| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
15. ச²த்தவக்³கோ³
15. Chattavaggo
1. அதிச²த்தியத்தே²ரஅபதா³னவண்ணனா
1. Atichattiyattheraapadānavaṇṇanā
பரினிப்³பு³தே ப⁴க³வதீதிஆதி³கங் ஆயஸ்மதோ அதிச²த்தியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ அத்த²த³ஸ்ஸிஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ த⁴ரமானஸ்ஸ ப⁴க³வதோ அதி³ட்ட²த்தா பரினிப்³பு³தகாலே ‘‘அஹோ மம பரிஹானீ’’தி சிந்தெத்வா ‘‘மம ஜாதிங் ஸப²லங் கரிஸ்ஸாமீ’’தி கதஸன்னிட்டா²னோ ச²த்தாதி⁴ச²த்தங் காரெத்வா தஸ்ஸ ப⁴க³வதோ ஸரீரதா⁴துங் நிஹிததா⁴துக³ப்³ப⁴ங் பூஜேஸி. அபரபா⁴கே³ புப்ப²ச்ச²த்தங் காரெத்வா தமேவ தா⁴துக³ப்³ப⁴ங் பூஜேஸி. ஸோ தேனேவ புஞ்ஞேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ க³ஹபதிகுலே நிப்³ப³த்தோ விஞ்ஞுதங் பத்தோ ஸத்த²ரி பஸன்னோ பப்³ப³ஜித்வா கம்மட்டா²னங் க³ஹெத்வா வாயமந்தோ நசிரஸ்ஸேவ அரஹத்தங் பாபுணி.
Parinibbutebhagavatītiādikaṃ āyasmato atichattiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle ekasmiṃ kulagehe nibbatto dharamānassa bhagavato adiṭṭhattā parinibbutakāle ‘‘aho mama parihānī’’ti cintetvā ‘‘mama jātiṃ saphalaṃ karissāmī’’ti katasanniṭṭhāno chattādhichattaṃ kāretvā tassa bhagavato sarīradhātuṃ nihitadhātugabbhaṃ pūjesi. Aparabhāge pupphacchattaṃ kāretvā tameva dhātugabbhaṃ pūjesi. So teneva puññena devamanussesu saṃsaranto ubhayasampattiyo anubhavitvā imasmiṃ buddhuppāde gahapatikule nibbatto viññutaṃ patto satthari pasanno pabbajitvā kammaṭṭhānaṃ gahetvā vāyamanto nacirasseva arahattaṃ pāpuṇi.
1. ஸோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பரினிப்³பு³தே ப⁴க³வதீதிஆதி³மாஹ. தத்த² ச²த்தாதிச²த்தந்தி சா²தி³யதி ஸங்வரியதி ஆதபாதி³ந்தி ச²த்தங், ச²த்தஸ்ஸ அதிச²த்தங் ச²த்தஸ்ஸ உபரி கதச²த்தங் ச²த்தாதிச²த்தங், ச²த்தஸ்ஸ உபரூபரி ச²த்தந்தி அத்தோ². தூ²பம்ஹி அபி⁴ரோபயிந்தி தூ²பியதி ராஸிகரீயதீதி தூ²போ, அத² வா தூ²பதி தி²ரபா⁴வேன வுத்³தி⁴ங் விரூள்ஹிங் வேபுல்லங் ஆபஜ்ஜமானோ பதிட்டா²தீதி தூ²போ, தஸ்மிங் தூ²பம்ஹி மயா காரிதங் ச²த்தங் உபரூபரி ட²பனவஸேன அபி⁴ விஸேஸேன ஆரோபயிங் பூஜேஸிந்தி அத்தோ².
1. So attano pubbakammaṃ saritvā somanassajāto pubbacaritāpadānaṃ pakāsento parinibbute bhagavatītiādimāha. Tattha chattātichattanti chādiyati saṃvariyati ātapādinti chattaṃ, chattassa atichattaṃ chattassa upari katachattaṃ chattātichattaṃ, chattassa uparūpari chattanti attho. Thūpamhi abhiropayinti thūpiyati rāsikarīyatīti thūpo, atha vā thūpati thirabhāvena vuddhiṃ virūḷhiṃ vepullaṃ āpajjamāno patiṭṭhātīti thūpo, tasmiṃ thūpamhi mayā kāritaṃ chattaṃ uparūpari ṭhapanavasena abhi visesena āropayiṃ pūjesinti attho.
2. புப்ப²ச்ச²த³னங் கத்வானாதி விகஸிதேஹி ஸுக³ந்தே⁴ஹி அனேகேஹி பு²ப்பே²ஹி ச²த³னங் ச²த்துபரி விதானங் கத்வா பூஜேஸிந்தி அத்தோ². ஸேஸங் ஸப்³ப³த்த² உத்தானத்த²மேவாதி.
2.Pupphacchadanaṃ katvānāti vikasitehi sugandhehi anekehi phupphehi chadanaṃ chattupari vitānaṃ katvā pūjesinti attho. Sesaṃ sabbattha uttānatthamevāti.
அதிச²த்தியத்தே²ரஅபதா³னவண்ணனா ஸமத்தா.
Atichattiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. அதிச²த்தியத்தே²ரஅபதா³னங் • 1. Atichattiyattheraapadānaṃ
