| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៣. អតិនិវាសសុត្តំ
3. Atinivāsasuttaṃ
២២៣. ‘‘បញ្ចិមេ , ភិក្ខវេ, អាទីនវា អតិនិវាសេ។ កតមេ បញ្ច? ពហុភណ្ឌោ ហោតិ ពហុភណ្ឌសន្និចយោ, ពហុភេសជ្ជោ ហោតិ ពហុភេសជ្ជសន្និចយោ, ពហុកិច្ចោ ហោតិ ពហុករណីយោ ព្យត្តោ កិំករណីយេសុ, សំសដ្ឋោ វិហរតិ គហដ្ឋបព្ពជិតេហិ អននុលោមិកេន គិហិសំសគ្គេន, តម្ហា ច អាវាសា បក្កមន្តោ សាបេក្ខោ បក្កមតិ។ ឥមេ ខោ, ភិក្ខវេ, បញ្ច អាទីនវា អតិនិវាសេ។
223. ‘‘Pañcime , bhikkhave, ādīnavā atinivāse. Katame pañca? Bahubhaṇḍo hoti bahubhaṇḍasannicayo, bahubhesajjo hoti bahubhesajjasannicayo, bahukicco hoti bahukaraṇīyo byatto kiṃkaraṇīyesu, saṃsaṭṭho viharati gahaṭṭhapabbajitehi ananulomikena gihisaṃsaggena, tamhā ca āvāsā pakkamanto sāpekkho pakkamati. Ime kho, bhikkhave, pañca ādīnavā atinivāse.
‘‘បញ្ចិមេ, ភិក្ខវេ, អានិសំសា សមវត្ថវាសេ។ កតមេ បញ្ច? ន ពហុភណ្ឌោ ហោតិ ន ពហុភណ្ឌសន្និចយោ, ន ពហុភេសជ្ជោ ហោតិ ន ពហុភេសជ្ជសន្និចយោ, ន ពហុកិច្ចោ ហោតិ ន ពហុករណីយោ ន ព្យត្តោ កិំករណីយេសុ, អសំសដ្ឋោ វិហរតិ គហដ្ឋបព្ពជិតេហិ អននុលោមិកេន គិហិសំសគ្គេន, តម្ហា ច អាវាសា បក្កមន្តោ អនបេក្ខោ បក្កមតិ។ ឥមេ ខោ, ភិក្ខវេ, បញ្ច អានិសំសា សមវត្ថវាសេ’’តិ។ តតិយំ។
‘‘Pañcime, bhikkhave, ānisaṃsā samavatthavāse. Katame pañca? Na bahubhaṇḍo hoti na bahubhaṇḍasannicayo, na bahubhesajjo hoti na bahubhesajjasannicayo, na bahukicco hoti na bahukaraṇīyo na byatto kiṃkaraṇīyesu, asaṃsaṭṭho viharati gahaṭṭhapabbajitehi ananulomikena gihisaṃsaggena, tamhā ca āvāsā pakkamanto anapekkho pakkamati. Ime kho, bhikkhave, pañca ānisaṃsā samavatthavāse’’ti. Tatiyaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៣-៤. អតិនិវាសសុត្តាទិវណ្ណនា • 3-4. Atinivāsasuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១-១០. បឋមទីឃចារិកសុត្តាទិវណ្ណនា • 1-10. Paṭhamadīghacārikasuttādivaṇṇanā
