| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৪. অতপনীযসুত্তং
4. Atapanīyasuttaṃ
৩১. ৰুত্তঞ্হেতং ভগৰতা, ৰুত্তমরহতাতি মে সুতং –
31. Vuttañhetaṃ bhagavatā, vuttamarahatāti me sutaṃ –
‘‘দ্ৰেমে, ভিক্খৰে, ধম্মা অতপনীযা। কতমে দ্ৰে? ইধ, ভিক্খৰে, একচ্চো কতকল্যাণো হোতি, কতকুসলো, কতভীরুত্তাণো, অকতপাপো, অকতলুদ্দো, অকতকিব্বিসো। সো ‘কতং মে কল্যাণ’ন্তিপি ন তপ্পতি, ‘অকতং মে পাপ’ন্তিপি ন তপ্পতি। ইমে খো, ভিক্খৰে, দ্ৰে ধম্মা অতপনীযা’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Dveme, bhikkhave, dhammā atapanīyā. Katame dve? Idha, bhikkhave, ekacco katakalyāṇo hoti, katakusalo, katabhīruttāṇo, akatapāpo, akataluddo, akatakibbiso. So ‘kataṃ me kalyāṇa’ntipi na tappati, ‘akataṃ me pāpa’ntipi na tappati. Ime kho, bhikkhave, dve dhammā atapanīyā’’ti. Etamatthaṃ bhagavā avoca. Tatthetaṃ iti vuccati –
‘‘কাযদুচ্চরিতং হিত্ৰা, ৰচীদুচ্চরিতানি চ।
‘‘Kāyaduccaritaṃ hitvā, vacīduccaritāni ca;
মনোদুচ্চরিতং হিত্ৰা, যঞ্চঞ্ঞং দোসসঞ্হিতং॥
Manoduccaritaṃ hitvā, yañcaññaṃ dosasañhitaṃ.
‘‘অকত্ৰাকুসলং কম্মং, কত্ৰান কুসলং বহুং।
‘‘Akatvākusalaṃ kammaṃ, katvāna kusalaṃ bahuṃ;
কাযস্স ভেদা সপ্পঞ্ঞো, সগ্গং সো উপপজ্জতী’’তি॥
Kāyassa bhedā sappañño, saggaṃ so upapajjatī’’ti.
অযম্পি অত্থো ৰুত্তো ভগৰতা, ইতি মে সুতন্তি। চতুত্থং।
Ayampi attho vutto bhagavatā, iti me sutanti. Catutthaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৪. অতপনীযসুত্তৰণ্ণনা • 4. Atapanīyasuttavaṇṇanā
