| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
6. அதீதக்க²ந்தா⁴தி³கதா²
6. Atītakkhandhādikathā
1. நஸுத்தஸாத⁴னகதா²வண்ணனா
1. Nasuttasādhanakathāvaṇṇanā
297. ‘‘அதீதங் அனாக³தங் பச்சுப்பன்ன’’ந்தி அயங் காலவிபா⁴க³பரிச்சி²ன்னோ வோஹாரோ த⁴ம்மானங் தங் தங் அவத்தா²விஸேஸங் உபாதா³ய பஞ்ஞத்தோ. த⁴ம்மோ ஹி ஸகிச்சக்க²ணே பச்சுப்பன்னோ, ததோ புப்³பே³ அனாக³தோ, பச்சா² அதீதோதி வுத்தோவாயமத்தோ². தத்த² யதி³பி த⁴ம்மா அனிச்சதாய அனவட்டி²தா, அவத்தா² பன தேஸங் யதா²வுத்தா வவத்தி²தாதி தது³பாதா³னா காலபஞ்ஞத்திபி வவத்தி²தா ஏவ. ந ஹி அதீதாதி³ அனாக³தாதி³பா⁴வேன வோஹரீயதி, க²ந்தா⁴தி³பஞ்ஞத்தி பன அனபெக்கி²தகாலவிஸேஸா. தீஸுபி ஹி காலேஸு ரூபக்க²ந்தோ⁴ ரூபக்க²ந்தோ⁴வ, ததா² ஸேஸா க²ந்தா⁴ ஆயதனதா⁴துயோ ச. ஏவமவட்டி²தே யஸ்மா பரவாதீ³ ‘‘அத்தீ²’’தி இமங் பச்சுப்பன்னநியதங் வோஹாரங் அதீதானாக³தேஸுபி ஆரோபேதி, தஸ்மா ஸோ அத்³த⁴ஸங்கரங் கரோதி. பரமத்த²தோ அவிஜ்ஜமானே விஜ்ஜமானே கத்வா வோஹரதீதி ததோ விவேசேதுங் ‘‘அதீதங் க²ந்தா⁴’’திஆதி³கா அயங் கதா² ஆரத்³தா⁴.
297. ‘‘Atītaṃ anāgataṃ paccuppanna’’nti ayaṃ kālavibhāgaparicchinno vohāro dhammānaṃ taṃ taṃ avatthāvisesaṃ upādāya paññatto. Dhammo hi sakiccakkhaṇe paccuppanno, tato pubbe anāgato, pacchā atītoti vuttovāyamattho. Tattha yadipi dhammā aniccatāya anavaṭṭhitā, avatthā pana tesaṃ yathāvuttā vavatthitāti tadupādānā kālapaññattipi vavatthitā eva. Na hi atītādi anāgatādibhāvena voharīyati, khandhādipaññatti pana anapekkhitakālavisesā. Tīsupi hi kālesu rūpakkhandho rūpakkhandhova, tathā sesā khandhā āyatanadhātuyo ca. Evamavaṭṭhite yasmā paravādī ‘‘atthī’’ti imaṃ paccuppannaniyataṃ vohāraṃ atītānāgatesupi āropeti, tasmā so addhasaṅkaraṃ karoti. Paramatthato avijjamāne vijjamāne katvā voharatīti tato vivecetuṃ ‘‘atītaṃ khandhā’’tiādikā ayaṃ kathā āraddhā.
யஸ்மா பன ருப்பனாதி³ஸபா⁴வே அதீதாதி³பே⁴த³பி⁴ன்னே த⁴ம்மே ஏகஜ்ஜ²ங் க³ஹெத்வா தத்த² ராஸட்ட²ங் உபாதா³ய க²ந்த⁴பஞ்ஞத்தி, சக்கு²ரூபாதீ³ஸு காரணாதி³அத்த²ங் ஸுஞ்ஞதட்ட²ஞ்ச உபாதா³ய ஆயதனபஞ்ஞத்தி தா⁴துபஞ்ஞத்தி ச, தஸ்மா ஸா அத்³த⁴த்தயஸாதா⁴ரணா, ந அதீதாதி³பஞ்ஞத்தி விய அத்³த⁴விஸேஸாதி⁴ட்டா²னாதி ஆஹ ‘‘க²ந்தா⁴தி³பா⁴வாவிஜஹனதோ அதீதானாக³தான’’ந்தி. தே பனேதே அதீதாதி³கே க²ந்தா⁴தி³கே விய ஸபா⁴வத⁴ம்மதோ ஸஞ்ஜானந்தோ பரவாதீ³ ‘‘அத்தீ²’’தி படிஜானாதீதி ஆஹ ‘‘அதீதானாக³தானங் அத்தி²தங் இச்ச²ந்தஸ்ஸா’’தி. ஸேஸமெத்த² யங் வத்தப்³ப³ங், தங் ஹெட்டா² வுத்தனயமேவ.
Yasmā pana ruppanādisabhāve atītādibhedabhinne dhamme ekajjhaṃ gahetvā tattha rāsaṭṭhaṃ upādāya khandhapaññatti, cakkhurūpādīsu kāraṇādiatthaṃ suññataṭṭhañca upādāya āyatanapaññatti dhātupaññatti ca, tasmā sā addhattayasādhāraṇā, na atītādipaññatti viya addhavisesādhiṭṭhānāti āha ‘‘khandhādibhāvāvijahanato atītānāgatāna’’nti. Te panete atītādike khandhādike viya sabhāvadhammato sañjānanto paravādī ‘‘atthī’’ti paṭijānātīti āha ‘‘atītānāgatānaṃ atthitaṃ icchantassā’’ti. Sesamettha yaṃ vattabbaṃ, taṃ heṭṭhā vuttanayameva.
‘‘தயோமே, பி⁴க்க²வே, நிருத்திபதா²’’தி ஸுத்தங் நிருத்திபத²ஸுத்தங். தத்த² ஹி பச்சுப்பன்னஸ்ஸேவ அத்தி²பா⁴வோ வுத்தோ, ந அதீதானாக³தானங். தேன வுத்தங் ‘‘அத்தி²தாய வாரிதத்தா’’தி. யதி³ ஏவங் ‘‘அத்தி², பி⁴க்க²வே, நிப்³பா³ன’’ந்தி இத³ங் கத²ந்தி? தங் ஸப்³ப³தா³ உபலத்³தி⁴தோ வுத்தங் நிச்சஸபா⁴வஞாபனத்த²ங் அஸங்க²தத⁴ம்மஸ்ஸ, இத⁴ பன ஸங்க²தத⁴ம்மானங் க²ணத்தயஸமங்கி³தாய அத்தி²பா⁴வோ ந ததோ புப்³பே³ பச்சா² சாதி பஞ்ஞாபனத்த²ங் ‘‘யங், பி⁴க்க²வே, ரூபங்…பே॰… ந தஸ்ஸ ஸங்கா² ப⁴விஸ்ஸதீ’’தி வுத்தங். ஏதேன ‘‘அத்தீ²’’தி ஸமஞ்ஞாய அனுபாதா³னதோ அதீதங் அனாக³தங் பரமத்த²தோ நத்தீ²தி த³ஸ்ஸிதங் ஹோதி. இமினாவூபாயேனாதி ‘‘க²ந்தா⁴தி³பா⁴வாவிஜஹனதோ’’தி ஏவங் வுத்தேன ஹேதுனா. உபபத்திஸாத⁴னயுத்தி ஹி இத⁴ ‘‘உபாயோ’’தி வுத்தா.
‘‘Tayome, bhikkhave, niruttipathā’’ti suttaṃ niruttipathasuttaṃ. Tattha hi paccuppannasseva atthibhāvo vutto, na atītānāgatānaṃ. Tena vuttaṃ ‘‘atthitāya vāritattā’’ti. Yadi evaṃ ‘‘atthi, bhikkhave, nibbāna’’nti idaṃ kathanti? Taṃ sabbadā upaladdhito vuttaṃ niccasabhāvañāpanatthaṃ asaṅkhatadhammassa, idha pana saṅkhatadhammānaṃ khaṇattayasamaṅgitāya atthibhāvo na tato pubbe pacchā cāti paññāpanatthaṃ ‘‘yaṃ, bhikkhave, rūpaṃ…pe… na tassa saṅkhā bhavissatī’’ti vuttaṃ. Etena ‘‘atthī’’ti samaññāya anupādānato atītaṃ anāgataṃ paramatthato natthīti dassitaṃ hoti. Imināvūpāyenāti ‘‘khandhādibhāvāvijahanato’’ti evaṃ vuttena hetunā. Upapattisādhanayutti hi idha ‘‘upāyo’’ti vuttā.
நஸுத்தஸாத⁴னகதா²வண்ணனா நிட்டி²தா.
Nasuttasādhanakathāvaṇṇanā niṭṭhitā.
2. ஸுத்தஸாத⁴னகதா²வண்ணனா
2. Suttasādhanakathāvaṇṇanā
298. ஏதே த⁴ம்மாதி ஏதே க²ந்த⁴ஆயதனதா⁴துத⁴ம்மா. ஸுத்தாஹரணந்தி நிருத்திபத²ஸுத்தாஹரணங். நேஸந்தி அதீதானாக³தானங்.
298. Ete dhammāti ete khandhaāyatanadhātudhammā. Suttāharaṇanti niruttipathasuttāharaṇaṃ. Nesanti atītānāgatānaṃ.
ஸுத்தஸாத⁴னகதா²வண்ணனா நிட்டி²தா.
Suttasādhanakathāvaṇṇanā niṭṭhitā.
அதீதக்க²ந்தா⁴தி³கதா²வண்ணனா நிட்டி²தா.
Atītakkhandhādikathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / 6. அதீதக்க²ந்தா⁴தி³கதா² • 6. Atītakkhandhādikathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 6. அதீதக்க²ந்தா⁴தி³கதா² • 6. Atītakkhandhādikathā
