| Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya |
๓. อตินิวาสสุตฺตํ
3. Atinivāsasuttaṃ
๒๒๓. ‘‘ปญฺจิเม , ภิกฺขเว, อาทีนวา อตินิวาเสฯ กตเม ปญฺจ? พหุภโณฺฑ โหติ พหุภณฺฑสนฺนิจโย, พหุเภสโชฺช โหติ พหุเภสชฺชสนฺนิจโย, พหุกิโจฺจ โหติ พหุกรณีโย พฺยโตฺต กิํกรณีเยสุ, สํสโฎฺฐ วิหรติ คหฎฺฐปพฺพชิเตหิ อนนุโลมิเกน คิหิสํสเคฺคน, ตมฺหา จ อาวาสา ปกฺกมโนฺต สาเปโกฺข ปกฺกมติฯ อิเม โข, ภิกฺขเว, ปญฺจ อาทีนวา อตินิวาเสฯ
223. ‘‘Pañcime , bhikkhave, ādīnavā atinivāse. Katame pañca? Bahubhaṇḍo hoti bahubhaṇḍasannicayo, bahubhesajjo hoti bahubhesajjasannicayo, bahukicco hoti bahukaraṇīyo byatto kiṃkaraṇīyesu, saṃsaṭṭho viharati gahaṭṭhapabbajitehi ananulomikena gihisaṃsaggena, tamhā ca āvāsā pakkamanto sāpekkho pakkamati. Ime kho, bhikkhave, pañca ādīnavā atinivāse.
‘‘ปญฺจิเม, ภิกฺขเว, อานิสํสา สมวตฺถวาเสฯ กตเม ปญฺจ? น พหุภโณฺฑ โหติ น พหุภณฺฑสนฺนิจโย, น พหุเภสโชฺช โหติ น พหุเภสชฺชสนฺนิจโย, น พหุกิโจฺจ โหติ น พหุกรณีโย น พฺยโตฺต กิํกรณีเยสุ, อสํสโฎฺฐ วิหรติ คหฎฺฐปพฺพชิเตหิ อนนุโลมิเกน คิหิสํสเคฺคน, ตมฺหา จ อาวาสา ปกฺกมโนฺต อนเปโกฺข ปกฺกมติฯ อิเม โข, ภิกฺขเว, ปญฺจ อานิสํสา สมวตฺถวาเส’’ติฯ ตติยํฯ
‘‘Pañcime, bhikkhave, ānisaṃsā samavatthavāse. Katame pañca? Na bahubhaṇḍo hoti na bahubhaṇḍasannicayo, na bahubhesajjo hoti na bahubhesajjasannicayo, na bahukicco hoti na bahukaraṇīyo na byatto kiṃkaraṇīyesu, asaṃsaṭṭho viharati gahaṭṭhapabbajitehi ananulomikena gihisaṃsaggena, tamhā ca āvāsā pakkamanto anapekkho pakkamati. Ime kho, bhikkhave, pañca ānisaṃsā samavatthavāse’’ti. Tatiyaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๓-๔. อตินิวาสสุตฺตาทิวณฺณนา • 3-4. Atinivāsasuttādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๑-๑๐. ปฐมทีฆจาริกสุตฺตาทิวณฺณนา • 1-10. Paṭhamadīghacārikasuttādivaṇṇanā
