கேவலகப்பங் வேளுவனங் ஓபா⁴ஸெத்வா’’தி (ஸங்॰ நி॰ 1.94) ஏவமாதீ³ஸு ஸமந்தபா⁴வோ. இத⁴ பன ஸமந்தபா⁴வோ அத்தோ² அதி⁴ப்பேதோ. தஸ்மா ‘‘கேவலகப்பங் கி³ஜ்ஜ²கூட’’ந்தி எத்த² அனவஸேஸங் ஸமந்ததோ கி³ஜ்ஜ²கூடந்தி ஏவமத்தோ² த³ட்ட²ப்³போ³.
Kappasaddo panāyaṃ abhisaddahanavohārakālapaññattichedanavikappalesasamantabhāvādianekattho. Tathā hissa ‘‘okappaniyametaṃ bhoto gotamassa. Yathā taṃ arahato sammāsambuddhassā’’ti (ma. ni. 1.387) evamādīsu abhisaddahanamattho. ‘‘Anujānāmi, bhikkhave, pañcahi samaṇakappehi phalaṃ paribhuñjitu’’nti (cūḷava. 250) evamādīsu vohāro. ‘‘Yena sudaṃ niccakappaṃ viharāmī’’ti (ma. ni. 1.387) evamādīsu kālo. ‘‘Iccāyasmā kappo’’ti (su. ni. 1098) evamādīsu paññatti. ‘‘Alaṅkato kappitakesamassū’’ti (vi. va. 1094) evamādīsu chedanaṃ. ‘‘Kappati dvaṅgulakappo’’ti (cūḷava. 446) evamādīsu vikappo, atthi kappo nipajjitu’’nti (a. ni. 8.80) evamādīsu leso. ‘‘Kevalakappaṃ veḷuvanaṃ obhāsetvā’’ti (saṃ. ni. 1.94) evamādīsu samantabhāvo. Idha pana samantabhāvo attho adhippeto. Tasmā ‘‘kevalakappaṃ gijjhakūṭa’’nti ettha anavasesaṃ samantato gijjhakūṭanti evamattho daṭṭhabbo.
ஓபா⁴ஸெத்வாதி வத்த²மாலாலங்காரஸரீரஸமுட்டி²தாய ஆபா⁴ய ப²ரித்வா, சந்தி³மா விய ஸூரியோ விய ச ஏகோபா⁴ஸங் ஏகபஜ்ஜோதங் கரித்வாதி அத்தோ². ஏகமந்தங் நிஸீதி³ங்ஸூதி தே³வதானங் த³ஸப³லஸ்ஸ ஸந்திகே நிஸின்னட்டா²னங் நாம ந ப³ஹு, இமஸ்மிங் பன ஸுத்தே பரித்தகா³ரவவஸேன நிஸீதி³ங்ஸு.
Obhāsetvāti vatthamālālaṅkārasarīrasamuṭṭhitāya ābhāya pharitvā, candimā viya sūriyo viya ca ekobhāsaṃ ekapajjotaṃ karitvāti attho. Ekamantaṃ nisīdiṃsūti devatānaṃ dasabalassa santike nisinnaṭṭhānaṃ nāma na bahu, imasmiṃ pana sutte parittagāravavasena nisīdiṃsu.
276. வெஸ்ஸவணோதி கிஞ்சாபி சத்தாரோ மஹாராஜானோ ஆக³தா, வெஸ்ஸவணோ பன த³ஸப³லஸ்ஸ விஸ்ஸாஸிகோ கதா²பவத்தனே ப்³யத்தோ ஸுஸிக்கி²தோ, தஸ்மா வெஸ்ஸவணோ மஹாராஜா ப⁴க³வந்தங் ஏதத³வோச. உளாராதி மஹேஸக்கா²னுபா⁴வஸம்பன்னா. பாணாதிபாதா வேரமணியாதி பாணாதிபாதே தி³ட்ட²த⁴ம்மிகஸம்பராயிகங் ஆதீ³னவங் த³ஸ்ஸெத்வா ததோ வேரமணியா த⁴ம்மங் தே³ஸேதி. ஸேஸேஸுபி ஏஸேவ நயோ. தத்த² ஸந்தி உளாரா யக்கா² நிவாஸினோதி தேஸு ஸேனாஸனேஸு ஸந்தி உளாரா யக்கா² நிப³த்³த⁴வாஸினோ. ஆடானாடியந்தி ஆடானாடனக³ரே ப³த்³த⁴த்தா ஏவங்னாமங். கிங் பன ப⁴க³வதோ அபச்சக்க²த⁴ம்மோ நாம அத்தீ²தி, நத்தி². அத² கஸ்மா வெஸ்ஸவணோ ‘‘உக்³க³ண்ஹாது, ப⁴ந்தே, ப⁴க³வா’’திஆதி³மாஹ? ஓகாஸகரணத்த²ங். ஸோ ஹி ப⁴க³வந்தங் இமங் பரித்தங் ஸாவேதுங் ஓகாஸங் காரெந்தோ ஏவமாஹ. ஸத்து² கதி²தே இமங் பரித்தங் க³ரு ப⁴விஸ்ஸதீதிபி ஆஹ. பா²ஸுவிஹாராயாதி க³மனட்டா²னாதீ³ஸு சதூஸு இரியாபதே²ஸு ஸுக²விஹாராய.
276.Vessavaṇoti kiñcāpi cattāro mahārājāno āgatā, vessavaṇo pana dasabalassa vissāsiko kathāpavattane byatto susikkhito, tasmā vessavaṇo mahārājā bhagavantaṃ etadavoca. Uḷārāti mahesakkhānubhāvasampannā. Pāṇātipātā veramaṇiyāti pāṇātipāte diṭṭhadhammikasamparāyikaṃ ādīnavaṃ dassetvā tato veramaṇiyā dhammaṃ deseti. Sesesupi eseva nayo. Tattha santi uḷārā yakkhā nivāsinoti tesu senāsanesu santi uḷārā yakkhā nibaddhavāsino. Āṭānāṭiyanti āṭānāṭanagare baddhattā evaṃnāmaṃ. Kiṃ pana bhagavato apaccakkhadhammo nāma atthīti, natthi. Atha kasmā vessavaṇo ‘‘uggaṇhātu, bhante, bhagavā’’tiādimāha? Okāsakaraṇatthaṃ. So hi bhagavantaṃ imaṃ parittaṃ sāvetuṃ okāsaṃ kārento evamāha. Satthu kathite imaṃ parittaṃ garu bhavissatītipi āha. Phāsuvihārāyāti gamanaṭṭhānādīsu catūsu iriyāpathesu sukhavihārāya.
277. சக்கு²மந்தஸ்ஸாதி ந விபஸ்ஸீயேவ சக்கு²மா, ஸத்தபி பு³த்³தா⁴ சக்கு²மந்தோ, தஸ்மா ஏகேகஸ்ஸ பு³த்³த⁴ஸ்ஸ ஏதானி ஸத்த ஸத்த நாமானி ஹொந்தி. ஸப்³பே³பி பு³த்³தா⁴ சக்கு²மந்தோ, ஸப்³பே³ ஸப்³ப³பூ⁴தானுகம்பினோ, ஸப்³பே³ ந்ஹாதகிலேஸத்தா ந்ஹாதகா. ஸப்³பே³ மாரஸேனாபமத்³தி³னோ, ஸப்³பே³ வுஸிதவந்தோ, ஸப்³பே³ விமுத்தா, ஸப்³பே³ அங்க³தோ ரஸ்மீனங் நிக்க²ந்தத்தா அங்கீ³ரஸா. ந கேவலஞ்ச பு³த்³தா⁴னங் ஏதானேவ ஸத்த நாமானி அஸங்க்²யெய்யானி நாமானி ஸகு³ணேன மஹேஸினோதி வுத்தங்.
277.Cakkhumantassāti na vipassīyeva cakkhumā, sattapi buddhā cakkhumanto, tasmā ekekassa buddhassa etāni satta satta nāmāni honti. Sabbepi buddhā cakkhumanto, sabbe sabbabhūtānukampino, sabbe nhātakilesattā nhātakā. Sabbe mārasenāpamaddino, sabbe vusitavanto, sabbe vimuttā, sabbe aṅgato rasmīnaṃ nikkhantattā aṅgīrasā. Na kevalañca buddhānaṃ etāneva satta nāmāni asaṅkhyeyyāni nāmāni saguṇena mahesinoti vuttaṃ.
வெஸ்ஸவணோ பன அத்தனோ பாகடனாமவஸேன ஏவமாஹ. தே ஜனாதி இத⁴ கீ²ணாஸவா ஜனாதி அதி⁴ப்பேதா. அபிஸுணாதா²தி தே³ஸனாஸீஸமத்தமேதங், அமுஸா அபிஸுணா அப²ருஸா மந்தபா⁴ணினோதி அத்தோ² . மஹத்தாதி மஹந்தபா⁴வங் பத்தா. ‘‘மஹந்தா’’திபி பாடோ², மஹந்தாதி அத்தோ². வீதஸாரதா³தி நிஸ்ஸாரதா³ விக³தலோமஹங்ஸா.
Vessavaṇo pana attano pākaṭanāmavasena evamāha. Te janāti idha khīṇāsavā janāti adhippetā. Apisuṇāthāti desanāsīsamattametaṃ, amusā apisuṇā apharusā mantabhāṇinoti attho . Mahattāti mahantabhāvaṃ pattā. ‘‘Mahantā’’tipi pāṭho, mahantāti attho. Vītasāradāti nissāradā vigatalomahaṃsā.
ஹிதந்தி மெத்தாப²ரணேன ஹிதங். யங் நமஸ்ஸந்தீதி எத்த² யந்தி நிபாதமத்தங். மஹத்தந்தி மஹந்தங். அயமேவ வா பாடோ², இத³ங் வுத்தங் ஹோதி ‘‘யே சாபி லோகே கிலேஸனிப்³பா³னேன நிப்³பு³தா யதா²பூ⁴தங் விபஸ்ஸிஸுங், விஜ்ஜாதி³கு³ணஸம்பன்னஞ்ச ஹிதங் தே³வமனுஸ்ஸானங் கோ³தமங் நமஸ்ஸந்தி, தே ஜனா அபிஸுணா, தேஸம்பி நமத்தூ²’’தி. அட்ட²கதா²யங் பன தே ஜனா அபிஸுணாதி தே பு³த்³தா⁴ அபிஸுணாதி ஏவங் பட²மகா³தா²ய பு³த்³தா⁴னங்யேவ வண்ணோ கதி²தோ, தஸ்மா பட²மகா³தா² ஸத்தன்னங் பு³த்³தா⁴னங் வஸேன வுத்தா. து³தியகா³தா²ய ‘‘கோ³தம’’ந்தி தே³ஸனாமுக²மத்தமேதங். அயம்பி ஹி ஸத்தன்னங்யேவ வஸேன வுத்தாதி வேதி³தப்³பா³. அயஞ்ஹெத்த² அத்தோ² – லோகே பண்டி³தா தே³வமனுஸ்ஸா யங் நமஸ்ஸந்தி கோ³தமங், தஸ்ஸ ச ததோ புரிமானஞ்ச பு³த்³தா⁴னங் நமத்தூ²தி.
Hitanti mettāpharaṇena hitaṃ. Yaṃ namassantīti ettha yanti nipātamattaṃ. Mahattanti mahantaṃ. Ayameva vā pāṭho, idaṃ vuttaṃ hoti ‘‘ye cāpi loke kilesanibbānena nibbutā yathābhūtaṃ vipassisuṃ, vijjādiguṇasampannañca hitaṃ devamanussānaṃ gotamaṃ namassanti, te janā apisuṇā, tesampi namatthū’’ti. Aṭṭhakathāyaṃ pana te janā apisuṇāti te buddhā apisuṇāti evaṃ paṭhamagāthāya buddhānaṃyeva vaṇṇo kathito, tasmā paṭhamagāthā sattannaṃ buddhānaṃ vasena vuttā. Dutiyagāthāya ‘‘gotama’’nti desanāmukhamattametaṃ. Ayampi hi sattannaṃyeva vasena vuttāti veditabbā. Ayañhettha attho – loke paṇḍitā devamanussā yaṃ namassanti gotamaṃ, tassa ca tato purimānañca buddhānaṃ namatthūti.
278. யதோ உக்³க³ச்ச²தீதி யதோ டா²னதோ உதே³தி. ஆதி³ச்சோதி அதி³தியா புத்தோ, வேவசனமத்தங் வா ஏதங் ஸூரியஸத்³த³ஸ்ஸ. மஹந்தங் மண்ட³லங் அஸ்ஸாதி மண்ட³லீமஹா. யஸ்ஸ சுக்³க³ச்ச²மானஸ்ஸாதி யம்ஹி உக்³க³ச்ச²மானே. ஸங்வரீபி நிருஜ்ஜ²தீதி ரத்தி அந்தரதா⁴யதி. யஸ்ஸ சுக்³க³தேதி யஸ்மிங் உக்³க³தே.
278.Yato uggacchatīti yato ṭhānato udeti. Ādiccoti aditiyā putto, vevacanamattaṃ vā etaṃ sūriyasaddassa. Mahantaṃ maṇḍalaṃ assāti maṇḍalīmahā. Yassa cuggacchamānassāti yamhi uggacchamāne. Saṃvarīpi nirujjhatīti ratti antaradhāyati. Yassa cuggateti yasmiṃ uggate.
ரஹதோ³தி உத³கரஹதோ³. தத்தா²தி யதோ உக்³க³ச்ச²தி ஸூரியோ, தஸ்மிங் டா²னே. ஸமுத்³தோ³தி யோ ஸோ ரஹதோ³தி வுத்தோ, ஸோ ந அஞ்ஞோ, அத² கோ² ஸமுத்³தோ³. ஸரிதோத³கோதி விஸடோத³கோ, ஸரிதா நானப்பகாரா நதி³யோ அஸ்ஸ உத³கே பவிட்டா²தி வா ஸரிதோத³கோ. ஏவங் தங் தத்த² ஜானந்தீதி தங் ரஹத³ங் தத்த² ஏவங் ஜானந்தி . கிந்தி ஜானந்தி? ஸமுத்³தோ³ ஸரிதோத³கோதி ஏவங் ஜானந்தி.
Rahadoti udakarahado. Tatthāti yato uggacchati sūriyo, tasmiṃ ṭhāne. Samuddoti yo so rahadoti vutto, so na añño, atha kho samuddo. Saritodakoti visaṭodako, saritā nānappakārā nadiyo assa udake paviṭṭhāti vā saritodako. Evaṃ taṃ tattha jānantīti taṃ rahadaṃ tattha evaṃ jānanti . Kinti jānanti? Samuddo saritodakoti evaṃ jānanti.
இதோதி ஸினேருதோ வா தேஸங் நிஸின்னட்டா²னதோ வா. ஜனோதி அயங் மஹாஜனோ. ஏகனாமாதி இந்த³னாமேன ஏகனாமா. ஸப்³பே³ஸங் கிர தேஸங் ஸக்கஸ்ஸ தே³வரஞ்ஞோ நாமமேவ நாமமகங்ஸு. அஸீதி த³ஸ ஏகோ சாதி ஏகனவுதிஜனா. இந்த³னாமாதி இந்தோ³தி ஏவங்னாமா. பு³த்³த⁴ங் ஆதி³ச்சப³ந்து⁴னந்தி கிலேஸனித்³தா³பக³மனேனாபி பு³த்³த⁴ங். ஆதி³ச்சேன ஸமானகொ³த்ததாயபி ஆதி³ச்சப³ந்து⁴னங். குஸலேன ஸமெக்க²ஸீதி அனவஜ்ஜேன நிபுணேன வா ஸப்³ப³ஞ்ஞுதஞ்ஞாணேன மஹாஜனங் ஓலோகேஸி. அமனுஸ்ஸாபி தங் வந்த³ந்தீதி அமனுஸ்ஸாபி தங் ‘‘ஸப்³ப³ஞ்ஞுதஞ்ஞாணேன மஹாஜனங் ஓலோகேஸீ’’தி வத்வா வந்த³ந்தி. ஸுதங் நேதங் அபி⁴ண்ஹஸோதி ஏதங் அம்ஹேஹி அபி⁴க்க²ணங் ஸுதங். ஜினங் வந்த³த² கோ³தமங், ஜினங் வந்தா³ம கோ³தமந்தி அம்ஹேஹி புட்டா² ஜினங் வந்தா³ம கோ³தமந்தி வத³ந்தி.
Itoti sineruto vā tesaṃ nisinnaṭṭhānato vā. Janoti ayaṃ mahājano. Ekanāmāti indanāmena ekanāmā. Sabbesaṃ kira tesaṃ sakkassa devarañño nāmameva nāmamakaṃsu. Asīti dasa eko cāti ekanavutijanā. Indanāmāti indoti evaṃnāmā. Buddhaṃ ādiccabandhunanti kilesaniddāpagamanenāpi buddhaṃ. Ādiccena samānagottatāyapi ādiccabandhunaṃ. Kusalena samekkhasīti anavajjena nipuṇena vā sabbaññutaññāṇena mahājanaṃ olokesi. Amanussāpi taṃ vandantīti amanussāpi taṃ ‘‘sabbaññutaññāṇena mahājanaṃ olokesī’’ti vatvā vandanti. Sutaṃ netaṃ abhiṇhasoti etaṃ amhehi abhikkhaṇaṃ sutaṃ. Jinaṃ vandatha gotamaṃ, jinaṃ vandāma gotamanti amhehi puṭṭhā jinaṃ vandāma gotamanti vadanti.
279. யேன பேதா பவுச்சந்தீதி பேதா நாம காலங்கதா, தே யேன தி³ஸாபா⁴கே³ன நீஹரியந்தூதி வுச்சந்தி. பிஸுணா பிட்டி²மங்ஸிகாதி பிஸுணாவாசா சேவ பிட்டி²மங்ஸங் கா²த³ந்தா விய பரம்முகா² க³ரஹகா ச. ஏதே ச யேன நீஹரியந்தூதி வுச்சந்தி, ஸப்³பே³பி ஹேதே த³க்கி²ணத்³வாரேன நீஹரித்வா த³க்கி²ணதோ நக³ரஸ்ஸ ட³ய்ஹந்து வா சி²ஜ்ஜந்து வா ஹஞ்ஞந்து வாதி ஏவங் வுச்சந்தி. இதோ ஸா த³க்கி²ணா தி³ஸாதி யேன தி³ஸாபா⁴கே³ன தே பேதா ச பிஸுணாதி³கா ச நீஹரியந்தூதி வுச்சந்தி, இதோ ஸா த³க்கி²ணா தி³ஸா. இதோதி ஸினேருதோ வா தேஸங் நிஸின்னட்டா²னதோ வா. கும்ப⁴ண்டா³னந்தி தே கிர தே³வா மஹோத³ரா ஹொந்தி, ரஹஸ்ஸங்க³ம்பி ச நேஸங் கும்போ⁴ விய மஹந்தங் ஹோதி. தஸ்மா கும்ப⁴ண்டா³தி வுச்சந்தி.
279.Yenapetā pavuccantīti petā nāma kālaṅkatā, te yena disābhāgena nīhariyantūti vuccanti. Pisuṇā piṭṭhimaṃsikāti pisuṇāvācā ceva piṭṭhimaṃsaṃ khādantā viya parammukhā garahakā ca. Ete ca yena nīhariyantūti vuccanti, sabbepi hete dakkhiṇadvārena nīharitvā dakkhiṇato nagarassa ḍayhantu vā chijjantu vā haññantu vāti evaṃ vuccanti. Ito sā dakkhiṇā disāti yena disābhāgena te petā ca pisuṇādikā ca nīhariyantūti vuccanti, ito sā dakkhiṇā disā. Itoti sineruto vā tesaṃ nisinnaṭṭhānato vā. Kumbhaṇḍānanti te kira devā mahodarā honti, rahassaṅgampi ca nesaṃ kumbho viya mahantaṃ hoti. Tasmā kumbhaṇḍāti vuccanti.
280. யத்த² சொக்³க³ச்ச²தி ஸூரியோதி யஸ்மிங் தி³ஸாபா⁴கே³ ஸூரியோ அத்த²ங் க³ச்ச²தி.
280.Yattha coggacchati sūriyoti yasmiṃ disābhāge sūriyo atthaṃ gacchati.
281. யேனாதி யேன தி³ஸாபா⁴கே³ன. மஹானேரூதி மஹாஸினேரு பப்³ப³தராஜா. ஸுத³ஸ்ஸனோதி ஸோவண்ணமயத்தா ஸுந்த³ரத³ஸ்ஸனோ. ஸினேருஸ்ஸ ஹி பாசீனபஸ்ஸங் ரஜதமயங், த³க்கி²ணபஸ்ஸங் மணிமயங் , பச்சி²மபஸ்ஸங் ப²லிகமயங், உத்தரபஸ்ஸங் ஸோவண்ணமயங், தங் மனுஞ்ஞத³ஸ்ஸனங் ஹோதி. தஸ்மா யேன தி³ஸாபா⁴கே³ன ஸினேரு ஸுத³ஸ்ஸனோதி அயமெத்த²த்தோ². மனுஸ்ஸா தத்த² ஜாயந்தீதி தத்த² உத்தரகுரும்ஹி மனுஸ்ஸா ஜாயந்தி. அமமாதி வத்தா²ப⁴ரணபானபோ⁴ஜனாதீ³ஸுபி மமத்தவிரஹிதா. அபரிக்³க³ஹாதி இத்தி²பரிக்³க³ஹேன அபரிக்³க³ஹா. தேஸங் கிர ‘‘அயங் மய்ஹங் ப⁴ரியா’’தி மமத்தங் ந ஹோதி, மாதரங் வா ப⁴கி³னிங் வா தி³ஸ்வா ச²ந்த³ராகோ³ நுப்பஜ்ஜதி.
281.Yenāti yena disābhāgena. Mahānerūti mahāsineru pabbatarājā. Sudassanoti sovaṇṇamayattā sundaradassano. Sinerussa hi pācīnapassaṃ rajatamayaṃ, dakkhiṇapassaṃ maṇimayaṃ , pacchimapassaṃ phalikamayaṃ, uttarapassaṃ sovaṇṇamayaṃ, taṃ manuññadassanaṃ hoti. Tasmā yena disābhāgena sineru sudassanoti ayametthattho. Manussā tattha jāyantīti tattha uttarakurumhi manussā jāyanti. Amamāti vatthābharaṇapānabhojanādīsupi mamattavirahitā. Apariggahāti itthipariggahena apariggahā. Tesaṃ kira ‘‘ayaṃ mayhaṃ bhariyā’’ti mamattaṃ na hoti, mātaraṃ vā bhaginiṃ vā disvā chandarāgo nuppajjati.
நபி நீயந்தி நங்க³லாதி நங்க³லானிபி தத்த² ‘‘கஸிகம்மங் கரிஸ்ஸாமா’’தி ந கெ²த்தங் நீயந்தி. அகட்ட²பாகிமந்தி அகட்டே² பூ⁴மிபா⁴கே³ அரஞ்ஞே ஸயமேவ ஜாதங். தண்டு³லப்ப²லந்தி தண்டு³லாவ தஸ்ஸ ப²லங் ஹோதி.
Napi nīyanti naṅgalāti naṅgalānipi tattha ‘‘kasikammaṃ karissāmā’’ti na khettaṃ nīyanti. Akaṭṭhapākimanti akaṭṭhe bhūmibhāge araññe sayameva jātaṃ. Taṇḍulapphalanti taṇḍulāva tassa phalaṃ hoti.
துண்டி³கீரே பசித்வானாதி உக்க²லியங் ஆகிரித்வா நித்³து⁴மங்கா³ரேன அக்³கி³னா பசித்வா. தத்த² கிர ஜோதிகபாஸாணா நாம ஹொந்தி. அத² கோ² தே தயோ பாஸாணே ட²பெத்வா தங் உக்க²லிங் ஆரோபெந்தி. பாஸாணேஹி தேஜோ ஸமுட்ட²ஹித்வா தங் பசதி. ததோ பு⁴ஞ்ஜந்தி போ⁴ஜனந்தி ததோ உக்க²லிதோ போ⁴ஜனமேவ பு⁴ஞ்ஜந்தி, அஞ்ஞோ ஸூபோ வா ப்³யஞ்ஜனங் வா ந ஹோதி, பு⁴ஞ்ஜந்தானங் சித்தானுகூலோயேவஸ்ஸ ரஸோ ஹோதி. தே தங் டா²னங் ஸம்பத்தானங் தெ³ந்தியேவ, மச்ச²ரியசித்தங் நாம ந ஹோதி. பு³த்³த⁴பச்சேகபு³த்³தா⁴த³யோபி மஹித்³தி⁴கா தத்த² க³ந்த்வா பிண்ட³பாதங் க³ண்ஹந்தி.
Tuṇḍikīre pacitvānāti ukkhaliyaṃ ākiritvā niddhumaṅgārena agginā pacitvā. Tattha kira jotikapāsāṇā nāma honti. Atha kho te tayo pāsāṇe ṭhapetvā taṃ ukkhaliṃ āropenti. Pāsāṇehi tejo samuṭṭhahitvā taṃ pacati. Tato bhuñjanti bhojananti tato ukkhalito bhojanameva bhuñjanti, añño sūpo vā byañjanaṃ vā na hoti, bhuñjantānaṃ cittānukūloyevassa raso hoti. Te taṃ ṭhānaṃ sampattānaṃ dentiyeva, macchariyacittaṃ nāma na hoti. Buddhapaccekabuddhādayopi mahiddhikā tattha gantvā piṇḍapātaṃ gaṇhanti.
கா³விங் ஏககு²ரங் கத்வாதி கா³விங் க³ஹெத்வா ஏககு²ரங் வாஹனமேவ கத்வா. தங் அபி⁴ருய்ஹ வெஸ்ஸவணஸ்ஸ பரிசாரகா யக்கா². அனுயந்தி தி³ஸோதி³ஸந்தி தாய தாய தி³ஸாய சரந்தி. பஸுங் ஏககு²ரங் கத்வாதி ட²பெத்வா கா³விங் அவஸேஸசதுப்பத³ஜாதிகங் பஸுங் ஏககு²ரங் வாஹனமேவ கத்வா தி³ஸோதி³ஸங் அனுயந்தி.
Gāviṃekakhuraṃ katvāti gāviṃ gahetvā ekakhuraṃ vāhanameva katvā. Taṃ abhiruyha vessavaṇassa paricārakā yakkhā. Anuyanti disodisanti tāya tāya disāya caranti. Pasuṃ ekakhuraṃ katvāti ṭhapetvā gāviṃ avasesacatuppadajātikaṃ pasuṃ ekakhuraṃ vāhanameva katvā disodisaṃ anuyanti.
இத்தி²ங் வா வாஹனங் கத்வாதி யேபு⁴ய்யேன க³ப்³பி⁴னிங் மாதுகா³மங் வாஹனங் கரித்வா. தஸ்ஸா பிட்டி²யா நிஸீதி³த்வா சரந்தி. தஸ்ஸா கிர பிட்டி² ஓனமிதுங் ஸஹதி. இதரா பன இத்தி²யோ யானே யோஜெந்தி. புரிஸங் வாஹனங் கத்வாதி புரிஸே க³ஹெத்வா யானே யோஜெந்தி. க³ண்ஹந்தா ச ஸம்மாதி³ட்டி²கே க³ஹேதுங் ந ஸக்கொந்தி. யேபு⁴ய்யேன பச்சந்திமமிலக்கு²வாஸிகே க³ண்ஹந்தி. அஞ்ஞதரோ கிரெத்த² ஜானபதோ³ ஏகஸ்ஸ தே²ரஸ்ஸ ஸமீபே நிஸீதி³த்வா நித்³தா³யதி, தே²ரோ ‘‘உபாஸக அதிவிய நித்³தா³யஸீ’’தி புச்சி². ‘‘அஜ்ஜ, ப⁴ந்தே, ஸப்³ப³ரத்திங் வெஸ்ஸவணதா³ஸேஹி கிலமிதொம்ஹீ’’தி ஆஹ.
Itthiṃ vā vāhanaṃ katvāti yebhuyyena gabbhiniṃ mātugāmaṃ vāhanaṃ karitvā. Tassā piṭṭhiyā nisīditvā caranti. Tassā kira piṭṭhi onamituṃ sahati. Itarā pana itthiyo yāne yojenti. Purisaṃ vāhanaṃ katvāti purise gahetvā yāne yojenti. Gaṇhantā ca sammādiṭṭhike gahetuṃ na sakkonti. Yebhuyyena paccantimamilakkhuvāsike gaṇhanti. Aññataro kirettha jānapado ekassa therassa samīpe nisīditvā niddāyati, thero ‘‘upāsaka ativiya niddāyasī’’ti pucchi. ‘‘Ajja, bhante, sabbarattiṃ vessavaṇadāsehi kilamitomhī’’ti āha.
குமாரிங் வாஹனங் கத்வாதி குமாரியோ க³ஹெத்வா ஏககு²ரங் வாஹனங் கத்வா ரதே² யோஜெந்தி. குமாரவாஹனேபி ஏஸேவ நயோ. பசாரா தஸ்ஸ ராஜினோதி தஸ்ஸ ரஞ்ஞோ பரிசாரிகா. ஹத்தி²யானங் அஸ்ஸயானந்தி ந கேவலங் கோ³யானாதீ³னியேவ, ஹத்தி²அஸ்ஸயானாதீ³னிபி அபி⁴ருஹித்வா விசரந்தி. தி³ப்³ப³ங் யானந்தி அஞ்ஞம்பி நேஸங் ப³ஹுவித⁴ங் தி³ப்³ப³யானங் உபட்டி²தமேவ ஹோதி, ஏதானி தாவ நேஸங் உபகப்பனயானானி. தே பன பாஸாதே³ வரஸயனம்ஹி நிபன்னாபி பீட²ஸிவிகாதீ³ஸு ச நிஸின்னாபி விசரந்தி. தேன வுத்தங் ‘‘பாஸாதா³ ஸிவிகா சேவா’’தி. மஹாராஜஸ்ஸ யஸஸ்ஸினோதி ஏவங் ஆனுபா⁴வஸம்பன்னஸ்ஸ யஸஸ்ஸினோ மஹாராஜஸ்ஸ ஏதானி யானானி நிப்³ப³த்தந்தி.
Kumāriṃ vāhanaṃ katvāti kumāriyo gahetvā ekakhuraṃ vāhanaṃ katvā rathe yojenti. Kumāravāhanepi eseva nayo. Pacārā tassa rājinoti tassa rañño paricārikā. Hatthiyānaṃ assayānanti na kevalaṃ goyānādīniyeva, hatthiassayānādīnipi abhiruhitvā vicaranti. Dibbaṃ yānanti aññampi nesaṃ bahuvidhaṃ dibbayānaṃ upaṭṭhitameva hoti, etāni tāva nesaṃ upakappanayānāni. Te pana pāsāde varasayanamhi nipannāpi pīṭhasivikādīsu ca nisinnāpi vicaranti. Tena vuttaṃ ‘‘pāsādā sivikā cevā’’ti. Mahārājassa yasassinoti evaṃ ānubhāvasampannassa yasassino mahārājassa etāni yānāni nibbattanti.
தஸ்ஸ ச நக³ரா அஹு அந்தலிக்கே² ஸுமாபிதாதி தஸ்ஸ ரஞ்ஞோ ஆகாஸே ஸுட்டு² மாபிதா ஏதே ஆடானாடாதி³கா நக³ரா அஹேஸுங், நக³ரானி ப⁴விங்ஸூதி அத்தோ². ஏகஞ்ஹிஸ்ஸ நக³ரங் ஆடானாடா நாம ஆஸி, ஏகங் குஸினாடா நாம, ஏகங் பரகுஸினாடா நாம, ஏகங் நாடஸூரியா நாம, ஏகங் பரகுஸிடனாடா நாம.
Tassaca nagarā ahu antalikkhe sumāpitāti tassa rañño ākāse suṭṭhu māpitā ete āṭānāṭādikā nagarā ahesuṃ, nagarāni bhaviṃsūti attho. Ekañhissa nagaraṃ āṭānāṭā nāma āsi, ekaṃ kusināṭā nāma, ekaṃ parakusināṭā nāma, ekaṃ nāṭasūriyā nāma, ekaṃ parakusiṭanāṭā nāma.
உத்தரேன கஸிவந்தோதி தஸ்மிங் ட²த்வா உஜுங் உத்தரதி³ஸாய கஸிவந்தோ நாம அஞ்ஞங் நக³ரங். ஜனோக⁴மபரேன சாதி ஏதஸ்ஸ அபரபா⁴கே³ ஜனோக⁴ங் நாம அஞ்ஞங் நக³ரங். நவனவதியோதி அஞ்ஞம்பி நவனவதியோ நாம ஏகங் நக³ரங். அபரங் அம்ப³ரஅம்ப³ரவதியோ நாம. ஆளகமந்தா³தி அபரம்பி ஆளகமந்தா³ நாம ராஜதா⁴னீ.
Uttarena kasivantoti tasmiṃ ṭhatvā ujuṃ uttaradisāya kasivanto nāma aññaṃ nagaraṃ. Janoghamaparena cāti etassa aparabhāge janoghaṃ nāma aññaṃ nagaraṃ. Navanavatiyoti aññampi navanavatiyo nāma ekaṃ nagaraṃ. Aparaṃ ambaraambaravatiyo nāma. Āḷakamandāti aparampi āḷakamandā nāma rājadhānī.
தஸ்மா குவேரோ மஹாராஜாதி அயங் கிர அனுப்பன்னே பு³த்³தே⁴ குவேரோ நாம ப்³ராஹ்மணோ ஹுத்வா உச்சு²வப்பங் காரெத்வா ஸத்த யந்தானி யோஜேஸி. ஏகிஸ்ஸாய யந்தஸாலாய உட்டி²தங் ஆயங் ஆக³தாக³தஸ்ஸ மஹாஜனஸ்ஸ த³த்வா புஞ்ஞங் அகாஸி. அவஸேஸஸாலாஹி தத்தே²வ ப³ஹுதரோ ஆயோ உட்டா²ஸி, ஸோ தேன பஸீதி³த்வா அவஸேஸஸாலாஸுபி உப்பஜ்ஜனகங் க³ஹெத்வா வீஸதி வஸ்ஸஸஹஸ்ஸானி தா³னங் அதா³ஸி. ஸோ காலங் கத்வா சாதுமஹாராஜிகேஸு குவேரோ நாம தே³வபுத்தோ ஜாதோ. அபரபா⁴கே³ விஸாணாய ராஜதா⁴னியா ரஜ்ஜங் காரேஸி. ததோ பட்டா²ய வெஸ்ஸவணோதி வுச்சதி.
Tasmākuvero mahārājāti ayaṃ kira anuppanne buddhe kuvero nāma brāhmaṇo hutvā ucchuvappaṃ kāretvā satta yantāni yojesi. Ekissāya yantasālāya uṭṭhitaṃ āyaṃ āgatāgatassa mahājanassa datvā puññaṃ akāsi. Avasesasālāhi tattheva bahutaro āyo uṭṭhāsi, so tena pasīditvā avasesasālāsupi uppajjanakaṃ gahetvā vīsati vassasahassāni dānaṃ adāsi. So kālaṃ katvā cātumahārājikesu kuvero nāma devaputto jāto. Aparabhāge visāṇāya rājadhāniyā rajjaṃ kāresi. Tato paṭṭhāya vessavaṇoti vuccati.
பச்சேஸந்தோ பகாஸெந்தீதி படிஏஸந்தோ விஸுங் விஸுங் அத்தே² உபபரிக்க²மானா அனுஸாஸமானா அஞ்ஞே த்³வாத³ஸ யக்க²ரட்டி²கா பகாஸெந்தி. தே கிர யக்க²ரட்டி²கா ஸாஸனங் க³ஹெத்வா த்³வாத³ஸன்னங் யக்க²தோ³வாரிகானங் நிவேதெ³ந்தி. யக்க²தோ³வாரிகா தங் ஸாஸனங் மஹாராஜஸ்ஸ நிவேதெ³ந்தி. இதா³னி தேஸங் யக்க²ரட்டி²கானங் நாமங் த³ஸ்ஸெந்தோ ததோலாதிஆதி³மாஹ. தேஸு கிர ஏகோ ததோலா நாம, ஏகோ தத்தலா நாம, ஏகோ ததோதலா நாம, ஏகோ ஓஜஸி நாம, ஏகோ தேஜஸி நாம, ஏகோ ததோஜஸீ நாம. ஸூரோ ராஜாதி ஏகோ ஸூரோ நாம, ஏகோ ராஜா நாம, ஏகோ ஸூரோராஜா நாம, அரிட்டோ² நேமீதி ஏகோ அரிட்டோ² நாம, ஏகோ நேமி நாம, ஏகோ அரிட்ட²னேமி நாம.
Paccesanto pakāsentīti paṭiesanto visuṃ visuṃ atthe upaparikkhamānā anusāsamānā aññe dvādasa yakkharaṭṭhikā pakāsenti. Te kira yakkharaṭṭhikā sāsanaṃ gahetvā dvādasannaṃ yakkhadovārikānaṃ nivedenti. Yakkhadovārikā taṃ sāsanaṃ mahārājassa nivedenti. Idāni tesaṃ yakkharaṭṭhikānaṃ nāmaṃ dassento tatolātiādimāha. Tesu kira eko tatolā nāma, eko tattalā nāma, eko tatotalā nāma, eko ojasi nāma, eko tejasi nāma, eko tatojasī nāma. Sūro rājāti eko sūro nāma, eko rājā nāma, eko sūrorājā nāma, ariṭṭho nemīti eko ariṭṭho nāma, eko nemi nāma, eko ariṭṭhanemi nāma.
ரஹதோ³பி தத்த² த⁴ரணீ நாமாதி தத்த² பனேகோ நாமேன த⁴ரணீ நாம உத³கரஹதோ³ அத்தி², பண்ணாஸயோஜனா மஹாபொக்க²ரணீ அத்தீ²தி வுத்தங் ஹோதி. யதோ மேகா⁴ பவஸ்ஸந்தீதி யதோ பொக்க²ரணிதோ உத³கங் க³ஹெத்வா மேகா⁴ பவஸ்ஸந்தி. வஸ்ஸா யதோ பதாயந்தீதி யதோ வுட்டி²யோ அவத்த²ரமானா நிக³ச்ச²ந்தி. மேகே⁴ஸு கிர உட்டி²தேஸு ததோ பொக்க²ரணிதோ புராணஉத³கங் ப⁴ஸ்ஸதி. உபரி மேகோ⁴ உட்ட²ஹித்வா தங் பொக்க²ரணிங் நவோத³கேன பூரேதி. புராணோத³கங் ஹெட்டி²மங் ஹுத்வா நிக்க²மதி. பரிபுண்ணாய பொக்க²ரணியா வலாஹகா விக³ச்ச²ந்தி. ஸபா⁴பீதி ஸபா⁴. தஸ்ஸா கிர பொக்க²ரணியா தீரே ஸாலவதியா நாம லதாய பரிக்கி²த்தோ த்³வாத³ஸயோஜனிகோ ரதனமண்ட³போ அத்தி², தங் ஸந்தா⁴யேதங் வுத்தங்.
Rahadopitattha dharaṇī nāmāti tattha paneko nāmena dharaṇī nāma udakarahado atthi, paṇṇāsayojanā mahāpokkharaṇī atthīti vuttaṃ hoti. Yato meghā pavassantīti yato pokkharaṇito udakaṃ gahetvā meghā pavassanti. Vassā yato patāyantīti yato vuṭṭhiyo avattharamānā nigacchanti. Meghesu kira uṭṭhitesu tato pokkharaṇito purāṇaudakaṃ bhassati. Upari megho uṭṭhahitvā taṃ pokkharaṇiṃ navodakena pūreti. Purāṇodakaṃ heṭṭhimaṃ hutvā nikkhamati. Paripuṇṇāya pokkharaṇiyā valāhakā vigacchanti. Sabhāpīti sabhā. Tassā kira pokkharaṇiyā tīre sālavatiyā nāma latāya parikkhitto dvādasayojaniko ratanamaṇḍapo atthi, taṃ sandhāyetaṃ vuttaṃ.
பயிருபாஸந்தீதி நிஸீத³ந்தி. தத்த² நிச்சப²லா ருக்கா²தி தஸ்மிங் டா²னே தங் மண்ட³பங் பரிவாரெத்வா ஸதா³ ப²லிதா அம்ப³ஜம்பு³ஆத³யோ ருக்கா² நிச்சபுப்பி²தா ச சம்பகமாலாத³யோதி த³ஸ்ஸேதி. நானாதி³ஜக³ணாயுதாதி விவித⁴பக்கி²ஸங்க⁴ஸமாகுலா. மயூரகோஞ்சாபி⁴ருதா³தி மயூரேஹி கோஞ்சஸகுணேஹி ச அபி⁴ருதா³ உபகீ³தா.
Payirupāsantīti nisīdanti. Tattha niccaphalā rukkhāti tasmiṃ ṭhāne taṃ maṇḍapaṃ parivāretvā sadā phalitā ambajambuādayo rukkhā niccapupphitā ca campakamālādayoti dasseti. Nānādijagaṇāyutāti vividhapakkhisaṅghasamākulā. Mayūrakoñcābhirudāti mayūrehi koñcasakuṇehi ca abhirudā upagītā.
ஜீவஞ்ஜீவகஸத்³தெ³த்தா²தி ‘‘ஜீவ ஜீவா’’தி ஏவங் விரவந்தானங் ஜீவஞ்ஜீவகஸகுணானம்பி எத்த² ஸத்³தோ³ அத்தி². ஒட்ட²வசித்தகாதி ‘‘உட்டே²ஹி, சித்த, உட்டே²ஹி சித்தா’’தி ஏவங் வஸ்ஸமானா உட்ட²வசித்தகஸகுணாபி தத்த² விசரந்தி. குக்குடகாதி வனகுக்குடகா. குளீரகாதி ஸுவண்ணகக்கடகா. வனேதி பது³மவனே. பொக்க²ரஸாதகாதி பொக்க²ரஸாதகா நாம ஸகுணா.
Jīvañjīvakasaddetthāti ‘‘jīva jīvā’’ti evaṃ viravantānaṃ jīvañjīvakasakuṇānampi ettha saddo atthi. Oṭṭhavacittakāti ‘‘uṭṭhehi, citta, uṭṭhehi cittā’’ti evaṃ vassamānā uṭṭhavacittakasakuṇāpi tattha vicaranti. Kukkuṭakāti vanakukkuṭakā. Kuḷīrakāti suvaṇṇakakkaṭakā. Vaneti padumavane. Pokkharasātakāti pokkharasātakā nāma sakuṇā.
ஸுகஸாளிகஸத்³தெ³த்தா²தி ஸுகானஞ்ச ஸாளிகானஞ்ச ஸத்³தோ³ எத்த². த³ண்ட³மாணவகானி சாதி மனுஸ்ஸமுக²ஸகுணா. தே கிர த்³வீஹி ஹத்தே²ஹி ஸுவண்ணத³ண்ட³ங் க³ஹெத்வா ஏகங் பொக்க²ரபத்தங் அக்கமித்வா அனந்தரே பொக்க²ரபத்தே ஸுவண்ணத³ண்ட³ங் நிக்கி²பந்தா விசரந்தி. ஸோப⁴தி ஸப்³ப³காலங் ஸாதி ஸா பொக்க²ரணீ ஸப்³ப³காலங் ஸோப⁴தி. குவேரனளினீதி குவேரஸ்ஸ நளினீ பது³மஸரபூ⁴தா, ஸா த⁴ரணீ நாம பொக்க²ரணீ ஸதா³ நிரந்தரங் ஸோப⁴தி.
Sukasāḷikasaddetthāti sukānañca sāḷikānañca saddo ettha. Daṇḍamāṇavakāni cāti manussamukhasakuṇā. Te kira dvīhi hatthehi suvaṇṇadaṇḍaṃ gahetvā ekaṃ pokkharapattaṃ akkamitvā anantare pokkharapatte suvaṇṇadaṇḍaṃ nikkhipantā vicaranti. Sobhati sabbakālaṃ sāti sā pokkharaṇī sabbakālaṃ sobhati. Kuveranaḷinīti kuverassa naḷinī padumasarabhūtā, sā dharaṇī nāma pokkharaṇī sadā nirantaraṃ sobhati.
282. யஸ்ஸ கஸ்ஸசீதி இத³ங் வெஸ்ஸவணோ ஆடானாடியங் ரக்க²ங் நிட்ட²பெத்வா தஸ்ஸா பரிகம்மங் த³ஸ்ஸெந்தோ ஆஹ. தத்த² ஸுக்³க³ஹிதாதி அத்த²ஞ்ச ப்³யஞ்ஜனஞ்ச பரிஸோதெ⁴த்வா ஸுட்டு² உக்³க³ஹிதா. ஸமத்தா பரியாபுதாதி பத³ப்³யஞ்ஜனானி அஹாபெத்வா பரிபுண்ணங் உக்³க³ஹிதா. அத்த²ம்பி பாளிம்பி விஸங்வாதெ³த்வா ஸப்³ப³ஸோ வா பன அப்பகு³ணங் கத்வா ப⁴ணந்தஸ்ஸ ஹி பரித்தங் தேஜவந்தங் ந ஹோதி, ஸப்³ப³ஸோ பகு³ணங் கத்வா ப⁴ணந்தஸ்ஸேவ தேஜவந்தங் ஹோதி. லாப⁴ஹேது உக்³க³ஹெத்வா ப⁴ணந்தஸ்ஸாபி அத்த²ங் ந ஸாதே⁴தி, நிஸ்ஸரணபக்கே² ட²த்வா மெத்தங் புரேசாரிகங் கத்வா ப⁴ணந்தஸ்ஸேவ அத்தா²ய ஹோதீதி த³ஸ்ஸேதி. யக்க²பசாரோதி யக்க²பரிசாரகோ.
282.Yassa kassacīti idaṃ vessavaṇo āṭānāṭiyaṃ rakkhaṃ niṭṭhapetvā tassā parikammaṃ dassento āha. Tattha suggahitāti atthañca byañjanañca parisodhetvā suṭṭhu uggahitā. Samattā pariyāputāti padabyañjanāni ahāpetvā paripuṇṇaṃ uggahitā. Atthampi pāḷimpi visaṃvādetvā sabbaso vā pana appaguṇaṃ katvā bhaṇantassa hi parittaṃ tejavantaṃ na hoti, sabbaso paguṇaṃ katvā bhaṇantasseva tejavantaṃ hoti. Lābhahetu uggahetvā bhaṇantassāpi atthaṃ na sādheti, nissaraṇapakkhe ṭhatvā mettaṃ purecārikaṃ katvā bhaṇantasseva atthāya hotīti dasseti. Yakkhapacāroti yakkhaparicārako.
வத்து²ங் வாதி க⁴ரவத்து²ங் வா. வாஸங் வாதி தத்த² நிப³த்³த⁴வாஸங் வா. ஸமிதிந்தி ஸமாக³மங். அனாவய்ஹந்தி ந ஆவாஹயுத்தங். அவிவய்ஹந்தி ந விவாஹயுத்தங். தேன ஸஹ ஆவாஹவிவாஹங் ந கரெய்யுந்தி அத்தோ². அத்தாஹிபி பரிபுண்ணாஹீதி ‘‘களாரக்கி² களாரத³ந்தா’’தி ஏவங் ஏதேஸங் அத்தபா⁴வங் உபனெத்வா வுத்தாஹி பரிபுண்ணப்³யஞ்ஜனாஹி பரிபா⁴ஸாஹி பரிபா⁴ஸெய்யுங் யக்க²அக்கோஸேஹி நாம அக்கோஸெய்யுந்தி அத்தோ². ரித்தம்பிஸ்ஸ பத்தந்தி பி⁴க்கூ²னங் பத்தஸதி³ஸமேவ லோஹபத்தங் ஹோதி. தங் ஸீஸே நிக்குஜ்ஜிதங் யாவ க³லவாடகா ப⁴ஸ்ஸதி. அத² நங் மஜ்ஜே² அயோகீ²லேன ஆகோடெந்தி.
Vatthuṃ vāti gharavatthuṃ vā. Vāsaṃ vāti tattha nibaddhavāsaṃ vā. Samitinti samāgamaṃ. Anāvayhanti na āvāhayuttaṃ. Avivayhanti na vivāhayuttaṃ. Tena saha āvāhavivāhaṃ na kareyyunti attho. Attāhipi paripuṇṇāhīti ‘‘kaḷārakkhi kaḷāradantā’’ti evaṃ etesaṃ attabhāvaṃ upanetvā vuttāhi paripuṇṇabyañjanāhi paribhāsāhi paribhāseyyuṃ yakkhaakkosehi nāma akkoseyyunti attho. Rittampissa pattanti bhikkhūnaṃ pattasadisameva lohapattaṃ hoti. Taṃ sīse nikkujjitaṃ yāva galavāṭakā bhassati. Atha naṃ majjhe ayokhīlena ākoṭenti.
சண்டா³தி கோத⁴னா. ருத்³தா⁴தி விருத்³தா⁴. ரப⁴ஸாதி கரணுத்தரியா. நேவ மஹாராஜானங் ஆதி³யந்தீதி வசனங் ந க³ண்ஹந்தி, ஆணங் ந கரொந்தி. மஹாராஜானங் புரிஸகானந்தி அட்ட²வீஸதியக்க²ஸேனாபதீனங். புரிஸகானந்தி யக்க²ஸேனாபதீனங் யே மனஸ்ஸா தேஸங். அவருத்³தா⁴ நாமாதி பச்சாமித்தா வேரினோ. உஜ்ஜா²பேதப்³ப³ந்தி பரித்தங் வத்வா அமனுஸ்ஸே படிக்கமாபேதுங் அஸக்கொந்தேன ஏதேஸங் யக்கா²னங் உஜ்ஜா²பேதப்³ப³ங், ஏதே ஜானாபேதப்³பா³தி அத்தோ².
Caṇḍāti kodhanā. Ruddhāti viruddhā. Rabhasāti karaṇuttariyā. Neva mahārājānaṃ ādiyantīti vacanaṃ na gaṇhanti, āṇaṃ na karonti. Mahārājānaṃ purisakānanti aṭṭhavīsatiyakkhasenāpatīnaṃ. Purisakānanti yakkhasenāpatīnaṃ ye manassā tesaṃ. Avaruddhā nāmāti paccāmittā verino. Ujjhāpetabbanti parittaṃ vatvā amanusse paṭikkamāpetuṃ asakkontena etesaṃ yakkhānaṃ ujjhāpetabbaṃ, ete jānāpetabbāti attho.
பரித்தபரிகம்மகதா²
Parittaparikammakathā
இத⁴ பன ட²த்வா பரித்தஸ்ஸ பரிகம்மங் கதே²தப்³ப³ங். பட²மமேவ ஹி ஆடானாடியஸுத்தங் ந ப⁴ணிதப்³ப³ங், மெத்தஸுத்தங் த⁴ஜக்³க³ஸுத்தங் ரதனஸுத்தந்தி இமானி ஸத்தாஹங் ப⁴ணிதப்³பா³னி. ஸசே முஞ்சதி, ஸுந்த³ரங். நோ சே முஞ்சதி, ஆடானாடியஸுத்தங் ப⁴ணிதப்³ப³ங், தங் ப⁴ணந்தேன பி⁴க்கு²னா பிட்ட²ங் வா மங்ஸங் வா ந கா²தி³தப்³ப³ங், ஸுஸானே ந வஸிதப்³ப³ங். கஸ்மா? அமனுஸ்ஸா ஓகாஸங் லப⁴ந்தி. பரித்தகரணட்டா²னங் ஹரிதுபலித்தங் காரெத்வா தத்த² பரிஸுத்³த⁴ங் ஆஸனங் பஞ்ஞபெத்வா நிஸீதி³தப்³ப³ங்.
Idha pana ṭhatvā parittassa parikammaṃ kathetabbaṃ. Paṭhamameva hi āṭānāṭiyasuttaṃ na bhaṇitabbaṃ, mettasuttaṃ dhajaggasuttaṃ ratanasuttanti imāni sattāhaṃ bhaṇitabbāni. Sace muñcati, sundaraṃ. No ce muñcati, āṭānāṭiyasuttaṃ bhaṇitabbaṃ, taṃ bhaṇantena bhikkhunā piṭṭhaṃ vā maṃsaṃ vā na khāditabbaṃ, susāne na vasitabbaṃ. Kasmā? Amanussā okāsaṃ labhanti. Parittakaraṇaṭṭhānaṃ haritupalittaṃ kāretvā tattha parisuddhaṃ āsanaṃ paññapetvā nisīditabbaṃ.
பரித்தகாரகோ பி⁴க்கு² விஹாரதோ க⁴ரங் நெந்தேஹி ப²லகாவுதே⁴ஹி பரிவாரெத்வா நேதப்³போ³. அப்³போ⁴காஸே நிஸீதி³த்வா ந வத்தப்³ப³ங், த்³வாரவாதபானானி பித³ஹித்வா நிஸின்னேன ஆவுத⁴ஹத்தே²ஹி ஸங்பரிவாரிதேன மெத்தசித்தங் புரேசாரிகங் கத்வா வத்தப்³ப³ங். பட²மங் ஸிக்கா²பதா³னி கா³ஹாபெத்வா ஸீலே பதிட்டி²தஸ்ஸ பரித்தங் காதப்³ப³ங். ஏவம்பி மோசேதுங் அஸக்கொந்தேன விஹாரங் ஆனெத்வா சேதியங்க³ணே நிபஜ்ஜாபெத்வா ஆஸனபூஜங் காரெத்வா தீ³பே ஜாலாபெத்வா சேதியங்க³ணங் ஸம்மஜ்ஜித்வா மங்க³லகதா² வத்தப்³பா³. ஸப்³ப³ஸன்னிபாதோ கோ⁴ஸேதப்³போ³. விஹாரஸ்ஸ உபவனே ஜெட்ட²கருக்கோ² நாம ஹோதி, தத்த² பி⁴க்கு²ஸங்கோ⁴ தும்ஹாகங் ஆக³மனங் படிமானேதீதி பஹிணிதப்³ப³ங். ஸப்³ப³ஸன்னிபாதட்டா²னே அனாக³ந்துங் நாம ந லப்³ப⁴தி. ததோ அமனுஸ்ஸக³ஹிதகோ ‘‘த்வங் கோ நாமா’’தி புச்சி²தப்³போ³. நாமே கதி²தே நாமேனேவ ஆலபிதப்³போ³. இத்த²ன்னாம துய்ஹங் மாலாக³ந்தா⁴தீ³ஸு பத்தி ஆஸனபூஜாய பத்தி பிண்ட³பாதே பத்தி, பி⁴க்கு²ஸங்கே⁴ன துய்ஹங் பண்ணாகாரத்தா²ய மஹாமங்க³லகதா² வுத்தா, பி⁴க்கு²ஸங்கே⁴ கா³ரவேன ஏதங் முஞ்சாஹீதி மோசேதப்³போ³. ஸசே ந முஞ்சதி, தே³வதானங் ஆரோசேதப்³ப³ங் ‘‘தும்ஹே ஜானாத², அயங் அமனுஸ்ஸோ அம்ஹாகங் வசனங் ந கரோதி, மயங் பு³த்³த⁴ஆணங் கரிஸ்ஸாமா’’தி பரித்தங் காதப்³ப³ங். ஏதங் தாவ கி³ஹீனங் பரிகம்மங். ஸசே பன பி⁴க்கு² அமனுஸ்ஸேன க³ஹிதோ ஹோதி, ஆஸனானி தோ⁴வித்வா ஸப்³ப³ஸன்னிபாதங் கோ⁴ஸாபெத்வா க³ந்த⁴மாலாதீ³ஸு பத்திங் த³த்வா பரித்தங் ப⁴ணிதப்³ப³ங். இத³ங் பி⁴க்கூ²னங் பரிகம்மங்.
Parittakārako bhikkhu vihārato gharaṃ nentehi phalakāvudhehi parivāretvā netabbo. Abbhokāse nisīditvā na vattabbaṃ, dvāravātapānāni pidahitvā nisinnena āvudhahatthehi saṃparivāritena mettacittaṃ purecārikaṃ katvā vattabbaṃ. Paṭhamaṃ sikkhāpadāni gāhāpetvā sīle patiṭṭhitassa parittaṃ kātabbaṃ. Evampi mocetuṃ asakkontena vihāraṃ ānetvā cetiyaṅgaṇe nipajjāpetvā āsanapūjaṃ kāretvā dīpe jālāpetvā cetiyaṅgaṇaṃ sammajjitvā maṅgalakathā vattabbā. Sabbasannipāto ghosetabbo. Vihārassa upavane jeṭṭhakarukkho nāma hoti, tattha bhikkhusaṅgho tumhākaṃ āgamanaṃ paṭimānetīti pahiṇitabbaṃ. Sabbasannipātaṭṭhāne anāgantuṃ nāma na labbhati. Tato amanussagahitako ‘‘tvaṃ ko nāmā’’ti pucchitabbo. Nāme kathite nāmeneva ālapitabbo. Itthannāma tuyhaṃ mālāgandhādīsu patti āsanapūjāya patti piṇḍapāte patti, bhikkhusaṅghena tuyhaṃ paṇṇākāratthāya mahāmaṅgalakathā vuttā, bhikkhusaṅghe gāravena etaṃ muñcāhīti mocetabbo. Sace na muñcati, devatānaṃ ārocetabbaṃ ‘‘tumhe jānātha, ayaṃ amanusso amhākaṃ vacanaṃ na karoti, mayaṃ buddhaāṇaṃ karissāmā’’ti parittaṃ kātabbaṃ. Etaṃ tāva gihīnaṃ parikammaṃ. Sace pana bhikkhu amanussena gahito hoti, āsanāni dhovitvā sabbasannipātaṃ ghosāpetvā gandhamālādīsu pattiṃ datvā parittaṃ bhaṇitabbaṃ. Idaṃ bhikkhūnaṃ parikammaṃ.
விக்கந்தி³தப்³ப³ந்தி ஸப்³ப³ஸன்னிபாதங் கோ⁴ஸாபெத்வா அட்ட²வீஸதி யக்க²ஸேனாபதயோ கந்தி³தப்³பா³. விரவிதப்³ப³ந்தி ‘‘அயங் யக்கோ² க³ண்ஹாதீ’’திஆதீ³னி ப⁴ணந்தேன தேஹி ஸத்³தி⁴ங் கதே²தப்³ப³ங். தத்த² க³ண்ஹாதீதி ஸரீரே அதி⁴முச்சதி. ஆவிஸதீதி தஸ்ஸேவ வேவசனங். அத² வா லக்³க³தி ந அபேதீதி வுத்தங் ஹோதி. ஹேடே²தீதி உப்பன்னங் ரோக³ங் வட்³டெ⁴ந்தோ பா³த⁴தி. விஹேடே²தீதி தஸ்ஸேவ வேவசனங். ஹிங்ஸதீதி அப்பமங்ஸலோஹிதங் கரொந்தோ து³க்கா²பேதி. விஹிங்ஸதீதி தஸ்ஸேவ வேவசனங். ந முஞ்சதீதி அப்பமாத³கா³ஹோ ஹுத்வா முஞ்சிதுங் ந இச்ச²தி, ஏவங் ஏதேஸங் விரவிதப்³ப³ங்.
Vikkanditabbanti sabbasannipātaṃ ghosāpetvā aṭṭhavīsati yakkhasenāpatayo kanditabbā. Viravitabbanti ‘‘ayaṃ yakkho gaṇhātī’’tiādīni bhaṇantena tehi saddhiṃ kathetabbaṃ. Tattha gaṇhātīti sarīre adhimuccati. Āvisatīti tasseva vevacanaṃ. Atha vā laggati na apetīti vuttaṃ hoti. Heṭhetīti uppannaṃ rogaṃ vaḍḍhento bādhati. Viheṭhetīti tasseva vevacanaṃ. Hiṃsatīti appamaṃsalohitaṃ karonto dukkhāpeti. Vihiṃsatīti tasseva vevacanaṃ. Na muñcatīti appamādagāho hutvā muñcituṃ na icchati, evaṃ etesaṃ viravitabbaṃ.
283. இதா³னி யேஸங் ஏவங் விரவிதப்³ப³ங், தே த³ஸ்ஸேதுங் கதமேஸங் யக்கா²னந்திஆதி³மாஹ. தத்த² இந்தோ³ ஸோமோதிஆதீ³னி தேஸங் நாமானி. தேஸு வெஸ்ஸாமித்தோதி வெஸ்ஸாமித்தபப்³ப³தவாஸீ ஏகோ யக்கோ². யுக³ந்த⁴ரோபி யுக³ந்த⁴ரபப்³ப³தவாஸீயேவ. ஹிரி நெத்தி ச மந்தி³யோதி ஹிரி ச நெத்தி ச மந்தி³யோ ச. மணி மாணி வரோ தீ³கோ⁴தி மணி ச மாணி ச வரோ ச தீ³கோ⁴ ச. அதோ² ஸேரீஸகோ ஸஹாதி தேஹி ஸஹ அஞ்ஞோ ஸேரீஸகோ நாம. ‘‘இமேஸங் யக்கா²னங்…பே॰… உஜ்ஜா²பேதப்³ப³’’ந்தி அயங் யக்கோ² இமங் ஹேடே²தி விஹேடே²தி ந முஞ்சதீதி ஏவங் ஏதேஸங் யக்க²ஸேனாபதீனங் ஆரோசேதப்³ப³ங். ததோ தே பி⁴க்கு²ஸங்கோ⁴ அத்தனோ த⁴ம்மஆணங் கரோதி, மயம்பி அம்ஹாகங் யக்க²ராஜஆணங் கரோமாதி உஸ்ஸுக்கங் கரிஸ்ஸந்தி. ஏவங் அமனுஸ்ஸானங் ஓகாஸோ ந ப⁴விஸ்ஸதி, பு³த்³த⁴ஸாவகானங் பா²ஸுவிஹாரோ ச ப⁴விஸ்ஸதீதி த³ஸ்ஸெந்தோ ‘‘அயங் கோ² ஸா, மாரிஸ, ஆடானாடியா ரக்கா²’’திஆதி³மாஹ. தங் ஸப்³ப³ங், ததோ பரஞ்ச உத்தானத்த²மேவாதி.
283. Idāni yesaṃ evaṃ viravitabbaṃ, te dassetuṃ katamesaṃ yakkhānantiādimāha. Tattha indo somotiādīni tesaṃ nāmāni. Tesu vessāmittoti vessāmittapabbatavāsī eko yakkho. Yugandharopi yugandharapabbatavāsīyeva. Hiri netti ca mandiyoti hiri ca netti ca mandiyo ca. Maṇi māṇi varo dīghoti maṇi ca māṇi ca varo ca dīgho ca. Atho serīsako sahāti tehi saha añño serīsako nāma. ‘‘Imesaṃ yakkhānaṃ…pe… ujjhāpetabba’’nti ayaṃ yakkho imaṃ heṭheti viheṭheti na muñcatīti evaṃ etesaṃ yakkhasenāpatīnaṃ ārocetabbaṃ. Tato te bhikkhusaṅgho attano dhammaāṇaṃ karoti, mayampi amhākaṃ yakkharājaāṇaṃ karomāti ussukkaṃ karissanti. Evaṃ amanussānaṃ okāso na bhavissati, buddhasāvakānaṃ phāsuvihāro ca bhavissatīti dassento ‘‘ayaṃ kho sā, mārisa, āṭānāṭiyā rakkhā’’tiādimāha. Taṃ sabbaṃ, tato parañca uttānatthamevāti.
ஸுமங்க³லவிலாஸினியா தீ³க⁴னிகாயட்ட²கதா²ய
Sumaṅgalavilāsiniyā dīghanikāyaṭṭhakathāya
ஆடானாடியஸுத்தவண்ணனா நிட்டி²தா.
Āṭānāṭiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / தீ³க⁴னிகாய • Dīghanikāya / 9. ஆடானாடியஸுத்தங் • 9. Āṭānāṭiyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / தீ³க⁴னிகாய (டீகா) • Dīghanikāya (ṭīkā) / 9. ஆடானாடியஸுத்தவண்ணனா • 9. Āṭānāṭiyasuttavaṇṇanā
