| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৬. অতীতক্খন্ধাদিকথা
6. Atītakkhandhādikathā
১. নসুত্তসাধনকথাৰণ্ণনা
1. Nasuttasādhanakathāvaṇṇanā
২৯৭. ইদানি ‘‘অতীতং খন্ধা’’তিআদিকথা হোতি। তত্থ খন্ধাদিভাৰাৰিজহনতো অতীতানাগতানং অত্থিতং ইচ্ছন্তস্স অতীতং খন্ধাতি পুচ্ছা পরৰাদিস্স, অতীতস্স খন্ধসঙ্গহিতত্তা আমন্তাতি পটিঞ্ঞা সকৰাদিস্স। পুন অতীতং নত্থীতি পুচ্ছা পরৰাদিস্স, তস্স নিরুত্তিপথসুত্তেন অত্থিতায ৰারিতত্তা পটিক্খেপো সকৰাদিস্স। আযতনধাতুপুচ্ছাসুপি অনাগতপঞ্হেসুপি পচ্চুপ্পন্নেন সদ্ধিং সংসন্দিত্ৰা অনুলোমপটিলোমতো আগতপঞ্হেসুপি ‘‘অতীতং রূপ’’ন্তিআদিপঞ্হেসুপি ইমিনাৰুপাযেন অত্থো ৰেদিতব্বো।
297. Idāni ‘‘atītaṃ khandhā’’tiādikathā hoti. Tattha khandhādibhāvāvijahanato atītānāgatānaṃ atthitaṃ icchantassa atītaṃ khandhāti pucchā paravādissa, atītassa khandhasaṅgahitattā āmantāti paṭiññā sakavādissa. Puna atītaṃnatthīti pucchā paravādissa, tassa niruttipathasuttena atthitāya vāritattā paṭikkhepo sakavādissa. Āyatanadhātupucchāsupi anāgatapañhesupi paccuppannena saddhiṃ saṃsanditvā anulomapaṭilomato āgatapañhesupi ‘‘atītaṃ rūpa’’ntiādipañhesupi imināvupāyena attho veditabbo.
২. সুত্তসাধনৰণ্ণনা
2. Suttasādhanavaṇṇanā
২৯৮. সুত্তসাধনে পন ন ৰত্তব্বন্তি পুচ্ছা সকৰাদিস্স। তত্থ নত্থি চেতেতি নত্থি চ এতে ধম্মাতি অত্থো। খন্ধাদিভাৰে সতি নত্থিতং অনিচ্ছন্তস্স আমন্তাতি পটিঞ্ঞা পরৰাদিস্স, অথ নেসং নত্থিভাৰসাধনত্থং সুত্তাহরণং সকৰাদিস্স। দুতিযপুচ্ছাপি পরৰাদিস্স, পটিঞ্ঞা সকৰাদিস্স, সুত্তাহরণং পরৰাদিস্স। তং পন নেসং খন্ধাদিভাৰমেৰ সাধেতি, ন অত্থিভাৰন্তি আহটম্পি অনাহটসদিসমেৰাতি।
298. Suttasādhane pana na vattabbanti pucchā sakavādissa. Tattha natthi ceteti natthi ca ete dhammāti attho. Khandhādibhāve sati natthitaṃ anicchantassa āmantāti paṭiññā paravādissa, atha nesaṃ natthibhāvasādhanatthaṃ suttāharaṇaṃ sakavādissa. Dutiyapucchāpi paravādissa, paṭiññā sakavādissa, suttāharaṇaṃ paravādissa. Taṃ pana nesaṃ khandhādibhāvameva sādheti, na atthibhāvanti āhaṭampi anāhaṭasadisamevāti.
অতীতং খন্ধাতিআদিকথাৰণ্ণনা।
Atītaṃ khandhātiādikathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / ৬. অতীতক্খন্ধাদিকথা • 6. Atītakkhandhādikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৬. অতীতক্খন্ধাদিকথা • 6. Atītakkhandhādikathā
