| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၃. အတိနိဝာသသုတ္တံ
3. Atinivāsasuttaṃ
၂၂၃. ‘‘ပဉ္စိမေ , ဘိက္ခဝေ, အာဒီနဝာ အတိနိဝာသေ။ ကတမေ ပဉ္စ? ဗဟုဘဏ္ဍော ဟောတိ ဗဟုဘဏ္ဍသန္နိစယော, ဗဟုဘေသဇ္ဇော ဟောတိ ဗဟုဘေသဇ္ဇသန္နိစယော, ဗဟုကိစ္စော ဟောတိ ဗဟုကရဏီယော ဗ္ယတ္တော ကိံကရဏီယေသု, သံသဋ္ဌော ဝိဟရတိ ဂဟဋ္ဌပဗ္ဗဇိတေဟိ အနနုလောမိကေန ဂိဟိသံသဂ္ဂေန, တမ္ဟာ စ အာဝာသာ ပက္ကမန္တော သာပေက္ခော ပက္ကမတိ။ ဣမေ ခော, ဘိက္ခဝေ, ပဉ္စ အာဒီနဝာ အတိနိဝာသေ။
223. ‘‘Pañcime , bhikkhave, ādīnavā atinivāse. Katame pañca? Bahubhaṇḍo hoti bahubhaṇḍasannicayo, bahubhesajjo hoti bahubhesajjasannicayo, bahukicco hoti bahukaraṇīyo byatto kiṃkaraṇīyesu, saṃsaṭṭho viharati gahaṭṭhapabbajitehi ananulomikena gihisaṃsaggena, tamhā ca āvāsā pakkamanto sāpekkho pakkamati. Ime kho, bhikkhave, pañca ādīnavā atinivāse.
‘‘ပဉ္စိမေ, ဘိက္ခဝေ, အာနိသံသာ သမဝတ္ထဝာသေ။ ကတမေ ပဉ္စ? န ဗဟုဘဏ္ဍော ဟောတိ န ဗဟုဘဏ္ဍသန္နိစယော, န ဗဟုဘေသဇ္ဇော ဟောတိ န ဗဟုဘေသဇ္ဇသန္နိစယော, န ဗဟုကိစ္စော ဟောတိ န ဗဟုကရဏီယော န ဗ္ယတ္တော ကိံကရဏီယေသု, အသံသဋ္ဌော ဝိဟရတိ ဂဟဋ္ဌပဗ္ဗဇိတေဟိ အနနုလောမိကေန ဂိဟိသံသဂ္ဂေန, တမ္ဟာ စ အာဝာသာ ပက္ကမန္တော အနပေက္ခော ပက္ကမတိ။ ဣမေ ခော, ဘိက္ခဝေ, ပဉ္စ အာနိသံသာ သမဝတ္ထဝာသေ’’တိ။ တတိယံ။
‘‘Pañcime, bhikkhave, ānisaṃsā samavatthavāse. Katame pañca? Na bahubhaṇḍo hoti na bahubhaṇḍasannicayo, na bahubhesajjo hoti na bahubhesajjasannicayo, na bahukicco hoti na bahukaraṇīyo na byatto kiṃkaraṇīyesu, asaṃsaṭṭho viharati gahaṭṭhapabbajitehi ananulomikena gihisaṃsaggena, tamhā ca āvāsā pakkamanto anapekkho pakkamati. Ime kho, bhikkhave, pañca ānisaṃsā samavatthavāse’’ti. Tatiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၃-၄. အတိနိဝာသသုတ္တာဒိဝဏ္ဏနာ • 3-4. Atinivāsasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၁၀. ပဌမဒီဃစာရိကသုတ္တာဒိဝဏ္ဏနာ • 1-10. Paṭhamadīghacārikasuttādivaṇṇanā
