| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১৫. ছত্তৰগ্গো
15. Chattavaggo
১. অতিছত্তিযত্থেরঅপদানৰণ্ণনা
1. Atichattiyattheraapadānavaṇṇanā
পরিনিব্বুতে ভগৰতীতিআদিকং আযস্মতো অতিছত্তিযত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে একস্মিং কুলগেহে নিব্বত্তো ধরমানস্স ভগৰতো অদিট্ঠত্তা পরিনিব্বুতকালে ‘‘অহো মম পরিহানী’’তি চিন্তেত্ৰা ‘‘মম জাতিং সফলং করিস্সামী’’তি কতসন্নিট্ঠানো ছত্তাধিছত্তং কারেত্ৰা তস্স ভগৰতো সরীরধাতুং নিহিতধাতুগব্ভং পূজেসি। অপরভাগে পুপ্ফচ্ছত্তং কারেত্ৰা তমেৰ ধাতুগব্ভং পূজেসি। সো তেনেৰ পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে গহপতিকুলে নিব্বত্তো ৰিঞ্ঞুতং পত্তো সত্থরি পসন্নো পব্বজিত্ৰা কম্মট্ঠানং গহেত্ৰা ৰাযমন্তো নচিরস্সেৰ অরহত্তং পাপুণি।
Parinibbutebhagavatītiādikaṃ āyasmato atichattiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle ekasmiṃ kulagehe nibbatto dharamānassa bhagavato adiṭṭhattā parinibbutakāle ‘‘aho mama parihānī’’ti cintetvā ‘‘mama jātiṃ saphalaṃ karissāmī’’ti katasanniṭṭhāno chattādhichattaṃ kāretvā tassa bhagavato sarīradhātuṃ nihitadhātugabbhaṃ pūjesi. Aparabhāge pupphacchattaṃ kāretvā tameva dhātugabbhaṃ pūjesi. So teneva puññena devamanussesu saṃsaranto ubhayasampattiyo anubhavitvā imasmiṃ buddhuppāde gahapatikule nibbatto viññutaṃ patto satthari pasanno pabbajitvā kammaṭṭhānaṃ gahetvā vāyamanto nacirasseva arahattaṃ pāpuṇi.
১. সো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পরিনিব্বুতে ভগৰতীতিআদিমাহ। তত্থ ছত্তাতিছত্তন্তি ছাদিযতি সংৰরিযতি আতপাদিন্তি ছত্তং, ছত্তস্স অতিছত্তং ছত্তস্স উপরি কতছত্তং ছত্তাতিছত্তং, ছত্তস্স উপরূপরি ছত্তন্তি অত্থো। থূপম্হি অভিরোপযিন্তি থূপিযতি রাসিকরীযতীতি থূপো, অথ ৰা থূপতি থিরভাৰেন ৰুদ্ধিং ৰিরূল়্হিং ৰেপুল্লং আপজ্জমানো পতিট্ঠাতীতি থূপো, তস্মিং থূপম্হি মযা কারিতং ছত্তং উপরূপরি ঠপনৰসেন অভি ৰিসেসেন আরোপযিং পূজেসিন্তি অত্থো।
1. So attano pubbakammaṃ saritvā somanassajāto pubbacaritāpadānaṃ pakāsento parinibbute bhagavatītiādimāha. Tattha chattātichattanti chādiyati saṃvariyati ātapādinti chattaṃ, chattassa atichattaṃ chattassa upari katachattaṃ chattātichattaṃ, chattassa uparūpari chattanti attho. Thūpamhi abhiropayinti thūpiyati rāsikarīyatīti thūpo, atha vā thūpati thirabhāvena vuddhiṃ virūḷhiṃ vepullaṃ āpajjamāno patiṭṭhātīti thūpo, tasmiṃ thūpamhi mayā kāritaṃ chattaṃ uparūpari ṭhapanavasena abhi visesena āropayiṃ pūjesinti attho.
২. পুপ্ফচ্ছদনং কত্ৰানাতি ৰিকসিতেহি সুগন্ধেহি অনেকেহি ফুপ্ফেহি ছদনং ছত্তুপরি ৰিতানং কত্ৰা পূজেসিন্তি অত্থো। সেসং সব্বত্থ উত্তানত্থমেৰাতি।
2.Pupphacchadanaṃ katvānāti vikasitehi sugandhehi anekehi phupphehi chadanaṃ chattupari vitānaṃ katvā pūjesinti attho. Sesaṃ sabbattha uttānatthamevāti.
অতিছত্তিযত্থেরঅপদানৰণ্ণনা সমত্তা।
Atichattiyattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১. অতিছত্তিযত্থেরঅপদানং • 1. Atichattiyattheraapadānaṃ
