| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৩. অতিনিৰাসসুত্তং
3. Atinivāsasuttaṃ
২২৩. ‘‘পঞ্চিমে , ভিক্খৰে, আদীনৰা অতিনিৰাসে। কতমে পঞ্চ? বহুভণ্ডো হোতি বহুভণ্ডসন্নিচযো, বহুভেসজ্জো হোতি বহুভেসজ্জসন্নিচযো, বহুকিচ্চো হোতি বহুকরণীযো ব্যত্তো কিংকরণীযেসু, সংসট্ঠো ৰিহরতি গহট্ঠপব্বজিতেহি অননুলোমিকেন গিহিসংসগ্গেন, তম্হা চ আৰাসা পক্কমন্তো সাপেক্খো পক্কমতি। ইমে খো, ভিক্খৰে, পঞ্চ আদীনৰা অতিনিৰাসে।
223. ‘‘Pañcime , bhikkhave, ādīnavā atinivāse. Katame pañca? Bahubhaṇḍo hoti bahubhaṇḍasannicayo, bahubhesajjo hoti bahubhesajjasannicayo, bahukicco hoti bahukaraṇīyo byatto kiṃkaraṇīyesu, saṃsaṭṭho viharati gahaṭṭhapabbajitehi ananulomikena gihisaṃsaggena, tamhā ca āvāsā pakkamanto sāpekkho pakkamati. Ime kho, bhikkhave, pañca ādīnavā atinivāse.
‘‘পঞ্চিমে, ভিক্খৰে, আনিসংসা সমৰত্থৰাসে। কতমে পঞ্চ? ন বহুভণ্ডো হোতি ন বহুভণ্ডসন্নিচযো, ন বহুভেসজ্জো হোতি ন বহুভেসজ্জসন্নিচযো, ন বহুকিচ্চো হোতি ন বহুকরণীযো ন ব্যত্তো কিংকরণীযেসু, অসংসট্ঠো ৰিহরতি গহট্ঠপব্বজিতেহি অননুলোমিকেন গিহিসংসগ্গেন, তম্হা চ আৰাসা পক্কমন্তো অনপেক্খো পক্কমতি। ইমে খো, ভিক্খৰে, পঞ্চ আনিসংসা সমৰত্থৰাসে’’তি। ততিযং।
‘‘Pañcime, bhikkhave, ānisaṃsā samavatthavāse. Katame pañca? Na bahubhaṇḍo hoti na bahubhaṇḍasannicayo, na bahubhesajjo hoti na bahubhesajjasannicayo, na bahukicco hoti na bahukaraṇīyo na byatto kiṃkaraṇīyesu, asaṃsaṭṭho viharati gahaṭṭhapabbajitehi ananulomikena gihisaṃsaggena, tamhā ca āvāsā pakkamanto anapekkho pakkamati. Ime kho, bhikkhave, pañca ānisaṃsā samavatthavāse’’ti. Tatiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৩-৪. অতিনিৰাসসুত্তাদিৰণ্ণনা • 3-4. Atinivāsasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-১০. পঠমদীঘচারিকসুত্তাদিৰণ্ণনা • 1-10. Paṭhamadīghacārikasuttādivaṇṇanā
